Romanos 6 - Jiñi Tsiji' bʌ Wen T'añ cha'añ Estudio

Chʌmeñonla ti' tojlel jiñi mulil

¹ ¿Chuqui yom mi lac su'b, che' jiñi? ¿Yom ba mi lac chʌn cha'len mulil cha'añ mi' p'ojlel i yutslel i pusic'al Dios?

² Mach yomic mi' ts'ita'ic. Come jilemix i p'ʌtʌlel mulil ti lac tojlel, ¿Bajche', che' jiñi, mi mejlel lac chʌn cha'len mulil?

³ ¿Mach ba la' wujilic cha'añ pejtelelonla tsa'ix bʌ lac ch'ʌmʌ ja' ti Cristo Jesús, tsa'ix chʌmiyonla yic'ot Cristo, che' bʌ tsa' chʌmi?

⁴ Che' mi lac ch'ʌm ja' mi lac chʌmel yilal yic'ot mi lac tem mujquel yic'ot Cristo cha'añ mi lac cha' tsiji' ilan pañimil che' bajche' Cristo tsa' tejchi loq'uel ba'añ chʌmeño' bʌ ti' p'ʌtʌlel Dios lac Tat.

⁵ Come mi temel tsa' ajñiyonla yic'ot Cristo che' bʌ tsa' chʌmi, che'ʌch ja'el temel mi caj lac tejchel ch'ojyel che' bajche' tsa' tejchi ch'ojyel ba'añ chʌmeño' bʌ.

⁶ Come la cujil tsa' ch'ijle ti cruz lac tsucul pusic'al yic'ot Cristo, cha'añ mi' jisʌntel i p'ʌtʌlel mulil ti lac pusic'al, cha'añ ma'añix mi lac chʌn yuman mulil.

⁷ Come jiñi tsa'ix bʌ chʌmi, colbilix ti' p'ʌtʌlel mulil.

⁸ Mi tsa' chʌmiyonla la quic'ot Cristo, la cujil ja'el cuxul mi caj la cajñel yic'ot,

⁹ come la cujil tejchemix ch'ojyel Cristo ba'añ chʌmeño' bʌ, mach mejlix ti cha' chʌmel, come ma'añix i p'ʌtʌlel chʌmel ti' tojlel.

¹⁰ Come che' bʌ tsa' chʌmi Cristo, junyajl jach tsa' chʌmi cha'añ i tojol mulil; wʌle cuxul cha'añ mi' ñuq'uesan Dios.

¹¹ Che' ja'el jatetla, ña'tanla jilemix i p'ʌtʌlel mulil ti la' tojlel, pero cuxuletla cha'añ mi la' ñuq'uesan Dios ti Cristo Jesús, lac Yum.

¹² Jiñi cha'añ mach mi la' chʌn yuman mulil ti la' bʌc'tal yujil bʌ chʌmel, mach mi' la' jac'ben i colosojlel la' pusic'al.

¹³ Mach mi la' wʌc' la' bʌc'tal cha'añ mi' c'ʌjñibʌyel cha'añ jontolil, aq'uen la' bʌ Dios, come tejchemetixla ch'ojyel ti' tojlel chʌmeño' bʌ, cha'añ mi' c'ʌjñibʌyel la' bʌc'tal ti' tojlel Dios ti' melol chuqui toj.

¹⁴ Come mach chʌn añetixla ti' p'ʌtʌlel mulil cha'añ mi la' jac'; come ma'añetixla ti' wenta jiñi mandar, añetixla ti' yutslel i pusic'al Dios.

X'e'telob cha'añ chuqui tac toj

¹⁵ ¿Chuqui yom che' jiñi? ¿Yom ba mi lac chʌn cha'len mulil che' ma'añoñixla ti' wenta jiñi mandar, come añoñixla ti' yutslel i pusic'al Dios? Mach yomic mi ts'ita'ic.

¹⁶ ¿Mach ba la' wujilic che' mi la' wotsan la' bʌ ti' ye'tel ti' tojlel juntiquil wiñic, x'e'teletla i cha'añ che' woli la' jac'ben i t'añ? Jiñi mu' bʌ i jac'ben mulil mi' chʌmel. Jiñi mu' bʌ i jac'ben Dios mi' taj toj bʌ i pusic'al.

¹⁷ Wocolix i yʌlʌ Dios, anquese wajali chucbiletla ti' p'ʌtʌlel mulil, pero wʌle tsa'ix la' jac'ʌ ti jump'ejl la' pusic'al jiñi cʌntesa tsa' bʌ aq'uentiyetla.

¹⁸ Tsa'ix loc'sʌntiyetla ti mulil; wʌle ochemetixla ti' wiñic Dios cha'añ mi la' jac' chuqui toj.

¹⁹ Mic cha'len t'añ che' bajche' wiñic come wocol mi la' ch'ʌmben isujm come wiñiquetla, che' bajche' tsa' la' wʌc'ʌ la' bʌc'tal cha'añ mi la' mel chuqui tac bi'bi' yic'ot chuqui tac jontol; wʌle che' yom mi la' wʌc' la' bʌc'tal cha'añ mi la' mel chuqui tac toj cha'añ ch'ujul mi la' wajñel.

²⁰ Che' ba' ora chuculetla ti mulil, ma'añic mi' mejlel la' mel chuqui toj.

²¹ ¿Chuqui tsa' la' taja ti mulil, che' jiñi? Wʌle che' mi la' cha' ña'tan la' mul, mi la' cha'len quisin, come la' wujil mi' chʌmelob jiñi mu' bʌ i cha'leñob mulil.

²² Pero wʌle che' loc'sʌbiletixla ti' p'ʌtʌlel mulil, yic'ot che' i wiñiquetixla Dios, woli la' taj la' sʌc-esʌntel yic'ot la' cuxtʌlel mach bʌ añic mi' jilel.

²³ Come i tojol jiñi mulil, jiñʌch chʌmel, pero lac majtañ mu' bʌ i yʌq'ueñonla Dios jiñʌch laj cuxtʌlel mach bʌ añic mi' jilel ti lac Yum Cristo Jesús.