Lucas 4 - Jiñi Tsiji' bʌ Wen T'añ cha'añ Estudio

I yilʌbentel i pusic'al Jesús

¹ Jesús, but'ul ti jiñi Ch'ujul bʌ Espíritu, tsi' cʌyʌ Jordán ja'. Jiñi Espíritu tsi' pʌyʌ majlel c'ʌlʌl ti' jochol bʌ lum.

² Cha'c'al q'uiñ ya'añ. Tsa' ilʌbenti i pusic'al cha'añ xi'ba, ma'añic chuqui tsi' wis c'uxu, che' ñumeñix, añix i wi'ñal.

³ Jiñi xi'ba tsi' su'be Jesús: —Mi i Yalobilet Dios, su'ben ili xajlel cha'añ mi' pʌntʌyel ti waj, —che'en.

⁴ Jesús tsi' jac'be, tsi' su'be: —Ts'ijbubil: “Mach ti wajic jach cuxulob wiñicob x'ixicob, [cojach ti pejtelel t'añ ch'oyol bʌ ti Dios”.] —Che'en.

⁵ Jiñi xi'ba tsi' pʌyʌ majlel ti chañ bʌ wits. Ti orajach tsi' laj pʌsbe Jesús i yumʌntel tac jiñi yumʌlob ti pañimil.

⁶ Jiñi xi'ba tsi' su'be Jesús: —Mi caj cʌq'ueñet pejtelel iliyi yic'ot i p'ʌtʌlel yic'ot i ñuclel, come laj aq'uebilon tic wenta. Mi cʌq'uen majqui com.

⁷ Muq'uic a ñocchocon a bʌ a ch'ujutesañon, laj a cha'añʌch mi' majlel ti pejtelel, che'en jiñi xi'ba.

⁸ Jesús tsi' jac'be: —Cucu ti loq'uel wʌ' ba'añon, Satanás, come ts'ijbubil: “Yom ma' ch'ujutesan a Yum Dios. Cojach jiñi yom ma' yuman”, —che'en.

⁹ Jiñi xi'ba tsi' pʌyʌ majlel Jesús ya' ti Jerusalén. Ya' tsi' pʌyʌ majlel ti wa'tʌl ti' pam i jol Templo. Tsi' su'be: —Mi i Yalobilet Dios, choco ju'bel a bʌ.

¹⁰ Come ts'ijbubil: “Mi caj i su'beñob i yángelob cha'añ mi' cʌntañet.

¹¹ Yic'ot mi caj i chuquet ti' c'ʌb, ame a jats' a woc ti xajlel”, che'en xi'ba.

¹² Jesús tsi' su'be: —Albilix jiñi t'añ: “Mach yomic ma' wilʌben i pusic'al a Yum Dios”, —che'en.

¹³ Che' bʌ tsa' ujti i yilʌben i pusic'al Jesús, jiñi xi'ba tsi' poj tʌts'ʌ i bʌ jumuc' ti' tojlel.

3. I YE'TEL JESÚS TI GALILEA ( 4.14—9.50 ) I tejchibal i ye'tel Jesús

¹⁴ Jesús tsa' cha' majli ti Galilea, añ i p'ʌtʌlel jiñi Espíritu yic'ot. Tsa' pujqui t'añ ti pejtelel lum ti' joytʌlel Galilea cha'añ ñuc bʌ i melbal Jesús.

¹⁵ Jesús tsi' cha'le cʌntesa ti sinagoga tac i cha'añ judíojob. Pejtelel wiñicob x'ixicob tsi' tsictesayob i ñuclel Jesús.

Jesús ya' ti Nazaret

¹⁶ Tsa' majli Jesús ya' ti Nazaret ba' tsa' coli. Tsa' ochi ti sinagoga ti' q'uiñilel c'aj-o che' bajche' i tilel. Tsa' wa'le cha'añ mi' pejcan juñ.

¹⁷ Tsa' aq'uenti i juñ jiñi x'alt'añ Isaías. Che' bʌ tsi' jamʌ jiñi bʌlbil bʌ juñ tsi' taja ba' ts'ijbubil ili t'añ:

¹⁸ “Añ i yEspíritu lac Yum tic pusic'al. Tsi' yajcayon cha'añ mic su'beñob wen t'añ jiñi p'ump'uño' bʌ. [Tsi' chocoyon tilel cha'añ mic lajmesʌbeñob i ch'ijiyemlel jiñi ch'ijiyemo' bʌ i pusic'al,] cha'añ mic su'beñob loq'uel jiñi ñup'ulo' bʌ, cha'añ mij cambeñob i wut jiñi xpots'ob, cha'añ mi cʌc'ob ti colel jiñi tic'lʌbilo' bʌ,

¹⁹ yic'ot cha'añ mi caj c su'b i ja'bilel i yutslel i pusic'al lac Yum”.

²⁰ Jesús tsi' cha' bʌlʌ jiñi juñ, tsi' cha' aq'ue jiñi am bʌ i ye'tel ti sinagoga, tsa' buchle. Pejtelel año' bʌ ti sinagoga tsi' ch'ujch'uj q'ueleyob Jesús.

²¹ Jiñi cha'añ Jesús tsa' caji i su'beñob: —Wʌle tsa'ix ts'ʌctiyi ili ts'ijbujel Dios tsa' bʌ la' wu'bi, —che'en.

²² Ti pejtelelob tsi' yʌlʌyob cha'añ uts'at Jesús, tsa' toj sajtiyob i pusic'al cha'añ uts'at i t'añ. Tsi' yʌlʌyob: —¿Mach ba jiñic i yalobil José?

²³ Jesús tsi' su'beyob: —Isujm mi caj la' su'beñon jiñi t'añ mu' bʌ i c'ʌñob ti lajiya: “Xts'ʌcaya, ts'ʌcan a bʌ”. Mi caj la' su'beñon c mel wʌ' tic lumal chuqui tsa' c mele ya' ti Capernaúm che' bajche' tsa'ix la' wu'bi, —che'en.

²⁴ Jesús tsi' yʌlʌ ja'el: —Isujm mic su'beñetla, ma'añic x'alt'añ mu' bʌ i q'uejlel ti ñuc ti' lumal.

²⁵ Isujm mic su'beñetla añ ca'bʌl me'ba' x'ixicob ti Israel ti' yorajlel Elías che' wen jamʌl pañimil ojlil i chʌmp'ejl ja'b, che' bʌ tsa' tili ca'bʌl wi'ñal ti pejtelel lum.

²⁶ Pero ma'añic tsa' chojqui majlel Elías ba'añob. Tsa' jach chojqui majlel ti Sarepta ya' ti Sidón ba'añ juntiquil me'ba' x'ixic.

²⁷ Añ ja'el ca'bʌl israelob año' bʌ leco bʌ i tsoy che' ti' yorajlel jiñi x'alt'añ Eliseo. Ma'añic majqui tsa' c'oq'uesʌnti, jiñi jach Naamán, ch'oyol bʌ ti Siria.

²⁸ Che' bʌ tsi' yu'biyob ili t'añ, tsa' laj cajiyob ti mich'ajel ya' ti sinagoga.

²⁹ Tsa' wa'leyob, tsi' pʌyʌyob loq'uel Jesús ti ti' tejclum wa'chocobil bʌ ti wits. Tsi' pʌyʌyob majlel ba' jʌmʌl wits cha'añ mi' xit chocob ju'bel,

³⁰ pero Jesús tsa' ñumi ti yojlil ya' ba'añob, che' jiñi tsa' majli.

Wiñic am bʌ i xi'bʌjlel

³¹ Tsa' ju'bi majlel Jesús ti Capernaúm, jump'ejl tejclum am bʌ ti' wenta Galilea. Tsi' cʌntesayob ti' q'uiñilel tac c'aj-o.

³² Tsa' toj sajtiyob i pusic'al cha'añ i cʌntesa Jesús come añ i p'ʌtʌlel i t'añ.

³³ Ya' ti sinagoga ya'añ juntiquil wiñic am bʌ i xi'bʌjlel, c'am tsi' cha'le t'añ,

³⁴ tsi' yʌlʌ: —Cʌyʌyon lojon. ¿Chuqui i ye'tel tsa' tiliyet ba'añon lojon, Jesús ch'oyolet bʌ ti Nazaret? ¿Tsa' ba tiliyet cha'añ ma' jisañon lojon? Cujil majquiyet. Jatet jiñi Ch'ujulet Bʌ ch'oyol bʌ ti Dios.

³⁵ Jesús tsi' tiq'ui, tsi' su'be: —Ch'abix, loq'uen ti' pusic'al. Jiñi xi'ba tsi' choco jiñi wiñic ti lum ti' yojlilob; tsa' loq'ui jiñi xi'ba. Ma'añic tsi' wis lowo jiñi wiñic.

³⁶ Tsa' toj sajtiyob i pusic'al ti pejtelelob, tsa' caji i pejcañob i bʌ, tsi' yʌlʌyob: —¿Baqui tilem i t'añ? Come ti' p'ʌtʌlel yic'ot i ye'tel mi' choc loq'uel i xi'bʌjlel wiñic.

³⁷ Tsa' pujqui t'añ ti pejtelel jiñi lum yic'ot ti yan tac bʌ lum ti' joytʌlel cha'añ ñuc bʌ i melbal Jesús.

Jesús tsi' c'oq'uesa x'ixic bʌ i ñij-al Pedro

³⁸ Che' jiñi tsa' wa'le Jesús. Tsa' loq'ui ti sinagoga, tsa' ochi ti' yotot Simón, ya'añ x'ixic bʌ i ñij-al woli' wen u'bin c'ajc. Tsi' c'ajtibeyob Jesús ti wocol t'añ cha'añ mi' c'oq'uesan.

³⁹ Tsi' ñuc choco i bʌ Jesús ti' t'ejl jiñi x'ixic, tsi' tiq'ui jiñi c'ajc, jiñi x'ixic tsa' lajmi, tsa' ch'ojyi ti ora, tsa' caji i chajpan i bʌl ñʌc'ʌl cha'añ mi' we'san Jesús.

Jesús tsi' c'oq'uesa ca'bʌl xc'am-ʌjelob

⁴⁰ Che' woli ti bʌjlel q'uiñ, tsi' pʌyʌyob majlel ba'añ Jesús pejtelel año' bʌ i c'am-ʌjel ti' chajp ti' chajp, Jesús tsi' yʌc'ʌ i c'ʌb ti jujuntiquilob, tsi' c'oq'uesayob.

⁴¹ Tsa' loq'uiyob xi'bajob ti' pusic'al cabʌlob, tsi' cha'leyob c'am bʌ t'añ, tsi' yʌlʌyob: —Jatet i Yalobilet Dios. Jesús tsi' tiq'uiyob, ma'añic tsi' yʌq'ueyob i cha'len t'añ, come cʌñʌl i cha'añob cha'añ jiñʌch jiñi Cristo.

Jesús tsi' cha'le subt'añ ti joytʌlel Galilea

⁴² Che' bʌ tsa' sʌc'a pañimil tsa' loq'ui majlel Jesús, tsa' majli ti jochol bʌ lum. Jiñi wiñicob x'ixicob tsi' sʌclayob, tsa' majliyob ba'añ. Tsi' ñopo i jalitesañob Jesús cha'añ ya' jach mi' cʌytʌl yic'otob.

⁴³ Pero Jesús tsi' su'beyob: —Wersa mic su'b jiñi wen t'añ cha'añ i yumʌntel Dios ti yam bʌ tejclum tac ja'el, come jiñʌch cha'añ tsa' chojquiyon tilel, —che'en.

⁴⁴ Tsi' cha'le subt'añ ti sinagoga tac ya' ti Galilea.