Santiago 2 - Jiñi Tsiji' bʌ Wen T'añ cha'añ Estudio

Mach yomic jelchojc mi la' c'uxbin la' bʌ

¹ Quermañujob, jatetla mu' bʌ la' ñop lac Yum Jesucristo i Yum Panchan, mach yomic jelchojc jach mi la' c'uxbin la' pi'ʌlob.

² Ya' ba' mi la' tempan la' bʌ, mi tsa' ochi wen chumul bʌ wiñic lʌpʌl bʌ i cha'añ i mʌtc'ʌb melbil bʌ ti oro yic'ot wen bʌ i pislel, mi tsa' ochi ja'el yam bʌ mach bʌ añic i chu'bʌañ lʌpʌl bʌ i cha'añ tsuculix bʌ i pislel,

³ mach weñic che' ñumen mi la' c'uxbin jiñi wen bʌ i pislel. Mi tsa' la' su'be buchtʌl ba' wen uts'at, pero mi tsa' la' su'be jiñi mach bʌ añic i chu'bʌañ: Wa'i' ya'i mi mach awomic wa'tʌl, buchi' ti lum lʌc'ʌl ti coc, mi che'etla,

⁴ añ la' mul che' jiñi. Jelchojc jach woli la' c'uxbin wiñicob. Jontol bajche' woli la' bajñel ña'tan.

⁵ C'uxbibilo' bʌ quermañujob, u'binla. Dios tsi' yajca jiñi mach bʌ añobic i chu'bʌañ ti pañimil cha'añ mi' wen tajob i wenlel che' mi' ñopob, come mi caj i yajñelob ti' yumʌntel Dios yic'ot pejtelel mu' bʌ i c'uxbiñob Dios che' bajche' albil i cha'añ.

⁶ Pero jatetla woli la' ts'a'len jiñi mach bʌ añic i chu'bʌañ. ¿Majqui mi' tic'lañetla? ¿Majqui mi' pʌyetla majlel ti melobʌjʌl? Jiñobʌch wen chumulo' bʌ.

⁷ ¿Mach ba jiñobic mu' bʌ i p'ajbeñob i c'aba' Cristo ba' mi lac taj lac wenlel?

⁸ Mi' isujm woli la' ts'ʌctesan ili c'ax ñuc bʌ mandar ti' Ts'ijbujel Dios: “C'uxbin a pi'ʌlob che' bajche' ma' bajñel c'uxbin a bʌ”. Mi woli la' jac' ili mandar toj woli la' mel.

⁹ Pero mi jelchojc jach woli la' c'uxbin la' pi'ʌlob añ la' mul, che' jiñi xñusa mandaretla ti' tojlel ili mandar.

¹⁰ Majqui jach mi' ts'ita' ñusan jump'ejl mandar anquese mi' laj jac' jiñi yan tac bʌ, añ i mul ti' tojlel pejtelel jiñi mandar cha'añ tsi' ñusa jump'ejl.

¹¹ Come Dios tsi' yʌlʌ: “Mach a cha'len ts'i'lel”, tsi' yʌlʌ ja'el: “Mach a cha'len tsʌnsa”. Mi ma'añic tsa' cha'le ts'i'lel pero mi tsa' cha'le tsʌnsa, xñusa mandaret che' jiñi.

¹² Ti' pejtelel chuqui mi la' mel yic'ot chuqui mi la' wʌl, ña'tanla mi caj la' mel la' bʌ ti' tojlel Cristo tsa' bʌ i yʌc'ʌyonla ti colel cha'añ mi lac jac'ben i mandar.

¹³ Jiñi mach bʌ yujilic p'untaya, ma'añic mi caj i p'untʌntel ti' yorajlel meloñel, jiñi yujil bʌ p'untaya tijicña mi caj i yu'bin che' ti' yorajlel meloñel.

Xuc'tʌlel mi ma'añic wen bʌ lac melbal ma'añic i c'ʌjñibal

¹⁴ Quermañujob, ¿chuqui i c'ʌjñibal mi añ majqui mi' lon al woli' ñop Dios che' ma'añic mi' pʌs wen bʌ i melbal? ¿Mu' ba i taj i coltʌntel ti ñopbal?

¹⁵ Mi a cʌñʌyʌch juntiquil p'ump'un bʌ mach bʌ añic i pislel mi i bʌl i ñʌc' ti jujump'ejl q'uiñ,

¹⁶ mi añ juntiquil tsa' bʌ i su'be: Cucu ti' ñʌch'tʌlel a pusic'al, q'uixñesan a bʌ, la' ñaj-aquet, pero ma'añic tsa' la' wʌq'ue chuqui yom cha'añ i bʌc'tal ¿chuqui mi caj la' taj che' jiñi?

¹⁷ Che' jiñi ma'añic woli la' ñop Dios ti isujm come to'ol t'añ jach mi ma'añic wen bʌ la' melbal.

¹⁸ Añ majqui mi caj i su'beñet: Jatet wola' ñop Dios cha'añ ma' taj a coltʌntel, pero joñon woli c pʌs wen bʌ c melbal. ¿Bajche' mi caj a pʌsbeñon ti isujm mi wola' ñop che' ma'añic wen bʌ a melbal? Pero wen tsiquil woli c ñop Dios che' mic pʌsbeñet wen bʌ c melbal, che'en.

¹⁹ Jatet ma' ñop cha'añ juntiquil jach Dios, isujm juntiquil jach, pero jiñi xi'bajob mi' ñopob ja'el anquese tsiltsilñayob ti bʌq'uen.

²⁰ Tontojet, ¿Mach ba a wujilic lolom jach mi lac to'ol ñop Dios che' ma'añic wen bʌ lac melbal?

²¹ ¿Mach ba añic tsa' q'uejli ti toj lac tat Abraham cha'añ ti wen bʌ i melbal che' bʌ tsi' yʌc'ʌ ti chʌmel i yalobil i c'aba' Isaac ya' ti' pulʌntib i majtañ Dios?

²² Ña'tan che' jiñi, mach cojic jach tsi' ñopo Dios pero tsi' mele chuqui wen. Tsiquil uts'at tsi' ñopo Dios come tsi' pʌsʌ i ñopbal yic'ot wen bʌ i melbal.

²³ Tsa' ts'ʌctiyi che' bajche' tsi' yʌlʌ i ts'ijbujel Dios: “Abraham tsi' ñopo Dios, jiñi cha'añ tsa' q'uejli ti toj”, Dios tsi' pejca ti' pi'ʌl.

²⁴ Ña'tanla che' jiñi, juntiquil mi' sujbel ti' toj ti' tojlel Dios che' mi' mel chuqui wen, mach cojic jach che' mi to'ol ñop Dios.

²⁵ Che' ja'el jiñi Rahab, jiñi tsa' bʌ i cha'le ca'bʌl ts'i'lel, tsa' q'uejli ti' toj ti' tojlel Dios che' bʌ tsi' pʌyʌ ochel jiñi xmucu tsajiyajob, che' bʌ tsi' chocoyob sujtel ti yam bʌ bij.

²⁶ Che' loq'uemix lac ch'ujlel ti lac bʌc'tal chʌmeñoñixla, che' ja'el mi to'ol t'añ jach woli lac ñop Dios che' ma'añic wen bʌ lac melbal, chʌmeñoñixla yu'bil come ma'añic mi lac ñop ti' isujm.