Romanos 7 - Jiñi Tsiji' bʌ Wen T'añ cha'añ Estudio

Lajiya cha'añ x'ixic am bʌ i ñoxi'al

¹ Quermañujob (mic cha'len t'añ yic'ot jiñi cʌmbilo' bʌ i cha'añ jiñi mandar), ¿mach ba la' wujilic che' añon to la ti' wenta jiñi mandar, wersa mi lac jac' che' cuxulontola?

² Jiñi x'ixic mu' bʌ i cha'len ñujpuñijel mi' jac'ben i mandar i ñoxi'al che' cuxul to; pero mi tsa'ix chʌmi i ñoxi'al, librejix mi' yajñel ma'añix mi' chʌn jac' i mandar i ñoxi'al.

³ Jiñi cha'añ mi tsi' pi'le yam bʌ wiñic che' cuxul to i ñoxi'al mi' pejcʌntel tij xts'i'lel; pero mi tsa'ix chʌmi i ñoxi'al librejix mi yajñel; jiñi cha'añ mi tsa' cha' ñujpuñi yic'ot yam bʌ wiñic, ma'añic mi caj i q'uejlel ti xts'i'lel.

⁴ Che' ja'el jatetla quermañujob, jilemix i p'ʌtʌlel jiñi mandar ti la' tojlel come tsa' chʌmiyetla yic'ot Cristo cha'añ mi la' wochel ti' wenta yam bʌ la' yum. Jiñi lac Yum jiñʌch Cristo tsa' bʌ tejchi loq'uel ba'añ chʌmeño' bʌ, cha'añ mi lac melben i ye'tel Dios.

⁵ Che' bʌ tsa' lac jac'be lac tsucul pusic'al, yic'ot i colosojlel lac pusic'al, ñijcʌbil bʌ cha'añ jiñi mandar, tsi' ñijcayonla ti mulil cha'añ mi' yʌc'onla ti chʌmel.

⁶ Wʌle tsa'ix loq'uiyonla ti' wenta jiñi mandar, cha'añ ti' caj tsa'ix chʌmiyonla yic'ot Cristo, librejoñixla cha'añ ma'añix mi lac chʌn jac'ben jiñi tsa' bʌ i cʌchʌyonla; jiñi cha'añ mi lac jac'ben Dios ti' p'ʌtʌlel jiñi Espíritu ti tsiji' bʌ laj cuxtʌlel, mach chʌn ti' p'ʌtʌlelic jiñi ts'ijbubil bʌ mandar ba' cʌchʌlonla wajali.

Jiñi mulil am bʌ tic pusic'al

⁷ ¿Chuqui yom mi cʌl, che' jiñi? ¿Mulil ba jiñi mandar? Mach mulilic mi ts'ita'ic. Pero jiñi mandar tsi' yʌq'ueyon cʌn jiñi mulil; yic'ot ma'añic tsa' c ña'ta mi' mulil che' bʌ tsa' c mulʌbe i chu'bʌañ c pi'ʌlob, machic jax tsi' yʌlʌ jiñi mandar: “Mach a mulʌben i chu'bʌañ a pi'ʌlob”.

⁸ Jiñi mandar tsi' yʌq'ueyon j cʌn cha'añ mach uts'atic i mulʌntel chu'bʌañʌl, pero jiñi mulil tsi' yʌq'ueyon c mulan yan tac bʌ chu'bʌañʌl, che' machic jax añ mandar ma'añic mi lac ña'tan mi' añ lac mul.

⁹ Che' bʌ maxto añic jiñi mandar, tsa' c lon ña'ta cuxulon; pero che' bʌ tsa' cu'bi jiñi mandar, jiñi mulil tsa' cha' cuxtʌyi, che' jiñi tsa' c ña'ta chʌmeñon ti mulil.

¹⁰ Tsa' c lon ña'ta cha'añ jiñi mandar mi' yʌq'ueñon j cuxtʌlel, pero tsi' yʌc'ʌyon ti chʌmel cha'añ c mul.

¹¹ Come jiñi mulil tsi' c'ʌñʌ jiñi mandar cha'añ mi' lotiñon; jiñi cha'añ chʌmeñon ti mulil cha'añ jiñi mandar.

¹² Isujm ch'ujul jiñi mandar, ch'ujul i su'bal Dios, tojʌch, yic'ot uts'atʌch ja'el.

¹³ Jiñi cha'añ, ¿am ba i mul jiñi mandar cha'añ tsi' yʌc'ʌyon ti chʌmel? Ma'añic mi ts'ita'ic. Cha'añʌch mi' tsictiyel jiñi mulil am bʌ tic pusic'al cha'añ mulilʌch. Jiñi mulil tsi' c'ʌñʌ chuqui uts'at cha'añ mi' yʌc'on ti chʌmel, cha'añ mi' tsictiyel ti jiñi mandar c'ax jontolʌch jiñi mulil.

¹⁴ La cujil tilem ti Espíritu jiñi mandar, pero añ i c'unlel c bʌc'tal cha'añ mulil, chuculon ti' p'ʌtʌlel mulil.

¹⁵ Come jiñi mu' bʌ c mel, ma'añic mic ch'ʌmben isujm, come ma'añic mic mel jiñi wen bʌ com bʌ c mel; pero jiñi mu' bʌ j ts'a'len jiñʌch mu' bʌ c mel.

¹⁶ Che' mic mel jiñi mach bʌ comic c mel, mic ña'tan uts'atʌch jiñi mandar.

¹⁷ Jiñi cha'añ mach chʌn tilemic tic pusic'al che' mic mel che' bajche' jiñi; jiñʌch jiñi mulil am bʌ tic pusic'al.

¹⁸ Che' jiñi, cujil ma'añic chuqui wen tic pusic'al, anquese com c mel chuqui uts'at, pero ma'añic mi' mejlel c mel.

¹⁹ Come ma'añic mic mel jiñi uts'at tac bʌ com bʌ c mel. Jiñi jontolil mach bʌ comic c mel jiñʌch mu' bʌ c mel.

²⁰ Che' mic mel jiñi mach bʌ comic c mel, mach joñoñix woli c mel, jiñʌch mulil am bʌ tic pusic'al.

²¹ Jiñi cha'añ che' com c mel chuqui uts'at, mic taj ili mandar: Cha'añ jiñi jontolil añ tic pusic'al.

²² Come tic pusic'al mic wen mulan i mandar Dios.

²³ Pero mic ña'tan añ yam bʌ c pʌyol tic bʌc'tal mu' bʌ i contrajin jiñi com bʌ c mel tic pusic'al, mi' yʌc'on ti chujquel ti' p'ʌtʌlel mulil am bʌ tic bʌc'tal.

²⁴ ¡P'ump'uñon jax! ¿Majqui mi caj i loc'sañon ti' p'ʌtʌlel jiñi tsucul bʌ c pusic'al mu' bʌ i yʌc'on ti chʌmel?

²⁵ ¡Mic su'ben wocolix i yʌlʌ Dios, cha'añ lac Yum Jesucristo mi' yʌc'on ti colel! Jiñi cha'añ joñon ti tsiji' bʌ c pusic'al mic jac'ben i mandar Dios, pero ti tsucul bʌ c pusic'al mic jac'ben i p'ʌtʌlel mulil.