Lucas 9 - Jiñi Tsiji' bʌ Wen T'añ cha'añ Estudio

Tsa' aq'uentiyob i ye'tel jiñi lajchʌntiquil

¹ Jesús tsi' pʌyʌ tilel jiñi lajchʌntiquil xcʌnt'añob i cha'añ. Tsi' yʌq'ueyob i ye'tel yic'ot i p'ʌtʌlel ti' contra xi'bajob, yic'ot cha'añ mi c'oq'uesañob pejtelel c'am-ʌjel tac.

² Tsi' chocoyob majlel cha'añ mi' su'bob jiñi wen t'añ cha'añ i yumʌntel Dios, yic'ot cha'añ mi' c'oq'uesañob jiñi xc'am-ʌjelob.

³ Jesús tsi' su'beyob: —Mach yomic chuqui mi la' ch'ʌm majlel ti bij, mi te' cha'añ xʌmbal, mi mochila, mi waj, mi taq'uiñ; yic'ot mach yomic mi la' ch'ʌm majlel cha'p'ejl la' bujc.

⁴ Baqui jach bʌ otot mi la' wochel, ya' yom mi la' jijlel c'ʌlʌl mi la' loq'uel majlel ti jiñi tejclum.

⁵ Baqui jach ma'añic mi la' wotsʌntel, loq'uenla ti jiñi tejclum, tijcanla loq'uel i ts'u'bejñal la' woc cha'añ mi' q'uelob mach uts'atic tsi' meleyob.

⁶ Tsa' loq'uiyob majlel jiñi xcʌnt'añob, tsi' pucuyob i bʌ ti pejtelel xchumtʌl tac, tsi' su'buyob jiñi wen t'añ yic'ot tsi' cha'leyob c'oq'uesaya ti pejtelel lum.

Tsa' tsʌnsʌnti Juan tsa' bʌ i yʌc'ʌ ch'ʌmja'

⁷ Tsa' caji yu'bin jiñi yumʌl Herodes pejtelel chuqui tac tsi' mele Jesús, ca'bʌl tsi' cha'le tsic pusic'al, come cha'tiquil uxtiquil tsi' yʌlʌyob: “Tsa'ix tejchi ch'ojyel Juan ba'añ chʌmeño' bʌ”.

⁸ Yaño' bʌ tsi' yʌlʌyob: “Tsa'ix cha' tsictiyi Elías”; yaño' bʌ tsi' yʌlʌyob: “Tsa'ix cha' ch'ojyi juntiquil oñiyi bʌ x'alt'añ”.

⁹ Tsi' yʌlʌ Herodes: —Joñon tsa'ix cʌc'ʌ ti set' t'ojbentel loq'uel i bic' Juan. ¿Majqui jiñi woli bʌ i mel ñuc bʌ i ye'tel? Jiñi cha'añ Herodes yom i q'uel Jesús.

Tsa' we'sʌntiyob jo'p'ejl mil

¹⁰ Che' bʌ tsa' cha' tiliyob jiñi apóstolob, tsi' su'beyob Jesús pejtelel chuqui tac tsi' meleyob. Jesús tsi' bajñel pʌyʌyob majlel ti jochol bʌ lum ti' tojel jiñi tejclum i c'aba' Betsaida.

¹¹ Che' bʌ tsi' yu'biyob jiñi wiñicob x'ixicob, tsi' tsajcayob majlel. Jesús tsi' ch'ʌmʌyob ti' wenta. Tsi' su'beyob t'añ cha'añ i yumʌntel Dios. Tsi' c'oq'uesa jiñi yomo' bʌ lajmesʌntel.

¹² Che' wolix ti bʌjlel q'uiñ, tsa' tiliyob ba'añ Jesús jiñi lajchʌntiquil, tsi' su'beyob: —Su'beñobix majlel jiñi wiñicob x'ixicob ti xchumtʌl tac yic'ot ti otot tac am bʌ ti' joytʌlel cha'añ mi' jijlelob ba' mi' tajob i bʌl i ñʌc', come wʌ'añonla ti jochol bʌ lum.

¹³ Jesús tsi' su'beyob: —Aq'uenla jatetla chuqui tac mi' c'uxob. Tsi' su'beyob: —Cojach añ c cha'añ lojon jo'q'uejl waj yic'ot cha'cojt chʌy pero mach jastiyic, cojach mi mux majlel c mʌn lojon i bʌl ñʌc'ʌl cha'añ pejtelel ili bajc'ʌl wiñicob x'ixicob.

¹⁴ Ya'añob che' bajche' jo'p'ejl mil wiñicob. Jesús tsi' su'be xcʌnt'añob i cha'añ: —Su'beñob buchtʌl ti' mojt ti' mojt ti lujuntiquil i yuxc'al ti jujunmojt, —che'en.

¹⁵ Che'ʌch tsi' meleyob che' bajche' tsi' yʌlʌ. Tsi' su'beyob buchtʌl ti pejtelelob.

¹⁶ Jesús tsi' ch'ʌmʌ jiñi jo'q'uejl waj yic'ot cha'cojt chʌy. Tsi' letsa i wut ti panchan. Tsi' cha'le oración. Tsi' xet'e waj. Tsi' yʌq'ue xcʌnt'añob i cha'añ, cha'añ mi' pucbeñob wiñicob x'ixicob.

¹⁷ Tsi' c'uxuyob waj ti pejtelelob, tsa' ñaj-ayob, tsi' lotoyob lajchʌmp'ejl chiquib i xujt'il tac.

Pedro tsi' yʌlʌ: Jatet Cristojet

¹⁸ Ti jump'ejl q'uiñ Jesús che' woli ti oración ti bajñelil, ya'añob yic'ot xcʌnt'añob i cha'añ, tsi' c'ajtibeyob, tsi' yʌlʌ: —¿Majquiyon mi' yʌlob jiñi wiñicob x'ixicob? —Che'en.

¹⁹ Jiñi xcʌnt'añob tsi' jac'beyob: —Cha'tiquil uxtiquil mi' yʌlob jatet Juan tsa' bʌ i yʌc'ʌ ch'ʌmja', yam bʌ mi' yʌlob cha'añ jatetʌch jiñi Elías, yam bʌ mi' yʌlob juntiquil oñiyi bʌ x'alt'añet tsa' bʌ cha' ch'ojyi.

²⁰ Jesús tsi' c'ajtibeyob: —Ixcu jatetla, ¿majquiyon mi la' wʌl? —Che'en. Pedro tsi' jac'ʌ: —Jatet Cristojet, yajcʌbil bʌ i cha'añ Dios.

Jesús tsi' su'bu bajche' mi caj i chʌmel

²¹ Jesús tsi' tiq'uiyob cha'añ ma'añic majqui mi' su'beñob iliyi mi juntiquilic.

²² Tsi' yʌlʌ: —Wersa mi' yu'bin ca'bʌl wocol i Yalobil Wiñic, yic'ot mi' taj i ts'a'lentel ti' tojlel xñoxob año' bʌ i ye'tel, ti' tojlel ñuc bʌ motomajob yic'ot ti' tojlel xts'ijbayajob; mi' caj i tsʌnsʌntel, yic'ot mi cha' ch'ojyel ti yuxp'ejlel q'uiñ, —che'en.

²³ Jesús tsi' su'beyob ti pejtelelob: —Mi añ majqui yom i tsajcañon, la' i len cʌy chuqui yom ti' bajñel pusic'al, la' i ch'ʌm i cruz ti jujump'ejl q'uiñ, la' i tsajcañon.

²⁴ Come majqui jach yom i bajñel cʌntan i cuxtʌlel mi caj i sʌt, yic'ot majqui jach mi' yʌc' i cuxtʌlel cha'añ ti' caj, mi caj i coltʌntel.

²⁵ Come ¿chuqui mi' taj wiñic mi tsi' lon ch'ʌmʌ pejtelel pañimil, mi tsi' jisa i bʌ o mi tsi' bajñel sʌtʌ i bʌ?

²⁶ Majqui jach mi' quisñiñon yic'ot c t'añ, i Yalobil Wiñic ja'el mi caj i quisñin jiñi wiñic che' mi' tilel ti' ñuclel yic'ot i ñuclel i Tat yic'ot i ñuclel jiñi ch'ujul bʌ ángelob.

²⁷ Ti isujm mic su'beñetla, lamital ili wʌ' bʌ añob ilayi, ma'añic mi caj i chʌmelob jinto mi' q'uelob i yumʌntel Dios, —che'en Jesús.

Tsa' yʌjñi Jesús

²⁸ Che' bʌ tsa' ñumi che' bajche' waxʌcp'ejl q'uiñ che' bʌ tsi' yʌlʌ ili t'añ, Jesús tsi' pʌyʌ majlel Pedro, Juan yic'ot Jacobo; tsa' letsi majlel yic'otob ti wits cha'añ mi' pejcañob Dios.

²⁹ Che' woli ti oración, tsa' yʌjñi i wut Jesús, tsa' sʌc'a i pislel, ts'ʌylaw tsa' majli.

³⁰ Awilan, cha'tiquil wiñicob tsi' pejcayob Jesús, jiñobʌch Moisés yic'ot Elías,

³¹ tsa' tsictiyiyob yic'ot i ñuclel, tsa' caji i yʌlob bajche' mi caj i cʌy pañimil Jesús che' mi' ts'ʌctesan mu' bʌ caj i mel ya' ti Jerusalén.

³² Suts'atax i wut Pedro yic'ot i pi'ʌlob cha'añ yomob wʌyel, pero che' cañalob i wut tsi' q'ueleyob i ñuclel Jesús yic'ot jiñi cha'tiquil wiñicob ya' bʌ añob yic'ot.

³³ Che' bʌ tsa' cajiyob ti majlel jiñi cha'tiquil, Pedro tsi' su'be Jesús: —Maestro, uts'at mi laj cʌytʌl ilayi. La' lac mel uxp'ejl lejchempat, jump'ejl cha'añet, jump'ejl cha'añ Moisés, yic'ot jump'ejl cha'añ Elías. Pero ma'añic tsi' ña'ta Pedro chuqui woli yʌl.

³⁴ Che' woli to i yʌl jiñi t'añ, tsa' tili tocal, tsi' mosoyob; tsi' cha'leyob bʌq'uen jiñi xcʌnt'añob che' bʌ tsi' mosoyob jiñi tocal.

³⁵ Tsa' loq'ui t'añ ti jiñi tocal, tsi' yʌlʌ: “Jiñʌch c'uxbibil bʌ Calobil. U'bibenla i t'añ”, che'en.

³⁶ Che' bʌ tsa' ujti jiñi t'añ, ya'añ Jesús ti' bajñelil. Jiñi xcʌnt'añob ñʌch'ʌl tsa' cʌleyob, ca'bʌl q'uiñ ma'añic tsi' wis su'beyob yaño' bʌ chuqui tac tsi' q'ueleyob.

Jesús tsi' c'oq'uesa ch'itoñ am bʌ i xi'bʌjlel

³⁷ Ti yijc'ʌlal che' bʌ tsa' ju'biyob ti wits, bajc'ʌl wiñicob x'ixicob tsa' tiliyob i taj Jesús.

³⁸ Awilan añ juntiquil wiñic tsa' tili, tsi' yʌlʌ ti c'am bʌ t'añ: —Maestro mij c'ajtibeñet, awocolic q'uele calobil, come jiñʌch cojach bʌ calobil.

³⁹ Awilan, jiñi xi'ba ti orajach mi' choc ju'bel, mi' yʌc' ti oñel, mi yʌc' ti juquin chʌmel, mi' yʌc' ti loq'uel i lojc i yej, mi' chʌn tic'lan, yic'ot mach yomic i col.

⁴⁰ Tsa' c'ajtibe xcʌnt'añob a cha'añ ti wocol t'añ cha'añ mi' chocob loq'uel, pero ma'añic tsa' mejliyob, che'en.

⁴¹ Jesús tsi' jac'ʌ: —Wiñicob x'ixicob año' bʌ wʌle mach bʌ añic mi la' ñop, sojquemetla. ¿Jayp'ejl to q'uiñ wʌ'añon la' wic'ot, cha'añ mij cuchbeñetla la' sajtemal? Pʌyʌ tilel a walobil wʌ' ba'añon, —che'en.

⁴² Che' woli to i tilel i lʌc'tesan i bʌ jiñi ch'itoñ, jiñi xi'ba tsi' yʌsa ju'bel ti lum, tsi' yʌc'ʌ ti juquin chʌmel, pero Jesús tsi' tiq'ui jiñi xi'ba, tsi' c'oq'uesa jiñi ch'itoñ, tsi' cha' ac'ʌ ti' wenta i tat.

⁴³ Tsa' toj sajtiyob i pusic'al ti pejtelelob che' bʌ tsi' q'ueleyob i ñuclel Dios. Che' bʌ tsa' toj sajtiyob i pusic'al cha'añ chuqui tac tsi' mele Jesús, tsa' caji i su'ben xcʌnt'añob i cha'añ:

Jesús tsi' cha' su'bu bajche' mi caj i chʌmel

⁴⁴ —La' ochic ti la' chiquin jiñi c t'añ, come i Yalobil Wiñic mi caj i yʌjq'uel ti' c'ʌb wiñicob, —che'en Jesús.

⁴⁵ Pero ma'añic tsi' ch'ʌmbeyob isujm jiñi t'añ, come mucbil isujmlel i t'añ cha'añ ma'añic mi' ch'ʌmbeñob isujm, ma'añic tsi' c'ajtiyob isujmlel come woliyob ti bʌq'uen.

¿Majqui jiñi ñumen ñuc bʌ?

⁴⁶ Jiñi cha'añ tsa' caji i cʌlʌx pejcañob i bʌ cha'añ mi' bajñel yajcañob majqui ñumen ñuc ti' tojlelob.

⁴⁷ Jesús tsi' ña'ta chuqui woli' yʌlob ti' pusic'al, tsi' pʌyʌ tilel juntiquil alob, tsi' yʌc'ʌ ti' t'ejl.

⁴⁸ Tsi' su'beyob: —Majqui jach mi' c'uxbin ili alob tij c'aba', mi' c'uxbiñon. Majqui jach mi' c'uxbiñon mi' c'uxbin c Tat tsa' bʌ i chocoyon tilel. Come jiñi ñumen ch'och'oc bʌ ti la' tojlel jiñʌch ñumen ñuc bʌ.

Jiñi mach bʌ añic mi' contrajiñonla woli' coltañonla

⁴⁹ Juan tsi' su'be: —Maestro, tsa' j q'uele lojon juntiquil mu' bʌ i choc loq'uel xi'bajob ti a c'aba'. Tsa' c tiq'ui lojon come ma'añic mi' tsajcañon lojon, —che'en.

⁵⁰ Jesús tsi' su'be: —Mach mi la' tic', come jiñi mach bʌ añic mi' contrajiñonla woli' coltañonla, —che'en.

4. TSA' MAJLI JESÚS TI JERUSALÉN ( 9.51—19.27 ) Jesús tsi' tiq'ui Jacobo yic'ot Juan

⁵¹ Che' i yorajlelix mi caj i pʌjyel majlel ti panchan, ti jump'ejl jach i pusic'al tsa' caji ti majlel ti Jerusalén.

⁵² Tsi' choco majlel wiñicob ti' tojel i wut. Tsa' ochiyob ti jump'ejl i tejclum samaritanojob cha'añ mi' chajpʌbeñob ba' mi' jijlel Jesús.

⁵³ Pero jiñi wiñicob x'ixicob ma'añic tsi' pʌyʌyob ochel come tsi' cʌñʌyob cha'añ wersa yom majlel ti Jerusalén.

⁵⁴ Che' bʌ tsi' q'ueleyob Jacobo yic'ot Juan, xcʌnt'añob i cha'añ, tsi' su'beyob: —C Yum, ¿Awom ba mic cha'len lojon mandar cha'añ mi' ju'bel tilel c'ajc ti panchan cha'añ mi' jisañob [che' bajche' tsi' mele Elías?]

⁵⁵ Jiñi cha'añ Jesús tsi' sutq'ui i bʌ i q'uelob, tsi' tiq'uiyob, tsi' yʌlʌ: —[Jatetla mach la' wujilic baqui bʌ espíritu woli i c'ʌñetla,

⁵⁶ come i Yalobil Wiñic ma'añic tsa' tili cha'añ mi' jisan wiñicob x'ixicob, pero tsa' tili cha'añ mi' coltañob.] Ti wi'il tsa' majliyob ti yam bʌ xchumtʌl.

Jiñi yomo' bʌ i tsajcañob Jesús

⁵⁷ Che' woli' majlelob ti bij, juntiquil wiñic tsi' su'be Jesús: —C Yum, mi caj c tsajcañet baqui jach ma' majlel, —che'en.

⁵⁸ Jesús tsi' su'be: —Añ i met wax. Añ i c'u' te'lemut, pero ma'añic i yajñib ba' mi' c'aj i yoj i Yalobil Wiñic.

⁵⁹ Jesús tsi' su'be yam bʌ wiñic: —Tsajcañon, —che'en. Jiñi wiñic tsi' su'be: —C Yum, la' ñaxan majlicon c muc c tat.

⁶⁰ Jesús tsi' su'be: —La' i mucob chʌmeño' bʌ jiñi chʌmeño' bʌ i pi'ʌlob, pero jatet cucu, su'bu i yumʌntel Dios, —che'en.

⁶¹ Yam bʌ wiñic tsi' su'be Jesús: —Mi caj c tsajcañet c Yum, pero la' ñaxan majlicon c su'beñob jiñi año' bʌ ti cotot, —che'en.

⁶² Jesús tsi' su'be: —Jiñi mu' bʌ i q'uel i pat che' woli' top' lum, ma'añic i c'ʌjñibal ti' yumʌntel Dios, —che'en.