Lucas 24 - Jiñi Tsiji' bʌ Wen T'añ cha'añ Estudio

Tsa' cha' ch'ojyi Jesús

¹ Ti ñaxan bʌ q'uiñ ti semana che' woli' sʌc'an, tsa' majliyob x'ixicob ti mucoñibʌl. Tsi' ch'ʌmʌyob majlel xojocña bʌ perfume tsa' bʌ i chajpayob.

² Che' bʌ tsa' c'otiyob, selc'ubilix loq'uel jiñi xajlel ti ti' jiñi mucoñibʌl.

³ Che' bʌ tsa' ochiyob ti mal, ma'añic tsi' tajbeyob i bʌc'tal lac Yum Jesús.

⁴ Che' woli melob i pusic'al cha'añ ma'añic tsiquil, awilan tsa' wa'leyob ya' ti' t'ejl jiñi x'ixicob cha'tiquil wiñicob ts'ʌylaw bʌ i pislel.

⁵ Jiñi x'ixicob tsi' ju'sayob i wut c'ʌlʌl ti lum cha'añ bʌq'uen. Jiñi wiñicob tsi' su'beyob: —¿Chucoch mi la' sajcan jiñi cuxul bʌ ba'añ chʌmeño' bʌ?

⁶ Mach wʌ'ix añ, tsa'ix ch'ojyi. Ña'tanla chuqui tsi' su'beyetla che' ya' to añ ti Galilea,

⁷ che' bʌ tsi' yʌlʌ: “Wersa mi' yʌjq'uel i Yalobil Wiñic ti' c'ʌb xmulilob, wersa mi' ch'ijtʌl ti cruz, wersa mi' cha' ch'ojyel ti' yuxp'ejlel q'uiñ”.

⁸ Che' jiñi, ili x'ixicob tsa' c'ajtiyi i cha'añob i t'añ Jesús.

⁹ Tsi' cʌyʌyob mucoñibʌl, tsa' majli i laj su'beñob chuqui tsa' ujti jiñi junlujuntiquil yic'ot pejtelel i pi'ʌlob.

¹⁰ Jiñobʌch María Magdalena, yic'ot Juana, yic'ot María i ña' Jacobo, yic'ot yaño' bʌ x'ixicob tsa' bʌ i su'beyob jiñi apóstolob chuqui tsa' ujti.

¹¹ Pero jiñi junlujuntiquil tonto jax tsi' yu'bibeyob i t'añ ili x'ixicob, ma'añic tsi' ñopbeyob.

¹² Tsa' wa'le Pedro, ajñel tsa' majli ti mucoñibʌl. Che' bʌ tsi' q'uele i mal, cojach tsi' q'uelbe i bʌjq'uil Jesús. Tsa' cha' majli ti' yotot. Tsa' toj sajti i pusic'al cha'añ jiñi tsa' bʌ ujti.

7. TSA' CH'OJYI JESÚS BA'AÑ CHɅMEÑO' BɅ ( 24.13-53 ) Ti' bijlel Emaús

¹³ Awilan, ti jiñi jach bʌ q'uiñ woli' majlelob cha'tiquil xcʌnt'añob ti jump'ejl tejclum i c'aba' Emaús, che' bajche' junlujump'ejl kilómetro i ñajtlel ti Jerusalén.

¹⁴ Che' woliyob ti xʌmbal majlel, woli yʌlob pejtelel chuqui tac tsa' bʌ ujti.

¹⁵ Che' woliyob ti t'añ majlel, che' wolix i tsʌts pejcañob i bʌ, Jesús tsi' lʌc'tesa i bʌ ba'añob, temel tsa' cajiyob ti xʌmbal majlel.

¹⁶ Pero ma'añic tsa' aq'uentiyob i cʌñob Jesús che' bʌ tsi' q'ueleyob.

¹⁷ Jesús tsi' c'ajtibeyob: —¿Chuqui woli la' wʌl che' woliyetla ti xʌmbal majlel? Yic'ot ¿chucoch ch'ijiyemetla? —Che'en.

¹⁸ Juntiquil i c'aba' Cleofas tsi' c'ajtibe: —¿Xjula'et jach ba ti Jerusalén? ¿Mach ba añic tsa' wu'bi chuqui tsa' ujti ya'i ti ili q'uiñ tac? —Che'en.

¹⁹ Jiñi cha'añ Jesús tsi' c'ajtibeyob: —¿Chuqui jiñi tsa' bʌ ujti? Jiñi xcʌnt'añob tsi' su'beyob: —¿Mach ba añic tsa' wu'bi bajche' tsa' ujti Jesús ch'oyol bʌ ti Nazaret? X'alt'añʌch jiñi Jesús, tsi' pʌsʌ i p'ʌtʌlel ti wen bʌ i melbal yic'ot ti' t'añ ti' wut Dios yic'ot ti' wut pejtelel wiñicob x'ixicob.

²⁰ Pero jiñi ñuc bʌ motomajob yic'ot jiñi yumʌlob lac cha'añ tsi' yʌc'ʌyob ti' c'ʌb yaño' bʌ cha'añ mi' yʌjq'uel ti chʌmel; tsi' ch'ijiyob ti cruz.

²¹ Pero tsa' j lon ña'ta lojon cha'añ jiñʌch mu' bʌ caj i coltañ israelob, pero wʌle añix uxp'ejl q'uiñ tsa' ujti.

²² Anquese añ x'ixic bʌ c pi'ʌlob lojon tsa' bʌ i yʌc'ʌ ti toj sajtel c pusic'al lojon. Ti sʌc'ajel tsa' majliyob ti mucoñibʌl.

²³ Come ma'añic tsi' tajbeyob i bʌc'tal Jesús, tsa' cha' tili i su'beñon lojon cha'añ ja'el tsi' q'ueleyob ángelob tsa' bʌ i yʌlʌyob cha'añ cuxul Jesús.

²⁴ Cha'tiquil uxtiquil c pi'ʌlob lojon tsa' majliyob ti mucoñibʌl. Che'ʌch tsi' tajayob bajche' tsi' yʌlʌyob jiñi x'ixicob, pero ma'añic tsi' q'ueleyob Jesús.

²⁵ Jiñi cha'añ Jesús tsi' su'beyob: —Tontojetla, jal mi la' ñop ti la' pusic'al pejtelel chuqui tsi' yʌlʌyob x'alt'añob.

²⁶ ¿Mach ba wersajic mi' ñaxan u'bin wocol jiñi Cristo cha'añ mi yochel ti' ñuclel? Che'en.

²⁷ Jesús tsa' caji i su'beñob isujmlel pejtelel i Ts'ijbujel Dios ba' tsa' tajle ti t'añ c'ʌlʌl ti' juñ Moisés c'ʌlʌl ti' juñ pejtelel x'alt'añob.

²⁸ Tsa' c'otiyob ti alʌ tejclum ba' woli' majlelob, tsi' mele Jesús che' bajche' yom to i xʌn majlel.

²⁹ Pero tsi' wersa su'beyob cʌytʌl, tsi' yʌlʌyob: —Cʌlejen quic'ot lojon come yomix ic'an, wolix i bʌjlel q'uiñ. Tsa' ochi ti jijlel yic'otob.

³⁰ Che' bʌ buchul yic'otob ti' t'ejl mesa, Jesús tsi' ch'ʌmʌ waj, tsi' su'be wocolix i yʌlʌ Dios, tsi' xut'u jiñi waj, tsi' yʌq'ueyob.

³¹ Ti jim bʌ ora tsa' jambentiyob i wut cha'añ mi cʌñob Jesús, pero tsi' bʌc' sʌtʌ i bʌ ti' wutob.

³² Tsi' su'beyob i bʌ: —¿Mach ba tijicñayic jax lac pusic'al tsa' la cu'bi che' bʌ tsi' pejcayonla Jesús ti bij? Yic'ot ¿che' bʌ tsi' su'beyonla isujmlel i Ts'ijbujel Dios?

³³ Ti jiñi jach bʌ ora, tsa' ch'ojyiyob, tsa' cha' majliyob ti Jerusalén ba' tsi' tajayob jiñi junlujuntiquil tsa' bʌ i tempayob i bʌ yic'ot yaño' bʌ i pi'ʌlob,

³⁴ tsi' yʌlʌyob: —Isujmʌch tsa'ix cha' ch'ojyi lac Yum, tsa'ix i pʌsʌ i bʌ ba'añ Simón.

³⁵ Jiñi cha'tiquil tsi' su'beyob chuqui tsa' ujti ti bij, tsa' caji i yʌlob bajche' tsi' cʌñʌyob Jesús che' bʌ tsi' xut'u waj.

Jesús tsi' pʌsʌ i bʌ ti' tojlel xcʌnt'añob

³⁶ Che' woliyob to ti t'añ jiñi xcʌnt'añob, cha'añ jiñi tsa' bʌ ujti; tsa' wa'le Jesús ti ojlil ba'añob, tsi' su'beyob: —La' ñʌch'lec la' pusic'al, —che'en.

³⁷ Jiñi cha'añ tsa' toj sajtiyob i pusic'al, tsi' cha'leyob bʌq'uen, tsi' lon ña'tayob woli' q'uelob espíritu.

³⁸ Jesús tsi' su'beyob: —¿Chucoch woliyetla ti bʌq'uen? ¿Chucoch woli ti t'añ la' pusic'al?

³⁹ Q'uelela j c'ʌb yic'ot coc. Awilan, joñoñʌch, tʌlʌyonla, q'ueleyonla, come ma'añic i bʌc'tal, yic'ot ma'añic i bʌquel espíritu che' bajche' woli la' q'uelon, —che'en Jesús.

⁴⁰ Che' bʌ tsa' ujti i su'b jiñi t'añ, tsi' pʌsbeyob i c'ʌb yic'ot i yoc.

⁴¹ Come cha'añ ti' caj wen tijicñayob yic'ot cha'añ tsa' toj sajtiyob i pusic'al, maxto añic tsa' mejli i ñopob mi isujm chuqui woli q'uelob. Jesús tsi' c'ajtibeyob: —¿Am ba chuqui mij c'ux? —Che'en.

⁴² Jiñi cha'añ tsi' yʌq'ueyob ts'ita' pojpobil bʌ chʌy yic'ot cha'b.

⁴³ Jesús tsi' ch'ʌmʌ, tsi' c'uxu ti' tojelob i wut.

⁴⁴ Ti wi'il Jesús tsi' su'beyob: —Jiñʌch tsa' bʌ c su'beyetla che' añon to quic'otetla: Cha'añ wersa mi' ts'ʌctiyel pejtelel chuqui tac ts'ijbubil cha'añon ti' mandar Moisés yic'ot ti' juñ x'alt'añob yic'ot ti Salmo tac, —che'en.

⁴⁵ Ti jim bʌ ora tsi' jambeyob i ña'tʌbal cha'añ mi' ch'ʌmbeñob isujm i Ts'ijbujel Dios.

⁴⁶ Tsi' su'beyob: —Come che'ʌch ts'ijbubil. Wersa mi' yu'bin wocol jiñi Cristo, wersa mi' cha' ch'ojyel ba'añ chʌmeño' bʌ ti yuxp'ejlel q'uiñ,

⁴⁷ yic'ot wersa mi' su'bentelob wiñicob x'ixicob ti pejtelel pañimil cha'añ mi' cʌyob i mul ti' c'aba' Cristo cha'añ mi' ñusʌbentelob i mul. Ya' ti Jerusalén mi caj i tejchel ti sujbel jiñi t'añ.

⁴⁸ Jatetla mi caj la' su'b chuqui tac tsa' la' q'uele.

⁴⁹ Awilan, mi caj c chocbeñetla tilel chuqui su'bebiletla i cha'añ c Tat mu' bʌ caj i yʌq'ueñetla. Cʌlenla wʌ' ti Jerusalén jinto mi la' wʌq'uentel la' p'ʌtʌlel ch'oyol bʌ ti chañ, che'en.

Tsa' pʌjyi letsel Jesús ti panchan

⁵⁰ Ti wi'il Jesús tsi' pʌyʌyob majlel xcʌnt'añob i cha'añ c'ʌlʌl ti Betania, tsi' letsa i c'ʌb, tsi' yʌq'ueyob i yutslel i t'añ.

⁵¹ Che' bʌ tsa' ujti i yʌq'ueñob i yutslel i t'añ tsi' cʌyʌyob, tsa' pʌjyi letsel ti panchan.

⁵² Jiñi xcʌnt'añob che' bʌ tsa' ujti i ch'ujutesañob, tsa' cha' majliyob ti Jerusalén yic'ot ca'bʌl i tijicñʌyelob i pusic'al.

⁵³ Tsa' chʌn majliyob ti Templo, tsi' su'buyob i ñuclel Dios, tsi' yʌlʌyob, uts'at Dios. [Amén.]