Mateo 9 - Jiñi Tsiji' bʌ Wen T'añ cha'añ Estudio

Jesús tsi' c'oq'uesa wiñic mach bʌ weñic i yoc i c'ʌb

¹ Che' jiñi, tsa' ochi Jesús ti barco, tsa' c'axi ti junwejl mar. Tsa' c'oti ti' lumal.

² Awilan, tsi' pʌyʌyob tilel juntiquil wiñic mach bʌ añix i p'ʌtʌlel i yoc i c'ʌb, ñolol ti' wʌyib. Che' bʌ tsi' q'uele Jesús woli' ñopob ti pusic'al jiñi wiñicob, tsi' su'be jiñi mach bʌ añix i p'ʌtʌlel i yoc i c'ʌb: —Calobil, tijicñesan a pusic'al. Ñusʌbilix a mul, —che'en.

³ Che' jiñi, cha'tiquil uxtiquil xts'ijbayajob tsi' yʌlʌyob ti' pusic'al: “Jiñi wiñic woli' p'aj Dios”.

⁴ Yujilix Jesús chuqui woli' yʌlob ti' pusic'al, jiñi cha'añ tsi' yʌlʌ: —¿Chucoch woliyetla ti' jontol bʌ t'añ ti la' pusic'al?

⁵ ¿Baqui bʌ ñumen uts'at mi la cʌl: “Ñusʌbilix a mul” o che' mic su'ben: “Ch'ojyen, cha'len xʌmbal?”

⁶ Pero cha'añ mi la' ña'tan añ i p'ʌtʌlel i Yalobil Wiñic ti pañimil cha'añ mi' ñusan mulil, —jiñi cha'añ tsi' su'be jiñi mach bʌ añix i p'ʌtʌlel i yoc i c'ʌb—: Ch'ojyen, teche a wʌyib, cucux ti a wotot, —che'en Jesús.

⁷ Jiñi cha'añ tsa' ch'ojyi, tsa' majli ti' yotot.

⁸ Che' bʌ tsi' q'ueleyob jiñi wiñicob x'ixicob tsa' toj sajtiyob i pusic'al, tsi' su'buyob i ñuclel Dios, cha'añ ti' caj Dios tsi' yʌq'ueyob i p'ʌtʌlel wiñicob x'ixicob.

Tsa' pʌjyi Mateo

⁹ Che' bʌ tsa' loq'ui Jesús ya'i, tsi' q'uele juntiquil wiñic i c'aba' Mateo, buchul ya' ba' mi' ch'ʌjmel tojoñel. Jesús tsi' su'be: —Tsajcañon. Mateo tsa' wa'le, tsa' caji i tsajcan majlel.

¹⁰ Che' buchul Jesús ti' t'ejl mesa ti yotot Mateo, tsa' tiliyob ca'bʌl xch'ʌm tojoñelob yic'ot xmulilob. Tsa' buchleyob ti' t'ejl mesa yic'ot Jesús yic'ot xcʌnt'añob i cha'añ.

¹¹ Che' bʌ tsi' q'ueleyob jiñi fariseojob, tsi' c'ajtibeyob xcʌnt'añob i cha'añ Jesús: —¿Chucoch woli' i tem c'ux waj jiñi la' Maestro yic'ot ch'ʌm tojoñelob yic'ot xmulilob?

¹² Che' bʌ tsi' yu'bi Jesús, tsi' su'beyob: —Jiñi c'oc'o' bʌ mach yomobic ts'ʌcʌntel, jiñi jach jiñi c'amo' bʌ.

¹³ Cucula, ñopola isujmlel jiñi t'añ: “Com mi la' cha'len p'untaya, mach comic mi la' wʌq'ueñon c majtañ”. Come ma'añic tsa' tili c pʌy jiñi tojo' bʌ i pusic'al, jiñi jach xmulilob cha'añ mi' cʌyob i mul.

C'ajtibal cha'añ ch'ajb

¹⁴ Tsa' tiliyob xcʌnt'añob i cha'añ Juan ba'añ Jesús, tsi' su'beyob: —¿Chucoch joñon lojon yic'ot jiñi fariseojob ca'bʌl mic cha'len lojon ch'ajb, pero jiñi xcʌnt'añob a cha'añ ma'añic mi' cha'leñob ch'ajb?

¹⁵ Jesús tsi' jac'beyob: —¿Mu' ba i mejlel i yajñelob ti ch'ijiyem jiñi woliyo' bʌ ti q'uiñijel che' temel to añob yic'ot jiñi xñujpuñijel? Pero tal i yorajlel che' mi caj i pʌjyel majlel jiñi wiñic woli bʌ ti ñujpuñijel, che' jiñi mi caj i cha'leñob ch'ajb.

¹⁶ Ma'añic majqui mi' c'ʌn tsiji' pisil cha'añ mi' lʌw tsuculix bʌ i pislel, come mu' jach i cha' tsijlel loq'uel, jinto ñumen colem i tsijlemal.

¹⁷ Che' ja'el, ma'añic majqui mi' yotsan tsiji' bʌ vino ti tsucul bʌ i yajñib melbil bʌ ti pʌchi. Mi che'ʌch tsi' mele, mi' tojmel i yajñib, mi' bejq'uel vino, mi' jilel i yajñib. Pero mi' yotsañob tsiji' to bʌ vino ti tsijib to bʌ i yajñib, che' jiñi, mi' jalijel i yajñib yic'ot jiñi vino ja'el.

Xch'oc bʌ i yalobil Jairo yic'ot x'ixic tsa' bʌ i tʌlbe i bujc Jesús

¹⁸ Che' woli' su'beñob jiñi t'añ, tsa' tili juntiquil wiñic i yum judíojob, tsi' ñocchoco i bʌ ti' tojlel Jesús, tsi' yʌlʌ: —Poj ujtel i chʌmel xch'oc bʌ calobil; pero la' ac'ʌ a c'ʌb ti' tojlel jiñi xch'oc cha'añ mi' cha' cuxtʌyel, —che'en.

¹⁹ Jesús tsa' wa'le, tsi' tsajca majlel temel yic'ot jiñi xcʌnt'añob i cha'añ.

²⁰ Ya'añ ja'el juntiquil x'ixic mach bʌ añic tsa' wis tijq'ui i bec' i ch'ich'el lajchʌmp'ejl ja'b. Tsa' tili ti' pat Jesús tsi' tʌlbe i yoc i pislel.

²¹ Jiñi x'ixic tsi' yʌlʌ ti' pusic'al: Mi tsa' jach c tʌlbe i pislel, mi caj j c'oc'an, che'en jiñi x'ixic.

²² Jesús tsi' sutq'ui i bʌ, tsi' q'uele, tsi' su'be: —Calobil, tijicñesan a pusic'al; tsa' taja a c'oc'lel cha'añ tsa' ñopoyon. Ti jiñi jach bʌ ora tsi' taja i tijicñʌyel.

²³ Che' bʌ tsa' ochi Jesús ti' yotot i yum judíojob, tsi' q'uele jiñi woli bʌ i wusob amʌy, yic'ot jiñi wiñicob x'ixicob ju'ucñayob bʌ ti c'am bʌ uq'uel.

²⁴ Jesús tsi' su'beyob: —Loq'uenla, mach chʌmeñic jiñi alʌ xch'oc, woli jach ti wʌyel. Tsi' wajleyob.

²⁵ Che' loq'uemobix jiñi wiñicob x'ixicob, tsa' ochi Jesús. Tsi' chucbe i c'ʌb jiñi alʌ xch'oc, tsa' tejchi ch'ojyel.

²⁶ Tsa' pam pujqui t'añ ti pejtelel xchumtʌl cha'añ jiñi tsa' bʌ ujti.

Tsa' c'otiyob i wut cha'tiquil xpots'

²⁷ Che' bʌ tsa' ñumi Jesús ya'i, tsi' tsajcayob majlel cha'tiquil xpots'ob. C'am tsi' cha'leyob t'añ: —I Yalobilet bʌ David, p'untañon lojon.

²⁸ Che' bʌ tsa' c'oti Jesús ti otot, tsa' tiliyob jiñi xpots'ob. Jesús tsi' su'beyob: —¿Mu' ba la' ñop mi mejlel j c'oq'uesañetla? Tsi' jac'beyob: —Mu' cu, c Yum.

²⁹ Jesús tsi' tʌlbeyob i wut. Tsi' yʌlʌ: —La' melbentiquetla che' bajche' tsa' la' ñopo, —che'en.

³⁰ Tsa' c'otiyob i wut. Jesús tsi' wen tiq'uiyob: —Chʌcʌ q'uele la' bʌ cha'añ ma'añic majqui mi yu'bin mi juntiquilic, —che'en.

³¹ Pero che' bʌ tsa' sujtiyob, tsi' pucuyob t'añ ti joytʌlel xchumtʌl tac cha'añ ñuc bʌ i melbal Jesús.

Jesús tsi' c'oq'uesa juntiquil x'uma'

³² Che' bʌ tsa' loq'uiyob, tsi' pʌyʌyob tilel ba'añ Jesús juntiquil x'uma' am bʌ i xi'bʌjlel.

³³ Che' bʌ tsa'ix chojqui loq'uel i xi'bʌjlel, jiñi x'uma' tsa' caji ti t'añ. Tsa' toj sajtiyob i pusic'al jiñi wiñicob x'ixicob, tsi' yʌlʌyob: —Ma'añic ba' ora tsa' laj q'uele che' bajche' iliyi ti' tojlel Israel.

³⁴ Jiñi fariseojob tsi' yʌlʌyob: —Ti' p'ʌtʌlel i yum xi'bajob, mi' choc loq'uel xi'bajob.

Wen ca'bʌl c'ajbal

³⁵ Jesús tsa' ñumi ti tejclum tac yic'ot ti xchumtʌl tac, tsi' cha'le cʌntesa ti' sinagoga tac judíojob, tsi' su'bu jiñi wen t'añ cha'añ i yumʌntel Dios; tsi' laj lajmesa c'am-ʌjel tac yic'ot pejtelel wocol tac bʌ ti' tojlel wiñicob x'ixicob.

³⁶ Che' bʌ tsi' q'uele Jesús tempʌbilob wiñicob x'ixicob, tsi' wen p'untayob, come tsi' q'uele c'uñob jax, pam pujquemob che' bajche' tʌñʌme' mach bʌ añic xcʌntaya i cha'añ.

³⁷ Jiñi cha'añ tsi' su'be jiñi xcʌnt'añob i cha'añ: “Isujm, wen ca'bʌl c'ajbal pero ma'añic ca'bʌl x'e'telob.

³⁸ Jiñi cha'añ c'ajtibenla i Yum c'ajbal ti wocol t'añ cha'añ mi' choc majlel x'e'telob ti' c'ajbal”, che'en.