Lucas 20 - Jiñi Tsiji' bʌ Wen T'añ cha'añ Estudio

I p'ʌtʌlel i ye'tel Jesús

¹ Ti jump'ejl bʌ q'uiñ Jesús woli' cʌntesan jiñi wiñicob x'ixicob ti Templo. Che' woli' su'b jiñi wen t'añ, tsa' c'otiyob ñuc bʌ motomajob yic'ot xts'ijbayajob yic'ot xñoxob año' bʌ i ye'tel.

² Tsa' caji i pejcañob Jesús, tsi' yʌlʌyob: —Su'beñon lojon, ¿Baqui tsa' taja a we'tel cha'añ ma' mel iliyi? ¿Majqui tsi' yʌq'ueyet a we'tel?

³ Jesús tsi' su'beyob: —Añ chuqui mij c'ajtibeñetla ja'el. Su'beñonla.

⁴ ¿Baqui ch'oyol i ye'tel Juan cha'añ mi' yʌc' ch'ʌmja'? ¿Ch'oyol ba ti panchan o ch'oyol ba ti wiñicob? Che'en.

⁵ Jiñi cha'añ tsa' caji i comol alob, tsi' yʌlʌyob: —Mi tsa' lac su'be: “Ch'oyol ti panchan”, mi cho'onla, muq'uix i cha' c'ajtibeñonla: ¿Chucoch ma'añic tsa' la' ñopbe i t'añ?

⁶ Mi tsa' lac su'be: “Ch'oyol ti wiñicob”, mi cho'onla, pejtelel wiñicob mi caj i julonla ti xajlel, come mi' ña'tañob ti isujm x'alt'añʌch jiñi Juan.

⁷ Tsi' yʌlʌyob cha'añ mach yujilobic baqui ch'oyol i ye'tel Juan.

⁸ Jesús tsi' su'beyob: —Joñon ja'el, ma'añic mic su'beñetla baqui tsa' c taja que'tel cha'añ jiñi mu' bʌ c mel, —che'en.

Jiñi jontol bʌ xcʌnta ts'usubilob

⁹ Jesús tsa' caji i su'ben wiñicob x'ixicob ili lajiya: Juntiquil wiñic tsi' pʌc'ʌ ts'usubil, tsi' yʌq'ue ti' wenta xcʌnta ts'usubilob; tsa' majli ti yam bʌ lum, jal tsa' cʌle ya'i.

¹⁰ Che' bʌ tsa' c'oti i yorajlel, tsi' choco majlel juntiquil x'e'tel i cha'añ ba'añ xcʌnta ts'usubilob cha'añ mi' ch'ʌm lamital i wut ts'usubil, pero jiñi xcʌnta ts'usubilob tsi' lowoyob jiñi x'e'tel. To'ol che' jach tsi' chocoyob sujtel.

¹¹ I yum tsi' cha' choco majlel yam bʌ x'e'tel, jiñi xcʌnta ts'usubilob tsi' lowoyob ja'el. Leco tsi' tic'layob, to'ol che' jach tsi' cha' chocoyob sujtel.

¹² I yum tsi' cha' choco majlel i yuxticlel bʌ x'e'tel; jiñi xcʌnta ts'usubilob tsi' lowoyob ja'el, tsi' chocoyob loq'uel.

¹³ Jiñi cha'añ i yum ts'usubil tsi' yʌlʌ: ¿Chuqui yom mic mel? Mi caj c choc majlel c'uxbibil bʌ calobil. Tic'ʌl che' mi' q'uelob calobil mi caj i q'uelob ti ñuc, che'en.

¹⁴ Jiñi xcʌnta ts'usubilob che' bʌ tsi' q'ueleyob i yalobil jiñi yumʌl, tsi' comol alʌyob, tsi' yʌlʌyob: “Jiñʌch mu' bʌ caj i yochel ti yumʌl, la' lac tsʌnsan, che' jiñi, mi caj la cochel ti' yum pejtelel i chu'bʌañ”.

¹⁵ Tsi' chocoyob loq'uel ti ts'usubil, tsi' tsʌnsayob, ¿Chuqui mi caj i tumbeñob xcʌnta ts'usubilob jiñi i yum ts'usubil?

¹⁶ Mi caj i tilel, mi caj i wersa jisan jiñi xcʌnta ts'usubilob, mi caj i yʌq'ueñ ti' wenta i ts'usubil yaño' bʌ. Che' bʌ tsi' yu'biyob ili t'añ tsi' yʌlʌyob: —Ma'añic ba ora mi caj cujtel lojon che' bajche' jiñi.

¹⁷ Jesús tsi' q'ueleyob, tsi' su'beyob: —Che' jiñi, ¿chuqui isujmlel ili ts'ijbubil bʌ? “Jiñi xajlel tsa' bʌ i chocoyob xmel ototob tsa'ix otsʌnti ti ñaxan bʌ i xujc otot”.

¹⁸ Pejtelel mu' bʌ i yajlel ti' pam ili xajlel mi caj i c'ʌscujel, pero jiñi mu' bʌ i tejñel ti jiñi xajlel mi caj i laj bic'tiyel, —che'en Jesús.

Jiñi tojoñel

¹⁹ Ti jim bʌ ora, jiñi ñuc bʌ motomajob yic'ot xts'ijbayajob tsa' caji i ña'tañob bajche' mi mejlel i chucob Jesús, come tsi' ch'ʌmbeyob isujm cha'añ tsi' cha'le t'añ ti lajiya ti' contrajob, pero tsi' bʌc'ñayob wiñicob.

²⁰ Tsi' chʌcʌ q'ueleyob Jesús. Tsi' chocoyob majlel xñʌch'ta t'añob tsa' bʌ i lon pʌsʌyob i bʌ ti toj, cha'añ mi' tajbeñob i mul Jesús ti' t'añ cha'añ mi' yʌc'ob ti melobʌjʌl ti' tojlel jiñi gobernador.

²¹ Jiñi xñʌch'ta t'añob tsi' su'beyob Jesús: —Maestro, cujil lojon ma' wʌl chuqui isujm, yic'ot toj ma' cha'len cʌntesan yic'ot junlajal jach ma' q'uel wiñicob, wola' cʌntesañon lojon ti' bijlel Dios ti isujm.

²² ¿Mu' ba i yʌl ti mandar cha'añ yom mi la cʌq'uen tojoñel jiñi César o ma'añic?

²³ Pero Jesús tsi' ña'ta mayajax i t'añob, tsi' su'beyob: —¿Chucoch mi la' wilʌbeñon c pusic'al?

²⁴ Pʌsbeñon jiñi taq'uiñ. ¿Majqui i yejtal yic'ot i ts'ijbal ya'añ ya'i? Tsi' jac'beyob: —I cha'añ César.

²⁵ Jiñi cha'añ Jesús tsi' su'beyob: —Aq'uenla César chuqui i cha'añ César. Aq'uenla Dios chuqui i cha'añ Dios, —che'en Jesús.

²⁶ Ma'añic tsa' mejli i tajbeñob i mul Jesús, come toj i t'añ ti' tojlel wiñicob x'ixicob, tsa' toj sajtiyob i pusic'al cha'añ uts'at tsi' jac'ʌ Jesús, ñʌch'ʌl tsa' cʌleyob.

C'ajtibal che' mi' tejchelob ch'ojyel chʌmeño' bʌ

²⁷ Tsa' tiliyob saduceojob ba'añ Jesús, jiñobʌch mu' bʌ i yʌlob ma'añic mi' cha' ch'ojyelob chʌmeño' bʌ tsi' c'ajtibeyob Jesús.

²⁸ Tsi' yʌlʌ: —Maestro, Moisés tsi' ts'ijbubeyonla: “Mi tsa' chʌmi juntiquil ascuñʌl bʌ am bʌ i yijñam mach bʌ añic i yalobil, che' jiñi añ ti' wenta jiñi ijts'iñʌl bʌ cha'añ mi' pʌyben i yijñam i yʌscun cha'añ mi' techben i p'olbal”.

²⁹ Añ wuctiquil wiñicob i yerañob i bʌ: Jiñi ñaxan bʌ tsi' pʌyʌ i yijñam, pero tsa' chʌmi jiñi wiñic che' ma'añic tsi' cʌyʌ i p'olbal.

³⁰ Jiñi i cha'ticlel bʌ wiñic tsi' pʌyʌ jiñi x'ixic, pero tsa' chʌmi ja'el che' ma'añic tsi' cʌyʌ i p'olbal.

³¹ I yuxticlel bʌ wiñic tsi' pʌyʌ ja'el jiñi x'ixic, che'ʌch tsa' laj ujti jiñi wuctiquilob, tsa' laj chʌmiyob che' ma'añic tsi' cʌyʌyob i p'olbal.

³² Ti wi'il tsa' chʌmi jiñi x'ixic ja'el.

³³ Ti' yorajlel che' mi' cha' ch'ojyelob chʌmeño' bʌ, ¿majqui bʌ wiñic i ñoxi'al jiñi x'ixic? Come ti' wucticlelob tsi' pʌyʌyob cha'añ i yijñam.

³⁴ Jiñi cha'añ Jesús tsi' jac'beyob: —Jiñi yalobilob wiñicob x'ixicob cuxulo' bʌ ti ili ora mi' pʌyob i bʌ yic'ot mi' sijintelob.

³⁵ Pero jiñi mu' bʌ i q'uejlelob ti uts'at cha'añ mi' tajob i cuxtʌlel ti jiñi tal to bʌ ora yic'ot cha'añ mi' cha' ch'ojyelob ba'añ chʌmeño' bʌ, ma'añix mi' pʌyob i pi'ʌl, ma'añix mi' sijintelob.

³⁶ Come mach chʌn mejlobix ti chʌmel, lajalobix che' bajche' ángelob, yic'ot yalobilobʌch Dios, come tsa'ix tejchiyob ch'ojyel ba'añ chʌmeño' bʌ.

³⁷ Pero jiñi chʌmeño' bʌ mi caj i cha' ch'ojyelob, che'ʌch tsi' yʌlʌ ja'el Moisés che' bʌ tsi' tsictesa chuqui tsa' ujti ti alʌ te' che' bʌ tsi' pejca lac Yum ti' Dios Abraham, i Dios Isaac, i Dios Jacob.

³⁸ Come Dios mach i Diosic chʌmeño' bʌ, pero i Diosʌch cuxulo' bʌ, come laj cuxulob cha'añ mi' ñuq'uesañob Dios, —che'en Jesús.

³⁹ Cha'tiquil uxtiquil xts'ijbayajob tsi' su'beyob: —Maestro, uts'at chuqui tsa' wʌlʌ.

⁴⁰ Ti wi'il ma'añix majqui tsi' chʌn ñopo i c'ajtiben yan tac bʌ c'ajtibal.

¿Majqui i yalobil jiñi Cristo?

⁴¹ Jiñi cha'añ Jesús tsi' c'ajtibeyob: —¿Chucoch mi la' wʌl i Yalobilʌch David jiñi Cristo?

⁴² Jiñi David tsi' yʌlʌ ti' Salmo: “Lac Yum tsi' su'be c Yum: Buchi' tic ñoj,

⁴³ jinto mi cʌq'ueñet a t'uchtan a contrajob”, che'en Jesús.

⁴⁴ David tsi' pejca Cristo ti' Yum, ¿Bajche' isujm che' jiñi i yalobil David jiñi Cristo? Che'en Jesús.

Jesús tsi' su'beyob i mul xts'ijbayajob

⁴⁵ Che' bʌ woli ñʌch'tañob jiñi t'añ pejtelel wiñicob x'ixicob, Jesús tsi' su'be xcʌnt'añob i cha'añ:

⁴⁶ —Chʌcʌ q'uele la' bʌ cha'añ xts'ijbayajob mu' bʌ i mulañob i lʌpob pʌl bʌ i bujc, mi' mulañob i yʌq'ueñtelob cortesía ba'añ choñoñibʌl tac, mi' mulañob jiñi ñaxan bʌ buchlibʌl ti sinagoga tac, yic'ot ñaxan bʌ buchlibʌl ti q'uiñijel.

⁴⁷ Mi' chilbeñob i yotot me'ba' x'ixicob yic'ot mi' melob tam bʌ oración tac cha'añ mi' lon q'uejlelob ti uts'at, pero ñumen mi caj i yʌq'ueñtelob i tojob i mul.