Mateo 7 - Jiñi Tsiji' bʌ Wen T'añ cha'añ Estudio

Mach a q'uelben i mul a pi'ʌl

¹ Mach mi la' wʌlben i mul la' pi'ʌlob, cha'añ ma'añic mi yʌlob la' mul ja'el,

² come che' mi la' wʌlben i mul la' pi'ʌlob, mi caj i yʌlob la' mul ja'el. Che' bajche' mi la' p'isben wiñicob, che'ʌch mi caj la' p'isbentel ja'el.

³ ¿Chucoch ma' q'uel sajl te' am bʌ ti' wut a wermañu, che' ma'añic ma' q'uel cucujl am bʌ ti a wut?

⁴ ¿Bajche' mi mejlel a su'ben a wermañu: “La' c loc'san jiñi sajl te' am bʌ ti a wut”, che' añ cucujl ti a wut ja'el?

⁵ Cha'chajp jax bʌ a pusic'al, ñaxan loc'san jiñi cucujl am bʌ ti a wut, ti wi'il mi mejlel a wen q'uel cha'añ ma' loc'san jiñi sajl te' am bʌ ti' wut a wermañu.

⁶ Mach mi la' wʌq'uen ts'i' chuqui tac ch'ujul, mach mi la' wejtuben chitam jiñi la' perla ame mi' laj t'uchtan, che' jiñi mi' sujtel i lowetla.

C'ajtinla, sajcanla, pejcanla

⁷ C'ajtinla, mi caj la' wʌq'uentel. Sajcanla, mi caj la' taj. Pejcanla, mi caj la' jambentel.

⁸ Come majqui jach mi' c'ajtin mi caj i yʌq'uentel; jiñi mu' bʌ i sajcan mi' taj; jiñi mu' bʌ i pejcan mi caj i jambentel.

⁹ ¿Am ba juntiquil wiñic ti la' tojlel mu' bʌ caj i yʌq'ueñ xajlel i yalobil mi tsi' c'ajtibe waj?

¹⁰ Mi tsi' c'ajtibe chʌy, ¿mu' ba i yʌq'ueñ lucum?

¹¹ Anquese jatetla jontoletla, la' wujil i yʌq'uentel la' walobilob chuqui uts'at. ¿Mach ba ñumen yujilic ac'ol chuqui uts'at la' Tat am bʌ ti panchan che' mi la' c'ajtiben?

¹² Jiñi cha'añ, melela chuqui uts'at ti' tojlel la' pi'ʌlob mi la' wom mi' melob chuqui uts'at ti la' tojlel. Come jiñʌch jiñi mandar yic'ot i su'bal x'alt'añob.

Ch'och'oc bʌ i ti' otot

¹³ Ochenla ti ch'och'oc bʌ i ti', come colem i ti', ñuc i bijlel mu' bʌ i pʌyonla majlel ti wocol. Ca'bʌl mi' yochelob ya'i.

¹⁴ Come ch'och'oc i ti', ch'och'oc i bijlel ba' mi la' taj la' cuxtʌlel. Ts'ita' jax jiñi mu' bʌ i yochelob i taj i cuxtʌlel.

Mi' laj cʌn ti' melbal

¹⁵ Yom tsajiletla cha'añ jiñi lot bʌ x'alt'añob mu' bʌ i tilelob ba'añetla lʌpbil bʌ i cha'añob i tsutsel tʌñʌme' yilal, pero i pusic'al lajalob bajche' jontol bʌ bʌte'el ts'i'.

¹⁶ Ti' melbalob jach mi laj cʌn lot bʌ x'alt'añob ¿mu' ba i tujq'uel ts'usub ti ch'ixol, o wut te' i c'aba' higo ti ts'ʌ'b ac'ol?

¹⁷ Ixcu ja'el, pejtelel wen bʌ te' mi' yʌc' uts'at bʌ i wut, pero jiñi mach bʌ weñic bʌ te' mi' yʌc' leco bʌ i wut.

¹⁸ Mach mejlic i yʌc' leco bʌ i wut jiñi wen bʌ te'. Mi jiñic ja'el, mi' yʌc' uts'at bʌ i wut jiñi te' mach bʌ weñic.

¹⁹ Pejtelel te' mach bʌ añic mi' yʌc' uts'at bʌ i wut mi' sejq'uel. Mi' chojquel ti c'ajc.

²⁰ Jiñi cha'añ, ti' melbal jach mi la' cʌñob.

Mach cʌñʌyeticla

²¹ Mach ti pejtelelobic jiñi mu' bʌ i pejcañoñob: C Yum c Yum, mi caj i yochelob ti' yumʌntel jiñi am bʌ ti panchan. Jiñi jach mu' bʌ i melob bajche' yom c Tat am bʌ ti panchan.

²² Ti jiñi q'uiñ ca'bʌl mi caj i su'beñoñob: “C Yum, c Yum, ¿mach ba tsa'ic cha'le lojon subt'añ yic'ot tsa' c choco lojon loq'uel xi'bajob ti a c'aba', ti a c'aba' tsa' c pʌsʌ lojon ca'bʌl ñuc tac bʌ i yejtal a p'ʌtʌlel?”

²³ Che' jiñi mi caj c su'beñob: “Mach j cʌñʌyeticla. Tʌts'ʌ la' bʌ tic tojlel mu' bʌ la' cha'len jontolil”.

Cha'p'ejl i c'ʌclib otot

²⁴ Majqui jach mi yu'bibeñon c t'añ, yic'ot mu' bʌ i jac'beñon, lajalʌch bajche' wiñic p'ip' bʌ i ña'tʌbal, tsa' bʌ i mele i yotot ti' pam xajlel.

²⁵ Tsa' yajli ja'al, tsa' tili but'ja', tsa' ñumi ca'bʌl ic', tsi' jats'ʌ jiñi otot; pero ma'añic tsa' bujchi come wen wa'chocobil ti' pam xajlel.

²⁶ Pero majqui jach mi i yu'bibeñon c t'añ pero ma'añic mi' jac'beñon, lajalʌch bajche' wiñic mach bʌ añic i ña'tʌbal tsi' mele i yotot ti' pam ji'.

²⁷ Tsa' yajli ja'al, tsa' tili but'ja', tsa' ñumi ca'bʌl ic', tsi' jats'ʌ jiñi otot, tsa' bujchi, tsa' laj jejmi.

²⁸ Che' bʌ tsa' ujti i su'b Jesús ili t'añ, tsa' toj sajtiyob i pusic'al wiñicob x'ixicob cha'añ i cʌntesʌbal,

²⁹ come tsi' cʌntesayob yic'ot i p'ʌtʌlel i ye'tel, mach lajalic bajche' xts'ijbayajob.