Santiago 3 - Jiñi Tsiji' bʌ Wen T'añ cha'añ Estudio

La cac'

¹ Quermañujob, mach yomic mi la' bʌc' otsan la' bʌ ti xcʌntesa, come la' wujil ñumen mi caj lac toj lac mul che' bʌ xcʌntesajonla.

² Ti lac pejtelel ca'bʌl mi lac taj lac sajtemal ti' tojlel lac pi'ʌlob, mi añ juntiquil wiñic mach bʌ añic mi taj i sajtemal ti t'añ, jiñʌch toj bʌ wiñic. Yujil i tic'ol i bʌ ti pejtelel chuqui mi' mel.

³ La' wujil mi la cotsʌben i frenojlel i yej caballo cha'añ mi' jac'beñonla, che' jiñi mi' yumañonla ti pejtelel i cuctal.

⁴ Ña'tanla wen colem barco, pero che' ñijcʌbil i cha'añ p'ʌtʌl bʌ ic', mi' toj-esʌntel majlel ti biq'uit bʌ i toj-esʌjib baqui jach yom majlel jiñi xñijca barco.

⁵ Che'ʌch ja'el la cac', anquese wen ch'och'oc jax ti lac bʌc'tal, pero wen ch'ejl mi' pʌs i bʌ ti' su'bol ñuc tac bʌ, anquese che' jach ya' wistʌl i ñich c'ajc, mi tsi' chucu colem te'el mi' laj pulel.

⁶ Jiñi la cac' lajalʌch bajche' c'ajc, wen yujil jontolil, mi' bi'b-esan pejtelel lac bʌc'tal; ch'oyol ti infierno i jontolil la cac', mi' mejlel i xic'beñonla jontolil cha'añ mi' jisañonla ti c'ajc.

⁷ Mi mejlel la cuts-esan i bʌl mate'el, mut, lucum, yic'ot i chʌñil mar come ti' chajp ti' chajp tsa' uts-esʌnti cha'añ wiñicob.

⁸ Pero ma'añic juntiquil wiñic mu' bʌ mejlel i yuts-esan i yac', jontol la cac', mach yujilic tijq'uel, but'ul ti venenojlel yujil bʌ tsʌnsa.

⁹ Ti la cac' mi lac ch'ujutesan Dios lac Tat, ti la cac' mi lac p'aj wiñicob x'ixicob melbilo' bʌ ti' yejtal Dios.

¹⁰ Ti' yej wiñic mi' loq'uel uts bʌ t'añ yic'ot p'ajoñel. Quermañujob, mach che'ic yom bajche' jiñi.

¹¹ Ti jump'ejl jach i loq'uib ja', ¿mu' ba i loq'uel tsaj bʌ ja' yic'ot ch'aj bʌ?

¹² Quermañujob, ¿mu' ba lac tuc' olivo ti higuera te'? ¿Mu' ba lac tuc' higo ti yʌq'uil ts'usub? Che' ja'el, ma'añic i loq'uib ja' mu' bʌ i yʌc' ch'aj bʌ ja' yic'ot tsaj bʌ.

Jiñi lac ña'tʌbal tilem bʌ ti Dios

¹³ Majqui jach añ ca'bʌl i ña'tʌbal ti la' tojlel, la' i tsictesan ti wen bʌ i melbal, yom pec' mi' mel i bʌ che' mi' mel chuqui wen yic'ot wen bʌ i ña'tʌbal.

¹⁴ Pero mi tsʌytsʌyña la' pusic'al cha'añ i wenlel la' pi'ʌlob, mi la' wujil a'leya ti la' pusic'al, mach la' chañ-esan la' bʌ, mach la' cha'len lot ti' contra isujmlel.

¹⁵ Come ili ña'tʌbalʌl mach ch'oyolic ti Dios, pero tilem ti pañimil, yic'ot tilem ti' colosojlel lac pusic'al yic'ot ti xi'ba.

¹⁶ Ya' ba' tsʌytsʌyñayob i pusic'al wiñicob, ba' ñijcʌbilob cha'añ i ts'i'lel i wut, ya'i mi' t'oxob i bʌ ti leto yic'ot ti jujunchajp jontolil.

¹⁷ Pero jiñi wen bʌ lac ña'tʌbal ch'oyol bʌ ti chañ ñaxan mi' pʌs i bʌ ti' sʌclel lac pusic'al yic'ot i yutslel lac t'añ, mi' yʌc' ti bujt'el lac pusic'al ti p'untaya cha'añ mi lac mel pejtelel chuqui wen ti pejtelel lac pusic'al, mach yujilic lo'loya.

¹⁸ Jiñi mu' bʌ i ñʌch'chocoñob leto ti' ñʌch'tʌlel i pusic'al woli' wejch'uñob majlel pac' yilal mu' bʌ caj i yʌc' i wut cha'añ toj mi la cajñel.