Romanos 10 - Jiñi Tsiji' bʌ Wen T'añ cha'añ Estudio

¹ Quermañujob, jiñi com bʌ ti pejtelel c pusic'al, yic'ot jiñi mu' bʌ c'ajtiben Dios ti oración jiñʌch cha'añ mi' coltʌntelob israelob,

² come mic su'b ti isujm, cha'añ wen ch'ejlob i pusic'al ti ye'tel Dios, pero mach yujilobic i melol chuqui yom Dios.

³ Come mach yujilobic bajche' mi lac taj toj bʌ lac pusic'al ti Dios, woli jach i ñopob i bajñel wa'chocoñob i bʌ ti toj, ma'añic mi' ch'ʌmob ti' wenta i tojel i coltʌntel chajpʌbil bʌ i cha'añ Dios,

⁴ come ti Cristo tsa' jili i c'ʌjñibal mandar, mi yʌq'uentel toj bʌ i pusic'al majqui jach mi' ñop.

⁵ Moisés tsi' ts'ijba bajche' mi' tajob toj bʌ i pusic'al ti' jiñi mandar. Tsi' yʌlʌ: “Jiñi wiñic mu' bʌ i jac' ti ts'ʌcʌl jiñi mandar cuxul mi caj i yajñel”, che'en.

⁶ Pero yambʌyʌch isujmlel jiñi toj bʌ lac pusic'al mu' bʌ la cʌq'uentel che' mi lac ñop Cristo, mi yʌl che' bajche' iliyi: Mach mi la' wʌl ti la' pusic'al: ¿Majqui mi caj i letsel ti panchan? (Iliyi jiñʌch, cha'añ mi' pʌy ju'bel Cristo).

⁷ Mi yomic ma' wʌl, ¿majqui mi caj i ju'bel ochel ti' yajñib chʌmeño' bʌ? (Iliyi, jiñʌch cha'añ mi' pʌy letsel Cristo ba'añ chʌmeño' bʌ).

⁸ Pero ¿chuqui mi yʌl? “Lʌc'ʌl añ jiñi t'añ ba'añet, añ ti a wej yic'ot añ ti a pusic'al”. Jiñʌch jiñi wen t'añ mu' bʌ c su'b lojon cha'añ mi la' ñop.

⁹ Mi tsa' su'bu ti a wej a Yumʌch Jesús, mi tsa' ñopo ti a pusic'al cha'añ Dios tsi' teche ch'ojyel ba'añ chʌmeño' bʌ, mi caj a coltʌntel.

¹⁰ Come ti lac pusic'al mi lac ñop cha'añ mi la cʌq'uentel toj bʌ lac pusic'al; pero ti la quej mi lac su'b cha'añ tsa'ix lac ñopo, che' jiñi mi laj coltʌntel.

¹¹ Come i Ts'ijbujel Dios mi' yʌl: “Pejtelel jiñi mu' bʌ i ñop lac Yum Jesús ma'añic mi caj i yu'bin quisin”, che'en.

¹² Come junlajalob jach judíojob yic'ot griegojob, come juntiquil jach lac Yum ti lac pejtelel, mi yʌq'ueñob oñ bʌ i yutslel i pusic'al pejtelel mu' bʌ i pejcañob.

¹³ Come majqui jach mi' pejcan lac Yum ti' c'aba' mi taj i coltʌntel.

¹⁴ ¿Bajche' mi' mejlel i pejcañob lac Yum wiñicob x'ixicob che' maxto añic tsi' ñopoyob? ¿Bajche' mi mejlel i ñopob lac Yum che' maxto añic tsi' yu'bibeyob i t'añ? ¿Bajche' mi caj i yu'bibeñob i t'añ mi ma'añic majqui mi' su'beñob?

¹⁵ ¿Bajche' mi mejlel i cha'leñob subt'añ mi mach chocbilobic majlel? Che' bajche' ts'ijbubil: ¡Wen i t'ojol jax i yoc jiñi mu' bʌ i su'bob jiñi wen t'añ mu' bʌ i yʌq'ueñonla i ñʌch'tʌlel lac pusic'al!

¹⁶ Mach ti' pejtelobic tsi' jac'ʌyob jiñi wen t'añ, come Isaías tsi' yʌlʌ: “C Yum, ¿majqui tsi' ñopo jiñi t'añ tsa' bʌ c su'bu lojon?” Che'en.

¹⁷ Jiñi cha'añ mi lac ñop che' mi la cu'bin yic'ot mi lac cu'bin i t'añ Dios che' mi lac su'bentel.

¹⁸ Pero mij c'ajtibeñetla: ¿Mach ba tsa'ic i yu'biyob? Tsa' cu. Come ts'ijbubil: Tsa' pam pujquiyob i t'añ ti pejtelel pañimil, c'ʌlʌl ba' jaxʌl i lum jiñi israelob tsa' pam pujqui i t'añob.

¹⁹ Mic cha' c'ajtibeñetla: ¿Mach ba añic tsi' ch'ʌmbeyob isujm jiñi israelob? Ñaxan Moisés tsi' su'bu jiñi tsa' bʌ i yʌlʌ Dios: “Mi caj j coltañ yaño' bʌ mach bʌ c cha'añobic cha'añ mic techbeñetla i tsʌytsʌyñʌyel la' pusic'al; mi caj j coltañ jiñi mach bʌ añobic i ña'tʌbal cha'añ mic techbeñetla la' mich'ajel”, che'en Moisés.

²⁰ Ch'ejl i pusic'al Isaías tsi' c'ajtesa ili t'añ tsa' bʌ i yʌlʌ Dios: “Tsi' tajayon jiñi mach bʌ añic tsi' sajcayoñob, tsa' cʌc'ʌ c bʌ ti cʌjñel ti' tojlel jiñi mach bʌ añic tsi' ña'tayob i cʌñon”, che'en Dios.

²¹ Pero cha'añ israelob tsi' yʌlʌ: “Ti pejtelel q'uiñ tsa' c sʌts'ʌ j c'ʌb ti' tojlel mach bʌ xjac't'añobix, mu' bʌ i contrajiñob c t'añ”, che'en.