Romanos 9 - Jiñi Tsiji' bʌ Wen T'añ cha'añ Estudio

I yajcʌntel israelob

¹ Mic su'b chuqui isujm ti Cristo, ma'añic mic cha'len lot; che'ʌch mi' su'beñon c pusic'al cʌntesʌbil bʌ cha'añ jiñi Ch'ujul bʌ Espíritu.

² Wen ch'ijiyem c pusic'al, ca'bʌl mic cha'len ña'tʌbal ti pejtelel ora,

³ come uts'at muq'uic c chojquel ti tojmulil cha'añ mij coltañ c pi'ʌlob, come c pi'ʌl lojon c bʌ, junlajal c ñojte'el lojon.

⁴ Israelobʌch, tsa' pʌjyiyob cha'añ mi' yochelob ti' yalobil Dios, tsa' tsictiyi i ñuclel Dios ti' tojlelob, tsi' mele Dios xuc'ul bʌ t'añ yic'otob, tsa' aq'uentiyob jiñi mandar, tsa' pʌsbentiyob bajche' yom mi' ch'ujutesañob Dios, tsa' su'bentiyob chuqui mi caj i yʌq'ueñtelob.

⁵ Abraham, Isaac yic'ot Jacob jiñobʌch i ñojte'elob, come ya'i tsa' tili Cristo ti' tojlelob. Cristo jiñʌch lac Dios am bʌ ti' wenta pejtelel chuqui tac añ, la' sujbic i ñuclel ti pejtelel ora. Amén.

⁶ Mach yomic mi la cʌl cha'añ ma'añic mi' ts'ʌctiyel i t'añ Dios, come mach i cha'añobic Dios ti pejtelel i p'olbal Israel.

⁷ Mach cha'añic i p'olbalob Abraham laj i yalobilob ti pejtelel, come ts'ijbubil: “I p'olbal Isaac jiñobʌch a walobilob”.

⁸ Tsiquil che' jiñi: Mach i yalobilobic Dios pejtelel i p'olbal Abraham, jiñi jach i yalobilob Abraham tsa' bʌ tiliyob che' bajche' tsi' wʌn alʌ Dios,

⁹ come jiñi t'añ tsa' bʌ su'benti Abraham jiñʌch iliyi: “Ti yam bʌ ja'b cha' talon, Sara mi caj i yʌc' ti pañimil ch'itoñ bʌ i yalobil”, che'en.

¹⁰ Pero mach cojic jach jiñi, che' ja'el Rebeca, tsi' cʌntʌbe i yalobil Isaac lac ñojte'el.

¹¹ Che' bʌ cʌntʌbil to i yalobilob, che' bʌ maxto añic tsi' cha'leyob chuqui wen yic'ot chuqui jontol (cha'añ mi' yujtel che' bajche' tsi' wʌn ña'ta Dios, mi' yajcan majqui jach yom, mach cha'añic wen bʌ i melbal mi' yajcan, pero cha'añ yom i pʌy),

¹² Dios tsi' su'be Rebeca: “Jiñi ascuñʌl bʌ, mi caj i melben i ye'tel jiñi ijts'iñʌl bʌ”, che'en.

¹³ Che' bajche' ts'ijbubil: “Tsa' j c'uxbi Jacob, tsa' c ts'a'le Esaú”, che'en.

¹⁴ ¿Chuqui yom mi lac cʌl, che' jiñi? ¿Mach ba tojic Dios? Toj cu,

¹⁵ come Dios tsi' su'be Moisés: “Mi caj c pʌsben i yutslel c pusic'al jiñi com bʌ c pʌsben, mi caj c p'untan jiñi com bʌ c p'untan”, che'en.

¹⁶ Tsiquil che' jiñi mach cha'añic che' yom i pusic'al wiñic, mi cha'añic woli' wersa sajcan i p'untʌntel, mi' p'untʌntel cha'añ che'ʌch yom Dios,

¹⁷ come i Ts'ijbujel Dios mi' yʌl chuqui tsa' su'benti faraón: “Tsa' c wa'chocoyet ti rey cha'añ mic pʌs c p'ʌtʌlel ti a tojel, cha'añ mi' sujbel j c'aba' ti pejtelel pañimil”, che'en Dios.

¹⁸ Tsiquil che' jiñi, Dios mi' p'untan majqui yom i p'untan, mi' tsʌts-esʌben i pusic'al majqui yom i tsʌts-esʌben.

¹⁹ Che' jiñi mi caj a wʌl: ¿Chucoch mi' chʌn ña'tan lac mul, che' jiñi? Come ¿majqui mi mejlel i tic' chuqui yom i mel Dios?

²⁰ Pero jatet wiñic ¿majquiyet cha'añ ma' cha'len t'añ ti' tojlel Dios bajche' jiñi? Jiñi vaso melbil bʌ ti lum, ¿mu' ba caj i su'ben jiñi tsa' bʌ i mele: Chucoch che' tsa' meleyon che' bajche' iliyi?

²¹ Jiñi xmel uc'um, ¿mach ba mejlic i c'ʌn jiñi jach bʌ oc'ol cha'añ mi' mel jump'ejl uc'um mu' bʌ i c'ʌjñel cha'añ chuqui uts'at, yic'ot yam bʌ uc'um mu' bʌ i c'ʌjñel cha'añ jiñi mach bʌ weñic?

²² ¿Chuqui che' jiñi? Anquese yom Dios i pʌs i mich'ajel yic'ot i p'ʌtʌlel, wen jal tsi' cuchbeyob i mul jiñi tsa' bʌ i techbeyob i mich'ajel mu' bʌ caj i jisʌntelob.

²³ Cha'añ mi' yʌc' ti tsictiyel pejtelel i ñuclel ti' tojlel jiñi p'untʌbilo' bʌ i cha'añ, wen jal tsi' cuchbeyob i mul jiñi yajcʌbilo' bʌ cha'añ mi' tajob i ñuclel.

²⁴ I pi'ʌlonla come pʌybilonla i cha'añ ja'el. Mach jiñic jach judíojob pʌybilob, pero jiñi gentilob ja'el.

²⁵ Che' ja'el tsi' yʌlʌ ti' juñ Oseas: “Mi caj c pejcañob tic tejclum jiñi mach bʌ c tejclumobic ti yam bʌ ora, mi caj c pejcan ti c'uxbibil bʌ c cha'añ jiñi mach bʌ c'uxbibilic ti yam bʌ ora.

²⁶ Mi caj i yujtel ya' ba' tsa' su'bentiyob: Jatetla mach c tejclumeticla. Ya'i mi caj i pejcʌntelob ti yalobil jiñi cuxul bʌ Dios”, che'en.

²⁷ Che' ja'el Isaías tsi' yʌlʌ ti' tojlel israelob: “Anquese lajal ti tsicol i yalobilob Israel bajche' i ji'il mar, lamital jach mi caj i coltʌntelob,

²⁸ come lac Yum ti orajach mi caj i cha'len meloñel ti toj ti pejtelel pañimil”, che'en.

²⁹ Che' bajche' tsi' wʌn alʌ Isaías: “Machic jax tsi' cʌybeyonla lac p'olbalob jiñi i Yum Panchan yic'ot Pañimil, lajal tsa' jisʌntiyonla bajche' jiñi año' bʌ ti Sodoma yic'ot ti Gomorra”, che'en.

Mi laj q'uejlel ti toj che' mi lac ñop

³⁰ ¿Chuqui yom mi lac cʌl, che' jiñi? Jiñi gentilob mach bʌ añic tsi' sʌclayob toj bʌ i pusic'al, tsa' mejli tajob toj bʌ i pusic'al, cha'añ tsi' ñopoyob.

³¹ Jiñi israelob tsa' bʌ i ñopo i tajob toj bʌ i pusic'al cha'añ ti' jac'ol mandar, ma'añic tsa' mejli i tajob.

³² ¿Chucoch? Come tsi' sʌclayob toj bʌ i pusic'al cha'añ ti' jac'ol [mandar], mach cha'añic tsi' ñopoyob; jiñi cha'añ tsa' yajliyob ti jiñi xajlel ba' mi' jats'ob i yoc,

³³ che' bajche' ts'ijbubil: “Awilan, mi cʌc' ti Sión jump'ejl Xajlel ba' mi' jats'ob i yoc wiñicob x'ixicob, yic'ot colem Xajlel mu' bʌ i yʌc'ob ti yajlel. Jiñi mu' bʌ i ñop jiñi Xajlel ma'añic mi caj i yu'bin quisin”, che'en.