Mateo 18 - Jiñi Tsiji' bʌ Wen T'añ cha'añ Estudio

¿Majqui ñumen ñuc ti' yumʌntel Dios?

¹ Ti jim bʌ ora tsa' tiliyob xcʌnt'añob ba'añ Jesús, tsi' c'ajtibeyob: —¿Majqui ñumen ñuc ti' yumʌntel panchan?

² Jesús tsi' pʌyʌ tilel juntiquil alob, tsi' yʌc'ʌ ya' ti ojlil ba'añob

³ tsi' su'beyob: —Isujm mic su'beñetla, mi ma'añic mi la' sutq'uin la' bʌ yic'ot mi ma'añic mi la' mel che' bajche' alobob, ma'añic mi caj la' wochel ti' yumʌntel panchan.

⁴ Jiñi cha'añ majqui jach mi' mel i bʌ ti pec' che' bajche' ili alob, jiñʌch jiñi c'ax ñuc bʌ ti' yumʌntel panchan.

⁵ Majqui jach mi' ch'ʌm ti' wenta juntiquil alob tij c'aba', joñon woli i ch'ʌmon ti' wenta.

Jiñi mu' bʌ i yʌsañonla ti mulil

⁶ Majqui jach mi' yʌsan ti mulil juntiquil ili ch'och'oco' bʌ woli bʌ i ñopon, ñumen uts'at tsa'ic cʌjchi ña'atun ti' bic' jiñi wiñic cha'añ mi' chojquel ochel ti tam bʌ mar.

⁷ ¡O'bol i bʌ jiñi año' bʌ ti pañimil mu' bʌ i yʌsañob ti mulil wiñicob x'ixicob! Come wersa mi caj i tilelob iliyi, pero ¡o'bol jax i bʌ jiñi wiñic mu' bʌ i yʌsan ti mulil i pi'ʌlob!

⁸ Jiñi cha'añ mi woli' yʌsañet ti mulil a c'ʌb yic'ot woc, tsepe loq'uel, choco loq'uel ti a tojlel; ñumen uts'at mi tsa' taja a cuxtʌlel che' xbor c'ʌbet, o che' xbor oquet, mach uts'atic mi tsa' chojquiyet ti c'ajc mach bʌ yujilix yajpel che' cha'ts'ijt a c'ʌb yic'ot a woc.

⁹ Che' ja'el, mi woli' yʌsañet ti mulil a wut, loc'san, choco loq'uel ti a tojlel; uts'at mi tsa' taja a cuxtʌlel che' jump'ejl jach a wut, mach uts'atic mi tsa' chojquiyet ti c'ajc che' cha'p'ejl a wut.

Lajiya cha'añ sajtem bʌ tʌñʌme'

¹⁰ Chʌcʌ q'uele la' bʌ cha'añ ma'añic mi la' q'uel ti lolom mi juntiquilic ch'och'oc bʌ, come mic su'beñetla, ya' ti panchan i yángelob jiñi ch'och'oco' bʌ ti pejtelel ora mi' q'uelbeñob i wut c Tat am bʌ ti panchan.

¹¹ [Come i Yalobil Wiñic tsa' tili cha'añ mi' coltañ jiñi sajtemo' bʌ.]

¹² ¿Bajche' mi la' wʌl? Mi añ juntiquil wiñic am bʌ jo'c'al (100) i tʌñʌme' mi tsa' sajti juncojt, ¿mach ba añic mi' cʌy jiñi bolonlujuncojt i jo'c'al (99) cha'añ mi' majlel i sajcan jiñi sajtem bʌ ya' ti bujtʌl?

¹³ Mi tsi' taja, isujm mic su'beñetla, ñumen tijicña i pusic'al mi caj i q'uel jiñi juncojt, bajche' jiñi bolonlujuncojt i jo'c'al mach bʌ añic tsa' sajtiyob.

¹⁴ Che'ʌch ja'el, la' Tat am bʌ ti panchan mach yomic mi' sajtel mi juntiquilic ch'och'oco' bʌ.

Mi lac ñusʌben i mul la quermañu

¹⁵ Jiñi cha'añ mi tsi' cha'le mulil ti a contra a wermañu, cucu, bajñel su'ben i mul; mi tsi' jac'beyet, tsa'ix a taja a wermañu.

¹⁶ Pero mi ma'añic tsi' jac'beyet, pʌyʌ majlel juntiquil cha'tiquil a wic'ot cha'añ mi' tsictiyel ti' tojlel cha'tiquil uxtiquil testigo jujump'ejl t'añ tsa' bʌ ajli.

¹⁷ Mi mach yomic i jac', su'beñob xñopt'añob; mi ma'añic mi' jac'ben xñopt'añob jiñi wiñic, la'ix ajñic che' bajche' mach bʌ xñopt'añic o che' bajche' xch'ʌm tojoñel.

¹⁸ Isujm mic su'beñetla, chuqui jach mi la' cʌch ti pañimil cʌchbil ti panchan. Chuqui jach mi la' jit ti pañimil jitbil ti panchan.

¹⁹ Mic su'beñetla ja'el, mi añ cha'tiquil ti pañimil mu' bʌ i temob i t'añ cha'añ chuqui mi' c'ajtiñob, che' jiñi mi caj i yʌq'ueñtelob cha'añ c Tat am bʌ ti panchan.

²⁰ Come baqui jach añ cha'tiquil uxtiquil tempʌbilo' bʌ tij c'aba', ya'ʌch añon ti ojlil yic'otob, che'en Jesús.

²¹ Tsa' tili Pedro ba'añ Jesús, tsi' yʌlʌ: —C Yum, ¿jayajl yom mic ñusʌben i mul quermañu che' añ chuqui mi' cha'len tij contra? ¿Yom ba c'ʌlʌl ti' wucyajlel mic ñusʌben i mul? —Che'en.

²² Jesús tsi' su'be: —Mic su'beñet, mach jasʌlic che' ti wucyajl jach, pero yom c'ʌlʌl ti wucyajl che' ti lujunyajl i chʌnc'al (70) tac.

Lajiya cha'añ x'e'tel mach bʌ añic tsi' ñusʌbe i bet yam bʌ

²³ I yumʌntel jiñi am bʌ ti panchan lajalʌch bajche' juntiquil yumʌl woli bʌ i ña'tʌbeñob i bet x'e'telob i cha'añ.

²⁴ Che' bʌ tsa' caji i ña'tʌbeñob i bet jiñi x'e'telob, tsi' pʌyʌ tilel juntiquil am bʌ i bet lujump'ejl mil talento.

²⁵ Ma'añic tsa' mejli i toj i bet. Jiñi cha'añ i yum tsi' yʌc'ʌ mandar cha'añ mi' chojñel jiñi wiñic yic'ot i yijñam yic'ot i yalobilob yic'ot pejtelel i chu'bʌañ cha'añ mi' toj i bet.

²⁶ Jiñi x'e'tel tsi' ñocchoco i bʌ, tsi' c'ajti ti wocol t'añ, tsi' yʌlʌ: “C yum, pijtan to, mi caj c tojbeñet ti pejtelel”, che'en.

²⁷ Cha'añ tsi' p'unta i yum jiñi x'e'tel, tsi' colo, tsi' ñusʌbe i bet.

²⁸ Che' woli ti sujtel jiñi x'e'tel tsi' taja juntiquil i pi'ʌl ti e'tel am bʌ i bet jo'c'al denario ti' tojlel, tsi' chucu ti' bic', tsi' su'be: “Tojbeñon a bet”, che'en.

²⁹ Jiñi i pi'ʌl ti e'tel tsi' ñocchoco i bʌ, ti wocol t'añ tsi' yʌlʌ: “Pijtan to, mi caj c tojbeñet ti pejtelel”, che'en.

³⁰ Pero jiñi x'e'tel ma'añic tsi' jac'ʌ, tsa' majli i yotsan ti mʌjquibʌl jinto mi' toj i bet.

³¹ Che' bʌ tsi' q'ueleyob i pi'ʌlob ti e'tel chuqui woli ti ujtel, tsa' caji i wen melob i pusic'al, tsa' majli i su'beñob i yum pejtelel chuqui tsa' ujti.

³² Jiñi cha'añ i yum tsi' pʌyʌ tilel, tsi' su'be: “Jontol bʌ x'e'telet, tsa' c ñusʌbeyet a bet come tsa' c'ajtibeyon ti wocol t'añ.

³³ ¿Mach ba yomic ja'el ma' p'untan a pi'ʌl ti e'tel, che' bajche' tsa' c p'untayet?” Che'en.

³⁴ Jiñi cha'añ i yum tsa' mich'a, tsi' yʌc'ʌ ti' c'ʌb jiñi xcʌnta mʌjquibʌl jinto mi' laj toj i bet.

³⁵ Che'ʌch ja'el c Tat am bʌ ti panchan mi caj i meletla, mi ma'añic mi la' ñusʌben i mul la' wermañu ti pejtelel la' pusic'al, —che'en Jesús.