Santiago 4 - Jiñi Tsiji' bʌ Wen T'añ cha'añ Estudio

Jiñi mu' bʌ i c'uxbin i cha'añ bʌ pañimil

¹ ¿Baqui tilem jiñi guerra tac yic'ot leto am bʌ ti la' tojlel? ¿Mach ba cha'añic i colosojlel la' pusic'al woli bʌ i cha'len leto yic'ot la ña'tʌbal? Come mi' tejchel guerra ti la' pusic'al che' cha'p'ejl jax la' ña'tʌbal.

² Añ i ts'i'lel la' wut cha'añ chu'bʌañʌl, mi la' cha'len tsʌnsa, tsʌytsʌyña la' pusic'al cha'añ i wenlel la' pi'ʌlob pero ma'añic mi la' taj woli bʌ la' ña'tan; mi la' cha'len leto yic'ot guerra, pero ma'añic mi la' taj chuqui la' wom come ma'añic mi la' c'ajtiben Dios.

³ Mi la' c'ajtin, pero ma'añic mi la' taj, come mach tojic bajche' mi la' c'ajtin, la' wom jach la' jisan cha'añ i colosojlel la' pusic'al.

⁴ Lajaletla bajche' x'ixic mu' bʌ i cʌy i ñoxi'al cha'añ mi' c'uxbin i contra. ¿Mach ba la' wujilic jiñi mu' bʌ i c'uxbin i cha'añ bʌ pañimil, mi' contrajin Dios? Jiñi yom bʌ i c'uxbintel ti pañimil, woli' yotsan i bʌ ti' contra Dios.

⁵ Ña'tanla isujm mi' su'beñonla i Ts'ijbujel: “Dios tsi' chumchoco ti lac pusic'al jiñi Espíritu mu' bʌ i cʌntañonla ame sojquiconla”.

⁶ Ca'bʌl mi' yʌq'ueñonla lac p'ʌtʌlel cha'añ mi' mʌjlel lac cha'añ, jiñi cha'añ mi' yʌl: “Dios mi' contrajin jiñi mu' bʌ i chañ-esañob i bʌ, pero mi' p'ʌt-esan jiñi mu' bʌ i peq'uesañob i bʌ”, che'en.

⁷ Aq'uen la' bʌ Dios; pʌsʌ la' bʌ ti' contra xi'ba, che' jiñi mi caj i puts'tañetla.

⁸ Lʌc'tesan la' bʌ ba'añ Dios, che' jiñi mi caj i lʌc'tesan i bʌ ba'añetla. Xmulilob, poco la' c'ʌb, jatetla cha'chajp jax bʌ la' pusic'al sʌc-esan la' bʌ.

⁹ Mele la' pusic'al, cha'lenla uq'uel, uc'tan la' mul. La' ujtiquetla ti tse'ñal. La' pʌntʌyic ti uq'uel; jiñi tijicñʌyel la' pusic'al, la' pʌntʌyic ti la' ch'ijiyemlel.

¹⁰ Mele la' bʌ ti pec' ti' wut lac Yum. Che' jiñi mi caj i yʌq'ueñetla la' ñuclel.

¿Majquiyet cha'añ ma' q'uelben i melbal yaño' bʌ?

¹¹ Quermañujob, mach yomic mi la' pʌc' ti jontolil la' pi'ʌlob. Jiñi mu' bʌ i pʌc' ti jontolil i pi'ʌlob yic'ot jiñi mu' bʌ i tsajiben i ñusa q'uiñ i pi'ʌl woli' contrajin jiñi mandar, woli' yʌl ti' pusic'al mach uts'atic jiñi mandar. Pero mi wola' wʌl ti a pusic'al mach uts'atic jiñi mandar, mach tojetic ti' tojlel. Wola' bajñel wa'chocon a bʌ ti meloñel ti' tojlel.

¹² Añ juntiquil jach x'ac' mandar am bʌ i p'ʌtʌlel cha'añ mi' coltañonla cha'añ mi' jisañonla. ¿Chuqui i ye'tel ma' bajñel otsan a bʌ ti xmeloñel ti' tojlel a pi'ʌl?

Mach la' wujilic chuqui mi' caj ti ujtel ijc'ʌl

¹³ ¡U'binla jatetla! Mu' bʌ la' wʌl: Wʌle o mi ijc'ʌl mi caj lac majlel ti tejclum, ya'i mi caj lac jalijel jump'ejl ja'b cha'añ mi lac cha'len mʌñoñel yic'ot choñoñel, mi caj lac taj ca'bʌl taq'uiñ,

¹⁴ mach la' wujilic chuqui mi' caj ti ujtel ijc'ʌl mi bajche' mi caj la' wujtel, isujm, lajal la' cuxtʌlel bajche' i yowix ja', poj tsiquil jumuc', ti wi'il mi sʌc jilel.

¹⁵ Ñumen uts'at mi la' wʌl: Mi che'ʌch yom lac Yum, che'ʌch mi caj la cajñel, yic'ot che'ʌch mi caj lac mel.

¹⁶ Pero che' mi la' bajñel ña'tan chuqui mi caj la' mel, woli la' chañ-esan la' bʌ, che' mi la' bajñel su'b la' bʌ ti ñuc, añ la' mul.

¹⁷ Majqui jach mi' ña'tan chuqui uts'at yom melol pero mi mach che'ic mi' mel, añʌch i mul.