Marcos 9 - Jiñi Tsiji' bʌ Wen T'añ cha'añ Estudio

¹ Jesús tsi' su'beyob: —Isujm mic su'beñetla, lamital ili wʌ' bʌ añob wʌle ma'añic mi caj i chʌmelob jinto mi' q'uelob i yumʌntel Dios che' mi' tilel ti' p'ʌtʌlel, —che'en.

Tsa' yʌjñi Jesús

² Che' ñumeñix wʌcp'ejl q'uiñ Jesús tsi' pʌyʌ majlel Pedro, Jacobo yic'ot Juan, ti' bajñelilob c'ʌlʌl ti chañ bʌ wits, ya'i tsa' yʌjñi Jesús ti' wutob.

³ Tsa' sʌc'a i pislel, ts'ʌylaw i sʌclel che' bajche' i ña'al tsʌñal. Ma'añic ti pañimil chuqui mi mejlel i sʌc-esan che' bajche' jiñi.

⁴ Tsi' q'ueleyob Elías yic'ot Moisés, woliyob ti t'añ yic'ot Jesús.

⁵ Che' jiñi Pedro tsi' su'be Jesús: —¡Maestro, uts'at che' wʌ'añonla ilayi! La' c mel lojon uxp'ejl lejchempat, jump'ejl cha'añet, jump'ejl cha'añ Moisés, jump'ejl cha'añ Elías, —che'en.

⁶ Come Pedro mach yujilic chuqui woli' yʌl, come woliyob ti ca'bʌl bʌq'uen.

⁷ Che' jiñi tsa' tili tocal, tsi' mosoyob, tsa' tili t'añ ti tocal, tsi' yʌlʌ: Jiñʌch Calobil, c'ux bʌ mi cu'bin, ñʌch'tanla, che'en.

⁸ Ti wi'il jiñi xcʌnt'añob che' bʌ tsi' joy q'ueleyob pañimil, tsi' q'ueleyob ma'añix majqui ya'añ yic'otob, i bajñel jach Jesús.

⁹ Che' woli' ju'belob tilel ti wits, Jesús tsi' tiq'uiyob cha'añ ma'añic mi' su'beñob mi juntiquilic chuqui tsi' q'ueleyob jinto mi' cha' ch'ojyel i Yalobil Wiñic ba'añ chʌmeño' bʌ.

¹⁰ Jiñi xcʌnt'añob tsi' lotoyob jiñi t'añ ti' pusic'al, tsi' c'ajtibeyob i bʌ chuqui isujmlel jiñi t'añ “mi' cha' ch'ojyel ba'añ chʌmeño' bʌ”.

¹¹ Tsi' c'ajtibeyob: —¿Chucoch mi' yʌlob xts'ijbayajob wersa mi' ñaxan tilel Elías?

¹² Jesús tsi' su'beyob: —Isujmʌch ñaxan tal Elías, mi caj i cha' toj-esan pejtelel chuqui añ. ¿Mach ba ts'ijbubilic: “Wersa mi' ñusan ca'bʌl wocol i Yalobil Wiñic, wersa mi' ts'a'lentel ja'el?”

¹³ Mic su'beñetla tsa'ix tili Elías, wiñicob x'ixicob tsi' tic'layob bajche' jach yomob che' bajche' ts'ijbubil, che'en.

Jesús tsi' c'oq'uesa ch'itoñ am bʌ i xi'bʌjlel

¹⁴ Che' bʌ tsa' c'oti ba'añ xcʌnt'añob, tsi' q'uele bajc'ʌl wiñicob x'ixicob ti' joytʌlel, jiñi xts'ijbayajob woliyob ti ca'bʌl t'añ yic'otob.

¹⁵ Ti ora tsa' toj sajtiyob i pusic'al pejtelel wiñicob x'ixicob che' bʌ tsi' q'ueleyob Jesús, ti ajñel tsa' tiliyob ba'añ, tsi' yʌq'ueyob cortesía.

¹⁶ Jesús tsi' c'ajtibeyob: —¿Chucoch woliyetla ti ca'bʌl t'añ yic'otob? —Che'en.

¹⁷ Juntiquil ya' bʌ añ yic'otob tsi' su'be: —Maestro, tsa' c pʌyʌ tilel calobil ba'añet, come añ i xi'bʌjlel mu' bʌ i yotsan ti x'uma'.

¹⁸ Baqui jach mi' chuc, mi' choc ju'bel, mi' loq'uel i lojc i yej, quech'ecña mi' mel i bʌquel i yej, mi' tsʌts-an i yoc i c'ʌb; tsa' c su'be xcʌnt'añob a cha'añ, cha'añ mi' chocob loq'uel, ma'añic tsa' mejliyob, che'en.

¹⁹ Jesús tsi' su'beyob: —¡Wiñicob x'ixicob añet bʌ la wʌle mach bʌ añic mi la' ñop! ¿Jayp'ejl to q'uiñ wʌ'añon la' wic'ot? ¿Jayp'ejl to q'uiñ mic chʌn cuchbeñetla la' sajtemal? Pʌyʌla tilel ba'añon, —che'en.

²⁰ Tsi' pʌyʌyob tilel jiñi ch'itoñ ba'añ Jesús, jiñi xi'ba che' bʌ tsi' q'uele Jesús, tsi' bʌc' ac'ʌ jiñi ch'itoñ ti juquin chʌmel, tsa' yajli jiñi ch'itoñ ti lum, tsi' pajch'i i bʌ, tsa' loq'ui i lojc i yej.

²¹ Jesús tsi' c'ajtibe i tat: —¿Jayp'ejlix ja'b tsa' caji jiñi? —Che'en. I tat tsi' su'be: —C'ʌlʌl che' alʌl to.

²² Ca'bʌl tsi' choco ochel ti c'ajc yic'ot ti ja' cha'añ mi' tsʌnsan pero mi añ to chuqui mi mejlel a mel, p'untañon lojon yic'ot coltañon lojon, che'en.

²³ Jesús tsi' su'be: —Mi mux a ñop, come jiñi mu' bʌ i ñop mi' mejlel ti melbentel pejtelel chuqui tac yom, —che'en.

²⁴ Ti ora jach i tat jiñi ch'itoñ tsi' cha'le c'am bʌ t'añ, tsi' yʌlʌ: —Mic ñop, chocbeñon loq'uel tilebixel bʌ c pusic'al, —che'en.

²⁵ Che' bʌ tsi' q'uele Jesús woli' tempañob i bʌ bajc'ʌl wiñicob x'ixicob, tsi' tiq'ui jiñi xi'ba, tsi' su'be: —Mic su'beñet xi'ba, mu' bʌ a wotsan jiñi ch'itoñ ti x'uma' ti xcojc, loq'uen ti jiñi ch'itoñ, mach ma' chʌn ochel ti' tojlel, —che'en.

²⁶ Tsi' cha'le oñel xi'ba, tsi' cha' ac'ʌ ti juquin chʌmel jiñi ch'itoñ che' bʌ tsa' loq'ui ti' pusic'al. Che' bajche' chʌmeñ tsa' cʌle jiñi ch'itoñ, jiñi cha'añ ca'bʌl tsi' yʌlʌyob: “Chʌmeñix”.

²⁷ Jesús tsi' chucbe i c'ʌb jiñi ch'itoñ, tsi' teche ch'ojyel, tsa' wa'le.

²⁸ Che' bʌ tsa' ochi Jesús ti otot, jiñi xcʌnt'añob i cha'añ tsi' bajñel c'ajtibeyob: —¿Chucoch ma'añic tsa' mejli c choc lojon loq'uel?

²⁹ Jesús tsi' su'beyob: —Mach mejlic ti chojquel loq'uel jiñi xi'ba, cojach yic'ot oración [yic'ot ch'ajb,] —che'en.

Jesús tsi' cha' su'bu bajche' mi caj i chʌmel

³⁰ Tsa' loq'uiyob majlel ya'i, tsa' ñumiyob ti Galilea, mach yomic Jesús mi' yu'biñob mi ya'añ.

³¹ Come woli' cʌntesan majlel xcʌnt'añob i cha'añ, tsi' su'beyob: —Mi caj i yʌjq'uel i Yalobil Wiñic ti' c'ʌb wiñicob mu' bʌ caj i tsʌnsañob, che' chʌmeñix mi caj i cha' ch'ojyel ti' yuxp'ejlel q'uiñ, —che'en.

³² Pero ma'añic tsi' ch'ʌmbeyob isujm jiñi t'añ, come añob i bʌq'uen cha'añ mi' c'ajtibeñob isujmlel.

¿Majqui jiñi ñumen ñuc bʌ?

³³ Tsa' c'oti Jesús ti Capernaúm, che' bʌ tsa' ochi ti otot, tsi' c'ajtibeyob: —¿Chuqui tsa' la' wʌlʌ tilel ya' ti bij? —Che'en.

³⁴ Ma'añic chuqui tsi' jac'ʌyob, come tsi' cʌlʌx pejcayob i bʌ ti bij cha'añ woli' bajñel yajcañob majqui ñumen ñuc mi' caj ti ajñel ti' tojlelob.

³⁵ Jiñi cha'añ tsa' buchle Jesús, tsi' pʌyʌ tilel jiñi lajchʌntiquil, tsi' su'beyob: —Majqui yom ajñel ti c'ax ñuc ti la' tojlel wersa mi' mel i bʌ ti c'ax ch'och'oc yic'ot yom mi' coltañetla ti la' pejtelel.

³⁶ Tsi' pʌyʌ tilel juntiquil alob, tsi' yʌc'ʌ ti ojlil ba'añob, che' bʌ tsi' meq'ue, tsi' su'beyob:

³⁷ —Majqui jach mi' c'uxbin tij c'aba' juntiquil alʌl che' bajche' ili alʌl, mi' c'uxbiñon. Jiñi mu' bʌ i c'uxbiñon mach joñoñic jach mi' c'uxbin, mi' c'uxbin ja'el c Tat tsa' bʌ i chocoyon tilel, —che'en.

Jiñi mach bʌ añic mi' contrajiñonla woli' coltañonla

³⁸ Juan tsi' su'be: —Maestro, tsa' j q'uele lojon juntiquil mu' bʌ i choc loq'uel xi'bajob ti a c'aba', pero ma'añic mi' tsajcañon lojon, jiñi cha'añ tsa' c tiq'ui lojon come ma'añic mi' tsajcañon lojon, —che'en.

³⁹ Pero Jesús tsi' su'be: —Mach mi la' tic', come ma'añic majqui mi' pʌs p'ʌtʌl bʌ i ye'tel tij c'aba' mu' bʌ i caj i cha'len t'añ tij contra.

⁴⁰ Come jiñi mach bʌ añic mi' contrajiñonla, mi' coltañonla.

⁴¹ Come majqui jach mi' yʌq'ueñetla jump'ejl tsima ja' tij c'aba' cha'añ ti' caj i cha'añetla Cristo, isujm mic su'beñetla, ma'añic mi caj i sʌt i chobejtʌbal.

Jiñi mu' bʌ i yʌsañonla ti mulil

⁴² Majqui jach mi' yʌsan ti mulil juntiquil ili ch'och'oco' bʌ mu' bʌ i ñopoñob, ñumen uts'at tsa'ic ñaxan cʌjchi ña'atun ti' bic' jiñi wiñic cha'añ mi' chojquel ochel ti mar.

⁴³ Mi woli' yʌsañet ti mulil a c'ʌb, tsepe loq'uel. Uts'at mi tsa' taja a cuxtʌlel che' xbor c'ʌbet, mach uts'atic mi ti cha'ts'ijtlel a c'ʌb ma' majlel ti tojmulil, ti jiñi c'ajc mach bʌ yujilic yajpel,

⁴⁴ [ba' ma'añic mi' chʌmel i motso'lel, ba' ma'añic mi' yajpel jiñi c'ajc ti pejtelel ora.]

⁴⁵ Mi woli' yʌsañet ti mulil a woc, tsepe loq'uel. Uts'at mi tsa' taja a cuxtʌlel che' xbor oquet, mach uts'atic mi ti cha'ts'ijtlel a woc ma' chojquel ochel ti tojmulil, [ti jiñi c'ajc mach bʌ yujilic yajpel,]

⁴⁶ [ba' ma'añic mi' chʌmel i motso'lel, ba' ma'añic mi' yajpel c'ajc ti pejtelel ora.]

⁴⁷ Mi woli' yʌsañet ti mulil a wut, loc'san, uts'at che' ma' wochel ti' yumʌntel Dios yic'ot jump'ejl jach a wut, mach uts'atic che' cha'p'ejl a wut ma' chojquel ochel ti tojmulil,

⁴⁸ ba' ma'añic mi' chʌmel i motso'lel, ba' ma'añic mi' yajpel c'ajc ti pejtelel ora.

⁴⁹ Come ti pejtelel pañimil mi caj i yotsʌbentel i yʌts'mil che' mi' ñusañob wocol [come pejtelel majtañʌl mu' bʌ i tsʌnsʌntel mi caj i yotsʌbentel i yʌts'mil.]

⁵⁰ Uts'at jiñi ats'am pero mi tsa' sajti i tsajel, ¿bajche' mi mejlel la' cha' tsaj-esan? Yom chʌn añ la' wʌts'mil yic'ot ajñenla ti' ñʌch'tʌlel la' pusic'al yic'ot la' pi'ʌlob, che'en.