Mateo 15 - Jiñi Tsiji' bʌ Wen T'añ cha'añ Estudio

Jiñi mu' bʌ i bi'b-esan wiñic

¹ Jiñi xts'ijbayajob yic'ot fariseojob ch'oyolo' bʌ ti Jerusalén tsa' tiliyob ba'añ Jesús, tsi' c'ajtibeyob:

² —¿Chucoch mi' ñusañob i su'bal lac ñojte'el jiñi xcʌnt'añob a cha'añ? Come ma'añic mi' pocob i c'ʌb che' mi' cajelob ti c'ux waj.

³ Jesús tsi' jac'beyob: —¿Chucoch jatetla ja'el mi la' ñusan i mandar Dios cha'añ i jac'ol i su'bal la' ñojte'el?

⁴ Come Dios tsi' yʌlʌ ti' mandar: “Q'uele ti ñuc a tat a ña'”. Che' ja'el tsi' yʌlʌ: “Jiñi mu' bʌ i p'aj i tat i ña' wersa mi' chʌmel”.

⁵ Pero jatetla mi la' wʌl, cha'añ juntiquil wiñic mi mejlel i su'ben i tat i ña': Ma'añix chuqui mi mejlel cʌq'ueñet cha'añ mij coltañet, come pejtelel c chu'bʌañ yic'ot c taq'uiñ tsa'ix c su'bu cha'añ i cha'añix Dios.

⁶ Jatetla mi la' lon al mach i wentajobic cha'añ mi' coltañob i tat i ña'; che' jiñi woli la' jisʌben i c'ʌjñibal i mandar Dios ti la' pusic'al cha'añ mi la' jac'ben i su'bal la' ñojte'el.

⁷ Cha'chajp jax la' pusic'al. Isujmʌch bajche' tsi' tajayetla ti t'añ Isaías che' bʌ tsi' yʌlʌ:

⁸ “Ti' yej jach mi' su'bob c ñuclel jiñi wiñicob x'ixicob, pero i pusic'alob ñajt añ tic tojlel.

⁹ Lolom jach mi' ch'ujutesañoñob, come woli i cha'leñob cʌntesa ti' su'bal i ñojte'elob”, che'en Jesús.

¹⁰ Jesús tsi' pʌyʌ tilel bajc'ʌl wiñicob x'ixicob, tsi' su'beyob: —Ñʌch'tanla, wen ch'ʌmbenla isujm.

¹¹ Mach jiñic mi' bi'b-esan wiñic chuqui tac mi' yochel ti' yej, pero pejtelel mu' bʌ i loq'uel ti' yej, jiñʌch mu' bʌ i bi'b-esan, che'en.

¹² Tsa' tiliyob xcʌnt'añob, tsi' su'beyob: —¿Awujilba cha'añ tsa' mich'ayob jiñi fariseojob che' bʌ tsi' yu'biyob a t'añ?

¹³ Jesús tsi' jac'beyob: —Pejtelel pimel mach bʌ pʌc'bilic i cha'añ c Tat am bʌ ti panchan mi' caj ti bojquel.

¹⁴ La' to ajñicob. Xpots'ob mi' lon pʌsben bij yam bʌ xpots'; mi jiñi xpots' mu' bʌ i toj-esan majlel yam bʌ xpots', ti' cha'ticlelob mi' caj i yajlelob ti ch'eñ, —che'en Jesús.

¹⁵ Pedro tsi' jac'ʌ, tsi' yʌlʌ: —Su'beñon lojon isujmlel jiñi lajiya, —che'en.

¹⁶ Jesús tsi' yʌlʌ: —Jatetla ja'el, ¿ma'añic mi la' ch'ʌmben isujm?

¹⁷ ¿Mach ba la' wujilic, jiñi mu' bʌ i yochel ti la quej mi' majlel ti lac ñʌc'? Ñumel jach mi' ñumel.

¹⁸ Pero jiñi mu' bʌ i loq'uel ti' yej wiñic ch'oyolʌch ti' pusic'al, jiñʌch mu' bʌ i bi'b-esan.

¹⁹ Come ch'oyol ti' pusic'al wiñic mi' tilel jiñi jontol bʌ i ña'tʌbal, che' bajche' tsʌnsa, ts'i'lel, xujch', jop't'añ yic'ot p'ajoñel.

²⁰ Pejtelel iliyi jiñʌch mu' bʌ i bi'b-esan wiñic; mach jiñic mi' bi'b-esan wiñic mi' tsi' c'uxu waj che' mach pocbilic i c'ʌb, che'en.

I xuc'tʌlel x'ixic loq'uem bʌ ti Canaán

²¹ Jesús tsa' loq'ui ya'i, tsa' majli ti' lum Tiro yic'ot Sidón.

²² Awilan tsa' tili juntiquil x'ixic ya' bʌ chumul ti' lum Canaán, c'am tsi' cha'le t'añ, tsi' yʌlʌ: —C Yum, i Yalobilet bʌ David, p'untañon, jiñi xch'oc bʌ calobil wen tic'lʌbil ti xi'ba, —che'en.

²³ Pero Jesús ma'añic tsi' jac'ʌ mi jump'ejlic t'añ. Tsa' tili xcʌnt'añob i cha'añ, ti wocol t'añ tsi' yʌlʌyob: —Su'beñix sujtel jiñi x'ixic, come woli' ti c'am bʌ t'añ tilel ti lac pat.

²⁴ Jesús tsi' jac'beyob: —Chocbilon tilel cha'añ jach jiñi sajtemo' bʌ tʌñʌme' ti Israel, —che'en.

²⁵ Jiñi x'ixic tsa' cha' tili, tsi' ñocchoco i bʌ ba'añ Jesús, tsi' yʌlʌ: —C Yum, coltañon, —che'en.

²⁶ Jesús tsi' su'be: —Mach weñic mi la' chilben i waj alobob cha'añ mi la' chocben alʌ ts'i', —che'en.

²⁷ Jiñi x'ixic tsi' yʌlʌ: —Isujmʌch, c Yum; pero jiñi alʌ ts'i' mi' c'ux i xejt'il mu' bʌ i p'ajtel ti' ye'bal i mesa i yum, —che'en.

²⁸ Jiñi cha'añ, Jesús tsi' jac'be: —X'ixic, wen ca'bʌl jax i xuc'tʌlel a pusic'al; jiñi cha'añ la' aq'uentiquet che' bajche' awom. Tsa' bʌc' lajmi i yalobil ti jiñi jach bʌ ora.

Jesús tsi' c'oq'uesa ca'bʌl xc'am-ʌjelob

²⁹ Tsa' ñumi Jesús ya'i, tsa' majli ti ti' mar am bʌ ti Galilea. Tsa' letsi majlel ti bujtʌl, ya'i tsa' buchle.

³⁰ Tsa' tiliyob ca'bʌl wiñicob x'ixicob ya' ba'añ tsi' pʌyʌyob tilel jiñi mach bʌ weñobic i yoc, yic'ot xpots'ob, yic'ot x'uma'ob, yic'ot xborc'ʌbob, yic'ot ca'bʌl yam bʌ xc'am-ʌjelob tac. Ya' tsi' yʌc'ʌyob ba' wa'al Jesús, tsi' c'oq'uesayob.

³¹ Jiñi cha'añ tsa' toj sajtiyob i pusic'al che' bʌ tsi' q'ueleyob woliyobix ti t'añ jiñi x'uma'ob, che' tsa'ix c'oc'ayob jiñi xborc'ʌbob, che' woliyobix ti xʌmbal jiñi mach bʌ weñobic i yoc, che' wolix i c'otelob i wut jiñi xpots'ob. Jiñi cha'añ tsa' caji i tsictesañob i ñuclel i Dios Israel.

Tsa' we'sʌntiyob chʌmp'ejl mil

³² Jesús tsi' pʌyʌ tilel xcʌnt'añob i cha'añ, tsi' yʌlʌ: —Mic p'untan jiñi wiñicob x'ixicob, come i yuxp'ejlelix q'uiñ wʌ' añob quic'ot. Ma'añobic i bʌl i ñʌc'; mach comic c su'beñob sujtel che' wi'ñayob ame c'uñ-acob ti bij, —che'en.

³³ Jiñi xcʌnt'añob i cha'añ tsi' su'beyob: —¿Baqui mic taj lojon ca'bʌl waj ilayi ti jochol bʌ lum cha'añ mi' c'uxob bajc'ʌl wiñicob x'ixicob?

³⁴ Jesús tsi' c'ajtibeyob: —¿Jayq'uejl waj añ la' cha'añ? Tsi' yʌlʌyob: —Wucq'uejl yic'ot ts'ita' chʌy.

³⁵ Jesús tsi' su'be wiñicob x'ixicob cha'añ mi' buchtʌlob ti lum.

³⁶ Tsi' ch'ʌmʌ jiñi wucq'uejl waj yic'ot jiñi chʌy, tsi' su'be wocolix i yʌlʌ Dios, tsi' xet'e, tsi' yʌq'ue xcʌnt'añob i cha'añ; jiñi xcʌnt'añob tsi' pucbeyob wiñicob x'ixicob.

³⁷ Ti pejtelelob tsi' c'uxuyob, tsa' ñaj-ayob; tsi' lotoyob wucp'ejl colem chiquib but'ul ti' xujt'il tac tsa' bʌ colojbaji.

³⁸ Añ che' bajche' lujumbajc' (4,000) wiñicob tsi' c'uxuyob jiñi waj, pero jiñi x'ixicob yic'ot alobob mach tsicbilobic.

³⁹ Che' jiñi, tsa'ix i chocoyob sujtel pejtelel jiñi wiñicob x'ixicob. Jesús tsa' ochi ti barco, tsa' majli ti' lumal Magdala.