Santiago 5 - Jiñi Tsiji' bʌ Wen T'añ cha'añ Estudio

T'añ ti' contra wen chumulo' bʌ wiñicob

¹ U'binla am bʌ ca'bʌl la' chu'bʌañ, cha'lenla uq'uel, cha'lenla oñel cha'añ jiñi wocol mu' bʌ caj i tajetla.

² Oc'beñix la' chu'bʌañ, c'uxbilix la' pislel ti' chʌñil.

³ Jiñi oro yic'ot plata ta'ajemix, i ta' mi' yʌc' ti tsictiyel la' mul, mi caj i jisan la' bʌc'tal che' bajche' c'ajc. Tsa' la' bajñel loto la' chu'bʌañ cha'añ ili cojix bʌ q'uiñ tac.

⁴ La' wilan c'am woli ti t'añ jiñi taq'uiñ, come ma'añic tsa' la' tojo' x'e'telob la' cha'añ tsa' bʌ i melbeyetla la' we'tel, tsa' c'oti i t'añ la' waj e'tel ti' chiquin lac Yum, jiñi i Yum panchan yic'ot pañimil.

⁵ Jatetla am bʌ ca'bʌl la' chu'bʌañ wʌ' ti pañimil, tijicña tsa' la' ñusa q'uiñ. Ma'añic tsa' la' tiq'ui la' bʌ. Tsa' la' jujp'esa la' pusic'al cha'añ jiñi q'uiñ che' mi caj la' tsʌnsʌntel.

⁶ Tsa' la' jop'be i mul jiñi toj bʌ, tsa' la' tsʌnsa, ma'añic tsi' letsa i t'añ ti la' tojlel.

Cha'lenla pijt yic'ot cha'lenla oración

⁷ Jiñi cha'añ quermañujob, cha'lenla pijt ti' ñʌch'tʌlel la' pusic'al jinto mi' tilel lac Yum. Ña'tanla jiñi xpac', jal mi' pijtan i yʌc'bal i lum, ti' ñʌch'tʌlel i pusic'al mi' pijtan jiñi ñaxan bʌ ja'al yic'ot jiñi wi'il bʌ cha'añ mi' colel i pʌc'ʌb.

⁸ Che'ʌch yom mi la' cha'len pijt ti' ñʌch'tʌlel la' pusic'al, xuc'chocon la' pusic'al come lʌc'ʌlix jiñi q'uiñ che' mi' tilel lac Yum.

⁹ Quermañujob, mach la' cha'len wulwul t'añ ti' contra la' pi'ʌlob, ame pʌjyiquetla cha'añ mi la' mel la' bʌ; awilan wa'alix ti ti' otot la Caj mel mulil.

¹⁰ Quermañujob, ña'tanla jiñi x'alt'añob tsa' bʌ i su'buyob t'añ ti' c'aba' lac Yum. Tsi' pʌsbeyetla bajche' yom mi la' ñusan wocol. Tsi' cha'leyob pijt ti' ñʌch'tʌlel i pusic'al. Tsi' ñusayob i tic'lʌntel.

¹¹ La cujil tijicñayobix cha'añ tsi' cuchuyob wocol. Tsa'ix la' wu'bi bajche' tsi' cuchu wocol ti uts'at jiñi Job, tsa'ix la' wu'bi chuqui tsi' mele lac Yum ti' tojlel Job che' ti' yujtibal, come uts i pusic'al lac Yum, wen yujil p'untaya.

¹² Jiñi cha'añ quermañujob, jiñʌch ñumen uts'at bʌ che' ma'añic mi la' lon taj ti t'añ panchan mi pañimil mi yam bʌ t'añ cha'añ mi la' wa'chocon la' t'añ, jasʌl jach mi la' wʌl che'ʌch yom, o mach che'ic yom, ame la' taj la' mul ti' tojlel Dios.

¹³ ¿Am ba majqui woli' yu'bin wocol? La' i pejcan Dios. ¿Am ba majqui tijicña? La' i c'ʌyin Dios.

¹⁴ ¿Am ba majqui woli ti c'am-ʌjel? La' i pʌy jiñi wa'chocobilo' bʌ ti' tojlel xñopt'añob mu' bʌ i tempañob i bʌ cha'añ mi' pejcʌbeñob Dios; mi caj i boñob ti olivo aceite ti' c'aba' lac Yum.

¹⁵ Mi woli lac ñop ti lac pusic'al che' mi lac pejcan Dios, mi caj i coltañ jiñi xc'am-ʌjel, lac Yum mi caj i c'oq'uesan, mi tsi' cha'le mulil, mux i ñusʌbentel.

¹⁶ Su'bu la' bʌ che' añ la' mul ti' tojlel la' pi'ʌlob, taja la' bʌ ti oración cha'añ mi la' lajmesʌntel. Añ ca'bʌl i c'ʌjñibal i yoración jiñi tojo' bʌ, ca'bʌlʌch i p'ʌtʌlel.

¹⁷ Wiñicʌch Elías lajal bajche'onla, ti jump'ejl i pusic'al tsi' pejca Dios cha'añ ma'añic mi' tilel ja'al, ojlil i chʌmp'ejl ja'b ma'añic tsa' yajli ja'al ti lum.

¹⁸ Tsi' cha' pejca Dios, tsi' choco tilel ja'al, jiñi lum tsi' cha' ac'ʌ ti colel pʌc'ʌbʌl.

¹⁹ Quermañujob, mi añ juntiquil ti la' tojlel tsa' bʌ i cʌyʌ isujmlel Dios, yom mi' cha' toj-esan yam bʌ,

²⁰ come jiñi mu' bʌ i toj-esan xmulil am bʌ i sajtemal woli' coltañ cha'añ mi' taj i cuxtʌlel cha'añ ma'añic mi' jilel, woli' yʌc' ti ñusʌntel ca'bʌl mulil.