Mateo 19 - Jiñi Tsiji' bʌ Wen T'añ cha'añ Estudio

I cʌntesa Jesús che' mi' cʌyob i bʌ xñujpuñijel

¹ Che' bʌ tsa' ujti ti cʌntesa Jesús, tsa' loq'ui ti' lum Galilea, tsa' majli ti lum i c'aba' Judea ti junwejl Jordán ja'.

² Bajc'ʌl wiñicob x'ixicob tsi' tsajcayob majlel. Ya'i tsi' lajmesa jiñi xc'am-ʌjelob.

³ Tsa' tiliyob fariseojob ba'añ Jesús, come yomob i yilʌben i pusic'al, tsi' c'ajtibeyob: —¿Tic'bil ba wiñic ti mandar cha'añ mi' cʌy i yijñam che' mach yomix i q'uel?

⁴ Jesús tsi' su'beyob: —¿Mach ba añic tsa' la' q'uele ti juñ: “Cha'añ Dios ti ñaxan, tsi' mele wiñic yic'ot x'ixic?” —Che'en.

⁵ Tsi' yʌlʌ: “Jiñi cha'añ mi' cʌy i tat i ña' wiñic, cha'añ mi' yajñel yic'ot i yijñam, come jiñi cha'tiquil mi' yochelob ti juntiquil jach”.

⁶ Mach chʌn cha'tiquilix, juntiquil jach. Jiñi cha'añ mach i t'ox wiñic chuqui Dios tsi' tempa, che'en Jesús.

⁷ Tsi' c'ajtibeyob: —¿Chucoch Moisés tsi' yʌlʌ cha'añ mi' mejlel cʌq'uen lojon quijñam i juñilel ba' ts'ijbubil cha'añ tsa'ix j cʌyʌ lojon?

⁸ Jesús tsi' jac'beyob: —Cha'añ i tsʌtslel la' pusic'al, jiñi cha'añ Moisés tsi' yʌc'ʌ i t'añ cha'añ mi' mejlel la' cʌy la' wijñam che' mi la' wʌq'uen i juñilel; pero mach che'ic tsa' ujti ti' cajibal pañimil.

⁹ Pero joñon mic su'beñetla majqui jach mi' to'ol cʌy i yijñam che' ma'añic i ts'i'lel, cha'añ jach yom i pʌy yam bʌ, mi' cha'len ts'i'lel; [jiñi mu' bʌ i pʌy jiñi cʌybil bʌ x'ixic, mi' cha'len ts'i'lel,] —che'en Jesús.

¹⁰ Jiñi xcʌnt'añob i cha'añ tsi' yʌlʌyob: —Mi che'ʌch mi' yajñel wiñic yic'ot i yijñam, tic'ʌl ñumen uts'at che' ma'añic mi' pʌy i yijñam.

¹¹ Jesús tsi' su'beyob: —Mach ti' pejtelelic mi mejlel i ch'ʌmbeñob isujm jiñi t'añ, jiñi jach jiñi tsa' bʌ aq'uentiyob i ch'ʌmben isujm.

¹² Añ wiñicob mach bʌ añic mi caj i pʌyob i yijñam, come che'ʌch tsi' yilayob pañimil, yaño' bʌ melbilob jach ti wiñicob, pero añ yaño' bʌ, che' jach bʌ mi' to'ol ajñelob cha'añ i ye'tel ti' yumʌntel panchan. Majqui jach mi' mejlel i ch'ʌm ti' wenta che' bajche' iliyi, la' i ch'ʌm, —che'en Jesús.

Jesús tsi' yʌc'ʌ i c'ʌb ti alobob

¹³ Tsa' pʌjyiyob tilel alobob ba'añ Jesús cha'añ mi' yʌc' i c'ʌb ti' tojlelob, yic'ot cha'añ mi' melbeñob oración; pero jiñi xcʌnt'añob tsi' tiq'uiyob.

¹⁴ Jesús tsi' yʌlʌ: La' tilicob alobob ba'añon, mach mi la' mʌctañob, come i cha'añobʌch i yumʌntel jiñi am bʌ ti panchan, che'en.

¹⁵ Che' bʌ tsa' ujti i yʌc' i c'ʌb ti' tojlel jiñi alobob, Jesús tsa' majli.

Jiñi wen chumul bʌ ch'itoñ wiñic

¹⁶ Tsa' tili juntiquil wiñic ba'añ Jesús, tsi' yʌlʌ: —Wen bʌ Maestro, ¿chuqui uts'at yom mic mel cha'añ mic taj j cuxtʌlel mach bʌ añic mi' jilel? —Che'en.

¹⁷ Jesús tsi' su'be: —¿Chucoch ma' pejcañon ti wen? Ma'añic juntiquil wen bʌ, jiñi jach Dios. Mi awom a taj a cuxtʌlel mach bʌ añic mi' jilel, jac'ben i mandar, —che'en.

¹⁸ Jiñi wiñic tsi' c'ajti: —¿Chuqui ti mandar? Jesús tsi' su'be: —Mach a cha'len tsʌnsa, mach a cha'len ts'i'lel, mach a cha'len xujch', mach a cha'len jop't'añ,

¹⁹ q'uele ti ñuc a tat a ña', yic'ot c'uxbin a pi'ʌlob che' bajche' ma' bajñel c'uxbin a bʌ, che'en.

²⁰ Jiñi ch'itoñ wiñic tsi' su'be: —Pejtelel jiñi mandar tsa' c jac'ʌ c'ʌlʌl che' ch'itoñon to. ¿Chuqui to yam bʌ yom mic mel? —Che'en.

²¹ Jesús tsi' su'be: —Mi junyajlel toj awom ajñel, cucu choño a chu'bʌañ, aq'uen jiñi p'ump'uño' bʌ, che' jiñi mi caj a taj ca'bʌl a chu'bʌañ ti panchan; la' tsajcañon, —che'en Jesús.

²² Che' bʌ tsi' yu'bi jiñi t'añ, wen ch'ijiyem tsa' caji ti majlel, come añ ca'bʌl i chu'bʌañ.

²³ Jesús tsi' su'be xcʌnt'añob i cha'añ: —Isujm mic su'beñetla, wen wocol mi' yochel ti' yumʌntel panchan jiñi wen chumul bʌ wiñic.

²⁴ Mic cha' su'beñetla, mach wen wocolic mi' ñumel camello ti' wut acuxan, pero ñumen wocol mi' yochel ti' yumʌntel Dios jiñi wen chumul bʌ wiñic, —che'en Jesús.

²⁵ Che' bʌ tsi' yu'biyob xcʌnt'añob i cha'añ, tsa' toj sajtiyob i pusic'al, tsi' yʌlʌyob: —¿Majqui mi mejlel ti coltʌntel che' jiñi?

²⁶ Jesús, tsi' ch'ujch'uj q'ueleyob, tsi' su'beyob: —Jiñi wiñicob mach mejlicob, pero Dios mi mejlel i mel ti pejtelel, —che'en.

²⁷ Pedro tsi' jac'ʌ: —Tsa' j cʌyʌ lojon c chu'bʌañ cha'añ mic tsajcañet lojon. ¿Chuqui mi caj c taj lojon? —Che'en.

²⁸ Jesús tsi' su'beyob: —Ti isujm mic su'beñetla, ti tsiji' bʌ pañimil, che' buchul i Yalobil Wiñic ti' yumʌntel ti' ñuclel, jatetla ja'el tsa' bʌ la' tsajcayon mi caj la' buchtʌl ti lajchʌmp'ejl buchlibʌl cha'añ mi la' mel jiñi lajchʌnmojt i p'olbal Israel.

²⁹ Majqui jach mi' cʌy i yotot, i yʌscuñob i chichob i yijts'iñob, i tat, i ña', [i yijñam] i yalobilob, i lumal, cha'añ tij c'aba', mi caj i taj yam bʌ jo'c'al i ñumel che' bajche' jiñi tsa' bʌ i cʌyʌ, mi caj i taj ja'el i cuxtʌlel mach bʌ añic mi' jilel.

³⁰ Pero ca'bʌl jiñi ñaxaño' bʌ mi caj i cʌytʌlob ti wi'ipat, che' ja'el ca'bʌl jiñi wi'ilobix bʌ mi caj i majlel ti ñaxan, —che'en Jesús.