Mateo 27 - Jiñi Tsiji' bʌ Wen T'añ cha'añ Estudio

Jesús ti' tojlel Pilato

¹ Ti sʌc'ajel, pejtelel ñuc bʌ motomajob yic'ot xñoxob año' bʌ i ye'tel ti tejclum tsi' pejcayob i bʌ ti' contra Jesús, cha'añ mi' yʌc'ob ti chʌmel.

² Cʌchbil tsi' pʌyʌyob majlel, tsi' yʌc'ʌyob ti' c'ʌb jiñi gobernador i c'aba' Poncio Pilato.

Tsi' tsʌnsa i bʌ Judas

³ Jiñi cha'añ Judas, jiñi tsa' bʌ i yʌc'ʌ Jesús ti' c'ʌb i contra, che' bʌ tsi' q'uele cha'añ tsa'ix i yʌc'ʌ ti wocol Jesús, tsi' mele i pusic'al, tsa' cha' majli i sutq'uin jiñi lujump'ejl i cha'c'al sʌsʌc taq'uiñ ba'añ jiñi ñuc bʌ motomajob yic'ot xñoxob año' bʌ i ye'tel.

⁴ Tsi' yʌlʌ: —Tsa'ix c cha'le mulil che' bʌ tsa' cʌc'ʌ ti la' c'ʌb jiñi mach bʌ añic i mul. Tsi' su'beyob: —Mach c wentajic lojon, bajñel q'uele a bʌ ajñel.

⁵ Jiñi cha'añ Judas tsi' choco jiñi taq'uiñ ti Templo, tsa' loq'ui majlel, tsa' majli i jich' i bʌ.

⁶ Jiñi ñuc bʌ motomajob tsi' lotoyob jiñi taq'uiñ, tsi' yʌlʌyob: —Tic'bil ti mandar mi la cotsan ti' yajñib ofrenda, come jiñʌch i tojol i ch'ich'el wiñic.

⁷ Che' bʌ tsa' ujti i ña'tañob bajche' mi caj i c'ʌñob jiñi taq'uiñ, tsi' mʌñʌyob jamil i cha'añ xmel p'ejtob, cha'añ ya'i mi' mujquelob jiñi ch'oyolo' bʌ ti yan tac bʌ lum.

⁸ Jiñi cha'añ, añ i c'aba' jiñi jamil c'ʌlʌl wʌle: “Jamil mʌmbil bʌ ti' tojol i ch'ich'el wiñic”.

⁹ Che'ʌch tsa' ts'ʌctiyi i t'añ jiñi x'alt'añ Jeremías, che' bʌ tsi' yʌlʌ: “Tsi' ch'ʌmʌyob jiñi lujump'ejl i cha'c'al sʌsʌc taq'uiñ, jiñʌch i tojol c'uxbibil bʌ wiñic, come che'ʌch i tojol tsi' yʌlʌyob i yalobilob Israel;

¹⁰ tsi' yʌc'ʌyob cha'añ i tojol i jamil jiñi xmel p'ejtob, che' bajche' tsi' su'beyon lac Yum”.

Pilato tsi' pejca Jesús

¹¹ Che' bʌ ya' wa'al Jesús ti' tojel i wut jiñi gobernador, tsi' c'ajtibe: —¿Jatet ba i Reyet judíojob? —Che'en. Jesús tsi' jac'ʌ: —Joñon cu.

¹² Che' bʌ woli i jop'beñob i mul Jesús jiñi ñuc bʌ motomajob yic'ot xñoxob, Jesús ma'añic chuqui tsi' yʌlʌ.

¹³ Jiñi cha'añ Pilato tsi' su'be: —¿Mach ba añic woli a wu'bin jaychajp chuqui woli' yʌlob ti a contra? —Che'en.

¹⁴ Pero Jesús ma'añic tsi' jac'ʌ mi jump'ejlic t'añ cha'añ pejtelel chuqui woli i yʌlob ti' contra; jiñi cha'añ jiñi gobernador tsa' toj sajti i pusic'al.

Jesús tsa' ajq'ui ti chʌmel

¹⁵ I tilelʌch che' ti' yorajlel q'uiñijel, jiñi gobernador mi' yʌc' ti colel juntiquil xñujp'el, mu' bʌ i c'ajtiñob jiñi wiñicob cha'añ mi' colel.

¹⁶ Ti jim bʌ ora ya' ñup'ul juntiquil wiñic wen cʌmbil bʌ jiñʌch i c'aba' Barrabás.

¹⁷ Che' bʌ tempʌbilobix jiñi wiñicob, Pilato tsi' c'ajtibeyob: —¿Majqui la' wom mi cʌc' ti colel? ¿Jim ba Barrabás, o jim ba Jesús jiñi mu' bʌ i pejcʌntel ti Cristo? —Che'en.

¹⁸ (Come yujil Pilato cha'añ ti' tsʌytsʌyñʌyelob jach i pusic'al tsi' yʌc'ʌyob Cristo ti' c'ʌb).

¹⁹ Che' buchul Pilato ti melobʌjʌl, i yijñam tsi' chocbe tilel t'añ tsi' yʌlʌ: —Ma'añic chuqui yom ma' tumben jiñi toj bʌ wiñic, come sajmʌl wen ca'bʌl tsa' cu'bi wocol tic ñajal cha'añ jiñi wiñic, —che'en.

²⁰ Pero jiñi ñuc bʌ motomajob yic'ot xñoxob año' bʌ i ye'tel tsi' wersa xic'beyob jiñi wiñicob cha'añ mi' c'ajtibeñob Pilato cha'añ mi yʌc' ti colel Barrabás, pero la' tsʌnsʌntic Jesús.

²¹ Jiñi gobernador, tsi' c'ajtibeyob: —¿Majqui la' wom mi cʌc' ti colel? Tsi' jac'ʌyob: —Barrabás.

²² Pilato tsi' su'beyob: —¿Chuqui la' wom mic tumben, jiñi Jesús mu' bʌ i pejcʌntel ti Cristo? Ti' pejtelelob tsi' yʌlʌyob: —La' ch'ijlec ti cruz.

²³ Jiñi gobernador tsi' su'beyob: —¿Chucoch? ¿Chuqui ti jontolil tsi' cha'le? Pero tsa' utsi cajiyob ti c'am bʌ t'añ, tsi' yʌlʌyob: —La' ch'ijlec ti cruz.

²⁴ Che' bʌ tsi' q'uele Pilato ma'añic chuqui tsa' mejli i cha'añ, tsa' jach ñumen tejchiyob ti ca'bʌl leto; jiñi cha'añ tsi' c'ajti ja' cha'añ mi' poc i c'ʌb ti' tojelob i wut, tsi' yʌlʌ: —Joñon ma'añic c mul cha'añ i ch'ich'el ili [toj bʌ] wiñic; añix ti la' bajñel wenta, —che'en.

²⁵ Pejtelel wiñicob x'ixicob tsi' jac'ʌyob: —I ch'ich'el ili wiñic la' c toj lojon quic'ot calobil lojon.

²⁶ Che' jiñi tsi' colbeyob Barrabás; che' bʌ tsa' ujti i yʌc' ti jats'ol Jesús ti asiyal, tsi' yʌc'ʌ ti' c'ʌb soldadojob cha'añ mi' ch'ijob ti cruz.

²⁷ Jiñi soldadojob i cha'añ jiñi gobernador tsi' pʌyʌyob majlel Jesús ti colem bʌ i mal otot, tsi' tempayob tilel soldadojob ti' joytʌlel Jesús.

²⁸ Tsi' jochbeyob i pislel, tsi' mosoyob ti chʌcts'eran bʌ pʌl bʌ bujcʌl i cha'añ soldadojob,

²⁹ tsi' xot jalʌyob ch'ix, tsi' yʌq'ueyob ti' jol Jesús, tsi' yʌq'ueyob te' jam ti ñoj bʌ i c'ʌb; tsi' ñocchocoyob i bʌ ti' tojlel, tsi' wajleyob, tsi' yʌlʌyob: —¡Cotañet i Reyet bʌ judíojob!

³⁰ Tsi' tujbayob, tsi' cha' ch'ʌmbeyob jiñi te' jam, tsi' jats'beyob i jol.

³¹ Che' bʌ tsa' ujti i wajleñob, tsi' cha' jochbeyob jiñi pʌl bʌ bujcʌl, tsi' cha' lʌpbeyob jiñi i bujc, che' jiñi tsi' pʌyʌyob majlel cha'añ mi' ch'ijob ti cruz.

Tsi' ch'ijiyob ti cruz Jesús

³² Che' bʌ tsa' loq'uiyob majlel, tsi' tajayob juntiquil wiñic ch'oyol bʌ ti Cirene i c'aba' Simón; tsi' xic'beyob i q'uechben majlel i cruz Jesús.

³³ Tsa' c'otiyob ti jump'ejl bujtʌl i c'aba' Gólgota, am bʌ isujmlel ti lac t'añ: I yajñib bʌquel jolʌl,

³⁴ tsi' yʌq'ueyob i jap vinagre xʌ'bʌl yic'ot ch'aj bʌ pimel. Che' bʌ tsi' mits'ti'a, ma'añic tsi' japʌ.

³⁵ Che' bʌ tsa'ix i ch'ijiyob ti cruz, tsa' caji i pucbeñob i bʌ i pislel Jesús, tsi' cha'leyob yajcaya ti alas cha'añ mi' ña'tañob majqui mi caj i ch'ʌm, [cha'añ mi' ts'ʌctiyel tsa' bʌ i yʌlʌ x'alt'añ: “Tsi' pucbeyob i bʌ c pislel yic'ot tsi' cha'leyob yajcaya ti alas cha'añ mi' tsictiyel majqui mi' ch'ʌm c bujc”.]

³⁶ Tsa' buchleyob i cʌntan.

³⁷ Tsi' ch'ijiyob te' ti' chañelal i jol Jesús ba' ts'ijbubil t'añ ti' contra: ILI WIÑIC JIÑɅCH JESÚS, I REY JUDÍOJOB.

³⁸ Tsi' ch'ijiyob cha'tiquil xujch' yic'ot Jesús, juntiquil ti' ñoj, yam bʌ ti' ts'ej.

³⁹ Jiñi woliyo' bʌ ti ñumel tsi' p'ajayob Jesús, tsi' ñijcayob i jol.

⁴⁰ Tsi' yʌlʌyob: “Jatet, mu' bʌ a jisan Templo, mu' bʌ a cha' wa'chocon ti uxp'ejl q'uiñ, coltañ a bʌ, mi i Yalobilet Dios, juben ti cruz”.

⁴¹ Che' ja'el jiñi ñuc bʌ motomajob tsi' wajleyob Jesús temel yic'ot xts'ijbayajob, yic'ot fariseojob yic'ot xñoxob año' bʌ i ye'tel, tsi' yʌlʌyob:

⁴² Tsi' colta yaño' bʌ, pero mach mejlic i bajñel coltañ i bʌ; mi jiñʌch i Rey Israel mi' yʌl, la' cu ju'bic ya' ti cruz wʌle, che' jiñi mi caj lac ñop.

⁴³ Tsi' ñopo Dios; la' cu i coltañ wʌle mi che' yom, come tsi' yʌlʌ: “Joñon i Yalobilon Dios”.

⁴⁴ Jiñi xujch'ob, tsa' bʌ ch'ijleyob ti cruz yic'ot Jesús, tsi' wajleyob ja'el.

Tsa' chʌmi Jesús

⁴⁵ Ti xinq'uiñil tsa' ic'a pañimil c'ʌlʌl ti och'ajel q'uiñ.

⁴⁶ Che' yom i taj och'ajel q'uiñ, Jesús tsi' cha'le c'am bʌ t'añ, tsi' yʌlʌ: Elí, Elí, ¿lama sabactani? (Mu' bʌ i yʌl ti lac t'añ: C Dios, C Dios, ¿chucoch tsa' cʌyʌyon?).

⁴⁷ Che' bʌ tsi' yu'biyob jiñi lʌc'ʌl bʌ wa'alob, lamital tsi' yʌlʌyob: —Woli' pʌy tilel Elías.

⁴⁸ Juntiquil tsa' bʌc' majli ti ajñel tsi' ch'ʌmʌ chʌyo'ja'. Tsi' yʌq'ue i chʌy vinagre, tsi' yʌc'ʌ ti' ñi' te', tsi' yʌq'ue Jesús cha'añ mi' ts'ub.

⁴⁹ Yaño' bʌ tsi' yʌlʌyob: —Cʌyʌla, la' laj q'uel mi tal Elías i coltañ.

⁵⁰ Jesús tsi' cha' cha'le c'am bʌ t'añ, tsi' yʌc'ʌ majlel i ch'ujlel.

⁵¹ Awilan, jiñi pisil joc'ol bʌ ti Templo tsa' tsijli ti ojlil, ti' jol c'ʌlʌl ti' yoc, tsa' tili i yujquel lum tsa' tojp'i xajlel tac.

⁵² Tsa' jajmi mucoñibʌl tac, tsa' tejchiyob ch'ojyel ca'bʌl i cha'año' bʌ Dios tsa'ix bʌ chʌmiyob.

⁵³ Che' bʌ tsa' loq'uiyob ti mucoñibʌl, che' bʌ ch'ojyemix Jesús, tsa' majliyob ti jiñi ch'ujul bʌ tejclum. Tsa' tsictiyi ti' wut ca'bʌl wiñicob x'ixicob.

⁵⁴ Jiñi i yaj capitán jo'c'al soldadojob yic'ot jiñi soldadojob woli bʌ i cʌntañob Jesús, tsi' cha'leyob bʌq'uen che' bʌ tsi' q'ueleyob i yujquel lum yic'ot pejtelel tsa' bʌ ujti, tsi' yʌlʌyob: Isujmʌch ili wiñic i Yalobilʌch Dios.

⁵⁵ Ya'añob ca'bʌl x'ixicob woli jach bʌ i ñajti q'uelob, jiñobʌch tsa' bʌ i we'sayob Jesús c'ʌlʌl che' bʌ tsa' loq'ui majlel ti Galilea.

⁵⁶ Ya'añob ja'el María ch'oyol bʌ ti Magdala, yic'ot María i ña' Jacobo yic'ot José, yic'ot i ña' i yalobilob Zebedeo.

Tsa' mujqui Jesús

⁵⁷ Che' wolix i yic'an, tsa' tili juntiquil wen chumul bʌ wiñic i c'aba' José, ch'oyol bʌ ti Arimatea, jiñʌch xcʌnt'añ i cha'añ Jesús ja'el.

⁵⁸ Tsa' majli ba'añ Pilato, tsi' c'ajtibe i bʌc'tal Jesús, jiñi cha'añ Pilato tsi' yʌc'ʌ mandar cha'añ mi' yʌq'uentel.

⁵⁹ José tsi' ch'ʌmbe i bʌc'tal Jesús, tsi' bʌc'ʌ ti sʌc bʌ pisil,

⁶⁰ tsi' ñolchoco ti tsiji' bʌ i yotlel ch'ujlelʌl, tsa' bʌ i tocoj ti' mal colem bʌ xajlel, che' bʌ tsa'ix i selc'u majlel jiñi colem xajlel ti ti' i yotlel ch'ujlelʌl, tsa' sujti.

⁶¹ Ya'añob María ch'oyol bʌ ti Magdala yic'ot yam bʌ María, buchulob ti' tojel i yotlel ch'ujlelʌl.

Jiñi xcʌnta mucoñibʌl

⁶² Ti yijc'ʌlal che' bʌ tsa' ñumi i q'uiñilel chajpaya cha'añ Pascua, tsi' tempayob i bʌ jiñi ñuc bʌ motomajob yic'ot fariseojob tsa' majliyob ba'añ Pilato.

⁶³ Tsi' yʌlʌyob: —C yum, woli c ña'tan lojon chuqui tsi' yʌlʌ jiñi xlot che' cuxul to, tsi' yʌlʌ: “Ti' yuxp'ejlel q'uiñ mic cha' ch'ojyel”, —che'en.

⁶⁴ Cha'len mandar, che' jiñi, cha'añ mi' wen q'uejlel jiñi mucoñibʌl c'ʌlʌl ti yuxp'ejlel q'uiñ, ame majlicob jiñi xcʌnt'añob i cha'añ ti ac'ʌlel cha'añ mi' i xujch'ibeñob majlel i bʌc'tal, che' jiñi mi caj i su'beñob wiñicob x'ixicob: “Tsa'ix cha' ch'ojyi ba'añ chʌmeño' bʌ”, che' jiñi ñumen leco mi' majlel jiñi lot bajche' ti ñaxan.

⁶⁵ Pilato tsi' su'beyob: —Ya'añ jiñi xcʌntayajob, cucula, wen ñup'ula che' bajche' la' wujil i melol, —che'en.

⁶⁶ Che' jiñi tsa' majliyob, tsi' wen ñup'beyob i ti' jiñi mucoñibʌl yic'ot xajlel, ti wi'il tsi' yotsʌbeyob i sellojlel, tsi' su'be jiñi xcʌntayajob cha'añ mi' wen q'uelob. Jiñi t'añ Ba' mi lac taj ti Biblia C Dios, c Dios ¿chucoch tsa' cʌyʌyon? C Tat, ñusʌbeñob i mul come mach yujilobic chuqui woli i melob. Mic su'beñet wʌle jach ya'añet quic'ot ti panchan X'ixic q'uele ya'añ a walobil (ti wi'il tsi' su'be jiñi xcʌnt'añ) q'uele ya'añ a ña' , Tiquiñix c ti' Tsa'ix ts'ʌctiyi ti' pejtelel C Tat, ti a c'ʌb mi cʌc' c ch'ujlel