Romanos 16 - Jiñi Tsiji' bʌ Wen T'añ cha'añ Estudio

Cortesía tac

¹ Com cʌq'ueñetla la' cʌn jiñi la quermana Febe am bʌ i ye'tel ti diaconisa ti' tojlel xñopt'añob mu' bʌ i tempañob i bʌ ya' ti Cencrea.

² Ch'ʌmʌla ti la' wenta come añetla ti lac Yum, che' bajche' yom mi' melob jiñi i cha'año' bʌ Dios, coltañla mi añ chuqui yom, come ca'bʌlix tsi' colta hermañujob, yic'ot tsi' coltayon ja'el.

³ Aq'ueñob cortesía Priscila yic'ot Aquila, come c pi'ʌlobʌch ti e'tel ti Cristo Jesús,

⁴ tsa' bʌ yʌlʌ tsʌnsʌntelob cha'añ tsi' coltayoñob, mach joñoñic jach mic su'beñob wocolix i yʌlʌ Priscila yic'ot Aquila, che'ʌch ja'el pejtelel jiñi xñopt'añob gentilo' bʌ baqui jach mi' tempañob i bʌ.

⁵ Aq'uenla cortesía ja'el xñopt'añob mu' bʌ i tempañob i bʌ ya' ti' yotot. Aq'uenla cortesía Epeneto mu' bʌ j c'uxbin, tsa' bʌ i ñaxan ñopo Cristo ya' ti Acaya.

⁶ Aq'uenla cortesía María tsa' bʌ i wen cha'le e'tel ti la' tojlel.

⁷ Aq'uenla cortesía Andrónico yic'ot Junias, jiñi j cʌñʌyo' bʌ yic'ot c pi'ʌlo' bʌ ti ñujp'el. Wen c'uxbibilob ti' tojlel jiñi apóstolob yic'ot ja'el ñaxan tsi' ñopoyob Cristo, wi'ilix joñon.

⁸ Aq'uenla cortesía Amplias mu' bʌ j c'uxbin ti lac Yum.

⁹ Aq'uenla cortesía Urbano c pi'ʌlo' bʌ ti e'tel ti Cristo Jesús, yic'ot Estaquis mu' bʌ j c'uxbin.

¹⁰ Aq'uenla cortesía Apeles tsa' bʌ i cuchu wocol ti' ye'tel Cristo. Aq'uenla cortesía jiñi año' bʌ ti' yotot Aristóbulo.

¹¹ Aq'uenla cortesía Herodión jiñi j cʌñʌ bʌ. Aq'uenla cortesía jiñi año' bʌ ti' yotot Narciso año' bʌ ti ñopol lac Yum.

¹² Aq'uenla cortesía Trifena yic'ot Trifosa woli bʌ i wen cha'leñob e'tel ti lac Yum. Aq'uenla cortesía jiñi c'uxbibil bʌ hermana Pérsida, tsa' bʌ i wen cha'le e'tel ti lac Yum.

¹³ Aq'uenla cortesía Rufo, yajcʌbil bʌ ti lac Yum, yic'ot i ña' tsa' bʌ i c'uxbiyon che' bajche' c ña'.

¹⁴ Aq'uenla cortesía Asíncrito, yic'ot Flegonte yic'ot Hermas yic'ot Patrobas yic'ot Hermes yic'ot lac quermañujob ya' bʌ añob yic'ot.

¹⁵ Aq'uenla cortesía Filólogo yic'ot Julia yic'ot Nereo yic'ot x'ixic bʌ i yeran, yic'ot Olimpas yic'ot pejtelel i cha'año' bʌ Dios ya' bʌ añob yic'ot.

¹⁶ Aq'uen la' bʌ cortesía, ts'ujts'un la' bʌ ti sʌclel la' pusic'al. Mi' yʌq'ueñetla cortesía pejtelel jiñi xñopt'añob i cha'añ Cristo.

¹⁷ Mic su'beñetla ti wocol t'añ hermañujob wen q'uelela jiñi mu' bʌ i t'oxetla ti t'añ yic'ot mu' bʌ i contrajin la' cʌntesʌntel tsa' bʌ la' ñopo. Tʌts'ʌ la' bʌ ba'añob.

¹⁸ Come jiñi wiñicob x'ixicob mu' bʌ i cha'leñob bajche' jiñi ma'añic mi' jac'ob chuqui yom lac Yum Jesucristo, jiñi jach mi' jac'ob chuqui yomob i bajñel i pusic'al, yic'ot ti maña jax bʌ t'añ yic'ot ti wen bʌ t'añ mi' lotiñob jiñi mach bʌ añic mi' wen ch'ʌmbeñob isujm.

¹⁹ Che' woli la' jac' woli i tsictiyel ti pejtelel wiñicob x'ixicob, jiñi cha'añ tijicñayon cha'añetla. Pero com che' añ wen bʌ la' ña'tʌbal cha'añ mi la' mel chuqui uts'at, pero mach comic mi la' cha'len jontolil.

²⁰ Jiñi Dios mu' bʌ i yʌq'ueñonla i ñʌch'tʌlel lac pusic'al mach jalix mi caj i yʌq'ueñetla la' t'uchtan Satanás. La' ajñic la' wic'ot i yutslel i pusic'al lac Yum Jesucristo.

²¹ Mi yʌq'ueñetla cortesía Timoteo jiñi c pi'ʌl bʌ ti e'tel, yic'ot j cʌñʌyo' bʌ che' bajche' Lucio, Jasón yic'ot Sosípater.

²² Joñon Tercio, tsa' bʌ c ts'ijba ili juñ, mi cʌq'ueñetla cortesía ti lac Yum.

²³ Mi yʌq'ueñetla cortesía Gayo i yum jiñi otot ba' jijlemon yic'ot ba' mi' tempañob i bʌ pejtelel xñopt'añob. Mi yʌq'ueñetla cortesía Erasto jiñi xcʌnta taq'uiñ cha'añ jiñi tejclum, yic'ot mi yʌq'ueñetla cortesía jiñi hermano Cuarto.

²⁴ [La' ajñic la' wic'ot i yutslel i pusic'al lac Yum Jesucristo ti la' pejtelel. Amén.]

La' tsictiyic i ñuclel Dios

²⁵ Jiñi Dios mu' bʌ i p'ʌt-esañetla che' bajche' mi yʌl jiñi wen t'añ mu' bʌ c su'b, mu' bʌ i yʌc' ti cʌjñel Jesucristo, come tsi' tsictesa jiñi mucul tac bʌ mach bʌ tsiquilic ti yam bʌ ora c'ʌlʌl ti' cajibal pañimil,

²⁶ che' ja'el tsictiyemix jiñi t'añ wʌle, ts'ijbubil i cha'añ x'alt'añob cha'añ ti' mandar jiñi Dios am bʌ ti pejtelel ora, tsi' yʌc'ʌ ti cʌjñel ti pejtelel pañimil cha'añ mi' jac'ob jiñi mu' bʌ i ñopob,

²⁷ jiñi cojach bʌ Dios am bʌ i ña'tʌbal, la' tsictiyic i ñuclel ti pejtelel ora ti Jesucristo. Amén.