Santiago 1 - Jiñi Tsiji' bʌ Wen T'añ cha'añ Estudio

I yutslel i t'añ Santiago

¹ Santiagojon, x'e'telon i cha'añ Dios yic'ot lac Yum Jesucristo, mic ts'ijbubeñetla ili juñ i p'olbalet bʌ la jiñi lajchʌntiquil i yalobil Israel, pujquemet bʌ la ti pejtelel pañimil; mi cʌq'ueñetla cortesía.

Lac ña'tʌbal tilem ti Dios

² Quermañujob, yom wen tijicñayetla che' mi' tilel wocol ti' chajp ti' chajp cha'añ mi' yilʌbeñetla la' pusic'al,

³ come la' wujil, mi xuc'ul mi la' ñop Dios che' mi la' ñusan wocol, mi' yʌc' ti p'ojlel i p'ʌtʌlel la' pusic'al ti pijt.

⁴ La' ts'ʌctiyic i p'ʌtʌlel la' pusic'al ti pijt cha'añ uts'at mi la' wajñel, cha'añ mi' ts'ʌctiyel i wenlel la' pusic'al; che' jiñi ma'añic chuqui añ to yom la' cha'añ.

⁵ Mi añ to yom la' ña'tʌbal c'ajtibenla Dios che' jiñi mi caj la wʌq'uentel, che' mi la' c'ajtiben mi caj i yʌq'ueñetla ti' yonlel i ña'tʌbal come wen uts i pusic'al.

⁶ Pero c'ajtinla ti' xuc'tʌlel la pusic'al, mach yomic tilebixel la' pusic'al ame lajaleticla bajche' wʌlʌcña bʌ ja' mu' bʌ i ñijcan ic', mi' jats' tac i bʌ ya' ti mar.

⁷ Mi che' bajche' jiñi, ña'tanla che' jiñi ma'añic chuqui mi caj la' wʌq'uentel ti lac Yum.

⁸ Come jiñi cha'chajp jax bʌ i pusic'al mach junsumic chuqui mu' bʌ i ña'tan, mi cha'len cajcaj xʌmbal ti pejtelel i bijlel.

⁹ Jiñi xñopt'añ mach bʌ añic i chu'bʌañ ti pañimil, la' ñuc-ac i pusic'al come Dios mi caj i yʌq'ueñ i ñuclel.

¹⁰ Pero jiñi wen chumul bʌ wiñic la' ñuc-ac i pusic'al cha'añ peq'uesʌbil ti' tojlel Dios, come pejtelel chu'bʌañʌl mi' caj ti jilel che' bajche' i ñich pimel.

¹¹ Che' wen ticʌw q'uiñ mi' tiquesan jam, mi' p'ajtel i ñich pimel, mi' jilel i t'ojlʌwel. Che'ʌch ja'el mi caj i chʌmel jiñi rico bʌ wiñic, quepel mi' cʌy i ye'tel.

Lac ch'ejlel ti lac wocol

¹² Tijicña jiñi mach bʌ añic mi' jac' i pʌyol ti mulil, come che' ñumeñix i yilʌbentel i pusic'al, mi caj i yʌq'uentel i cuxtʌlel i wenta corona che' bajche' albil i cha'añ Dios, Dios mi caj i yʌq'ueñob pejtelel mu' bʌ i c'uxbiñob.

¹³ Che' añ majqui woli' pʌjyel ti mulil, mach yomic mi la' wʌl tilem ti Dios, come Dios mach mejlic i pʌjyel ti mulil, ma'añic ba' ora mi' su'ben mulil wiñicob,

¹⁴ che' añ majqui mi taj i pʌyol ti mulil, woli i bajñel jac'ben i colosojlel i pusic'al mu' bʌ i pʌy, mu' bʌ i xic'.

¹⁵ Jiñi cha'añ i colosojlel i pusic'al mi' colel ti' pusic'al, mi' ñijcan ti mulil, che' tsa'ix p'ojli mulil mi' yʌc' ti chʌmel.

¹⁶ C'uxbibilo' bʌ quermañujob, mach mi la' jac' la' lotintel.

¹⁷ Pejtelel wen bʌ lac majtañ yic'ot pejtelel uts'at bʌ lac majtañ mi' tilel ti Dios, mi' ju'bel tilel ti lac Tat, tsa' bʌ i mele ec' ti pejtelel, ma'añic mi' q'uextʌyel i pusic'al, yic'ot mach yujilic yʌjñel mi ts'ita'ic.

¹⁸ Che' ja'el tsi' yʌq'ueyonla lac ñop isujmlel i t'añ cha'añ mi lac cha' ilan pañimil che' bajche' yom i pusic'al; tsi' cha' meleyonla ti yʌx alʌl bʌ i yalobil ti' tojlel yaño' bʌ mu' bʌ caj i ñopob.

Chʌn melela chuqui mi' yʌl jiñi wen t'añ

¹⁹ Jiñi cha'añ c'uxbibil bʌ quermañujob, yom p'ip'etla che' mi la' ñʌch'tan t'añ, mach yomic ora mi la' cha'len t'añ, mach yomic mi la' bʌc' mich'an

²⁰ come i mich'ajel wiñicob ma'añic mi' coltañonla lac mel chuqui toj che' bajche' yom Dios.

²¹ Jiñi cha'añ cʌyʌla pejtelel chuqui tac bi'bi' yic'ot pejtelel jontolil. Ti' yutslel la' pusic'al jac'ʌla jiñi wen t'añ tsa' bʌ ochi ti la' pusic'al che' bajche' pac', come jiñʌch mu' bʌ mejlel i coltañ la' ch'ujlel.

²² Chʌn melela chuqui mi' yʌl jiñi wen t'añ, mach yomic to'ol che' jach mi la' wu'bin, mach mi la' lon ña'tan woli la' ñop mi ma'añic woli la' jac'.

²³ Come jiñi mu' bʌ i ñʌch'tan jiñi wen t'añ, mi ma'añic mi' jac', lajalʌch bajche' juntiquil mu' bʌ i q'uel i wut ti espejo,

²⁴ che' mi' yujtel i q'uel i wut, mi' majlel, mi' bʌc' ñajʌyel ti' pusic'al bajche' yilal i wut.

²⁵ Mach che'ic jiñi mu' bʌ i wen q'uel jiñi wen bʌ mandar, come jiñi mandar mi' yʌc' ti colel jiñi ñup'ulo' bʌ; majqui jach mi' wen q'uel, ma'añic mi' ñajʌyel ti' pusic'al chuqui tsi' yu'bi, pero mi' jac' che' bajche' yom. Jiñi wiñic mi' taj i wenlel ti Dios ti pejtelel chuqui mi' mel.

²⁶ Jiñi mu' bʌ i lon ña'tan uts'at woli' ch'ujutesan Dios che' ma'añic mi' tic' i yac', woli jach i bajñel lotin i bʌ, lolom jach i ñopbal.

²⁷ Jiñi mu' bʌ i ch'ujutesan Dios ti isujm, mach bʌ añic i bi'bi'lel ti' tojlel Dios lac Tat, jiñʌch iliyi: Mu' bʌ i coltañ me'ba' alobob yic'ot me'ba' x'ixicob che' ti yorajlel wocol, mi' chʌcʌ q'uel i bʌ cha'añ ma'añic mi mel che' bajche' jiñi año' bʌ ti pañimil.