Romanos 4 - Jiñi Tsiji' bʌ Wen T'añ cha'añ Estudio

Tsa' bʌ i pʌsbeyonla Abraham

¹ ¿Chuqui yom mi la cʌl che' jiñi? ¿Chuqui tsi' taja Abraham jiñi lac ñojte'el?

² Che' tsa'ic q'uejli ti toj Abraham cha'añ wen bʌ i melbal; che' jiñi mi mejlel i su'b i bʌ ti ñuc, pero mach ti' tojlelic Dios.

³ ¿Chuqui mi' yʌl i Ts'ijbujel Dios? Abraham tsi' ñopo Dios, jiñi cha'añ Dios tsi' q'uele ti toj, che'en.

⁴ Pero jiñi mu' bʌ i cha'len e'tel, mi' ch'ʌm i tojol, mach i majtañic, i tojolʌch ti e'tel;

⁵ pero Dios mi' ñusʌbeñob i mul jiñi mach bʌ tojobic mu' bʌ i ñopob. Mi' yotsañob ti' wenta. Dios mi' q'uelob ti toj cha'añ jach tsi' ñopoyob, mach cha'añic ti wen bʌ i melbal.

⁶ Che' bajche' mi' yʌl David ja'el cha'añ tijicña jiñi wiñic mu' bʌ i q'uejlel ti toj ti Dios, mach cha'añic ti wen bʌ i melbal.

⁷ David tsi' yʌlʌ: “Tijicñayob jiñi mu' bʌ i ñusʌbentelob i jontolil, yic'ot jiñi mach bʌ añix mi' chʌn ña'tʌbentel i mul ti Dios.

⁸ Tijicña jiñi wiñic mach bʌ añic mi' ña'tʌbentel i mul ti lac Yum”.

⁹ ¿Cojach ba tijicñayob jiñi tsepbilo' bʌ i pʌchʌlel? ¿Mach ba tijicñayobic ja'el jiñi mach bʌ tsepbilobic i pʌchʌlel? Come mic su'b lojon tsa' q'uejli ti toj Abraham cha'añ tsi' ñopo Dios.

¹⁰ ¿Baqui ora tsa' q'uejli ti toj? ¿Jim ba che' tsepbilix i pʌchʌlel o che' maxto tsepbilic? Tsa' q'uejli ti toj che' maxto tsepbilic i pʌchʌlel.

¹¹ Ti wi'il tsa' tsepbenti i pʌchʌlel Abraham cha'añ i yejtal yic'ot i sellojlel toj bʌ i pusic'al tsa' bʌ aq'uenti cha'añ tsi' ñopo Dios che' maxto tsepbilic i pʌchʌlel, cha'añ mi' yochel ti' tat pejtelelob mu' bʌ i ñopob Dios che' mach tsepbilobic i pʌchʌlel, cha'añ che' jiñi mi' q'uejlelob ti toj ja'el cha'añ tsi' ñopoyob.

¹² I tatʌch jiñi tsepbilo' bʌ i pʌchʌlel, mach cojic jach tsi' ch'ʌmʌyob tsep pʌchʌlel, pero tsi' ñopoyob ja'el, che' jiñi woli' tsajcañob lac tat Abraham tsa' bʌ i ñopo Dios che' maxto tsepbilic i pʌchʌlel.

Mi la cʌq'uentel jiñi albil bʌ t'añ che' mi' lac ñop Dios

¹³ Mach cha'añic ti' jac'ol jiñi mandar tsa' su'benti Abraham yic'ot i p'olbal mux i yʌq'ueñtelob jiñi pañimil ti' wenta; pero cha'añ jach tsi' ñopo Dios tsa' q'uejli ti toj.

¹⁴ Pero mi jiñi albil bʌ t'añ i cha'añob jach jiñi mu' bʌ i jac'ob jiñi mandar, che' jiñi lolom jach mi lac ñop Dios, ma'añic i c'ʌjñibal jiñi tsa' bʌ i yʌlʌ Dios cha'añ mi' caj i yʌq'ueñonla.

¹⁵ Come i ñusʌntel jiñi mandar mi' techben i mich'ajel Dios, pero che' ma'añic mandar ma'añic chuqui mi' ñusʌntel.

¹⁶ Jiñi cha'añ mi lac taj jiñi albil bʌ t'añ ti' yutslel i pusic'al Dios cha'añ tsa' lac ñopo, che' jiñi mi' ts'ʌctiyel jiñi t'añ ti' tojlel pejtelel i p'olbal Abraham mu' bʌ i ñopob Dios, mach cojic jach mu' bʌ i ñopob mandar, pero yaño' bʌ ja'el mu' bʌ i ñopob Dios che' bajche' Abraham. Jiñʌch lac tat ti lac pejtelel.

¹⁷ Che' bajche' ts'ijbubil: “Tsa' c wa'chocoyet ti' tat wiñicob x'ixicob ti ca'bʌl lum tac”. Jiñi Dios tsa' bʌ i ñopo Abraham jiñʌch mu' bʌ i yʌq'ueñob i cuxtʌlel jiñi chʌmeño' bʌ, mu' bʌ i mel ti' p'ʌtʌlel jach i t'añ jiñi maxto bʌ añic ti yam bʌ ora.

¹⁸ Anquese ma'añic tsi' ña'ta Abraham bajche' mi' caj ti ts'ʌctiyel jiñi t'añ, tsi' chʌn ñopo ti' xuc'tʌlel i pusic'al, cha'añ mi caj i yochel ti' tat ca'bʌl wiñicob x'ixicob ti ca'bʌl lum, che' bajche' tsa' su'benti: “Che'i mi' caj ti ajñel ca'bʌl a p'olbal”.

¹⁹ Ma'añic tsa' lujb-a i ñop anquese tsi' ña'ta ma'añix i yorajlel cha'añ mi' yajñel i yalobil come ts'itajax yom ts'ʌctiyel jo'c'al i ja'bilel, che' ja'el ñoxix Sara.

²⁰ Ma'añic tsi' wis cʌyʌ i ñop, ma'añic tsa' tejchi tilebixel bʌ i pusic'al cha'añ jiñi t'añ tsa' bʌ su'benti ti Dios, tsa' p'ʌt-a i pusic'al ti ñopol Dios, tsi' su'bu i ñuclel Dios.

²¹ Ti jump'ejl i pusic'al tsi' ña'ta añ i p'ʌtʌlel Dios cha'añ mi' ts'ʌctesan jiñi tsa' bʌ i yʌlʌ.

²² Jiñi cha'añ tsa' q'uejli ti toj cha'añ tsi' ñopo Dios.

²³ Mach cha'añic jach Abraham, tsa' ts'ijbunti jiñi t'añ “Tsa' q'uejli ti toj”,

²⁴ pero cha'añonla ja'el mu' bʌ lac ñop Dios, tsa' bʌ i teche ch'ojyel lac Yum Jesús ba'añ chʌmeño' bʌ, mi laj q'uejlel ti toj,

²⁵ come Jesús tsa' ajq'ui ti chʌmel cha'añ mi' toj lac mul, yic'ot tsa' tejchi ch'ojyel cha'añ mi laj q'uejlel ti toj.