Romanos 12 - Jiñi Tsiji' bʌ Wen T'añ cha'añ Estudio

2. I XIC'BENTEL BAJCHE' YOM MI' YAJÑEL XÑOPT'AÑOB ( 12.1—15.13 ) Jiñi tsiji' bʌ laj cuxtʌlel

¹ Jiñi cha'añ hermañujob, ti wocol t'añ mic su'beñetla cha'añ ti' p'untaya Dios, aq'uenla Dios la' bʌc'tal che' bajche' tsʌnsʌbil bʌ i majtañ anquese cuxulet to la, jiñʌch ch'ujul bʌ i majtañ yic'ot uts'at bʌ mi' q'uel, jiñʌch i ch'ujutesʌntel ti' isujm.

² Mach mi la' mel bajche' mi' melob jiñi año' bʌ ti pañimil, la' q'uextʌyic la' pusic'al ti tsijib, cha'añ mi la' cʌn chuqui yom Dios, jiñʌch wen tac bʌ yic'ot ts'ʌcʌl tac bʌ mu' bʌ i mulan.

³ Mic su'beñetla ti' yutslel i pusic'al Dios tsa' bʌ aq'uentiyon: Ti jujuntiquiletla mach mi la' ña'tan ti la' pusic'al ñumen añ la ñuclel che' bajche' añ, ña'tan jach la ti toj la ñuclel ti jujuntiquiletla che' bajche' tsi' yʌq'ueyetla la ñop Dios.

⁴ Che' bajche' ti lac bʌc'tal añ ca'bʌl chucbil tac bʌ, pero mach junchajpic jach i c'ʌjñibal,

⁵ che' ja'el joñonla anquese ca'bʌlonla, jump'ejl jach lac bʌc'tal ti Cristo, lac tem cha'añʌch lac bʌ.

⁶ Mach junchajpic jach laj c'ʌjñibal tsa' bʌ aq'uentiyonla ti' yutslel i pusic'al Dios: Mi añ lac c'ʌjñibal ti subt'añ, la' laj su'b ti uts'at che' bajche' tsi' yʌq'ueyonla lac ñop Dios;

⁷ mi cha'añʌch mi laj coltañ lac pi'ʌlob, la' laj coltañob; mi cha'añ mi lac cha'len cʌntesa, la' lac cha'len cʌntesa;

⁸ mi cha'añ i ñuq'uesʌntel i pusic'al lac pi'ʌlob, la' lac ñuq'uesʌbeñob i pusic'al; mi cha'añ mi lac pucbeñob lac chu'bʌañ, la' lac cʌc' ti pejtelel lac pusic'al; mi cha'añ mi lac mel lac que'tel, la' lac wen mel ti uts'at; mi cha'añ la cujil p'untaya, la' lac cha'len ti' tijicñʌyel lac pusic'al.

Jiñi yom bʌ mi' mel xñopt'añob

⁹ Cha'lenla c'uxbiya ti isujm. Ts'a'lenla jontolil yic'ot melela chuqui tac wen.

¹⁰ C'uxbin la' bʌ, come la' pi'ʌl la' bʌ; yom ñumen ñuc mi la' q'uel la' pi'ʌlob che' bajche' mi la' bajñel q'uel la' bʌ.

¹¹ Mi añ chuqui yom melol, mach yomic ts'u'betla, yom chʌn ch'ejletla ti e'tel; cha'lenla i ye'tel lac Yum ti' tijicñʌyel la' pusic'al;

¹² yom tijicñayetla ti la' pijtaya, cuchula la' wocol ti uts'at, chʌn cha'lenla oración.

¹³ Coltañla i cha'año' bʌ Dios ti pejtelel chuqui tac añ to yom i cha'añob yic'ot otsanla ti la' wotot jiñi mu' bʌ i jula'tañetla.

¹⁴ Aq'ueñob i yutslel la' t'añ jiñi mu' bʌ i tic'lañetla; ac'ʌla i yutslel la' t'añ, mach mi la' p'ajob.

¹⁵ Yom tijicñayetla yic'ot jiñi tijicñayo' bʌ; cha'lenla uq'uel yic'ot jiñi mu' bʌ i cha'leñob uq'uel.

¹⁶ Ajñenla ti jump'ejl la' pusic'al yic'ot la' pi'ʌlob; mach mi la' q'uel la' bʌ ti ñuc, tem ajñenla yic'ot jiñi pec' bʌ mi' melob i bʌ. Mach mi la' bajñel ña'tan ñumen ca'bʌl la' ña'tʌbal.

¹⁷ Mach mi la' q'uextan jontolil; ña'tan la' mel chuqui toj ti' wut pejtelel wiñicob x'ixicob.

¹⁸ Cha'lenla wersa cha'añ ñʌch'ʌl mi la' wajñel yic'ot pejtelel wiñicob x'ixicob.

¹⁹ C'uxbibilet bʌ la, mach mi la' q'uextan jontolil, la' i q'uextan Dios ti' mich'ajel, come ts'ijbubil: “Joñon mij q'uextan jontolil, joñon mi cʌq'ueñob i tojol i mul, che' tsi' yʌlʌ lac Yum”, che'en lac Yum.

²⁰ Jiñi cha'añ mi añ i wi'ñal la' contra, aq'uen chuqui mi' c'ux; mi añ i tiquinti', aq'uen chuqui mi' jap; mi tsa' mele che' bajche' iliyi, chʌc waxan i wut mi caj i majlel cha'añ quisin.

²¹ Mach a wʌc' a bʌ ti' jac'ol jontolil, mele chuqui wen cha'añ ma' mʌlben jiñi jontolil.