Marcos 11 - Jiñi Tsiji' bʌ Wen T'añ cha'añ Estudio

Che' bʌ tsa' ochi ti Jerusalén

¹ Che' bʌ lʌc'ʌlix añob ti Jerusalén, lʌc'ʌl ti Betfagé yic'ot ti Betania ya' ti' tojel Olivo wits; Jesús tsi' choco majlel cha'tiquil xcʌnt'añob i cha'añ.

² Tsi' su'beyob: —Cucula ti tejclum ya' ti' tojel la' wut, che' mi la' wochel, ya' cʌchʌl mi caj la' taj tsiji' burro, maxto bʌ añic majqui tsi' c'ʌchta, jitila, pʌyʌla tilel.

³ Mi añ majqui mi' c'ajtibeñetla: ¿Chucoch woli la' mel bajche' jiñi? Su'benla: “Yom i c'ʌn lac Yum, ti wi'il mi caj i cha' sutq'uibeñet”, che'en Jesús.

⁴ Tsa' majliyob jiñi xcʌnt'añob. Tsi' tajayob jiñi burro cʌchʌl ti ti' otot ya' ti calle, tsi' jitiyob.

⁵ Jiñi ya' bʌ wa'alob tsi' su'beyob: —¿Chucoch woli la' jit jiñi burro?

⁶ Jiñi xcʌnt'añob tsi' su'beyob chuqui tsi' yʌlʌ Jesús. Jiñi wiñicob tsi' chocoyob majlel.

⁷ Jiñi xcʌnt'añob tsi' pʌyʌyob tilel jiñi tsijib burro ba'añ Jesús. Tsi' tasibeyob i pat ti' pislelob, Jesús tsa' c'ʌchle.

⁸ Añ ca'bʌl tsa' bʌ i tasiyob majlel jiñi bij ti' pislelob. Yaño' bʌ tsa' caji i tsepob i c'ʌb te' am bʌ i yopol tsa' caji i lijlij ac'ob majlel ti bij.

⁹ Jiñi woli bʌ i majlelob ti ñaxan yic'ot jiñi woli bʌ i tilelob ti wi'il pat c'am tsi' yʌlʌyob: —Coltañon lojon. La' sujbic a ñuclel jatet mu' bʌ a tilel ti' c'aba' lac Yum.

¹⁰ La' sujbic i ñuclel i yumʌntel lac tat David woli bʌ i tilel. Coltañon lojon añet bʌ ti chañ.

¹¹ Tsa' ochi Jesús ti Jerusalén, tsa' majli ti Templo. Che' bʌ tsa'ix i joy q'uele pejtelel chuqui tac añ, che' bʌ wolix i yic'an, tsa' majli ti Betania yic'ot jiñi lajchʌntiquil.

Jesús tsi' tiq'ui higuera te'

¹² Ti yijc'ʌlal che' loq'uemobix ti Betania, tsi' yu'bi wi'ñal.

¹³ Ñajt tsi' q'uele higuera te' am bʌ i yopol; tsa' majli i q'uel mi añ chuqui mi' taj; pero che' bʌ tsa' c'oti ya' ba'añ te', i yopol jach tsi' taja come maxto i yorajlelic i wut.

¹⁴ Jiñi cha'añ Jesús tsi' su'be jiñi te': —Mach i chʌn c'ux a wut wiñicob x'ixicob ti pejtelel ora. Jiñi xcʌnt'añob i cha'añ tsi' yu'biyob.

Jesús tsi' sʌc-esa Templo

¹⁵ Che' bʌ tsa' c'otiyob ti Jerusalén, Jesús tsa' ochi ti Templo, tsa' caji i choc loq'uel jiñi woliyo' bʌ ti choñoñel yic'ot woliyo' bʌ ti mʌñoñel ti Templo. Jesús tsi' ch'a' chocbeyob i mesa tac xq'uex taq'uiñob, yic'ot i buchlib tac jiñi woli bʌ i choñob x'ujcuts.

¹⁶ Tsi' tiq'uiyob cha'añ ma'añic chuqui mi' ch'ʌmob ñumel ti' mal Templo mi juntiquilic.

¹⁷ Jesús tsi' cʌntesayob, tsi' su'beyob: —¿Mach ba ts'ijbubil ti juñ: “Mi' caj ti ajlel cotot ti' yotlel oración cha'añ pejtelel wiñicob x'ixicob ti pañimil?” Pero jatetla tsa'ix la' wotsa ti' ch'eñal xujch', —che'en.

¹⁸ Che' bʌ tsi' yu'biyob jiñi xts'ijbayajob yic'ot jiñi ñuc bʌ motomajob, tsi' sajcayob bajche' mi mejlel i tsʌnsañob come tsi' bʌc'ñayob Jesús. Come tsa' toj ñuc-ayob i pusic'al pejtelel wiñicob x'ixicob cha'añ i cʌntesʌbal.

¹⁹ Che' wolix i yic'an tsa' loq'ui majlel ti tejclum Jesús yic'ot jiñi xcʌnt'añob.

Tsa' tiqui higuera te'

²⁰ Che' ti sʌc'ajel, che' bʌ woli ñumelob ti' t'ejl jiñi higuera te', tsi' q'ueleyob tiquiñix c'ʌlʌl ti' wi'.

²¹ Jiñi cha'añ Pedro tsa' c'ajtiyi i cha'añ, tsi' su'be: —Maestro, q'uele tsa'ix tiqui jiñi higuera te' tsa' bʌ a ch'ʌcʌ, —che'en.

²² Jesús tsi' jac'ʌ: —Ñopola Dios.

²³ Come isujm mic su'beñetla: Majqui jach mi' su'ben jiñi wits cha'añ mi' ch'ujyel letsel cha'añ mi' chojquel ochel ti mar, mi mach tilebixelic i pusic'al, mi wolix i ñop mi caj i yujtel bajche' mi' yʌl, jiñi mu' bʌ i yʌl mi caj i melbentel.

²⁴ Jiñi cha'añ mic su'beñetla: Pejtelel chuqui mi la' c'ajtiben Dios ti oración, ñopola mi caj la' wʌq'uentel, che' jiñi mi caj la' taj.

²⁵ Yic'ot che' woliyetla ti oración, mi añ chuqui lotol ti la' pusic'al ti' contra juntiquil, ñusʌbenla i mul cha'añ mi' ñusʌbeñetla la' mul la' Tat am bʌ ti panchan,

²⁶ [come mi ma'añic mi la' ñusʌben i mul la' pi'ʌlob, ma'añic mi caj i ñusʌbeñetla la' mul ja'el la' Tat am bʌ ti panchan,] —che'en Jesús.

I p'ʌtʌlel i ye'tel Jesús

²⁷ Tsa' cha' tiliyob ti Jerusalén, che' bʌ tsi' cha'le xʌmbal Jesús ti mal Templo, tsa' tiliyob ñuc bʌ motomajob yic'ot xts'ijbayajob yic'ot xñoxob año' bʌ i ye'tel.

²⁸ Tsi' c'ajtibeyob: —¿Baqui tsa' taja a we'tel cha'añ ma' mel iliyi? ¿Majqui tsi' yʌq'ueyet a we'tel cha'añ ma' mel chuqui tac ma' mel?

²⁹ Jesús tsi' su'beyob: —Joñon ja'el mij c'ajtibeñetla, jac'beñonla, che' jiñi joñon mi caj c su'beñetla baqui tsa' c taja que'tel cha'añ jiñi mu' bʌ c mel.

³⁰ ¿Baqui ch'oyol i ye'tel Juan cha'añ mi' yʌc' ch'ʌmja'? ¿Ch'oyol ba ti panchan o ch'oyol ti wiñicob? Su'beñonla, —che'en Jesús.

³¹ Tsa' caji i bajñel pejcañob i bʌ, tsi' yʌlʌyob: —Mi tsa' lac su'be ch'oyol ti panchan, mi cho'onla, mi caj i yʌl: ¿Chucoch, che' jiñi, ma'añic tsa' la' ñopbe i t'añ?

³² ¿Mi tsa' la cʌlʌ ch'oyol ti wiñicob? Pero tsi' bʌc'ñayob wiñicob x'ixicob come ti pejtelelob tsi' yʌlʌyob mero x'alt'añʌch jiñi Juan.

³³ Jiñi cha'añ tsi' jac'beyob: —Mach cujilic lojon, —che'en. Che' jiñi Jesús tsi' su'beyob: —Joñon ja'el, ma'añic mic su'beñetla baqui tsa' c taja que'tel cha'añ jiñi mu' bʌ c mel.