Romanos 11 - Jiñi Tsiji' bʌ Wen T'añ cha'añ Estudio

Añob to israelob yajcʌbilo' bʌ i cha'añ Dios

¹ Jiñi cha'añ mi j c'ajtibeñetla: ¿Tsa' ba i choco Dios i tejclum? ¡Ma'añic mi ts'ita'ic!, come joñon ja'el israelon, i p'olbalon Abraham, tilemon ti' p'olbal Benjamín.

² Dios ma'añic tsi' choco i cha'año' bʌ come wʌn cʌmbilob i cha'añ c'ʌlʌl ti wajali. ¿O mach ba la' wujilic chuqui tsi' yʌlʌ i Ts'ijbujel Dios cha'añ Elías, che' ba' ora tsi' c'ajtibe Dios cha'añ mi' contrajin israelob? Tsi' yʌlʌ:

³ “C Yum, tsa'ix i tsʌnsayob x'alt'añob a cha'añ, tsa'ix i jemeyob i yajñib tac ba' ma' wʌq'uentel a majtañ; c bajñel jax tsa' cʌleyon, yom i tsʌnsañoñob ja'el”, che'en Elías.

⁴ Pero ¿bajche' tsi' jac'be Dios? “Woli j cʌntan ojlil i waxʌclujumbajc' (7,000) wiñicob mach bʌ añic tsi' ñocchocoyob i bʌ ti' tojlel Baal”, che'en.

⁵ Che' ja'el wʌle añ israelob yajcʌbilo' bʌ i cha'añ Dios ti' yutslel i pusic'al.

⁶ Jiñi cha'añ mi Dios tsi' yajcayob ti' yutslel i pusic'al, che' jiñi mach cha'añic wen bʌ i melbalob. Tsa'ic i yajcayob cha'añ wen bʌ i melbalob, che' jiñi mach i majtañobic, i tojolobʌch i ye'tel. [Mi Dios tsi' yajcayob cha'añ wen bʌ i melbalob, che' jiñi mach i yutslelix Dios; mach cha'añic wen bʌ lac melbal mi lac taj lac wenlel.]

⁷ ¿Chuqui mi lac cʌl che' jiñi? Jiñi tsa' bʌ i sajcayob jiñi israelob ma'añic tsi' tajayob, pero jiñi yajcʌbilo' bʌ tsi' tajayob. Jiñi yaño' bʌ tsa' tsʌts-esʌbentiyob i pusic'al;

⁸ che' bajche' ts'ijbubil: “Dios tsi' yotsayob ti tonto, cha'añ ma'añic mi' c'otelob i wut, yic'ot cha'añ ma'añic mi' yu'biñob t'añ ti' chiquin, c'ʌlʌl wʌle”, che'en.

⁹ David ja'el tsi' yʌlʌ: “La' pʌntʌyic i q'uiñijelob ti yac ba' mi' yajlelob cha'añ mi' tojob i mul.

¹⁰ La' yajpicob i wut cha'añ ma'añic mi' q'uelob pañimil, yic'ot c'uchchocobeñob i pat ti pejtelel ora”, che'en.

I coltʌntel jiñi gentilob

¹¹ Pero joñon mi c'ajtibeñetla: ¿Tsa' ba i jats'ʌyob i yoc israelob cha'añ mi' junyajlel yajlelob? ¡Ma'añic mi ts'ita'ic! Cha'añ ti' caj tsi' ñusʌbeyob i t'añ Dios tsa' tili i coltʌntel jiñi gentilob, cha'añ mi' techbentelob i tsʌytsʌyñʌyel i pusic'al.

¹² Mi cha'añ ti' caj i ñusa t'añ jiñi israelob tsi' tajayob i wenlel jiñi año' bʌ ti pañimil yic'ot mi cha'añ ti' caj tsa' yajliyob jiñi israelob tsi' tajayob i wenlel jiñi gentilob, ¿mach ba ñumen ca'bʌlic mi caj i tajob i wenlel che' ba' ora mi' caj i cha' coltʌntelob?

¹³ Wʌle mic pejcañetla gentilet bʌ la. Come chocbilon majlel ti subt'añ ti' tojlel gentilob, mij q'uel ti wen ñuc que'tel.

¹⁴ Muq'uic i mejlel c techbeñob tsʌytsʌyña bʌ i pusic'al c pi'ʌlob che' mi la' ñop Dios, cha'añ mi' tajob i coltʌntel lamital,

¹⁵ come tsa' poj tʌjts'iyob loq'uel jiñi israelob cha'añʌch mi' yuts-esʌntelob wiñicob x'ixicob ti pañimil, ¿chuqui mi caj i tajob jiñi israelob che' ba' ora mi cha' ch'ʌjmelob ti' wenta ti' tojlel Dios? Mi caj i yʌq'ueñtelob i cuxtʌlel come cʌn chʌmeñobix yu'bil.

¹⁶ Mi la cujil ch'ujulʌch jiñi ñaxan bʌ waj mu' bʌ la cʌq'uen Dios, che'ʌch ja'el ti' junc'ojlel jiñi sa'; mi la cujil ch'ujul i wi' jiñi te', che'ʌch ja'el i c'ʌb tac.

¹⁷ Mi añ lamital i c'ʌb jiñi te', tsa' bʌ jajqui loq'uel, ixcu jatet, i c'ʌbet olivo te' tsa' jach bʌ yʌlo coli ti mate'el; tsa' jach ñʌjp'iyet ochel ba' tsa' jajqui loq'uel i c'ʌb, tsa' taja a p'ʌtʌlel ti' wi' yic'ot ti' yetsel jiñi wen bʌ olivo te'.

¹⁸ Mach a su'b a bʌ ti ñuc ti' tojlel i c'ʌb te' tsa' bʌ jajqui loq'uel. Mi tsa' su'bu a bʌ ti ñuc, ña'tan mach jatetic wola' wʌq'uen i p'ʌtʌlel i wi' tac jiñi te', jiñi i wi' tac mi' yʌq'ueñet a p'ʌtʌlel.

¹⁹ I tajol mi caj a wʌl: Tsa' jajqui loq'uel i c'ʌb te', cha'añ mic mejlel ti ñʌjp'el ochel.

²⁰ Isujmʌch; tsa' jajqui loq'uel come ma'añic tsi' ñopoyob, pero jatet ma' cʌytʌl ba' ochemet cha'añ jach tsa' ñopo. Jiñi cha'añ mach a q'uel a bʌ ti ñuc, cha'len bʌq'uen,

²¹ mi Dios ma'añic tsi' ñusʌbeyob mul jiñi mero i c'ʌb olivo te', che'ʌch ja'el jatet ma'añic mi caj i ñusʌbeñet.

²² Ña'tan che' bajche' añ i yutslel i pusic'al Dios yic'ot i mich'ajel; mi' pʌs i mich'ajel ti' tojlel jiñi tsa' bʌ yajliyob, pero i yutslel i pusic'al mi caj i yajñel ti a tojlel mi xuc'ul ma' wajñel ti' yutslel i pusic'al, che' machic jax jiñi, jatet ja'el mi caj a jajquel loq'uel.

²³ Jiñi tsa' bʌ jajqui loq'uel mi caj i cha' otsʌntel mi tsi' sutq'uiyob i bʌ cha'añ mi' ñopob Dios, come p'ʌtʌlʌch Dios cha'añ mi mejlel i cha' otsañob.

²⁴ Mi jatet tsa' tsejpiyet loq'uel ti jiñi olivo te' tsa' jach bʌ bajñel coli ti mate'el, mi tsa' mejliyet ti ñʌjp'el ochel ti jiñi wen bʌ olivo te', ¿Mach ba ñumeñic mi' mejlel ti cha' ñʌjp'el ochel ti' c'ʌb jiñi mero i c'ʌb olivo te' ya' ba' tsa' jajqui loq'uel?

I coltʌntel israelob

²⁵ Hermañujob, yom mi la' ña'tan jiñi t'añ mach bʌ tsictiyemic ti yam bʌ ora, ame ñuquic mi la' lon q'uel la' bʌ ti la' bajñel pusic'al, tsa' tsʌts-ayob i pusic'al lamital israelob jinto ts'ʌcʌl mi' yochelob jiñi gentilob ti' ñopol Dios.

²⁶ Che' jiñi, pejtelel israelob mi caj i coltʌntelob che' bajche' ts'ijbubil: “Tal juntiquil xColtaya loq'uem bʌ ti Sión, mi caj i jisʌben i jontolil i p'olbal Jacob.

²⁷ Jiñʌch xuc'ul bʌ c t'añ tsa' bʌ c su'beyob che' ba' ora mic loc'sʌbeñob i mul”, che'en Dios.

²⁸ Wʌle jiñi israelob woli' contrajiñob Dios cha'añ jiñi wen t'añ cha'añ mi' tajob i coltʌntel jiñi gentilob, pero cha'añ ti' caj yajcʌbilob, c'uxbibilob ti Dios, come i p'olbalob Jacob,

²⁹ Dios ma'añic mi' q'uextan i pusic'al che' mi' yʌq'ueñonla lac majtañ, yic'ot ma'añic mi' q'uextan i pusic'al che' mi' pʌyonla.

³⁰ Che' bajche' jatetla ja'el ti yam bʌ ora tsa' la' ñusa Dios, pero wʌle tsa'ix p'untʌntiyetla cha'añ ti' caj tsi' ñusayob Dios jiñi israelob,

³¹ che' ja'el wʌle jiñi israelob tsa' bʌ i ñusayob Dios, che' bajche' tsa' p'untʌntiyetla che'ʌch ja'el mi caj i cha' p'untʌntelob,

³² come Dios tsi' cʌyʌ pejtelel wiñicob x'ixicob ti mulil, cha'añ mi' pʌsbeñob i yutslel i pusic'al ti' pejtelelob.

I c'ʌyintel Dios cha'añ i ña'tʌbal

³³ Wen ca'bʌl i yutslel i pusic'al Dios, ma'añic i p'isol i ña'tʌbal yic'ot i cʌmbal. Mach mejlic laj cʌmben i ña'tʌbal yic'ot mach mejlic lac ch'ʌmben isujm jiñi mu' bʌ i mel,

³⁴ come, ¿am ba majqui tsi' cʌmbe i ña'tʌbal Dios? ¿O am ba majqui tsi' cʌntesa?

³⁵ ¿Am ba majqui tsi' yʌq'ue Dios i majtañ ti ñaxan, cha'añ mi' cha' ch'ʌmben i q'uexol?

³⁶ Come ch'oyol ti Dios pejtelel chuqui tac añ, ti pejtelel cʌntʌbil i cha'añ, yic'ot i cha'añʌch Dios pejtelel chuqui tac añ. La' sujbic i ñuclel Dios ti pejtelel ora. Amén.