Romanos 5 - Jiñi Tsiji' bʌ Wen T'añ cha'añ Estudio

Jiñi mu' bʌ lac taj che' mi laj q'uejlel ti toj

¹ Dios mi' q'uelonla ti toj cha'añ tsa' lac ñopo, añix i ñʌch'tʌlel lac pusic'al yic'ot Dios cha'añ ti' caj tsa' lac ñopo lac Yum Jesucristo.

² Cha'añ ti' caj Jesucristo mu' bʌ lac ñop, ochemoñixla ja'el ti' yutslel i pusic'al Dios; jiñi cha'añ xuc'ulonla; tijicñayonla cha'añ mi caj lac taj i ñuclel Dios.

³ Mach cojic jach jiñi, tijicñayonla ja'el cha'añ jiñi wocol mu' bʌ la cu'bin, come la cujil jiñi wocol tac mi' yʌq'ueñonla lac p'ʌtʌlel ti pijt.

⁴ I xuc'tʌlel lac pusic'al ti' pijtaya, mi yʌq'ueñonla lac p'ʌtʌlel cha'añ mi laj cuch wocol; che' mi laj cuch wocol, mi' p'ojlel lac pijtaya ti Dios.

⁵ Che' woliyonla ti pijt, mach lolomic jach, come la cujil i c'uxbiya Dios tsa'ix i but'beyonla ti lac pusic'al ti jiñi Ch'ujul bʌ Espíritu tsa' bʌ aq'uentiyonla.

⁶ Che' bʌ ma'añic tsa' mejli lac bajñel coltañ lac bʌ, tsa' chʌmi Cristo cha'añ xjontolilob.

⁷ Isujm ma'añic majqui mi yʌc' i bʌ ti' chʌmel cha'añ i coltʌntel juntiquil, mi cha'añic juntiquil toj bʌ, tic'ʌl añ mu' bʌ i yʌc' i bʌ ti chʌmel cha'añ mi' coltañ juntiquil wen uts bʌ i pusic'al.

⁸ Pero Dios tsi' pʌsʌ i c'uxbiya ti lac tojlel, ba ora tsa' chʌmi Cristo cha'añonla che' xmulilontola.

⁹ Jiñi cha'añ wʌle mi laj q'uejlel ti toj cha'añ jach i ch'ich'el Cristo; jiñi cha'añ mi caj laj coltʌntel ti Cristo che' mi' tsictiyel i mich'ajel Dios.

¹⁰ Che' i contrajonla Dios, tsa' chʌmi i Yalobil cha'añ mi yuts-esan lac pusic'al yic'ot Dios. Wʌle che' uts-esʌbilix lac pusic'al yic'ot Dios, mi caj laj coltʌntel cha'añ tsiji' bʌ i cuxtʌlel Cristo.

¹¹ Mach cojic jach jiñi, pero tijicñayonla ti Dios cha'añ lac Yum Jesucristo, come Cristo tsi' yuts-esa lac pusic'al yic'ot Dios.

Adán yic'ot Cristo

¹² Jiñi cha'añ tsa' ochi mulil ti pañimil cha'añ ti' caj i mul juntiquil wiñic. Jiñi mulil mi yʌc' chʌmel, jiñi cha'añ mi lac chʌmel ti lac pejtelel, come tsa' lac laj cha'le mulil ti lac pejtelel.

¹³ Che' maxto ts'ijbubilic jiñi mandar añix mulil ti pañimil, pero che' maxto añic mandar, maxto añic mulil ti' wenta wiñicob x'ixicob.

¹⁴ Tsi' cha'le yumʌntel jiñi chʌmel ti' yorajlel Adán c'ʌlʌl ti Moisés, anquese maxto añic tsi' ñusayob mandar che' bajche' Adán; jiñi Adán jiñʌch i lajintel Cristo mu' bʌ caj i tilel.

¹⁵ Pero jiñi lac majtañ mach mejlic ti lajintel yic'ot i mul Adán, cha'añ ti' mul juntiquil wiñic, ca'bʌl tsa' chʌmiyob, pero tsa' utsi p'ojli i yutslel i pusic'al Dios yic'ot lac majtañ ti' tojlel ca'bʌlob cha'añ ti' yutslel i pusic'al juntiquil wiñic, jiñʌch Jesucristo.

¹⁶ Jiñi lac majtañ mach lajalic bajche' jiñi wocol mu' bʌ lac taj cha'añ ti' mul Adán, come cha'añ ti mul juntiquil tsa' tejchi meloñel yic'ot tojmulil, pero jiñi lac majtañ tsa' tili cha'añ ti' caj añ ca'bʌl mulil, cha'añ mi laj q'uejlel ti' toj.

¹⁷ Cha'añ ti' mul juntiquil wiñic mi' chʌmelob pejtelel wiñicob x'ixicob, pero ñumen mi caj i tajob i cuxtʌlel ti jiñi juntiquil wiñic, Jesucristo, jiñi mu' bʌ i ch'ʌmob ti' wenta jiñi ñuc bʌ i yutslel i pusic'al Dios yic'ot toj bʌ i pusic'al mu' bʌ i tajob ti majtañ.

¹⁸ Cha'añ ti' mul Adán tsa' tili tojmulil ti' tojlel pejtelel wiñicob x'ixicob, che' ja'el cha'añ ti toj bʌ i melbal Cristo mi' q'uejlelob ti toj pejtelel wiñicob x'ixicob, cha'añ cuxul mi' yajñelob.

¹⁹ Cha'añ ti' caj i ñusa t'añ juntiquil wiñic ca'bʌl tsa' q'uejliyob ti xmulil; che' ja'el cha'añ ti' caj i jac' t'añ juntiquil wiñic ca'bʌl mi' caj i q'uejlelob ti toj.

²⁰ Tsa' tili mandar cha'añ mi' tsictiyel woli' p'ojlel mulil, pero che' bʌ tsa' p'ojli mulil, ñumen ca'bʌl tsa' p'ojli i yutslel i pusic'al Dios.

²¹ Come che' bajche' jiñi mulil tsi' cha'le i yumʌntel ti chʌmel, che'ʌch ja'el mi' mel i yumʌntel i yutslel i pusic'al Dios cha'añ tsa' aq'uentiyonla toj bʌ lac pusic'al, cha'añ cuxul mi lac cajñel ti pejtelel ora ti lac Yum Jesucristo.