Mateo 25 - Jiñi Tsiji' bʌ Wen T'añ cha'añ Estudio

Lajiya cha'añ lujuntiquil xch'octacob

¹ I yumʌntel jiñi am bʌ ti panchan lajalʌch che' bajche' lujuntiquil xch'octacob tsa' bʌ i ch'ʌmʌyob majlel i candil, tsa' majli i tajob xñujpuñijel.

² Jo'tiquil añob i ña'tʌbal, yam bʌ jo'tiquil ma'añobic i ña'tʌbal.

³ Jiñi mach bʌ añobic i ña'tʌbal, tsi' ch'ʌmʌyob majlel candil, pero ma'añic tsi' ch'ʌmʌyob majlel ti oñ i cas;

⁴ jiñi año' bʌ i ña'tʌbal tsi' ch'ʌmʌyob majlel cas ti' buxil, yic'ot ti' candil.

⁵ Che' bʌ tsa' jal-a jiñi xñujpuñijel, tsi' cha'leyob ñʌcʌb, tsa' wʌyiyob.

⁶ Ti ojlil ac'ʌlel tsi' yu'biyob t'añ: ¡U'bix tilel xñujpuñijel; cucula taja tilel! Che'en.

⁷ Che' jiñi tsa' ch'ojyiyob jiñi xch'octacob, tsa' caji i chajpañob i candil.

⁸ Jiñi xch'octacob mach bʌ añobic i ña'tʌbal tsi' su'be jiñi año' bʌ i ña'tʌbal: “Aq'ueñon lojon ts'ita' la' cas, come yomix yajpel lojon j candil”.

⁹ Jiñi año' bʌ i ña'tʌbal tsi' yʌlʌyob: “Ma'añic, ame mach jasʌlic cha'añon lojon yic'ot cha'añetla ja'el, cucula ba'añ xchon casob, mʌñʌ la' cha'añ”.

¹⁰ Che' majlemob ti mʌñoñel tsa' tili jiñi xñujpuñijel, jiñi chajpʌbilobix bʌ tsa' ochiyob yic'ot jiñi xñujpuñijel; tsa' mʌjqui i ti' otot.

¹¹ Ti wi'il tsa' c'otiyob jiñi yam bʌ xch'octacob, tsi' yʌlʌyob: ¡c Yum, c Yum, jambeñon lojon!

¹² Tsi' jac'beyob: Ti isujm, mic su'beñetla, mach j cʌñʌyeticla, che'en.

¹³ Chʌcʌ q'uele la' bʌ che' jiñi, come ma'añic majqui yujil baqui bʌ q'uiñ mi baqui bʌ ora [mi' tilel i Yalobil Wiñic.]

Lajiya cha'añ talento tac

¹⁴ Come i yumʌntel jiñi am bʌ ti panchan lajalʌch bajche' juntiquil wiñic sami bʌ ti ñajt bʌ lum, tsi' pʌyʌ tilel x'e'telob i cha'añ tsi' yʌq'ue ti' wenta i chu'bʌañ.

¹⁵ Juntiquil tsi' yʌq'ue jo'p'ejl talento, yam bʌ tsi' yʌq'ue cha'p'ejl talento, yam bʌ tsi' yʌq'ue jump'ejl talento, ti jujuntiquil tsa' aq'uentiyob che' bajche' añob i c'ʌjñibal; tsa' majli ti ñajtʌl.

¹⁶ Jiñi tsa' bʌ i ch'ʌmʌ jo'p'ejl talento tsa' bʌc' majli i c'ʌn ti ganar, tsi' cha'le ti ganar yam bʌ jo'p'ejl talento.

¹⁷ Che' ja'el, jiñi tsa' bʌ i ch'ʌmʌ cha'p'ejl talento tsi' cha'le ti ganar yam bʌ cha'p'ejl talento.

¹⁸ Pero jiñi tsa' bʌ i ch'ʌmʌ jump'ejl talento tsa' majli i pic lum, ya'i tsi' mucbe i taq'uiñ i yum.

¹⁹ Che' bʌ tsa' ñumi ca'bʌl q'uiñ, tsa' cha' tili i yum jiñi x'e'telob cha'añ mi' q'uel bajche' tsi' c'ʌñʌyob jiñi taq'uiñ.

²⁰ Tsa' tili jiñi tsa' bʌ aq'uenti jo'p'ejl talento, tsi' ch'ʌmʌ tilel yam bʌ jo'p'ejl talento, tsi' yʌlʌ: “C yum, tsa' wʌq'ueyon jo'p'ejl talento; umba'añ, tsa' cha'le ti ganar yam bʌ jo'p'ejl talento”, che'en.

²¹ I yum tsi' su'be: “Uts'at bajche' tsa' mele, xuc'ul bʌ x'e'telet, che' añ ts'ita' ti a wenta xuc'ul tsa' mele, ca'bʌl mi caj cotsʌbeñet ti a wenta; ochen, tijicñesan a pusic'al yic'ot a Yum”, che'en.

²² Tsa' c'oti ja'el jiñi tsa' bʌ aq'uenti cha'p'ejl talento, tsi' su'be: “C yum, cha'p'ejl talento tsa' wʌq'ueyon; umba'añ, tsa' c cha'le ti ganar yam bʌ cha'p'ejl”, che'en.

²³ I yum tsi' su'be: “Uts'at bajche' tsa' mele, xuc'ul bʌ x'e'telet, che' añ ts'ita' ti a wenta xuc'ul tsa' mele, ca'bʌl mi caj cotsʌbeñet ti a wenta. Ochen, tijicñesan a pusic'al yic'ot a Yum”, che'en.

²⁴ Tsa' c'oti ja'el jiñi tsa' bʌ aq'uenti jump'ejl talento, tsi' yʌlʌ: “C yum, cujil bʌc'ñʌbilet, ma' tsepben i wut trigo ba' ma'añic tsa' pʌc'ʌ, ma' tuc'ben i wut ba' ma'añic tsa' wejch'u.

²⁵ Jiñi cha'añ tsa' bʌc'ñayon, tsa' majli c muc a taq'uiñ ti' mal lum; umba'añ, come a cha'añʌch”, che'en.

²⁶ I yum tsi' jac'ʌ: “Jontolet, ts'u'b bʌ x'e'telet, a wujilʌch mic tsepben i wut trigo ba' ma'añic tsa' c pʌc'ʌ, mic tuc'ben i wut ba' ma'añic tsa' c wejch'u.

²⁷ Jiñi cha'añ, a wʌc'ʌ c taq'uiñ tsi' c'ʌñʌ ba' mi' c'ʌjñel ti ganar, che'ic jiñi, mic cha' ch'ʌm c taq'uiñ yic'ot i jol che' mic julel.

²⁸ Chilbenla jiñi taq'uiñ, aq'uenla jiñi am bʌ lujump'ejl i talento.

²⁹ Come jiñi am bʌ i cha'añ, mi caj i yʌq'uentel yam bʌ che' jiñi wen oñ i cha'añ; majqui jach ma'añic i cha'añ mi caj i laj chilbentel ti' pejtelel chuqui añ i cha'añ.

³⁰ Chocola jiñi x'e'tel mach bʌ añic i c'ʌjñibal ti ic'ch'ipan bʌ pañimil ya' ti jumpat; ya'i mi' cajelob ti uq'uel yic'ot quech'ecña bʌ i bʌquel i yej”, che'en.

I yorajlel meloñel ti' tojlel wiñicob x'ixicob

³¹ Che' mi' tilel i Yalobil Wiñic ti' ñuclel, yic'ot pejtelel ch'ujul bʌ i yángelob mi' caj ti buchtʌl ti' yumʌntel yic'ot i ñuclel.

³² Ti' tojel i wut mi caj i tempʌntelob pejtelel wiñicob x'ixicob loq'uemo' bʌ ti pejtelel lum; che' jiñi mi caj i t'oxob che' bajche' xcʌnta tʌñʌme' mi' t'ox tʌñʌme' yic'ot chivo.

³³ Mi' yʌc' tʌñʌme' ti' ñoj. Mi' yʌc' chivo ti' ts'ej.

³⁴ Jiñi cha'añ jiñi Rey mi caj i su'ben jiñi año' bʌ ti' ñoj: “La' cu la, ochemet bʌ la ti' yutslel c Tat, ch'ʌmʌ la' yumʌntel chajpʌbil bʌ cha'añetla c'ʌlʌl ti' cajibal pañimil.

³⁵ Come che' bʌ tsa' cu'bi wi'ñal, tsa' la' wʌq'ueyon i bʌl c ñʌc'; che' bʌ tsa' cu'bi tiquinti', tsa' la' wʌq'ueyon chuqui mic jap; che' xñumelon jach, tsa' la' pʌyʌyon ochel ti la' wotot;

³⁶ che' pits'ilon, tsa' la' wʌq'ueyon chuqui mic xoj; che' c'amon, tsa' la' jula'tayon; che' añon ti mʌjquibʌl, tsa' tili la' q'uelon”, che'en.

³⁷ Jiñi cha'añ jiñi tojo' bʌ mi caj i jac'ob: “C Yum, ¿am ba ba' tsa' q'ueleyet lojon che' wi'ñayet? ¿Tsa' ba cʌq'ueyet lojon i bʌl a ñʌc'? Che' añ a tiquinti', ¿tsa' ba cʌq'ueyet lojon chuqui ma' jap?

³⁸ ¿Am ba ba' tsa' q'ueleyet lojon che' ñumel jach woliyet, tsa' c pʌyʌyet lojon ochel ti cotot yic'ot che' pits'ilet tsa' cʌq'ueyet lojon chuqui ma' xoj?

³⁹ ¿Am ba ba' tsa' q'ueleyet lojon che' c'amet o che' añet ti mʌjquibʌl tsajñi cula'tañet lojon?”

⁴⁰ Jiñi Rey mi caj i su'beñob: “Isujm mic su'beñetla, che' bʌ tsa' la' colta juntiquil quermañu, anquese mach ñuquic, joñon tsa' la' coltayon”, che'en.

⁴¹ Che' ja'el, mi caj i su'beñob jiñi año' bʌ ti' ts'ej: “Cucula, chojquemet bʌ la ti Dios, ochenla ti c'ajc mach bʌ añic i jilibal, chajpʌbil bʌ cha'añ xi'ba yic'ot i yÁngelob.

⁴² Come che' bʌ tsa' cu'bi wi'ñal, ma'añic tsa' la' wʌq'ueyon i bʌl c ñʌc', che' bʌ tsa' cu'bi tiquinti', ma'añic tsa' la' wʌq'ueyon chuqui mic jap;

⁴³ che' ñumel jach woliyon ma'añic tsa' la' pʌyʌyon ochel ti la' wotot; che' pits'ilon ma'añic tsa' la' wʌq'ueyon chuqui mic xoj; che' c'amon, che' añon ti mʌjquibʌl, ma'añic tsa' la' jula'tayon”, che'en.

⁴⁴ Che' ja'el mi caj i su'beñob: “C Yum, ¿am ba ba' tsa' q'ueleyet lojon che' wi'ñayet, che' añ a tiquinti', che' pits'ilet, che' c'amet, che' añet ti mʌjquibʌl i ma'añic tsa' j coltayet lojon?”

⁴⁵ Che' jiñi, mi caj i su'beñob: “Isujm mic su'beñetla, che' bʌ ma'añic tsa' la' colta juntiquil c cha'añ bʌ anquese mach ñuquic, ma'añic tsa' la' coltayon”, che'en.

⁴⁶ Jiñi cha'añ ili jontolo' bʌ mi caj i majlelob ti tojmulil mach bʌ añic mi' jilel, jiñi tojo' bʌ mi caj i tajob i cuxtʌlel mach bʌ añic mi' jilel, che'en Jesús.