Mateo 4 - Jiñi Tsiji' bʌ Wen T'añ cha'añ Estudio

I yilʌbentel i pusic'al Jesús

¹ Jiñi Espíritu tsi' pʌyʌ majlel Jesús ti jochol bʌ lum cha'añ mi' yilʌbentel i pusic'al ti xi'ba.

² Cha'c'al q'uiñ yic'ot cha'c'al ac'ʌlel ma'añic chuqui tsi' c'uxu; tsa'ix caji i yu'bin wi'ñal.

³ Tsa' tili jiñi xpʌy mulil ya' ba'añ Jesús. Tsi' su'be: —Mi i Yalobilet Dios, su'ben ili xajlel tac cha'añ mi' pʌntʌyel ti waj, —che'en.

⁴ Jesús tsi' su'be: —Ts'ijbubil: “Mach cuxulobic wiñicob x'ixicob cha'añ jach waj pero ti jujump'ejl t'añ mu' bʌ i loq'uel ti' yej Dios”, —che'en.

⁵ Jiñi xi'ba tsa' caji i pʌy majlel Jesús ti ch'ujul bʌ tejclum, ya'i tsi' pʌyʌ letsel ti' pam i jol jiñi Templo,

⁶ tsi' su'be: —Mi i Yalobilet Dios, choco ju'bel a bʌ ilayi come ts'ijbubil: “Mi caj i su'beñob i yÁngel cha'añ mi' cʌntañet. Mi caj i chuquetob ti' c'ʌb, cha'añ ma'añic ma' jats' a woc ti xajlel”, —che'en.

⁷ Jesús tsi' yʌlʌ: —Ts'ijbubil ja'el: “Mach yomic ma' wilʌben i pusic'al a Yum Dios”, —che'en.

⁸ Ti wi'il jiñi xi'ba tsi' pʌyʌ majlel ti wen chañ bʌ wits. Tsi' laj pʌsbe pejtelel i yumʌntel tac jiñi yumʌlob ti pañimil yic'ot i ñuclel,

⁹ tsi' su'be: —Muq'uic a ñocchocon a bʌ a ch'ujutesañon, mi caj cʌq'ueñet ti pejtelel iliyi, —che'en.

¹⁰ Jesús tsi' su'be: —Cucux, Satanás, come ts'ijbubil: “Cojach a Yum Dios yom ma' ch'ujutesan, cojach jiñi yom ma' yuman”, —che'en.

¹¹ Jiñi xi'ba tsi' cʌyʌ Jesús, che' jiñi, tsa' tili ángelob cha'añ mi' coltañob Jesús.

3. I YE'TEL JESÚS TI GALILEA ( 4.12—13.58 ) I tejchibal i ye'tel Jesús

¹² Che' bʌ tsi' yu'bi Jesús ya'añ Juan ti mʌjquibʌl, tsa' cha' majli ti' lum Galilea.

¹³ Che' bʌ tsa' loq'ui ti Nazaret tsa' majli ti chumtʌl ti Capernaúm, tejclum am bʌ ti ti' mar, lʌc'ʌl bʌ ti' lum Zabulón yic'ot Neftalí.

¹⁴ Cha'añ mi' ts'ʌctiyel jiñi t'añ tsa' bʌ i yʌlʌ jiñi x'alt'añ Isaías:

¹⁵ “Jiñi wiñicob x'ixicob año' bʌ ti Zabulón, yic'ot ti Neftalí, yic'ot año' bʌ ya' ti ti' colem mar, yic'ot ya' ti junwejl Jordán ja', yic'ot ti Galilea i lum gentilob,

¹⁶ jiñi wiñicob x'ixicob año' bʌ ti ic'ch'ipan bʌ pañimil tsi' q'ueleyob colem bʌ i sʌclel pañimil. Tsa' caji ti tilel i sʌclel pañimil ba'añ jiñi año' bʌ ti ac'ʌlel woli bʌ i chʌmelob”, che'en.

¹⁷ Ti jim bʌ ora tsa' caji ti subt'añ Jesús. Tsi' yʌlʌ: Cʌyʌx la' mul come lʌc'ʌlix i yumʌntel jiñi am bʌ ti panchan, che'en.

Jesús tsi' pʌyʌ chʌntiquil xchuc chʌyob

¹⁸ Che' woli ti xʌmbal ti ti' mar i c'aba' Galilea, Jesús tsi' q'uele cha'tiquil wiñicob, Simón am bʌ i cha'chajplel i c'aba' Pedro, yic'ot i yijts'in Simón i c'aba' Andrés. Woli' chocob ochel i chimo' chʌy ya' ti mar, come xchuc chʌyob.

¹⁹ Tsi' su'beyob: —La' la tsajcañon, wʌle mi caj la' wochel ti x'e'tel, cha'añ mi la' sʌclan wiñicob x'ixicob mu' bʌ i tsajcañon, —che'en.

²⁰ Ti' orajach tsi' cʌyʌyob i chimo' chʌy. Tsi' tsajcayob majlel Jesús.

²¹ Che' bʌ woli to i ts'ita' xʌn majlel Jesús, tsi' q'uele yam bʌ cha'tiquil, Jacobo yic'ot i yijts'in i c'aba' Juan, ya'añob ti barco yic'ot i tat i c'aba' Zebedeo. Woli' ts'isob i chimo' chʌy. Jesús tsi' pʌyʌyob.

²² Ti orajach tsi' cʌyʌyob i tat yic'ot i barco. Tsi' tsajcayob majlel.

Jesús tsi' cʌntesa bajc'ʌl wiñicob

²³ Jesús tsa' ñumi majlel ti pejtelel Galilea, tsi' cha'le cʌntesa ti' sinagoga tac judíojob. Tsi' su'bu jiñi wen t'añ cha'añ i yumʌntel Dios. Tsi' lajmesa pejtelel c'am-ʌjel tac yic'ot pejtelel i wocol wiñicob x'ixicob.

²⁴ Ti pejtelel Siria tsa' caji i yu'biñob ñuc tac bʌ i melbal Jesús. Tsi' pʌyʌyob tilel pejtelel xc'am-ʌjelob yic'ot woli bʌ i melob i pusic'al cha'añ i c'am-ʌjelob ti' chajp ti' chajp yic'ot jiñi año' bʌ i xi'bʌjlel yic'ot año' bʌ i cha'añ juquin chʌmel, yic'ot jiñi mach bʌ añobic i c'ʌjñibal i yoc i c'ʌb. Tsi' laj c'oq'uesayob.

²⁵ Tsi' tsajcayob majlel Jesús ca'bʌl wiñicob x'ixicob ch'oyolo' bʌ ti Galilea, ti Decápolis, ti Jerusalén, ti Judea yic'ot jiñi ch'oyolo' bʌ ti junwejl Jordán ja'. I cʌntesa Ba' mi lac taj ti lac Biblia I cʌntesa Jesús ti wits I cʌntesʌntel jiñi xcʌnt'añob I cʌntesa ti lajiya tac ; I cuxtʌlel jiñi wiñicob x'ixicob Cha'añ fariseojob yic'ot xcʌntesa mandarob Cha'añ jiñi cojix bʌ q'uiñ tac , I subt'añ Jesús ya' ti bujtʌl I cʌntesa Jesús ti' chajp ti' chajp ; Jiñi isujm bʌ waj cha'añ laj cuxtʌlel Jiñi cuxul bʌ ja' Tsa' majli Jesús ti' q'uiñilel lejchempat Jiñi wen bʌ xcʌnta tʌñʌme' Jiñi cojix bʌ Santa Cena ,;