Marcos 2 - Jiñi Tsiji' bʌ Wen T'añ cha'añ Estudio

Jesús tsi' c'oq'uesa wiñic mach bʌ añic i c'ʌjñibal i yoc i c'ʌb

¹ Che' bʌ tsa' ñumi cha'p'ejl uxp'ejl q'uiñ, tsa' cha' ochi Jesús ti Capernaúm, che' bʌ tsi' yu'biyob ya'añ ti otot,

² ti orajach tsi' tempayob i bʌ ca'bʌlob, jinto ma'añix tsa' ochiyob c'ʌlʌl ti ti' otot. Jesús tsi' su'beyob i t'añ Dios.

³ Jiñi cha'añ tsa' tiliyob wiñicob woli bʌ i pʌyob tilel ba'añ Jesús juntiquil wiñic mach bʌ p'ʌtʌlic i yoc i c'ʌb, woli' ch'uyob tilel chʌntiquil wiñicob.

⁴ Che' bʌ ma'añic tsa' mejliyob ti c'otel ba'añ Jesús cha'añ ti' caj wen ca'bʌl lac pi'ʌlob, tsi' toc jamʌyob i jol otot ti' chañelal Jesús. Che' bʌ tsa'ix i jamʌyob tsi' ju'sayob ti wʌyib ba' ñolol jiñi mach bʌ p'ʌtʌlic i yoc i c'ʌb.

⁵ Che' bʌ tsi' q'uele Jesús woli i ñopob ti pusic'al, tsi' su'be jiñi mach bʌ p'ʌtʌlic i yoc i c'ʌb: —Calobil ñusʌbilix a mul, —che'en.

⁶ Ya' buchulob cha'tiquil uxtiquil xts'ijbayajob, woliyob ti t'añ ti' pusic'al:

⁷ ¿Chucoch che'i mi' cha'len t'añ jiñi wiñic? Woli ti p'ajoñel, ¿Majqui mi mejlel i ñusan mulil, mach ba cojic jach Dios?

⁸ Ti orajach tsi' ña'ta Jesús ti' pusic'al chuqui woli' ña'tañob, tsi' su'beyob: —¿Chucoch che'i mi la' cha'len t'añ ti la' pusic'al?

⁹ ¿Baqui bʌ jiñi t'añ ñumen uts'at bʌ mic su'ben jiñi mach bʌ p'ʌtʌlic i yoc i c'ʌb: “Ñusʌbilix a mul” o che' mic su'ben: “Ch'ojyen, teche a wʌyib, cha'len xʌmbal?”

¹⁰ Cha'añ mi la' ña'tan añ i p'ʌtʌlel i Yalobil Wiñic ila ti pañimil cha'añ mi' ñusan mulil, —tsi' su'be jiñi c'am bʌ—:

¹¹ Mic su'beñet: Ch'ojyen, teche a wʌyib, cucu ti a wotot, —che'en Jesús.

¹² Jiñi wiñic tsa' ch'ojyi ti ora, tsi' teche i wʌyib, tsa' loq'ui majlel ti' wut pejtelelob; che' jiñi, tsa' toj sajtiyob i pusic'al ti pejtelelob; tsi' tsictesayob i ñuclel Dios. Tsi' yʌlʌyob: —Ma'añic ba' tsa' laj q'uele bajche' jiñi.

Tsa' pʌjyi Leví

¹³ Ti wi'il tsa' loq'ui Jesús tsa' cha' majli ti ti' mar, pejtelel wiñicob x'ixicob tsi' tempayob i bʌ ba'añ Jesús tsi' cʌntesayob.

¹⁴ Che' woli ti xʌmbal majlel tsi' q'uele Leví, i yalobil Alfeo, buchul ba' mi' ch'ʌjmel tojoñel, Jesús tsi' su'be: —Tsajcañon. Tsa' wa'le Leví, tsi' tsajca majlel.

¹⁵ Che' ba ora ya'añ Jesús ti' t'ejl mesa ti yotot Leví, ca'bʌl xch'ʌm tojoñelob yic'ot xmulilob tsa' buchleyob yic'ot Jesús ti' t'ejl mesa yic'ot xcʌnt'añob i cha'añ. Come ca'bʌl wiñicob x'ixicob tsi' tsajcayob majlel.

¹⁶ Jiñi xts'ijbayajob yic'ot fariseojob tsi' q'ueleyob woli ti we'el Jesús yic'ot xch'ʌm tojoñelob yic'ot xmulilob, tsi' c'ajtibeyob xcʌnt'añob i cha'añ: —¿Chucoch mi' cha'len we'el uch'el yic'ot xch'ʌm tojoñelob yic'ot xmulilob?

¹⁷ Che' bʌ tsi' yu'bi Jesús iliyi, tsi' su'beyob: —Jiñi c'oc'o' bʌ mach yomobic ts'ʌcʌntel, cojach jiñi c'amo' bʌ, ma'añic tsa' tiliyon cha'añ mic pʌy jiñi tojo' bʌ, cojach xmulilob.

C'ajtibal cha'añ ch'ajb

¹⁸ Jiñi xcʌnt'añob i cha'añ Juan woliyob ti ch'ajb yic'ot i cha'año' bʌ fariseojob, che' jiñi tsa' tili i c'ajtibeñob Jesús: —¿Chucoch jiñi xcʌnt'añob i cha'añ Juan yic'ot i cha'año' bʌ fariseojob mi' cha'leñob ch'ajb? ¿Chucoch ma'añic mi' cha'leñob ch'ajb xcʌnt'añob a cha'añ?

¹⁹ Jesús tsi' su'beyob: —¿Mu' ba mejlel i cha'leñob ch'ajb xq'uiñijelob che' ya' to añob yic'ot jiñi wiñic woli bʌ ti ñujpuñijel? Che' ya' to añ jiñi wiñic woli bʌ ti ñujpuñijel mach mejlicob ti ch'ajb.

²⁰ Pero tal i yorajlel che' mi caj i pʌjyel majlel xñujpuñijel, che' jiñi mi caj i cha'leñob ch'ajb.

²¹ —Ma'añic majqui mi' c'ʌn tsijib pisil cha'añ mi' lʌw tsucul bʌ i pislel, mi che' tsi' mele mi' tsijlel majlel tsucul bʌ pisil ba'añ jiñi tsiji' bʌ i lʌjwil jinto ñumen colem i tsijlemal.

²² Che' ja'el ma'añic majqui mi' yotsan tsijib vino ti tsucul bʌ i yajñib melbil bʌ ti pʌchi, mi tsi' yotsa jiñi vino mi' tojmel i yajñib, mi' bejq'uel, che' ja'el mi' jilel i yajñib, pero yom mi' yotsʌntel tsijib vino ti tsiji' bʌ i yajñib, —che'en Jesús.

Xcʌnt'añob tsi' tuc'uyob i wut jam ti' q'uiñilel c'aj-o

²³ Ti jump'ejl q'uiñ che' mi' c'ajob i yoj, tsa' ñumi majlel Jesús ba' pʌc'bil jam c'uxbil bʌ i wut, che' woliyob ti xʌmbal majlel jiñi xcʌnt'añob i cha'añ, tsa' caji i tuc'ob c'uxbil bʌ i wut jam.

²⁴ Jiñi cha'añ jiñi fariseojob tsi' su'beyob Jesús: —Awilan, ¿chucoch mi' melob chuqui tic'bil ti jiñi q'uiñ che' mi laj c'aj la co?

²⁵ Jesús tsi' su'beyob: —¿Mach ba añic tsa' la' q'uele ti juñ chuqui tsi' mele David che' bʌ tsi' yu'bi wi'ñal yic'ot i pi'ʌlob?

²⁶ Tsa' ochi ti' yotot Dios che' ya'añ Abiatar ti' ye'tel ti c'ax ñuc bʌ motomaj, David tsi' c'uxu jiñi waj tsa' bʌ ajq'ui ti mesa, tic'bil bʌ ti mandar cha'añ ma'añic mi' c'uxob, cojach motomajob mi mejlel i c'uxob. David tsi' yʌq'ueyob i c'ux i pi'ʌlob ja'el, —che'en.

²⁷ Jesús tsi' su'beyob ja'el: —Jiñi i q'uiñilel c'aj-o melbil cha'añ i wenlel wiñicob x'ixicob. Pero mach melbilobic wiñicob x'ixicob cha'añ mi' yʌq'ueñob i ñuclel i q'uiñilel c'aj-o.

²⁸ Jiñi cha'añ i Yalobil Wiñic i Yumʌch ja'el i q'uiñilel c'aj-o, che'en. I yumʌntel Bajche' tsa' ujti Baqui mi lac taj Albil i cha'añ x'alt'añob ; ; ; . Albil i cha'añ Juan Bautista ; . i lajintel ; ,,,,,; ; ; ,; . Tsa' bʌ i tsictesa Jesús Ti' subt'añ ; . Yom bʌ mi' mejlel ; ; ; ; ; ,; ; ; ; ; ; . Tsa' bʌ i mʌcta cha'añ mi ts'ʌctiyel ; ; . Jiñi xcʌnt'añob yom mi su'bob ti' melbal yic'ot ti' xuc'tʌlel i pusic'al ,; ; ; ; . I su'bal xcʌnt'añob ; ; ; ; ,. Ti' ts'ijbujel xcʌnt'añob ; ; ; ; . Ti' yujtibal (ti jiñi cojix bʌ q'uiñ) ; ; ; ,.