Mateo 13 - Jiñi Tsiji' bʌ Wen T'añ cha'añ Estudio

Lajiya cha'añ xwejch'uya pac'

¹ Ti jiñi jach bʌ q'uiñ Jesús tsa' loq'ui ti otot; tsa' buchle ti' t'ejl mar.

² Tsi' tempayob i bʌ ca'bʌl wiñicob x'ixicob ya' ba'añ; jiñi cha'añ tsa' letsi Jesús ti barco, tsa' buchle, pejtelel wiñicob x'ixicob ya' wa'alob ti ti' jiñi mar.

³ Añ ca'bʌl chuqui tsi' su'beyob ti lajiya tac, tsi' yʌlʌ: Juntiquil wiñic tsa' majli ti wejch'uya pac',

⁴ che' woli' wejch'un majlel pac' tsa' yajli ts'ita' ti ti' bij; tsa' tiliyob te'lemut tsi' laj c'uxuyob.

⁵ Yam bʌ tsa' yajli ti xajlelol ba' ma'añic ca'bʌl i lumil, orajach tsa' pasi, come mach tamic i lumil,

⁶ che' bʌ tsa' chañ-a q'uiñ, c'ux tsi' yu'bi; tsa' tiqui, come ma'añic i wi'.

⁷ Yam bʌ tsa' yajli ti ch'ixol, jiñi ch'ix tsa' coli, tsi' tsʌnsa jiñi pac'.

⁸ Yam bʌ tsa' yajli ti wen bʌ lum, tsi' yʌc'ʌ i wut jujuntejc ti jo'c'al, ti uxc'al, ti lujump'ejl i cha'c'al.

⁹ Jiñi am bʌ i chiquin cha'añ mi' yu'bin, la' i yu'bin, che'en Jesús.

Isujmlel jiñi lajiya tac

¹⁰ Che' jiñi tsa' tiliyob jiñi xcʌnt'añob ba'añ Jesús, tsi' c'ajtibeyob: —¿Chucoch ma' pejcañob ti lajiya?

¹¹ Jesús tsi' jac'beyob, tsi' yʌlʌ: —Come aq'uebiletla cha'añ mi la' cʌn isujmlel i yumʌntel panchan mach bʌ tsictiyemic ti yam bʌ ora, pero iliyob mach aq'uebilobic i cʌn.

¹² Come majqui jach añ i cha'añ mi caj i yʌq'uentel yam bʌ, jinto mi' wen oñ-an; pero jiñi mach bʌ añic i cha'añ mi caj i laj chilbentel chuqui añ i cha'añ.

¹³ Jiñi cha'añ mic pejcañob ti lajiya: Come mi' q'uelob, pero ma'añic mi' c'otelob i wut; mi' yu'biñob, pero ma'añic mi' yochel t'añ ti' chiquiñob, ma'añic mi' ch'ʌmbeñob isujm.

¹⁴ Che'ʌch tsa' ts'ʌctiyi i t'añ x'alt'añ Isaías, tsa' bʌ i yʌlʌ: “Mi caj la' wu'bin t'añ, pero ma'añic mi caj la' ch'ʌmben isujm, mi caj la' q'uel pero ma'añic mi caj la' cʌñ.

¹⁵ Come jiñi wiñicob x'ixicob tsa' ochiyob ti tonto i pusic'al. Mach yomic i chʌn u'biñob t'añ, tsi' muts'uyob i wut ame i q'uelob ti' wut, tsi' mʌcʌyob i chiquin ame i yu'biñob ti' chiquin, ame i ch'ʌmbeñob isujm ti' pusic'al, ame i cha' sutq'uiñob i bʌ cha'añ mij c'oq'uesañob”, che'en Jesús.

¹⁶ Pero jatetla tijicñayetla come mi' c'otel la' wut yic'ot mi la' wu'bin t'añ ti la' chiquin.

¹⁷ Isujm mic su'beñetla, ca'bʌl x'alt'añob yic'ot wiñicob tojo' bʌ i pusic'al, tsi' ña'ta i q'uelob jiñi woli bʌ la' q'uel, pero ma'añic tsi' q'ueleyob; tsi' ña'ta i yu'biñob jiñi woli bʌ la' wu'bin, pero ma'añic tsi' yu'biyob.

Jesús tsi' su'bu isujmlel jiñi lajiya cha'añ xwejch'uya pac'

¹⁸ U'binla isujmlel jiñi lajiya cha'añ jiñi xwejch'uya pac'.

¹⁹ Che' añ majqui mi' yu'bin jiñi wen t'añ cha'añ i yumʌntel Dios, mi ma'añic tsi' ch'ʌmbe isujm, orajach mi' tilel jiñi xjontolil, mi' chilben loq'uel jiñi pʌc'bil bʌ ti' pusic'al. Jiñʌch isujmlel jiñi wejch'ubil bʌ ti i ti' bij.

²⁰ Jiñi wejch'ubil bʌ ti xajlelol, jiñʌch mu' bʌ i yu'bin jiñi wen t'añ, tijicña i pusic'al mi' bʌc' jac',

²¹ pero ma'añic i wi' ti' pusic'al, ts'ita' jach mi' jalijel, che' mi' tilel i wocol yic'ot i tic'lʌntel cha'añ jiñi wen t'añ, mi' cha' cʌy.

²² Jiñi wejch'ubil bʌ ti ch'ixol, jiñʌch mu' bʌ i yu'bin jiñi wen t'añ, pero ca'bʌl jax i c'oj-ol cha'añ pañimil yic'ot i lotintel cha'añ chu'bʌañʌl, mi' c'unte' jisan jiñi wen t'añ ti' pusic'al yic'ot ma'añic mi' yʌc' ti wut.

²³ Jiñi wejch'ubil bʌ ti wen bʌ lum, jiñʌch mu' bʌ i yu'bin jiñi wen t'añ, mi' ch'ʌmben isujm, mi' yʌc' i wut jujuntejc ti jo'c'al, ti uxc'al, ti lujump'ejl i cha'c'al.

Lajiya cha'añ trigo yic'ot mach bʌ weñic bʌ jam

²⁴ Jesús tsi' su'beyob yam bʌ t'añ ti lajiya, tsi' yʌlʌ: I yumʌntel jiñi am bʌ ti panchan lajalʌch bajche' juntiquil wiñic tsa' bʌ majli i wejch'un wen bʌ pac' ti' lum.

²⁵ Che' wʌyʌlob jiñi wiñicob, tsa' tili i contra, tsi' wejch'u mach bʌ weñic bʌ pac' ba' wejch'ubil jiñi trigo, che' jiñi tsa' sujti.

²⁶ Che' bʌ tsa' pasi jiñi trigo tsi' yʌc'ʌ i wut, che' jiñi tsa' pasi ja'el jiñi mach bʌ weñic bʌ jam.

²⁷ Tsa' tiliyob jiñi x'e'telob i cha'añ i yum otot, tsi' su'beyob: “C Yum, ¿mach ba weñic jiñi pac' tsa' bʌ a wejch'u ti a lum? ¿Baqui tsa' tili jiñi mach bʌ weñic woli bʌ ti pasel?”

²⁸ Tsi' su'beyob: “Juntiquil xcontra tsi' mele jiñi”. Jiñi x'e'telob tsi' c'ajtibeyob: ¿Awom ba mic majlel c boc lojon loq'uel jiñi mach bʌ weñic bʌ jam?

²⁹ I yum tsi' yʌlʌ: “Mach comic, ame bojquic jiñi trigo che' woli la' boc loq'uel jiñi mach bʌ weñic.

³⁰ La' to tem colic jinto mi' lojtel i wut jiñi trigo; che' ti' yorajlel c'ajbal mi caj c su'ben x'e'telob: Ñaxan tempanla jiñi mach bʌ weñic, buts buts cʌchʌla cha'añ mi' pulel; pero jiñi trigo lotola tilel ti' yotlel”.

Lajiya cha'añ jiñi pac' mostaza

³¹ Tsi' su'beyob yam bʌ t'añ ti lajiya, tsi' yʌlʌ: I yumʌntel jiñi am bʌ ti panchan lajalʌch bajche' i bʌc' i wut te' i c'aba' mostaza tsa' bʌ i pʌc'ʌ juntiquil wiñic ti' lum.

³² Ti isujm jiñʌch ñumen biq'uit bʌ pac' bajche' yan tac bʌ pac'; pero che' mi' colel mi' ñusan jiñi pimel ti pʌc'ʌbʌl, mi' colel bajche' te', mi' tilel te'lemut, mi' mel i c'u' ti' c'ʌb jiñi te', che'en Jesús.

Lajiya cha'añ levadura

³³ Tsi' su'beyob yam bʌ t'añ ti lajiya: I yumʌntel jiñi am bʌ ti panchan lajalʌch bajche' levadura. Tsi' ch'ʌmʌ juntiquil x'ixic, tsi' xajc'u ti uxp'is harina jinto tsi' laj xaxa ti' pejtelel, che'en.

Jesús mi c'ʌn lajiya cha'añ cʌntesa

³⁴ Jesús tsi' su'beyob jiñi wiñicob x'ixicob pejtelel jiñi t'añ ti lajiya tac, cojach ti lajiya tsi' pejcayob,

³⁵ cha'añ mi' ts'ʌctiyel i t'añ jiñi x'alt'añ tsa' bʌ i yʌlʌ: “Mi caj c cha'len t'añ ti lajiya tac, mi caj c su'b jiñi mucul tac bʌ isujmlel c'ʌlʌl ti' cajibal pañimil”, che'en.

Jesús tsi' su'bu isujmlel jiñi jam mach bʌ weñic

³⁶ Che' bʌ tsa'ix i choco sujtel jiñi tempʌbilo' bʌ, Jesús tsa' ochi ti otot; tsa' tiliyob jiñi xcʌnt'añob i cha'añ, tsi' yʌlʌyob: —Su'beñon lojon isujmlel jiñi lajiya cha'añ jiñi mach bʌ weñic bʌ jam ya' ti jamil.

³⁷ Jesús tsi' su'beyob: —Jiñi mu' bʌ i wejch'un wen bʌ pac' jiñʌch i Yalobil Wiñic.

³⁸ Jiñi jamil jiñʌch pañimil; jiñi wen bʌ pac' jiñʌch i yalobilob i yumʌntel Dios; jiñi jam mach bʌ weñic jiñʌch i yalobilob jiñi xjontolil;

³⁹ jiñi xcontra tsa' bʌ i wejch'u mach bʌ weñic bʌ pac' jiñʌch xi'ba; i yorajlel c'ajbal che' mi' lojtel i wut jiñi jam jiñʌch i jilibal pañimil; jiñi xc'ajbalob jiñʌch ángelob.

⁴⁰ Che' bajche' mi' tempʌyel jiñi mach bʌ weñic bʌ jam cha'añ mi' pulel, che'ʌch mi' caj i yujtel ti' jilibal ili pañimil.

⁴¹ I Yalobil Wiñic mi caj i choc tilel i yángelob, cha'añ mi' tempañob loq'uel ti' yumʌntel pejtelel mu' bʌ i yʌsañob ti mulil i pi'ʌlob yic'ot jiñi mu' bʌ i cha'leñob jontolil,

⁴² mi caj i chocob ochel ti c'ajc; ya'i mi' cajelob ti ca'bʌl uq'uel yic'ot quech'ecña bʌ i bʌquel i yej.

⁴³ Ti jim bʌ ora mi' cajel ti tsictiyel i sʌclel jiñi tojo' bʌ i pusic'al che' bajche' q'uiñ ya' ti' yumʌntel i Tat. Jiñi am bʌ i chiquin cha'añ mi' yu'bin, la' i yu'bin.

Lajiya cha'añ mucul bʌ chu'bʌañʌl letsem bʌ i tojol

⁴⁴ Che' yilal ja'el i yumʌntel jiñi am bʌ ti panchan bajche' jump'ejl chu'bʌañʌl wen letsem bʌ i tojol, mucul bʌ ti jamil, tsa' bʌ i taja juntiquil wiñic, pero tsi' cha' mucu; wen tijicña i pusic'al tsa' majli i chon pejtelel i chu'bʌañ, cha'añ mi' mʌn jiñi jamil.

Jiñi perla wen i t'ojol bʌ

⁴⁵ Che' yilal ja'el i yumʌntel panchan che' bajche' juntiquil xmʌñoñel woli bʌ i sajcan wen bʌ perla tac.

⁴⁶ Che' bʌ tsi' taja jump'ejl wen letsem bʌ i tojol, tsa' majli i laj chon pejtelel i chu'bʌañ. Tsi' mʌñʌ jiñi perla.

Lajiya cha'añ chimo' chʌy

⁴⁷ Che' yilal ja'el i yumʌntel jiñi am bʌ ti panchan bajche' chimo' chʌy tsa' bʌ chojqui ochel ti mar, tsi' chucu ca'bʌl chʌy ti' chajp ti' chajp,

⁴⁸ che' but'ulix, tsi' tujc'ayob loq'uel ti ti' mar; tsa' buchleyob, tsi' yajcayob ochel ti chiquib tac jiñi wen bʌ chʌy, tsi' chocoyob jiñi mach bʌ weñic.

⁴⁹ Che'ʌch ja'el mi' caj ti ujtel ti' jilibal pañimil: Jiñi ángelob mi caj i tilelob, cha'añ mi yajcañob loq'uel jiñi tojo' bʌ ti' tojlel jiñi jontolo' bʌ,

⁵⁰ mi caj i chocob ochel ti c'ajc; ya'i mi' cajelob ti uq'uel yic'ot quech'ecña bʌ i bʌquel i yej, che'en Jesús.

Tsiji' bʌ chu'bʌañʌl yic'ot tsucul bʌ

⁵¹ Jesús tsi' c'ajtibeyob: —¿Tsa' ba la' wen ch'ʌmbe isujm ti pejtelel ili lajiya tac? —Che'en. Tsi' jac'beyob: —Tsa' cu, c Yum, —che'ob.

⁵² Jesús tsi' su'beyob: —Pejtelel xts'ijbaya wen cʌntesʌbil bʌ ti isujmlel i yumʌntel jiñi am bʌ ti panchan lajalʌch bajche' juntiquil tatʌl ti otot, mu' bʌ i loc'san ti' yajñib i chu'bʌañ tsiji' bʌ yic'ot jiñi ñoxix bʌ, —che'en.

Jesús ti Nazaret

⁵³ Che' bʌ tsa' ujti i su'b jiñi lajiya tac, Jesús tsa' loq'ui majlel ya'i.

⁵⁴ Che' bʌ tsa' c'oti Jesús ti' lumal, tsi' cha'le cʌntesa ti' sinagoga judíojob, tsa' toj sajtiyob i pusic'al wiñicob, x'ixicob, tsi' yʌlʌyob: —¿Baqui tsi' taja i ña'tʌbal yic'ot i p'ʌtʌlel cha'añ mi' mel ñuc tac bʌ i melbal?

⁵⁵ ¿Mach ba jiñic i yalobil jiñi carpintero? ¿Mach ba jiñic María i ña'? ¿Mach ba i yijts'iñobic jiñi Jacobo, José, Simón yic'ot Judas?

⁵⁶ ¿Mach ba wʌ'ic añ la quic'ot x'ixico' bʌ i yijts'in? ¿Baqui tsi' taja pejtelel i ña'tʌbal?

⁵⁷ Tsa' cajiyob ti ju'ucñʌyel, jiñi cha'añ Jesús tsi' su'beyob: —Ma'añic x'alt'añ mu' i q'uejlel ti ñuc ti' lumal mi jiñic ti yotot, —che'en.

⁵⁸ Jesús ma'añic tsi' mele ca'bʌl ñuc bʌ i melbal ya'i, come ma'añic tsi' ñopoyob jiñi wiñicob x'ixicob.