Mateo 2 - Jiñi Tsiji' bʌ Wen T'añ cha'añ Estudio

Wiñicob año' bʌ i ña'tʌbal ch'oyolo' bʌ ti' pasibal q'uiñ

¹ Che' bʌ tsi' yila pañimil Jesús ya' ti Belén ti Judea, che' yumʌl jiñi Herodes, awilan, tsa' tiliyob ti Jerusalén wiñicob año' bʌ ca'bʌl i ña'tʌbal, ch'oyolo' bʌ ti' pasibal q'uiñ,

² tsi' c'ajtiyob: —¿Baqui añ i yum judíojob tsa' bʌ i yila pañimil? Come tsa' j q'uele lojon i yec' ti' pasibal q'uiñ. Tsa' tiliyon lojon cha'añ mic ch'ujutesan lojon.

³ Che' bʌ tsi' yu'bi jiñi t'añ jiñi yumʌl Herodes, tsi' mele i pusic'al yic'ot pejtelel wiñicob x'ixicob año' bʌ ti Jerusalén.

⁴ Jiñi cha'añ tsi' tempa pejtelel ñuc bʌ motomajob yic'ot xts'ijbayajob, tsi' c'ajtibeyob baqui mi caj i yilan pañimil jiñi Cristo.

⁵ Tsi' jac'beyob: —Ya' ti Belén ti Judea, come che'ʌch ts'ijbubil i cha'añ x'alt'añ:

⁶ “Ixcu jatetla añet bʌ la ti Belén ya' ti' lumal Judá, mach ba ch'och'oqueticla ti' tojlel i yumob Judá. Come ti la' tojlel mi caj i loq'uel juntiquil yumʌl mu' bʌ caj i cʌntan israelob, jiñi c cha'año' bʌ”.

⁷ Che' jiñi Herodes tsi' mucu pʌyʌ tilel jiñi wiñicob año' bʌ ca'bʌl i ña'tʌbal. Tsi' c'ajtibeyob baqui ora tsa' tsictiyi jiñi ec'.

⁸ Tsi' chocoyob majlel ti Belén, tsi' su'beyob: —Cucula, wersa sajcanla jiñi alʌl, che' mi la' taj, yom mi la' cha' tilel la' su'beñon cha'añ mic majlel c ch'ujutesan ja'el, —che'en Herodes.

⁹ Che' bʌ tsa' ujti i yu'bibeñob i t'añ jiñi yumʌl tsa' majliyob. Awilan, jiñi ec' tsa' bʌ i q'ueleyob ti' pasibal q'uiñ tsa' cha' caji ti xʌmbal majlel ti' tojel i wutob. Tsi' cʌyʌ i xʌmbal jiñi ec' ya' ti' chañelal ba'añ jiñi alʌl.

¹⁰ Che' bʌ tsi' q'ueleyob jiñi ec', wen tijicñayob jax i pusic'al tsi' yu'biyob.

¹¹ Che' bʌ tsa' ochiyob ti otot, tsi' q'ueleyob jiñi alʌl yic'ot María i ña'. Tsi' ñocchocoyob i bʌ cha'añ mi' ch'ujutesañob, che' jiñi tsi' jamʌyob caxate', tsi' yʌq'ueyob i majtañ: Oro, yic'ot xojocña bʌ pom, yic'ot mirra.

¹² Su'bebilobix jiñi wiñicob ti' ñajal cha'añ ma'añic mi' chʌn ñumelob ba'añ Herodes, tsa' sujtiyob majlel ti' lumal ti yam bʌ bij.

Tsa' puts'iyob ti Egipto

¹³ Che' sujtemobix jiñi wiñicob, awilan, tsa' tsictiyi i yÁngel lac Yum ti' ñajal José. Jiñi ángel tsi' yʌlʌ: Ch'ojyen. Pʌyʌ majlel jiñi alʌl yic'ot i ña'. Puts'en ti Egipto, cʌlejen ya'i jinto mic su'beñet, come Herodes mi caj i sʌclan jiñi alʌl cha'añ mi' tsʌnsan, che'en.

¹⁴ Tsa' ch'ojyi José. Tsi' pʌyʌ majlel alʌl yic'ot i ña' ti ac'ʌlel. Tsa' majli ti Egipto.

¹⁵ Ya'i tsa' cʌle jinto tsa' chʌmi Herodes. Che'ʌch tsa' ujti cha'añ mi' ts'ʌctiyel i t'añ lac Yum tsa' bʌ i yʌlʌ ti' yej x'alt'añ: “Tsa' c pʌyʌ loq'uel calobil ti Egipto”, che'en.

Tsa' tsʌnsʌnti alobob

¹⁶ Tsa' caji ti ca'bʌl mich'ajel Herodes che' bʌ tsi' ña'ta tsa' lotinti cha'añ jiñi wiñicob año' bʌ ca'bʌl i ña'tʌbal. Tsi' yʌc'ʌ mandar cha'añ mi' tsʌnsʌntelob pejtelel alʌ ch'itoñob maxto bʌ ts'ʌcʌlic cha'p'ejl i ja'bilel ya' bʌ añob ti Belén yic'ot ti' joytʌlel. Yujilix jiñi rey Herodes jayp'ejlix i ja'bilel jiñi alʌl, come tsi' su'beyob jiñi wiñicob año' bʌ ca'bʌl i ña'tʌbal.

¹⁷ Che' jiñi tsa' ts'ʌctiyi i t'añ jiñi x'alt'añ Jeremías tsa' bʌ i yʌlʌ:

¹⁸ “Tsa' u'binti c'am bʌ t'añ ya' ti Ramá, ca'bʌl uq'uel yic'ot we'ecña bʌ uq'uel. Raquel woli' chʌn uc'tan i yalobilob. Ma'añic tsi' jac'ʌ i ñʌch'chocontel i pusic'al come tsa' jili i yalobilob”.

Tsa' cha' sujtiyob ti Nazaret

¹⁹ Che' bʌ tsa' chʌmi Herodes, awilan ya' ti Egipto tsa' tsictiyi i yÁngel lac Yum ti' ñajal José.

²⁰ Tsi' yʌlʌ: Ch'ojyen. Pʌyʌ majlel jiñi alʌl yic'ot i ña'. Cucu ti' lumal Israel come chʌmeñobix jiñi yomo' bʌ i tsʌnsañob jiñi alʌl, che'en.

²¹ Jiñi cha'añ tsa' ch'ojyi. Tsi' pʌyʌ majlel alʌl yic'ot i ña'. Tsa' c'otiyob ti' lumal Israel.

²² José tsi' bʌc'ña majlel ya' ti Judea, come tsi' yu'bi woli ti yumʌntel Arquelao i yalobil Herodes. Jiñi Arquelao tsi' ch'ʌmbe i ye'tel i tat. Jiñi cha'añ tsa' majli ti' lum Galilea che' bajche' su'bebil ti' ñajal.

²³ Tsa' c'oti ti chumtʌl ti jump'ejl tejclum i c'aba' Nazaret cha'añ mi' ts'ʌctiyel i t'añ jiñi x'alt'añob: “Mi caj i su'bentel ti nazareno”.