Mateo 28 - Jiñi Tsiji' bʌ Wen T'añ cha'añ Estudio

Tsa' cha' ch'ojyi Jesús

¹ Che' bʌ tsa' ñumi i q'uiñilel c'aj-o, che' ti sʌc'ajel ti jiñi ñaxan bʌ q'uiñ ti semana, María ch'oyol bʌ ti Magdala yic'ot yam bʌ María tsa' majli i q'uelob jiñi mucoñibʌl.

² Ti jim bʌ ora tsa' ñumi tsʌts bʌ i yujquel lum; come juntiquil i yÁngel lac Yum tsa' ju'bi tilel ti panchan, tsi' lʌc'tesa i bʌ ba'añ jiñi mucoñibʌl, tsi' selc'u loq'uel jiñi xajlel, tsa' buchle ti' pam jiñi xajlel.

³ Che'ʌch yilal bajche' i c'ʌc'al chajc, i pislel wen sʌsʌc che' bajche' i ña'al tsʌñal.

⁴ Jiñi xcʌntayajob, che' bʌ tsi' q'ueleyob jiñi ángel tsiltsilñayob ti bʌq'uen lajal tsa' cʌleyob che' bajche' xchʌmel.

⁵ Jiñi ángel tsi' su'be jiñi x'ixicob: Jatetla mach mi la' cha'len bʌq'uen, come cujil woli la' sajcan Jesús, jiñi tsa' bʌ ch'ijle ti cruz.

⁶ Mach wʌ'ix añ, tsa'ix ch'ojyi che' bajche' tsi' yʌlʌ, la' laj, q'uelela i yajñib ba' tsi' ñolchocoyob lac Yum.

⁷ Cucula ti ora, su'benla xcʌnt'añob i cha'añ: “Tsa'ix ch'ojyi Jesús ba'añ chʌmeño' bʌ, awilan tsa'ix majli i pijtañetla ti Galilea; ya'i mi caj la' q'uel”. Tsa'ix c su'beyetla, che'en.

⁸ Jiñi x'ixicob tsi' tʌts'ʌyob i bʌ ba'añ jiñi mucoñibʌl, wen woliyob ti bʌq'uen pero wen tijicñayob i pusic'al ja'el, ajñel tsa' majli i su'beñob jiñi xcʌnt'añob i cha'añ Jesús. [Che' woli' majlelob i su'beñob wen t'añ jiñi xcʌnt'añob].

⁹ Awilan, tsa' loq'ui Jesús cha'añ mi' tajob, tsi' yʌlʌ: —Cotañet. Jiñi x'ixicob tsi' lʌc'tesayob i bʌ tsi' mec'beyob i yoc, yic'ot tsi' ch'ujutesayob.

¹⁰ Jiñi cha'añ Jesús tsi' su'beyob: —Mach mi la' cha'len bʌq'uen, cucula, su'benla jiñi quermañujob cha'añ mi' majlelob ti Galilea, ya'i mi caj i q'ueloñob, —che'en.

Jiñi xcʌntayajob tsi' su'buyob chuqui tac tsa' ujti

¹¹ Che' woliyob ti majlel jiñi x'ixicob, cha'tiquil uxtiquil xcʌntayajob tsa' majliyob ti tejclum, tsi' su'beyob jiñi ñuc bʌ motomajob pejtelel chuqui tac tsa' ujti.

¹² Jiñi ñuc bʌ motomajob tsi' tempayob i bʌ yic'ot xñoxob, tsi' temeyob i t'añ. Jiñi soldadojob tsa' aq'uentiyob ca'bʌl taq'uiñ,

¹³ tsa' su'bentiyob: Su'benla wiñicob x'ixicob: “Tsa' tili xcʌnt'añob i cha'añ ti ac'ʌlel, tsi' xujch'ibeyob loq'uel i bʌc'tal che' wʌyʌlon lojon”. Che' yom mi la' su'beñob.

¹⁴ Mi tsi' yu'bi jiñi gobernador, mi caj c wen pejcan lojon cha'añ ma'añic mi la' taj la' mul.

¹⁵ Jiñi soldadojob tsi' ch'ʌmʌyob jiñi taq'uiñ, tsi' meleyob che' bajche' tsa' su'bentiyob. Tsa' pujqui jiñi t'añ ba'añ judíojob c'ʌlʌl wʌle.

Tsa' chojquiyob majlel xcʌnt'añob ti subt'añ

¹⁶ Jiñi junlujuntiquil xcʌnt'añob tsa' majliyob ti Galilea ya' ti wits che' bajche' tsi' su'beyob Jesús.

¹⁷ Che' bʌ tsi' q'ueleyob Jesús, tsi' ch'ujutesayob; pero lamital tilebixelob i pusic'al.

¹⁸ Jesús tsi' lʌc'tesa i bʌ ti' tojlel jiñi xcʌnt'añob tsa' caji i su'beñob: “Aq'uebilon c p'ʌtʌlel cha'añ mic mel pejtelel chuqui com ti panchan yic'ot ti pañimil.

¹⁹ Jiñi cha'añ, cucula, sutq'uinla ti xcʌnt'añob wiñicob x'ixicob ti pejtelel pañimil. Aq'uenla ch'ʌmja' ti' c'aba' lac Tat, ti' c'aba' i Yalobil, yic'ot ti' c'aba' Ch'ujul bʌ Espíritu;

²⁰ yic'ot cʌntesanla cha'añ mi' laj jac'ob pejtelel chuqui tac tsa' c su'beyetla; añon quic'otetla ti pejtelel ora c'ʌlʌl ti' jilibal pañimil”. [Amén]