Romanos 3 - Jiñi Tsiji' bʌ Wen T'añ cha'añ Estudio

¹ ¿Am ba chuqui ñumen uts'at i cha'añob judíojob bajche' gentilob? ¿Chuqui i c'ʌjñibal jiñi tsep pʌchʌlel?

² Ca'bʌl, come jiñobʌch tsa' bʌ aq'uentiyob i t'añ Dios ti ñaxan.

³ Isujm, ma'añic tsi' ñopoyob lamital, pero ¿tsa' ba jili i xuc'tʌlel i pusic'al Dios cha'añ ma'añic tsi' ñopoyob?

⁴ Ma'añic mi' ts'ita'ic, anquese xlotob pejtelel wiñicob, pero Dios mach yujilic lot; che' bajche' ts'ijbubil: “Cha'añ mi' tsictiyel tojʌch a t'añ yic'ot cha'añ mi' mʌjlel a cha'añ che' ma' mel a bʌ”, che'en.

⁵ Lac jontolil ja'el mi' yʌc' ti tsictiyel toj bʌ i pusic'al Dios, ¿chuqui mi la cʌl, che' jiñi? ¿Mach ba tojic Dios che' mi' yʌc'onla ti tojmulil? (Woliyon ti t'añ che' bajche' mi' cha'leñob t'añ wiñicob).

⁶ Toj cu. Mi mach tojic Dios, ¿bajche' mi mejlel i mel wiñicob x'ixicob año' bʌ ti pañimil?

⁷ Mi woli ti wen tsictiyel i ñuclel Dios cha'añ isujmlel i t'añ Dios woli bʌ c su'b, anquese mi yʌlob cha'añ woliyon ti lot, ¿chucoch woli c chʌn q'uejlel che' bajche' juntiquil xmulil?

⁸ Lamital mi yʌlob cha'añ woliyon lojon ti cʌntesa che' bajche' iliyi: “La' lac cha'len jontolil cha'añ mi' p'ojlel chuqui tac uts'at”. Ili wiñicob woliyob ti lot, jiñi cha'añ yomʌch mi' tojob i mul che' bajche' yom.

Ma'añic majqui toj

⁹ ¿Ixcu che' jiñi? ¿Ñumen uts'atonbala che' bajche' yaño' bʌ? Ma'añic mi' ts'ita'ic, come tsa'ix c su'bu lojon cha'añ jiñi judíojob yic'ot gentilob, ti lac pejtelel chuculonla ti' p'ʌtʌlel mulil.

¹⁰ Che' bajche' ts'ijbubil: “Ma'añic majqui toj, mi juntiquilic,

¹¹ ma'añic majqui mi' ch'ʌmben isujm, ma'añic majqui mi sajcan Dios.

¹² Ti lac pejtelel tsa' lac xoyo lac bijlel, ma'añic laj c'ʌjñibal tsa' majliyonla, ma'añic majqui mi' cha'len chuqui wen mi juntiquilic.

¹³ Lajal i yej wiñicob bajche' i ti' mucoñibʌl; mi' cha'leñob lot. Añ i venenojlel lucum ti' mal i yej;

¹⁴ but'ul i yej ti p'ajoñel yic'ot ti wajleya.

¹⁵ Ajñel mi' majlelob i tsʌnsan i pi'ʌlob.

¹⁶ Baqui jach mi' majlelob mi' techob wocol yic'ot jisaya.

¹⁷ Ma'añic mi' cʌñob jiñi bij ba'añ i ñʌch'tʌlel lac pusic'al.

¹⁸ Ma'añic mi' wis bʌc'ñañob Dios”.

¹⁹ Pero la cujil cha'añ pejtelel chuqui ts'ijbubil ti mandar, i cha'añobʌch jiñi ochemo' bʌ ti' wenta jiñi mandar, cha'añ mi' ñʌjch'elob pejtelel wiñicob x'ixicob ti' pañimil, che' mi' melob i bʌ ti' tojlel Dios,

²⁰ come mach cha'añic i jac'ol mandar mi' caj i q'uelonla ti toj Dios, come jiñi mandar mi' yʌq'ueñonla laj cʌñ cha'añ xmulilonla.

Dios mi' yʌq'ueñ toj bʌ i pusic'al jiñi mu' bʌ i ñop

²¹ Pero wʌle mach cojic jach ti jiñi ts'ijbubil bʌ mandar tsa' tsictiyi toj bʌ i pusic'al Dios, che' bajche' ts'ijbubil ti mandar yic'ot ti' juñ x'alt'añob:

²² Tsa' tsictiyi ja'el toj bʌ i pusic'al Dios che' mi lac ñop Jesucristo, pejtelel mu' bʌ i ñopob Jesucristo, mi' yʌq'ueñtelob toj bʌ i pusic'al, come Dios mach jelchojquic mi' q'uel wiñicob x'ixicob,

²³ come ti pejtelelob tsa'ix i cha'leyob mulil, jiñi cha'añ mach i tajayobix i ñuclel Dios,

²⁴ pero Dios mi' q'uelonla ti toj cha'añ jach i yutslel i pusic'al ti Cristo Jesús che' bʌ tsi' mʌñʌyonla, cha'añ mi' yʌc'ob ti colel;

²⁵ come Dios tsi' yʌc'ʌ Cristo cha'añ mi' tojbeñonla lac mul ti' ch'ich'el, cha'añ mi' lajmel i mich'ajel ti' tojlel pejtelel mu' bʌ i ñopob; che' jiñi tsiquil tojʌch Dios tsa' bʌ i cuchbeyob i mul wiñicob x'ixicob ti yam bʌ ora,

²⁶ jiñi cha'añ Dios tsi' pijta ti ili q'uiñ cha'añ mi' pʌs tojʌch i pusic'al, che' bʌ tsi' yʌc'ʌ Jesucristo, jiñi cha'añ tojʌch Dios, yic'ot mi' q'uelob ti toj pejtelel mu' bʌ i ñopob Jesús.

²⁷ Che' jiñi, ¿baqui mi' cʌlel jiñi wiñic mu' bʌ i q'uelob i bʌ ti ñuc cha'añ i jac'ol jiñi mandar? Ma'añix i c'ʌjñibal. ¿Chucoch? Come mach cha'añic i jac'ol mandar mi' q'uelonla ti toj Dios, pero cha'añ jach tsa' lac ñopo Jesús.

²⁸ Jiñi cha'añ mi lac cʌl, cha'añ jiñi wiñicob x'ixicob mi' q'uejlelob ti toj cha'añ tsi' ñopoyob Jesucristo; mach cha'añic i jac'ol mandar.

²⁹ Jiñi Dios ¿i cha'añ jach ba judíojob? ¿Mach ba i cha'añic gentilob ja'el? Isujm i cha'añob gentilob ja'el,

³⁰ come juntiquil jach Dios. Mi caj i q'uejlelob ti toj pejtelel mu' bʌ i ñopob Jesucristo, jiñi tsepbil bʌ i pʌchʌlel yic'ot ja'el jiñi mach bʌ tsepbilic i pʌchʌlel.

³¹ Ixcu che' jiñi, ¿mu' ba lac jisʌben i c'ʌjñibal jiñi mandar che' mi lac ñop Jesucristo? ¡Ma'añic mi' ts'ita'ic! Mi lac chʌn ña'tʌben i c'ʌjñibal.