Romanos 8 - Jiñi Tsiji' bʌ Wen T'añ cha'añ Estudio

Cuxulonla ti Espíritu

¹ Jiñi cha'añ ma'añix tojmulil ti' tojlelob jiñi año' bʌ ti Cristo Jesús, [jiñi mach bʌ añix mi' chʌn jac'beñob i tsuculel i pusic'al, pero mi' jac'beñob jiñi Espíritu,]

² come i p'ʌtʌlel jiñi Espíritu mu' bʌ i yʌq'ueñonla laj cuxtʌlel ti Cristo Jesús, tsi' loc'sayonla ti' p'ʌtʌlel mulil mu' bʌ i yʌc'onla ti chʌmel.

³ Jiñi mandar ma'añic tsa' mejli i coltañonla, come c'uñonla cha'añ lac tsucul pusic'al. Dios tsi' choco tilel i Yalobil lajal bʌ i bʌc'tal che' bajche' lac cha'añ am bʌ i pʌyol ti mulil; tsi' yʌc'ʌ i bʌ ti chʌmel cha'añ mi' toj lac mul, cha'añ mi' jilel i p'ʌtʌlel mulil am bʌ ti lac bʌc'tal.

⁴ Tsa' chʌmi cha'añ mi' yʌq'ueñonla lac mel chuqui tac toj che' bajche' yom jiñi mandar, cha'añ mi lac cha'len xʌmbal che' bajche' yom jiñi Espíritu, mach che'ic bajche' yom lac tsucul pusic'al.

⁵ Come jiñi mu' bʌ i jac'beñob i tsucul pusic'al mi' chʌn ña'tañob chuqui yom i tsucul pusic'al; pero jiñi mu' bʌ i jac'beñob jiñi Espíritu mi' chʌn ña'tañob chuqui yom jiñi Espíritu.

⁶ Come jiñi mu' bʌ i chʌn jac'ben i tsucul pusic'al mi caj i chʌmel; pero jiñi mu' bʌ i chʌn jac'ben jiñi Espíritu mi' taj i cuxtʌlel yic'ot i ñʌch'tʌlel i pusic'al.

⁷ Jiñi mu' bʌ i chʌn ña'tan chuqui yom i tsucul pusic'al, woli' contrajin Dios, come ma'añic mi' jac'ben i mandar Dios, yic'ot ma'añic mi' mejlel i jac'ben,

⁸ come jiñi mu' bʌ i jac'ben i tsucul pusic'al mach mejlic i mel chuqui uts'at ti' wut Dios.

⁹ Pero jatetla mach chʌn añetixla ti' p'ʌtʌlel la' tsucul pusic'al, añetla ti' wenta Espíritu mi woli' yajñel i yEspíritu Dios ti la' pusic'al. Jiñi mach bʌ añic i cha'añ i yEspíritu Cristo, mach i cha'añic Dios.

¹⁰ Pero mi añ Cristo ti la' pusic'al, anquese mi' chʌmel la' bʌc'tal cha'añ mulil, jiñi Espíritu mi' yʌq'ueñetla la' cuxtʌlel cha'añ tsa' q'uejliyetla ti toj.

¹¹ Mi ya' chumul ti jatetla i yEspíritu Dios tsa' bʌ i teche ch'ojyel Jesús ba'añ chʌmeño' bʌ; jiñi Dios tsa' bʌ i teche ch'ojyel Cristo Jesús ba'añ chʌmeño' bʌ, mi caj i yʌq'ueñ i cuxtʌlel la' bʌc'tal yujil bʌ chʌmel cha'añ ti yEspíritu chumul bʌ ti la' pusic'al.

¹² Jiñi cha'añ hermañujob, añ ti lac wenta cha'añ mi lac jac'ben lac Yum, mach yomix mi lac jac'ben lac tsucul pusic'al cha'añ mi lac mel chuqui yom lac bʌc'tal.

¹³ Mi woli la' mel bajche' yom la' tsucul pusic'al, mi caj la' chʌmel; pero mi ti' p'ʌtʌlel Espíritu mi la' wʌc' ti chʌmel i melbal la' tsucul pusic'al, cuxul mi caj la' wajñel.

¹⁴ Pejtelel mu' bʌ i toj-esʌntelob majlel cha'añ i yEspíritu Dios, jiñobʌch i yalobilob Dios.

¹⁵ Ma'añic tsa' aq'uentiyetla espíritu mu' bʌ i yotsañetla ti mozo cha'añ mi la' cha' ajñel ti' bʌq'uen; Dios tsi' yʌq'ueyetla i yEspíritu, cha'añ mi la' wochel ti yalobil, jiñi cha'añ mi la cʌl: ¡Abba, c Tat!

¹⁶ Jiñi Espíritu mi' su'beñonla ti lac pusic'al cha'añ i yalobilonla Dios.

¹⁷ Mi i yalobilonla Dios, añ chuqui mi caj la cʌq'uentel ti Dios, mi tsa' la cu'bi wocol temel yic'ot Cristo, lac tem cha'añ jach la quic'ot Cristo chuqui mi caj la cʌq'uentel, cha'añ temel mi lac taj lac ñuclel yic'ot Cristo.

¹⁸ Cujil ti isujm cha'añ mach mejlic ti lajintel jiñi wocol am bʌ wʌle yic'ot i ñuclel Cristo mu' bʌ caj i tsictiyel ti joñonla.

¹⁹ Come pejtelel melbil tac bʌ ti pañimil woli ti pijt jinto mi' pʌstʌlob i yalobilob Dios.

²⁰ Come pejtelel melbil tac bʌ, tsa' asiyi yic'ot wocol, mach cha'añic che' bajche' bajñel yom, pero che'ʌch yom Dios cha'añ mi' wersa pijtan jiñi ñumen uts'at tac bʌ mu' bʌ caj i tilel.

²¹ Jiñi cha'añ pejtelel jiñi melbil tac bʌ mi caj i yʌjq'uel ti colel ja'el ti' p'ʌtʌlel chʌmel, mi caj i yochel ti libre cha'añ tijicña mi' yajñel yic'ot i ñuclel i yalobilob Dios.

²² La cujil cha'añ pejtelel jiñi melbil tac bʌ ti pañimil, woli ti ajacñiyel, woli ti bajq'uel yilal che' bajche' x'ixic mu' bʌ caj i yilan pañimil i yalobil.

²³ Mach cojic jach jiñi melbil tac bʌ woli ti ajacñiyel, pero joñonla ja'el, tsa'ix bʌ aq'uentiyonla ñaxan bʌ lac majtañ, jiñʌch jiñi Espíritu. Woliyonla ti ajacñiyel ti lac pusic'al, come woliyonla ti pijt jinto mi' tsictiyel i yalobilonla Dios che' mi la cʌq'uentel tsiji' bʌ lac bʌc'tal,

²⁴ come che' bʌ coltʌbilonla, tsa' caji lac pijtan; mi tsa'ix laj q'uele jiñi woli bʌ lac pijtan, mach chʌn pijtayajix che' jiñi; come jiñi tsa'ix bʌ laj q'uele, ¿chuqui toj mi lac chʌn pijtʌben?

²⁵ Mi woli lac pijtan jiñi maxto bʌ laj q'uele, la' lac pijtan ti' xuc'tʌlel lac pusic'al.

²⁶ Che' ja'el jiñi Espíritu mi' coltañonla che' c'uñonla, come mach la cujilic bajche' yom mi lac pejcan Dios; pero jiñi Espíritu mi' c'ajtiben Dios ti wocol t'añ chuqui yom ti lac tojlel yic'ot t'añ mach bʌ mejlic la' cʌl joñonla.

²⁷ Pero Dios mu' bʌ i wen q'uel lac pusic'al yujil chuqui yom jiñi Espíritu, come mi' c'ajtiben Dios cha'añ mi' coltañ i cha'año' bʌ che' bajche' yom Dios.

Mi' wen mʌjlel lac cha'añ

²⁸ La cujil mi' c'ʌn Dios pejtelel chuqui tac mi yujtel cha'añ i wenlel jiñi mu' bʌ i c'uxbiñob Dios, jiñobʌch jiñi pʌybilo' bʌ i cha'añ che' bajche' tsi' wʌn ña'ta.

²⁹ Come Dios tsi' wʌn yajca i cha'año' bʌ, tsi' wʌn wa'chocoyob cha'añ mi' yʌq'ueñtelob i pusic'al lajal bʌ che' bajche' i pusic'al i Yalobil, cha'añ mi' taj ca'bʌl i yijts'iñob jiñi ascuñʌl bʌ.

³⁰ Jiñi tsa' bʌ i wʌn yajcayob, tsi' pʌyʌyob ja'el; jiñi tsa' bʌ i pʌyʌyob, Dios tsi' q'ueleyob ti toj ja'el; jiñi tsa' bʌ i q'ueleyob ti toj, tsi' yʌq'ueyob i ñuclel ja'el.

³¹ ¿Chuqui yom mi lac cʌl che' jiñi? Mi woli' coltañonla Dios, ¿majqui mi mejlel i contrajiñonla?

³² Dios ma'añic tsi' p'unta i Yalobil, tsi' yʌc'ʌ ti chʌmel cha'añonla ti lac pejtelel, ¿mach ba muq'uic i yʌq'ueñonla yic'ot Cristo pejtelel chuqui añ to yom lac cha'añ?

³³ ¿Majqui mi' mejlel i tsictesʌben i mul jiñi yajcʌbilo' bʌ i cha'añ Dios? Come Dios mi' q'uelonla ti toj.

³⁴ ¿Majqui mi' mejlel i yʌc'onla ti tojmulil? Come Cristo tsa' chʌmi cha'añonla; tsa' tejchi ch'ojyel ja'el ba'añ chʌmeño' bʌ; che' ja'el añ ti' ñoj Dios ba' woli' c'ajtiben Dios laj coltʌntel.

³⁵ ¿Am ba majqui mi mejlel i t'oxonla ti c'uxbiya Cristo? ¿Mejl ba lac wocol, o laj c'oj-ol, o lac tic'lʌntel, o lac wi'ñal, o che' ma'añic lac pislel, o che' añ bʌbʌq'uen bʌ, o jiñi espada?

³⁶ Che' bajche' ts'ijbubil: “Cha'añetla woli c tsʌnsʌntel lojon ti pejtelel ora, mic pʌjyel lojon majlel che' bajche' tʌñʌme' cha'añ mic tsʌnsʌntel lojon”, che'en.

³⁷ Ti pejtelel ili wocol tac bʌ, mi' wen mʌjlel majlel lac cha'añ, cha'añ ti' p'ʌtʌlel Jesús tsa' bʌ i c'uxbiyonla.

³⁸ Come cujil ma'añic chuqui mi mejlel i mʌctañ i c'uxbiya Dios, mi jiñic jax chʌmel, o che' cuxulontola, mi ángelob, mi yumʌlob, mi jiñic p'ʌtʌlo' bʌ, mi jiñic mu' bʌ i yujtel wʌle, mi jiñic mu' bʌ caj ti ujtel,

³⁹ mi jiñic chañ tac bʌ, mi jiñic am bʌ ti tamlel, mi yan tac bʌ melbil tac bʌ. Ma'añic chuqui mi mejlel i t'oxonla ti c'uxbiya Dios mu' bʌ lac taj ti lac Yum Cristo Jesús.