Mateo 21 - Jiñi Tsiji' bʌ Wen T'añ cha'añ Estudio

5. JESÚS YA' TI JERUSALÉN: SEMANA CHE' MI CAJ I YU'BIN WOCOL ( 21.1—28.20 ) Che' bʌ tsa' ochi ti Jerusalén

¹ Che' lʌc'ʌlix añob ti Jerusalén, tsa' c'otiyob ya' ti Betfagé ti Olivo wits. Jesús tsi' choco majlel cha'tiquil xcʌnt'añob,

² tsi' su'beyob: Cucula ti tejclum ya' ti' tojel la' wut, ya' cʌchʌl mi caj la' taj juncojt i ña' burro yic'ot i yal. Jitila, pʌybeñonla tilel.

³ Mi añ majqui mi' pejcañetla yom mi la' su'ben: “Yom i c'ʌn lac Yum, ti wi'il mi caj i cha' sutq'uibeñetla”, che'en Jesús.

⁴ Che'ʌch tsa' ujti cha'añ mi' ts'ʌctiyel i t'añ x'alt'añ tsa' bʌ i yʌlʌ:

⁵ “Su'benla i yalobilob jiñi año' bʌ ti Sión: La' Rey woli' tilel ba'añetla, jiñi uts bʌ, c'ʌchʌl ti burro woli' tilel, c'ʌchʌl ti' yal burro yujil bʌ cuchijel”, che'en.

⁶ Jiñi xcʌnt'añob tsa' majliyob, tsi' meleyob che' bajche' tsi' su'beyob Jesús.

⁷ Tsi' pʌyʌyob tilel jiñi xña' burro yic'ot i yal. Jiñi xcʌnt'añob tsi' tasibeyob i pat xña' burro yic'ot i yal ti' pislelob. Jesús tsi' c'ʌchta.

⁸ Bajc'ʌl wiñicob x'ixicob tsi' tasiyob majlel jiñi bij ti' pislelob; yaño' bʌ tsi' tsepeyob ju'bel i c'ʌb te', tsa' caji i lijlij ac'ob majlel ya' ti bij.

⁹ Jiñi wiñicob x'ixicob woli bʌ i majlelob ti ñaxan yic'ot jiñi woli bʌ i tilelob ti' pat, c'am tsi' yʌlʌyob: ¡Coltañon lojon i Yalobilet bʌ David! ¡La' sujbic a ñuclel, jatet mu' bʌ a tilel ti' c'aba' lac Yum! ¡Coltañon lojon añet bʌ ti chañ!

¹⁰ Che' bʌ tsa' ochi Jesús ti Jerusalén, ti pejtelel jiñi año' bʌ ti tejclum tsa' cajiyob ti t'añ, tsi' yʌlʌyob: —¿Majqui ili wiñic?

¹¹ Jiñi wiñicob x'ixicob tsi' yʌlʌyob: —Jiñʌch Jesús jiñi x'alt'añ ch'oyol bʌ ti Nazaret am bʌ ti Galilea.

Jesús tsi' sʌc-esa jiñi Templo

¹² Jesús tsa' ochi ti Templo. Tsa' caji i choc loq'uel pejtelel jiñi woliyo' bʌ ti choñoñel yic'ot mʌñoñel ti Templo; Jesús tsi' ch'a' chocbeyob i mesa tac xq'uex taq'uiñob yic'ot i buchlib tac jiñi woli bʌ i choñob x'ujcuts.

¹³ Jesús tsi' su'beyob: Ts'ijbubil ti juñ, “Mi' caj ti ajlel cotot ti' yotlel oración”, pero jatetla wolix la' sutq'uin ti' ch'eñal xujch', che'en.

¹⁴ Tsa' tiliyob ba'añ Jesús ya' ti' mal Templo, jiñi xpots'ob yic'ot jiñi mach bʌ weñobic i yoc; tsi' c'oq'uesayob.

¹⁵ Pero jiñi ñuc bʌ motomajob yic'ot xts'ijbayajob che' bʌ tsi' q'ueleyob ñuc bʌ i melbal Jesús tsa' cajiyob ti mich'an che' bʌ tsi' yu'bibeyob i t'añ jiñi alobob woliyo' bʌ ti c'am bʌ t'añ ti ya' ti Templo, che' bʌ tsi' yʌlʌyob: Coltañon lojon i Yalobilet bʌ David.

¹⁶ Tsi' su'beyob Jesús: —¿Mach ba wolic a wu'bin chuqui woli' yʌlob? —Che'en. Jesús tsi' jac'beyob: —Woli cu. ¿Mach ba tsa'ic la' q'uele ti juñ: “Ti yej alobob yic'ot ti' yej jiñi woliyo' bʌ ti chu', tsi' wen tsictesayob i ñuclel Dios?”

¹⁷ Jesús tsi' cʌyʌyob, tsa' loq'ui majlel ti tejclum, tsa' c'oti ti Betania, ya'i tsa' jijli.

Jesús tsi' tiq'ui higuera te'

¹⁸ Ti sʌc'ajel che' woli' cha' majlel ti tejclum, Jesús tsa' caji ti wi'ñan.

¹⁹ Che' bʌ tsi' q'uele te' i c'aba' higuera lʌc'ʌl bʌ añ ti bij tsa' majli i q'uelben i wut, ma'añic chuqui tsi' taja, cojach i yopol añ; Jesús tsi' su'be: —Mach ma' chʌn ac' a wut ti pejtelel ora. Ti jiñi jach bʌ ora tsa' caji ti tiquin jiñi higuera te'.

²⁰ Che' bʌ tsi' q'ueleyob jiñi xcʌnt'añob, tsa' toj sajtiyob i pusic'al, tsi' yʌlʌyob: —¿Bajche' tsa' bʌc' tiqui jiñi higuera te'?

²¹ Jesús tsi' jac'beyob: —Isujm mic su'beñetla, mi mux la' ñop, mi ma'añic tilebixel bʌ la' pusic'al, mach cojic jach mi caj la' mel che' bajche' tsa' c melbe jiñi higuera te'. Mi tsa' caji la' su'ben jiñi wits: Loq'uen, ochen ti mar, che'ʌch mi' caj i yujtel.

²² Mi mux la' ñop mi caj la' wʌq'uentel pejtelel chuqui tac mi la' c'ajtin ti oración, —che'en Jesús.

I p'ʌtʌlel i ye'tel Jesús

²³ Che' bʌ tsa' ochi Jesús ti Templo, jiñi ñuc bʌ motomajob yic'ot jiñi xñoxob año' bʌ i ye'tel tsa' tiliyob ba' woli' cha'len cʌntesa, tsi' c'ajtibeyob: —¿Baqui tsa' taja a we'tel cha'añ ma' mel iliyi? ¿Majqui tsi' yʌq'ueyet a we'tel?

²⁴ Jesús tsi' jac'beyob: —Añ chuqui mij c'ajtibeñetla ja'el, mi muc'ʌch la' jac'beñon, joñon ja'el mi caj c su'beñetla baqui tsa' c taja que'tel cha'añ jiñi mu' bʌ c mel.

²⁵ ¿Baqui ch'oyol i ye'tel Juan tsa' bʌ i yʌc'ʌ ch'ʌmja'? ¿Ch'oyol ba ti panchan o ch'oyol ba ti wiñicob? Tsa' caji i pejcañob i bʌ, tsi' yʌlʌyob: —Mi tsa' lac su'be, “Ch'oyol ti panchan”, mi caj i su'beñonla: ¿Chucoch che' jiñi, ma'añic tsa' la' ñopbe i t'añ?

²⁶ Mi tsa' lac su'be: “Ch'oyol ti wiñicob”, mi lac bʌc'ñan wiñicob x'ixicob, come ti pejtelelob mi' yʌlob x'alt'añʌch jiñi Juan.

²⁷ Jiñi cha'añ tsi' yʌlʌyob: —Mach cujilic lojon, —che'en. Jesús tsi' su'beyob: —Che' ja'el, joñon ma'añic mic su'beñetla baqui tsa' c taja que'tel cha'añ jiñi mu' bʌ c mel.

Lajiya cha'añ cha'tiquil i yalobil wiñic

²⁸ ¿Bajche' mi la' wʌl? Añ juntiquil wiñic am bʌ cha'tiquil i yalobil, tsa' tili ba'añ ñaxan bʌ i yalobil, tsi' su'be: “Calobil, cucu wʌle ti e'tel tic ts'usubil”, che'en.

²⁹ I yalobil tsi' su'be: “Mach comic majlel”, pero ti wi'il tsi' q'uexta i pusic'al, tsa' majli.

³⁰ Jiñi wiñic tsa' tili ba'añ yam bʌ i yalobil, lajal tsi' su'be, jiñi i yalobil tsi' yʌlʌ: “Yom cu, muc'ʌch c majlel c yum”; pero ma'añic tsa' majli.

³¹ ¿Majqui ti' cha'ticlelob tsi' mero mele che' bajche' yom i tat? Tsi' yʌlʌyob: —Jiñi ñaxan bʌ. Jesús tsi' su'beyob: —Isujm mic su'beñetla, jiñi xch'ʌm tojoñelob yic'ot jiñi ts'i'lel x'ixicob ñaxan mi caj i majlelob ti la' tojlel ti' yumʌntel Dios.

³² Come Juan tsa' tili ba'añetla, tsa' ajñi ti toj bʌ bij, pero ma'añic tsa' la' ñopbe i t'añ, pero jiñi xch'ʌm tojoñelob yic'ot jiñi xts'i'lel x'ixicob tsi' ñopbeyob i t'añ. Pero jatetla anquese tsa' la' q'uele che' bajche' tsi' cʌyʌyob i mul, pero ma'añic tsa' la' cʌyʌ la' mul cha'añ mi la' ñopben i t'añ ti wi'il, —che'en Jesús.

Lajiya cha'añ jontol bʌ xcʌnta ts'usubilob

³³ U'binla yam bʌ t'añ ti lajiya: Añ juntiquil i yum otot, tsi' pʌc'ʌ ts'usubil, tsi' joy mʌcʌ ti corral, tsi' piqui lum ba' mi' t'uchtʌben loq'uel i ya'lel ts'usub; tsi' mele chañ bʌ q'ueloñib, tsi' yʌq'ueyob ti' wenta xcʌnta ts'usubilob. Tsa' majli ti yam bʌ lum.

³⁴ Che' lʌc'ʌlix i yorajlel mi' cajel ti wut, tsi' choco majlel yam bʌ x'e'telob i cha'añ. Tsa' majliyob ba'añ xcʌnta ts'usubilob cha'añ mi' ch'ʌmbeñob tilel i wut.

³⁵ Jiñi xcʌnta ts'usubilob tsi' chucuyob jiñi x'e'telob i cha'añ, juntiquil tsi' jats'ʌyob, jiñi yam bʌ tsi' tsʌnsayob, jiñi yam bʌ tsi' juluyob ti xajlel.

³⁶ I yum ts'usubil tsi' cha' chocbeyob majlel yam bʌ x'e'telob ñumen ca'bʌlob bajche' ti ñaxan. Jiñi xcʌnta ts'usubilob lajal tsi' tic'layob.

³⁷ Ti wi'il i yum ts'usubil tsi' choco majlel i yalobil ba'añob, tsi' yʌlʌ: “Mi caj i q'uelob ti ñuc calobil”, che'en.

³⁸ Che' bʌ tsi' q'ueleyob i yalobil jiñi yumʌl, jiñi xcʌnta ts'usubilob tsi' su'beyob i bʌ jiñʌch mu' bʌ caj i yochel ti yumʌl, con lac tsʌnsan cha'añ mi lac ch'ʌm pejtelel i chu'bʌañ.

³⁹ Tsi' chucuyob, tsi' chocoyob loq'uel ti ts'usubil, tsi' tsʌnsayob.

⁴⁰ Che' mi' tilel i yum ts'usubil, ¿chuqui mi caj i tumbeñob xcʌnta ts'usubilob? Che'en Jesús.

⁴¹ Tsi' su'beyob: —Jiñi jontolo' bʌ wiñicob ma'añic mi caj i p'untañob, mi caj i jisañob; mi caj i yʌc' i ts'usubil ti' wenta yaño' bʌ xcʌnta ts'usubilob mu' bʌ caj i yʌq'ueñob i wut che' ti' yorajlel.

⁴² Jesús tsi' c'ajtibeyob: —¿Mach ba añic tsa' la' q'uele jiñi t'añ ti' Ts'ijbujel Dios: “Jiñi xajlel tsa' bʌ i chocoyob xmel otot tsa' otsʌnti ti ñaxan bʌ i xujc otot. I melbalʌch lac Yum iliyi. Uts'atax mi laj q'uel?” Che'en Jesús.

⁴³ Jiñi cha'añ mic su'beñetla mi caj la' chilbentel i yumʌntel Dios, mi caj i yʌq'ueñtelob jiñi wiñicob x'ixicob mu' bʌ i yʌc'ob wen bʌ i wut.

⁴⁴ Jiñi mu' bʌ i yajlel ti' pam ili xajlel mi caj i xujlel. Jiñi mu' bʌ i tejñel ti ili xajlel mi caj i laj bic'tiyel, che'en Jesús.

⁴⁵ Che' bʌ tsi' yu'bibeyob i lajiya tac Jesús, jiñi ñuc bʌ motomajob yic'ot fariseojob tsi' ña'tayob woli' tajtʌlob ti t'añ.

⁴⁶ Che' bʌ woli' ña'tañob bajche' mi mejlel i chucob Jesús, tsi' bʌc'ñayob wiñicob x'ixicob come woli' yʌlob x'alt'añʌch.