Romanos 2 - Jiñi Tsiji' bʌ Wen T'añ cha'añ Estudio

Jiñi toj bʌ i meloñel Dios

¹ Jiñi cha'añ añ a mul che' woli a q'uel ti xmulil a pi'ʌlob, come mach a wentajic cha'añ ma' melob; come che' ma' q'uel ti xmulil a pi'ʌlob, woli a bajñel otsan a bʌ ti wocol, come lajal ma' mel ja'el.

² La cujil Dios mi' cha'len meloñel ti toj ti' contra jiñi mu' bʌ i cha'leñob mulil.

³ Jatet mu' bʌ a su'b i mul a pi'ʌlob che' lajal wola' cha'len mulil, ¿mu' ba a lon ña'tan cha'añ ma'añic mi caj i tajet i mich'ajel Dios?

⁴ ¿Mach ba añic ma' ña'tan woli a ñusʌben i yutslel i pusic'al Dios, che' jal woli i cuchbeñet a mul? ¿Mach ba a wujilic cha'añ ti' yutslel i pusic'al Dios woli pʌyet majlel cha'añ ma' cʌy a mul?

⁵ Pero cha'añ i tsʌtslel a pusic'al, ma'añic ma' cʌy a mul, jiñi cha'añ woli a wʌc' ti tempʌyel i mich'ajel Dios ti' a tojlel che' ti' q'uiñilel i mich'ajel, yic'ot che' mi' tsictiyel toj bʌ i meloñel Dios,

⁶ jiñi cha'añ Dios mi caj i yʌq'ueñob i chobejtʌbal che' bajche' añ i melbal ti jujuntiquil.

⁷ Mi caj i taj i cuxtʌlel mach bʌ añic mi' jilel jiñi mu' bʌ i chʌn cha'leñob chuqui uts'at cha'añ yomob i ñuclel, i c'uxbintel yic'ot cha'añ cuxul mi' yajñel ti pejtelel ora;

⁸ pero jiñi mu' bʌ i cha'leñob jontolil, mach bʌ añic mi' ñopob chuqui isujm, mi caj i tajbeñob i mich'ajel Dios.

⁹ Mi caj i tajob ca'bʌl wocol yic'ot tsic pusic'al pejtelel mu' bʌ i cha'leñob jontolil, ñaxan jiñi judíojob, ti wi'il jiñi griegojob;

¹⁰ pero mi caj i taj i ñuclel yic'ot i c'uxbintel yic'ot i ñʌch'tʌlel i pusic'al jiñi mu' bʌ i cha'len chuqui uts'at, ñaxan jiñi judíojob, ti wi'il jiñi griegojob,

¹¹ come Dios mach jelchojquic jach mi' q'uel wiñicob x'ixicob.

¹² Pejtelel tsa' bʌ i cha'leyob mulil che' ma'añic tsi' yu'biyob mandar mi caj i jilelob cha'añ i mul pero Dios ma'añic mi caj i c'ʌn mandar cha'añ mi' melob; jiñi tsa' bʌ i yu'biyob mandar, jiñi tsa' bʌ i ñusayob, Dios mi caj i c'ʌmben jiñi mandar cha'añ mi' melob,

¹³ come mach tojobic ti' wut Dios jiñi mu' bʌ i lon u'biñob mandar, cojach jiñi mu' bʌ i jac'ob jiñi mandar mi' q'uejlelob ti toj.

¹⁴ Jiñi gentilob mach bʌ añic i cha'añob jiñi ts'ijbubil bʌ mandar, añ i cha'añob i mandar Dios ti' pusic'al che' mi' bajñel melob che' bajche' ts'ijbubil, anquese mach i cʌñʌyobic jiñi ts'ijbubil bʌ,

¹⁵ mi' tsictesañob jiñi mandar ts'ijbubil bʌ ti' pusic'alob, mi' bajñel ña'tañob ti' pusic'al mi toj woli' melob o mi mach tojic.

¹⁶ Ti' q'uiñilel meloñel, Dios mi caj i c'ʌn Jesucristo cha'añ mi' mel wiñicob x'ixicob cha'añ jiñi mucul tac bʌ tsa' bʌ i meleyob che' bajche' mi' yʌl jiñi wen t'añ mu' bʌ c su'b.

Jiñi judíojob yic'ot jiñi mandar

¹⁷ Jatet judíojet, mu' bʌ a ñop jiñi ts'ijbubil bʌ mandar, ñuc ma' lon q'uel a bʌ cha'añ woli a ñop Dios;

¹⁸ cʌmbil a cha'añ chuqui yom a Dios, ma' ña'tan chuqui wen uts'at, come cʌntesʌbilet ti jiñi mandar;

¹⁹ ma' lon ña'tan xtoj-esayajet cha'añ xpots'ob, ma' lon ña'tan i sʌclelet pañimil cha'añ jiñi año' bʌ ti ac'ʌlel;

²⁰ ma' lon ña'tan maestrojet cha'añ jiñi tontojo' bʌ, xcʌntesajet cha'añ alobob, yic'ot ma' lon ña'tan ca'bʌlʌch a ña'tʌbal ti jiñi mandar yic'ot ti isujmlel.

²¹ Jatet ma' cʌntesan a pi'ʌlob, ¿chucoch ma'añic ma' bajñel cʌntesan a bʌ? Ma' su'b mach weñic xujch', pero jatet ma' cha'len xujch'.

²² Jatet mu' bʌ a wʌl mach a cha'len ts'i'lel, pero ma' cha'len ts'i'lel, jatet mu' bʌ a ts'a'len dios te' tac, pero ma' xujch'iben i chu'bʌañ jiñi templo tac.

²³ Jatet mu' bʌ a lon su'b a bʌ ti ñuc cha'añ jiñi mandar, ¿mach ba wolic a ts'a'len Dios che' ma' ñusʌben i mandar?

²⁴ Come che' bajche' ts'ijbubil: “Jiñi gentilob mi' p'ajbeñob i c'aba' Dios cha'añ ti la' caj”.

²⁵ Come añ i c'ʌjñibal tsep pʌchʌlel mi woli a jac' jiñi mandar, pero mi woli a ñusan mandar, lolom jach tsepbil a pʌchʌlel.

²⁶ Jiñi mach bʌ tsepbilic i pʌchʌlel mi tsi' mele chuqui tac toj mu' bʌ i yʌl jiñi mandar, ¿mach ba tsepbilic i pʌchʌlel yilal ti' tojlel Dios?

²⁷ Jiñi mach bʌ tsepbilic i pʌchʌlel, pero mi ts'ʌcʌl tsi' jac'ʌ mandar, mi caj i tsictesan a mul, come woli a ñusan mandar che' añ a cha'añ jiñi ts'ijbubil bʌ mandar yic'ot tsep pʌchʌlel.

²⁸ Come mach mero judíojobic pejtelel i p'olbal Israel, mi jiñic tsep pʌchʌlel mu' bʌ i mejlel ti lac bʌc'tal;

²⁹ mero judíojob jiñi tojo' bʌ pusic'al ti' Dios, mero tsep pʌchʌlel jiñi am bʌ ti lac pusic'al, mach ti lac bʌc'talic, i melbalʌch jiñi Espíritu. Jiñi mero judíojo' bʌ mi' taj i ñuclel ti Dios, mach ti wiñicobic.