Lucas 7 - Jiñi Tsiji' bʌ Wen T'añ cha'añ Estudio

Jesús tsi' c'oq'uesa x'e'tel i cha'añ i capitán soldado

¹ Che' bʌ tsa' ujti i su'b pejtelel jiñi t'añ tsa' bʌ i yu'biyob wiñicob x'ixicob, tsa' ochi Jesús ti Capernaúm.

² Ya'i añ juntiquil x'e'tel i cha'añ i yaj capitán jo'c'al soldadojob, wen c'am, wen c'ux mi' yu'bin ja'el, yomix chʌmel.

³ Che' bʌ tsi' yu'bi jiñi capitán ya'añ Jesús, tsi' choco majlel cha'tiquil uxtiquil xñoxob i cha'añ judíojob cha'añ mi' su'beñob ti wocol t'añ, cha'añ mi' tilel i c'oq'uesan jiñi x'e'tel i cha'añ.

⁴ Che' bʌ tsa' tiliyob ba'añ Jesús tsi' su'beyob ti wocol t'añ, tsi' yʌlʌyob: —Uts'at ma' melben jiñi woli bʌ i c'ajtibeñet ili wiñic,

⁵ come c'ux mi' yu'bin lac lumal yic'ot tsi' wa'chocobeyon lojon sinagoga.

⁶ Tsa' majli Jesús yic'otob. Che' mach ñajtix añob ti yotot, jiñi capitán tsi' choco majlel i pi'ʌlob ba'añ Jesús, tsi' su'be: —C Yum, mach ma' tic'lan a bʌ, come mach uts'atoñic cha'añ ma' wochel ti cotot.

⁷ Jiñi cha'añ tsa' c ña'ta mach uts'atoñic cha'añ mic tilel ba'añet, cojach yom ma' wʌc' a t'añ; che' jiñi, mi' caj i lajmel x'e'tel c cha'añ.

⁸ Come joñon ja'el añon ti' wenta yam bʌ wiñic. Añ tic wenta ca'bʌl soldadojob. Mic su'ben juntiquil: “Cucu”, mi' majlel; yam bʌ mic su'ben: “La'”, mi' tilel; mic su'ben c wiñic: “Mele jiñi”, mi' mel, che'en.

⁹ Jesús uts'at tsi' yu'bibe i t'añ jiñi capitán. Tsi' sutq'ui i bʌ. Tsi' su'beyob jiñi woli bʌ i tsajcañob majlel: —Mic su'beñetla, ma'añic ba' tsa' c taja ti pejtelel Israel wiñic mu' bʌ i ñopon bajche' jiñi, —che'en Jesús.

¹⁰ Che' bʌ tsa' sujtiyob ti yotot jiñi capitán temel yic'ot jiñi chocbilo' bʌ majlel i cha'añ, c'oq'uix tsi' tajayob jiñi x'e'tel tsa' bʌ c'am-a.

Jesús tsi' teche ch'ojyel chʌmeñ bʌ i yalobil me'ba' x'ixic

¹¹ Ti wi'il tsa' majli Jesús ti tejclum i c'aba' Naín, tsa' majliyob yic'ot ca'bʌl xcʌnt'añob i cha'añ yic'ot bajc'ʌl wiñicob x'ixicob.

¹² Che' lʌc'ʌlix añ ti ti' tejclum, awilan, woli' ch'ʌmob majlel i bʌc'tal cojach bʌ yalobil me'ba' x'ixic cha'añ mi' mucob. Tsi' tsajcayob majlel ca'bʌl wiñicob x'ixicob loq'uemo' bʌ ti jiñi tejclum.

¹³ Che' bʌ tsi' q'uele lac Yum, tsi' p'unta jiñi me'ba' x'ixic, tsi' su'be: —Mach a cha'len uq'uel, —che'en.

¹⁴ Che' bʌ tsa' tili Jesús ba'añob, tsi' tʌlʌ i yajñib ch'ujlelʌl, jiñi woli bʌ i q'uechob majlel tsi' cʌyʌyob i xʌmbal. Jesús tsi' yʌlʌ: —Ch'itoñ mic su'beñet, ch'ojyen, —che'en.

¹⁵ Jiñi cha'añ jiñi tsa' bʌ chʌmi tsa' buchle, tsa' caji ti t'añ, Jesús tsi' cha' aq'ue i yalobil jiñi x'ixic.

¹⁶ Ti pejtelelob tsa' cajiyob ti bʌq'uen, tsi' tsictesayob i ñuclel Dios, tsi' yʌlʌyob: “Tsa'ix tili ñuc bʌ x'alt'añ ba'añonla, Dios tsa'ix i jula'ta i cha'año' bʌ”.

¹⁷ Tsa' pujqui t'añ cha'añ ñuc bʌ i melbal Jesús ti pejtelel Judea yic'ot ti pejtelel lum ti' joytʌlel.

Jiñi wiñicob chocbilo' bʌ tilel i cha'añ Juan

¹⁸ Jiñi xcʌnt'añob i cha'añ Juan tsi' su'beyob pejtelel chuqui tac tsa' ujti. Juan tsi' pʌyʌ cha'tiquil xcʌnt'añob i cha'añ,

¹⁹ tsi' chocoyob majlel ba'añ Jesús cha'añ mi' c'ajtibeñob: “¿Jatet ba jiñi woli bʌ c pijtan lojon, o yom toj mic pijtan lojon yam bʌ?”

²⁰ Che' bʌ tsa' tiliyob jiñi wiñicob ba'añ Jesús, tsi' su'beyob: —Tsi' chocoyon lojon tilel Juan tsa' bʌ i yʌc'ʌ ch'ʌmja' cha'añ mij c'ajtibeñet lojon mi jatet jiñi mu' bʌ caj i tilel o yom ba mic pijtan lojon yam bʌ.

²¹ Ti jiñi jach bʌ ora Jesús tsi' c'oq'uesa ca'bʌl xc'am-ʌjelob año' bʌ leco tac bʌ i chʌmel, yic'ot jiñi año' bʌ i xi'bʌjlel, yic'ot tsi' cambeyob i wut ca'bʌl xpots'ob.

²² Jesús tsi' jac'beyob, tsi' su'beyob: —Cucula, su'benla Juan chuqui tsa' la' q'uele yic'ot chuqui tsa' la' wu'bi: Wolix i c'otelob i wut jiñi xpots'ob, woliyobix ti xʌmbal jiñi mach bʌ p'ʌtʌlobic i yoc, lajmesʌbilobix jiñi año' bʌ leco bʌ i tsoy, jiñi xcojcob wolix i yu'biñob t'añ, woli' cha' tejchelob ch'ojyel jiñi chʌmeño' bʌ, jiñi p'ump'uño' bʌ woli' yu'biñob jiñi wen t'añ.

²³ Tijicña jiñi mach bʌ añic mi' lon tejchel tilebixel bʌ i pusic'al cha'añ c melbal, —che'en Jesús.

²⁴ Che' bʌ tsa' majliyob jiñi wiñicob chocbilo' bʌ tilel cha'añ Juan, Jesús tsa' caji su'ben jiñi tempʌbilo' bʌ bajche' yilal Juan: —¿Chuqui tsajñi la' q'uel ti jochol bʌ lum? ¿Jim ba te' jam woli bʌ i yujcun ic'?

²⁵ ¿Chuqui tsajñi la' q'uel? ¿Jim ba juntiquil wiñic wen i t'ojol bʌ i pislel? La' wilan jiñi wen chumulo' bʌ mu' bʌ i lʌpob weñatax bʌ pisil añob i wo'lel ti' mulil yic'ot añob ti yotot reyob.

²⁶ Jiñi cha'añ ¿chuqui tsajñi la' q'uel? ¿Tsajñi ba la' q'uel juntiquil x'alt'añ? Isujm, mic su'beñetla, ñumen ñuc jiñi Juan bajche' x'alt'añ.

²⁷ Come tsa' ña'tʌnti Juan ti jiñi t'añ tsa' bʌ ts'ijbunti: “Awilan, mic ñaxan choc majlel subt'añ mu' bʌ i chajpan a bijlel”.

²⁸ Mic su'beñetla: Ti pejtelel i yalobilob x'ixicob ma'añic yam bʌ ñuc bʌ x'alt'añ bajche' jiñi Juan tsa' bʌ i yʌc'ʌ ch'ʌmja'. Pero jiñi c'ax ch'och'oc bʌ ti' yumʌntel Dios ñumen añ i ñuclel bajche' Juan.

²⁹ Pejtelel wiñicob x'ixicob yic'ot xch'ʌm tojoñelob tsi' ña'tayob tojʌch Dios che' bʌ tsi' yu'bibeyob i t'añ Juan, tsi' ch'ʌmʌyob ja' ti' c'ʌb Juan.

³⁰ Pero jiñi fariseojob yic'ot xcʌntesa mandarob tsi' ñusayob i pʌyol ti Dios yic'ot i coltʌntel, come ma'añic tsi' ch'ʌmʌyob ja' ti' c'ʌb Juan.

³¹ Lac Yum tsi' cha' alʌ: —¿Bajche' mic lajin jiñi wiñicob x'ixicob año' bʌ ti pañimil wʌle? ¿Bajche' yilalob?

³² Lajalob bajche' alobob buchulo' bʌ ba'añ choñoñibʌl woli bʌ i pʌyob i pi'ʌlob, mi' yʌlob: “Tsa' c wusu lojon flauta, ma'añic tsa' la' cha'le son, tsa' c'ʌyi lojon ch'ijiyem bʌ c'ay pero ma'añic tsa' la' wu'bi la' ch'ijiyemlel”.

³³ Come Juan tsa' bʌ i yʌc'ʌ ch'ʌmja' tsa' tili. Ma'añic tsi' c'uxu waj, ma'añic tsi' japʌ vino, mi la' wʌl: “Añ i xi'bʌjlel”.

³⁴ Tsa' tili i Yalobil Wiñic, añ chuqui tsi' c'uxu, añ chuqui tsi' japʌ, woli la' wʌl: “Awilan, xwo'lel, jiñi xjap vino, mi' cha'len xʌmbal yic'ot xch'ʌm tojoñelob yic'ot xmulilob”.

³⁵ Pero i ña'tʌbal Dios mi' tsictiyel ti uts'at ti pejtelel i yalobilob, —che'en Jesús.

Jesús tsa' majli ti' yotot juntiquil fariseo i c'aba' Simón

³⁶ Juntiquil fariseo tsi' su'be Jesús ti wocol t'añ cha'añ mi' cha'len c'ux waj yic'ot, che' bʌ tsa' ochi Jesús ti' yotot jiñi fariseo. Tsa' buchle ti' t'ejl mesa.

³⁷ Awilan, juntiquil x'ixic ti tejclum tsa' bʌ i cha'le mulil, che' bʌ tsi' ña'ta ya'añ Jesús ti' t'ejl mesa ti' yotot jiñi fariseo, tsi' ch'ʌmʌ tilel jump'ejl alʌ limetej melbil bʌ ti xajlel but'ul ti xojocña bʌ ts'ac.

³⁸ Che' ya' wa'al jiñi x'ixic ti' pat Jesús, tsa' caji ti uq'uel, tsa' chʌjq'ui ju'bel i ya'lel i wut ti' yoc Jesús, tsi' sujcube ti' tsutsel i jol, tsi' ts'ujts'ube i yoc, tsi' boño ti jiñi xojocña bʌ ts'ac.

³⁹ Jiñi fariseo tsa' bʌ i pʌyʌ tilel Jesús ti we'el tsi' q'uele, tsi' ña'ta ti' pusic'al: X'alt'añic jiñi wiñic, tsa'ix i cʌñʌ ili x'ixic woli bʌ i tʌl, tsa'ix i cʌmbe i melbal, come xmulilʌch jiñi x'ixic, che'en.

⁴⁰ Jiñi cha'añ Jesús tsi' su'be Simón: —Simón, añ chuqui mi caj c su'beñet, —che'en. Simón tsi' yʌlʌ: —Su'beñon, Maestro.

⁴¹ Tsa' caji yʌl Jesús: —Juntiquil wiñic tsi' yʌq'ueyob taq'uiñ ti bet cha'tiquil xbetob. Juntiquil añ i bet jo'c'al i cha'bajc' (500) denario. Yam bʌ lujump'ejl i yuxc'al (50) denario.

⁴² Ma'añobic i chu'bʌañ ili xbetob cha'añ mi' tojob i bet. Jiñi wiñic tsi' ñusʌbeyob i bet ti cha'ticlelob. Ti cha'ticlel mi caj i c'uxbiñob jiñi wiñic tsa' bʌ i ñusʌbeyob i bet. Alʌ che' jiñi, ¿majqui mi caj i ñumen c'uxbin? —Che'en Jesús.

⁴³ Tsi' yʌlʌ Simón: —Mi cʌl jiñi tsa' bʌ ñusʌbenti ñumen oñ bʌ i bet, —che'en. Jesús tsi' cha' su'be: —Isujmʌch bajche' tsa' ña'ta.

⁴⁴ Jesús tsi' sutq'ui i bʌ i q'uel jiñi x'ixic, tsi' su'be Simón: —¿Woli ba a q'uel jiñi x'ixic? Tsa' ochiyon ti a wotot, ma'añic tsa' wʌq'ueyon ja' cha'añ mic poc coc, ili x'ixic tsa' chʌjq'ui ju'bel i ya'lel i wut ti coc, tsi' sujcubeyon ti' tsutsel i jol.

⁴⁵ Ma'añic tsa' ts'ujts'uyon, pero ili x'ixic ma'añic tsi' cʌyʌ i ts'ujts'ubeñon coc c'ʌlʌl che' bʌ tsa' ochiyon.

⁴⁶ Ma'añic tsa' boño c jol ti olivo aceite, pero ili x'ixic tsi' boño coc ti xojocña bʌ ts'ac.

⁴⁷ Jiñi cha'añ mic su'beñet, anquese ca'bʌl i mul ñusʌbilix ti pejtelel, jiñi cha'añ ca'bʌl mi' c'uxbiñon; majqui mi' ñusʌbentel ts'ita' i mul ts'ita' jach mi' cha'len c'uxbiya, —che'en Jesús.

⁴⁸ Tsi' su'be x'ixic: —Ñusʌbilix a mul, —che'en.

⁴⁹ Jiñi buchulo' bʌ yic'ot Jesús ti' t'ejl mesa tsa' caji i yʌlob ti' pusic'al: —¿Majqui ili wiñic cha'añ mi' ñusan mulil?

⁵⁰ Jesús tsi' su'be x'ixic: —Coltʌbilet cha'añ tsa' ñopo, cucu ti' ñʌch'tʌlel a pusic'al, —che'en. María, i ña' Jesús ; ; ; ; ; María Magdalena ,; ; ,; ,; ; ; ; María yic'ot Marta año' bʌ ti Betania ; ; X'ixicob tsa' bʌ i tsajcayob Jesús ; ; X'ixicob tsa' bʌ ñusʌbentiyob i mul: x'ixic leco bʌ i melbal () ts'i'lel x'ixic () X'ixicob tsa' bʌ c'oq'uesʌntiyob: i ñij-al Pedro (; ; ) x'ixic tsa' bʌ i beq'ue i ch'ich'el (; ; ) xch'oc bʌ i yalobil Jairo (,; ,; ,) x'ixic am bʌ ti Canaán (; ) x'ixic c'uchul bʌ i pat () X'ixicob tsa' bʌ sujbiyob i ñuclel: x'ixic am bʌ ti Canaán () p'ump'un bʌ me'ba' x'ixic (; ) Yaño' tac bʌ: x'ixic am bʌ Samaria () me'ba' x'ixic am bʌ ti Naín () x'ixicob año' bʌ ti Jerusalén ()