Mateo 14 - Jiñi Tsiji' bʌ Wen T'añ cha'añ Estudio

4. I YE'TEL JESÚS TI YAN TAC BɅ TEJCLUM ( 14.1—20.34 ) Tsa' tsʌnsʌnti Juan tsa' bʌ i yʌc'ʌ ch'ʌmja'

¹ Ti jim bʌ ora jiñi yumʌl Herodes Antipas tsa' caji i yu'bin t'añ cha'añ ñuc tac bʌ i melbal Jesús.

² Herodes tsi' su'be x'e'telob i cha'añ: Jiñʌch Juan tsa' bʌ i yʌc'ʌ ch'ʌmja', tsa' cha' tejchi ch'ojyel ba'añ chʌmeño' bʌ, jiñi cha'añ añ i p'ʌtʌlel cha'añ mi' pʌs ñuc tac bʌ i melbal, che'en.

³ Come Herodes añix ora tsi' yʌc'ʌ ti chujquel Juan, tsi' cʌchʌ, tsi' yotsa ti mʌjquibʌl ti' t'añ Herodías, i yijñam i yeran i c'aba' Felipe,

⁴ come Juan tsi' su'be Herodes: Tic'bil ti mandar, mach mejlic a pʌyben i yijñam a weran, che'en.

⁵ Herodes yom i tsʌnsan Juan, pero tsi' bʌc'ña wiñicob x'ixicob, come woli' yʌlob x'alt'añʌch jiñi Juan.

⁶ Che' ti' q'uiñilel i ja'bilel Herodes, tsi' cha'le son xch'oc bʌ i yalobil Herodías ti yojlil xq'uiñijelob, jiñi Herodes wen uts'at tsi' q'uele,

⁷ tsi' wa'choco i t'añ ti' tojlel jiñi xch'oc, cha'añ mi caj i yʌq'ueñ pejtelel mu' bʌ i c'ajtiben.

⁸ Xic'bil i cha'añ i ña' jiñi xch'oc tsi' yʌlʌ: —Aq'ueñon wʌ' ti colem plato i jol Juan tsa' bʌ i yʌc'ʌ ch'ʌmja', —che'en.

⁹ Jiñi rey tsi' mele i pusic'al, pero cha'añ ti' caj tsi' wa'choco i t'añ ti' tojlel jiñi xch'oc yic'ot ti' tojlel jiñi buchulo' bʌ ti' t'ejl i mesa Herodes, jiñi cha'añ tsi' yʌc'ʌ i t'añ cha'añ mi' yʌq'uentel jiñi woli bʌ i c'ajtin;

¹⁰ jiñi cha'añ tsi' choco majlel ti set' t'ojbentel loq'uel i bic' Juan ya' ti mʌjquibʌl.

¹¹ Tsa' pit ch'ʌjmi tilel i jol Juan ti colem plato, tsa' aq'uenti jiñi xch'oc, jiñi xch'oc tsi' yʌq'ue i ña'.

¹² Che' jiñi tsa' c'otiyob xcʌnt'añob i cha'añ Juan, tsi' ch'ʌmbeyob majlel i bʌc'tal, tsi' mucuyob; tsa' sujtiyob, tsa' majli i su'beñob Jesús.

Jesús tsi' we'sa jo'p'ejl mil

¹³ Che' bʌ tsa'ix i yu'bi Jesús, tsa' majli ti barco ti colem bʌ i tiquiñal lum ti' bajñelil. Che' bʌ tsi' yu'biyob wiñicob x'ixicob, jomocña tsa' loq'uiyob tilel, tsi' tsajcañob majlel ti tejclum tac.

¹⁴ Jesús tsa' loq'ui tilel, tsi' q'uele bajc'ʌl wiñicob x'ixicob, tsi' p'untayob, tsi' c'oq'uesayob jiñi c'amo' bʌ.

¹⁵ Che' wolix ti bʌjlel q'uiñ, tsa' tiliyob jiñi xcʌnt'añob, tsi' yʌlʌyob: —Ilayi jiñʌch jochol bʌ lum, tsa'ix ñumi q'uiñ; su'beñobix sujtel ili wiñicob x'ixicob ti xchumtʌl tac cha'añ mi' majlel i mʌñob i bʌl i ñʌc'.

¹⁶ Jesús tsi' su'beyob: —Mach wersajic mi' sujtelob, aq'uenla jatetla chuqui mi' c'uxob, —che'en.

¹⁷ Tsi' jac'beyob: —Cojach añ jo'q'uejl waj yic'ot cha'cojt chʌy.

¹⁸ Jesús tsi' su'beyob: —Ch'ʌmʌla tilel ba'añon, —che'en.

¹⁹ Jesús tsi' su'be wiñicob x'ixicob cha'añ mi' buchtʌlob ti jam. Tsi' ch'ʌmʌ jiñi jo'q'uejl waj yic'ot cha'cojt chʌy, tsi' letsa i wut ti panchan, tsi' cha'le oración, tsi' xet'e jiñi waj, tsi' yʌq'ue jiñi xcʌnt'añob i cha'añ. Jiñi xcʌnt'añob tsi' pucbeyob wiñicob x'ixicob.

²⁰ Tsi' c'uxuyob ti pejtelelob, tsa' ñaj-ayob, tsi' lotbeyob i colojbal lajchʌmp'ejl chiquib.

²¹ Añ che' bajche' jo'p'ejl mil wiñicob tsi' c'uxuyob waj, ya'añ ja'el x'ixicob yic'ot alobob pero mach tsicbilobic.

Jesús tsi' cha'le xʌmbal ti' pam ja'

²² Jesús tsi' su'beyob ochel ti barco jiñi xcʌnt'añob i cha'añ, cha'añ mi' ñaxan c'axelob majlel ti junwejl mar, tsa' to bajñel cʌle i su'beñob sujtel jiñi wiñicob x'ixicob.

²³ Che' bʌ tsa' ujti i su'beñob sujtel, tsa' letsi majlel ti' bajñelil ti bujtʌl cha'añ mi' cha'len oración. Che' ti ic'ajel ya'añ ti' bajñelil.

²⁴ Jiñi barco ya'ix añ ti ojlil mar, woli' i xewulan jiñi ja', come tsʌts woli' jats' jiñi ic'.

²⁵ Che' jalto sʌc'a pañimil tsa' tili Jesús ba'añ jiñi xcʌnt'añob woli i xʌn tilel ti' pam ja'.

²⁶ Jiñi xcʌnt'añob, che' bʌ tsi' q'ueleyob woli ti xʌmbal ti' pam ja', tsa' wen cajiyob ti bʌq'uen, tsi' yʌlʌyob: —I ch'ujlel jach wiñic. C'am tsi' cha'leyob oñel cha'añ bʌq'uen.

²⁷ Pero Jesús tsi' bʌc' pejcayob, tsi' su'beyob: —Tijicñesan la' pusic'al, joñoñʌch, mach mi la' cha'len bʌq'uen, —che'en.

²⁸ Jiñi cha'añ Pedro tsi' jac'be, tsi' su'be: —C Yum, mi jatetʌch, su'beñon tilel ba'añet ti' pam ja', —che'en.

²⁹ Jesús tsi' su'be: —La'. Tsa' loq'ui Pedro ti barco, tsa' caji ti xʌmbal ti' pam ja' cha'añ mi' majlel ba'añ Jesús.

³⁰ Che' bʌ tsi' q'uele jiñi tsʌts bʌ ic', tsa' caji ti bʌq'uen, che' jiñi tsa' caji ti sujp'el ochel majlel ti' mal ja', che' jiñi, c'am tsi' cha'le t'añ, tsi' yʌlʌ: —C Yum, coltañon, —che'en.

³¹ Jesús tsi' bʌc' sʌts'ʌ i c'ʌb, tsi' chucu, tsi' su'be: —Pedro, chucoch ma'añic ma' ñop ti pejtelel a pusic'al, ¿chucoch tsa' tejchi tilebixel bʌ a pusic'al? —Che'en.

³² Che' bʌ tsa' ochiyob Jesús yic'ot Pedro ti barco tsa' lajmi jiñi ic'.

³³ Jiñi año' bʌ ti' mal barco tsa' tiliyob, tsi' ch'ujutesayob Jesús, tsi' yʌlʌyob: —Isujmʌch i Yalobilet Dios.

Jesús tsi' c'oq'uesa xc'am-ʌjelob ya' ti Genesaret

³⁴ Che' bʌ tsa' c'axiyob, tsa' c'otiyob ti' lum Genesaret.

³⁵ Jiñi wiñicob ya'i, che' bʌ tsi' cʌñʌyob Jesús, tsa' caji i pucob majlel t'añ ti pejtelel i lumal, tsa' caji i pʌyob tilel ba'añ Jesús pejtelel xc'am-ʌjelob.

³⁶ Tsi' c'ajtibeyob ti wocol t'añ cha'añ mi' tʌlbeñob i yoc i pislel, pejtelel jiñi tsa' bʌ i tʌlbeyob i yoc i pislel tsa' laj c'oq'uesʌntiyob.