Marcos 7 - Jiñi Tsiji' bʌ Wen T'añ cha'añ Estudio

Jiñi mu' bʌ i bi'b-esan wiñic

¹ Tsi' tempayob i bʌ fariseojob yic'ot cha'tiquil uxtiquil xts'ijbayajob ch'oyolo' bʌ ti Jerusalén, tsa' tiliyob ba'añ Jesús.

² Tsi' q'ueleyob añ xcʌnt'añob i cha'añ woli bʌ i c'uxob waj che' mach pocbilobic i c'ʌb. [Tsi' ts'a'leyob,]

³ come fariseojob yic'ot pejtelel judíojob mi' chʌn jac'ob i su'bal i ñojte'el. Jiñi cha'añ, ma'añic mi' c'uxob i waj mi ma'añic mi' wen pocob i c'ʌb.

⁴ Che' mi' sujtelob ti choñoñibʌl tac, mi ma'añic mi' ñaxan cha'leñob ts'ʌmel, ma'añic mi' c'uxob i waj. Añ to ca'bʌl i su'bal i ñojte'el mu' bʌ i chʌn melob. I tilelʌch mi' pocob tsima yic'ot p'ejt, yic'ot plato melbil bʌ ti tsucu taq'uiñ yic'ot wʌyibʌl.

⁵ Jiñi fariseojob yic'ot xts'ijbayajob tsi' c'ajtibeyob: —¿Chucoch mi' ñusʌbeñob i su'bal lac ñojte'el jiñi xcʌnt'añob a cha'añ? ¿Chucoch mi' cha'leñob we'el che' bi'bi'ob i c'ʌb?

⁶ Jesús tsi' su'beyob: —Cha'chajp jax la' pusic'al. Isujm chuqui tsi' su'bu Isaías che' bʌ tsi' tajayetla ti t'añ che' bajche' ts'ijbubil: “Ti' yej jach mi' su'bob c ñuclel jiñi wiñicob x'ixicob, pero ñajt añob i pusic'al tic tojlel.

⁷ Lolom jach mi' ch'ujutesañoñob, come jiñʌch i mandar tac wiñicob woli bʌ i cʌntesañob”, che'en Jesús.

⁸ Come mi la' cʌyben i mandar Dios. Mi la' wen ñopben i cʌntesa wiñicob x'ixicob [che' bajche' i pocol jarra yic'ot vaso tac yic'ot yan tac bʌ lajal bʌ bajche' iliyi yom bʌ pocol.]

⁹ Tsi' su'beyob ja'el: —Mi la' wʌl uts'at mi la' ñusʌben i mandar Dios cha'añ mi la' wen ñop i su'bal la' ñojte'el.

¹⁰ Moisés tsi' yʌlʌ: “Q'uele ti ñuc a tat a ña'. Jiñi mu' bʌ i p'aj i tat i ña' mi caj i wersa chʌmel”, che'en.

¹¹ Pero jatetla mi la' wʌl: Uts'at mi su'beñob i tat i ña' ma'añic chuqui mi mejlel i yʌq'ueñob cha'añ mi' coltañob, come Corbán i chu'bʌañ mi' yʌlob. (Jiñi Corbán mi' yʌl ti lac t'añ: Jiñʌch mu' bʌ cʌq'uen Dios).

¹² Che' jiñi, ma'añic mi la' wʌq'ueñob i coltañ i tat i ña'.

¹³ Mi la' jisʌben i c'ʌjñibal i t'añ Dios cha'añ jach i su'bal la' ñojte'el mu' bʌ la' cha' su'ben la' walobilob. Añ ca'bʌl chuqui leco mi la' mel che' bajche' jiñi, che'en.

¹⁴ Jesús tsi' cha' pʌyʌ tilel pejtelel wiñicob x'ixicob, tsi' su'beyob: —Ñʌch'tañonla ti la' pejtelel. Ch'ʌmbenla isujm.

¹⁵ Ti pañimil ma'añic chuqui c'uxbil bʌ mu' bʌ i bi'b-esʌben i pusic'al wiñicob. Jiñi mu' bʌ i loq'uel ti' pusic'al wiñic, jiñʌch mu' bʌ i bi'b-esan.

¹⁶ [Majqui jach añ i chiquin cha'añ mi yu'bin, la' i ñʌch'tan,] —che'en.

¹⁷ Jesús tsi' cʌyʌ wiñicob x'ixicob. Che' bʌ tsa' ochi ti otot, jiñi xcʌnt'añob i cha'añ tsi' c'ajtibeyob isujmlel jiñi lajiya.

¹⁸ Jesús tsi' c'ajtibeyob: —¿Jatetla ja'el, mach ba añic mi la' ch'ʌmben isujm? ¿Mach ba añic mi la' ña'tan cha'añ ma'añic mi' bi'b-esan wiñic jiñi mu' bʌ i yochel ti' malil?

¹⁹ Come ma'añic mi' yochel ti' pusic'al, jiñi jach ti' ñʌc'. Ñumel jach mi' ñumel, —che'en. Che'ʌch tsi' cʌntesayob cha'añ sʌcʌch pejtelel i bʌl lac ñʌc'.

²⁰ Jesús tsi' yʌlʌ: “Jiñi mu' bʌ i loq'uel ti wiñic mi' bi'b-esan wiñic”.

²¹ Come ch'oyol ti' pusic'al wiñicob x'ixicob mi' tilel ca'bʌl jontol bʌ i ña'tʌbal, yic'ot i ts'i'lel, yic'ot i tajol i yixic, yic'ot tsʌnsa,

²² yic'ot xujch', yic'ot i mulʌntel chu'bʌañʌl, yic'ot jontolil, yic'ot lotiya, yic'ot i bi'bi'lel, yic'ot tsʌytsʌyña bʌ i pusic'al cha'añ i wenlel yaño' bʌ, yic'ot p'ajoñel, yic'ot i q'uelol i bʌ ti ñuc yic'ot i tontojlel.

²³ Come ch'oyol ti' pusic'al wiñicob x'ixicob pejtelel jiñi jontolil jiñʌch mu' bʌ i bi'b-esan, che'en Jesús.

I xuc'tʌlel x'ixic ch'oyol bʌ ti Sirofenicia

²⁴ Tsa' wa'le Jesús, tsa' loq'ui majlel c'ʌlʌl ti' lumal Tiro yic'ot ti [Sidón.] Tsa' ochi ti otot. Mach yomic mi' ña'tañob mi ya'añ, pero ma'añic ba' tsa' mejli ti mucul ajñel.

²⁵ Juntiquil x'ixic añ xch'oc bʌ yalobil añ i xi'bʌjlel, tsi' yu'bi ya'añ Jesús. Ti orajach tsa' tili tsi' ñocchoco i bʌ ti' ye'bal i yoc.

²⁶ Jiñi x'ixic jiñʌch griega, ch'oyol ti Sirofenicia. Tsi' c'ajtibe ti wocol t'añ cha'añ mi' chocben loq'uel i xi'bʌjlel i yalobil.

²⁷ Jesús tsi' su'be: —La' ñaxan we'sʌntic alobob, come mach uts'atic mi la' chilben i waj alobob cha'añ mi la' chocben ts'i', —che'en.

²⁸ Jiñi x'ixic tsi' jac'ʌ: —Isujmʌch c Yum, pero jiñi ts'i' mi' c'ux i xujt'il i waj alobob mu' bʌ i yajlel ti' ye'bal mesa, —che'en.

²⁹ Jesús tsi' su'be: —Cha'añ ti' caj jiñi t'añ tsa' bʌ a su'beyon, mux a mejlel ti sujtel; tsa'ix loq'ui i xi'bʌjlel a walobil, —che'en.

³⁰ Che' bʌ tsa' c'oti jiñi x'ixic ti' yotot tsi' taja i yalobil ñolol ti' wʌyib, loq'uemix jiñi xi'ba.

Jesús tsi' c'oq'uesa x'uma' wiñic

³¹ Jesús tsa' cha' loq'ui ti lum i c'aba' Tiro. Che' bʌ tsa' ñumi ti Sidón, tsa' c'oti ti mar am bʌ ti Galilea. Woli' xʌn ñumel ti tejclum tac Decápolis.

³² Wiñicob x'ixicob tsi' pʌyʌyob tilel juntiquil xcojc, wocol mi' cha'len t'añ, tsi' c'ajtibeyob cha'añ mi' yʌc' i c'ʌb ti' jiñi wiñic.

³³ Jiñi cha'añ Jesús tsi' pʌyʌ tilel ti' bajñelil, tsi' yotsa i yal i c'ʌb ti' chiquin, yic'ot tsi' tujba yal i c'ʌb, che' jiñi tsi' tʌlbe i yac'.

³⁴ Jesús tsi' letsa i wut ti panchan, c'am tsi' jac'ʌ i yoj, tsi' su'be: —¡Efata! (mu' bʌ i yʌl ti lac t'añ: “La' jajmic”.)

³⁵ Ti jiñi bʌ ora tsa' jajmi i chiquin jiñi wiñic, tsa' jijti i yac', tojix tsa' caji ti t'añ.

³⁶ Jesús tsi' wersa su'beyob cha'añ ma'añic mi' su'beñob yaño' bʌ mi juntiquilic. Ti jujunyajl che' bʌ tsi' tiq'uiyob, ñumen tsi' pucuyob t'añ.

³⁷ C'ax ca'bʌl tsa' toj sajtiyob i pusic'al wiñicob x'ixicob, tsi' yʌlʌyob: —Uts'at pejtelel chuqui tac tsi' mele. Mi' yʌq'ueñ i yu'bin t'añ jiñi xcojcob. Mi' yʌq'ueñ i cha'len t'añ jiñi x'uma'ob.