Lucas 2 - Jiñi Tsiji' bʌ Wen T'añ cha'añ Estudio

Tsi' yila pañimil Jesús

¹ Ti jim bʌ ora tsi' cha'le mandar Augusto César cha'añ mi' tsijquelob wiñicob ti pejtelel lum am bʌ ti' wenta Roma.

² Jiñi ñaxan bʌ i tsicol wiñicob tsa' ujti che' woli' cha'len i ye'tel ti gobernador Cirenio ya' ti Siria.

³ Ti pejtelelob tsa' majliyob ti' tejclum tac ba' chucbilob i c'aba' i tat i ña' cha'añ mi' ts'ijbuntelob i c'aba' ti juñ.

⁴ Tsa' loq'ui José ti Nazaret am bʌ ti' wenta Galilea. Tsa' majli ti Judea ti' tejclum David i c'aba' Belén, come José loq'uem ti' p'olbal David.

⁵ Cha'añ mi' ts'ijbun i c'aba' ti juñ temel yic'ot i yijñam i c'aba' María c'ajtibil bʌ i cha'añ. Cʌntʌbil i cha'añ alʌl.

⁶ Che' bʌ ya'añob ti Belén, tsa' c'oti i yorajlel cha'añ mi' yilan pañimil i yalobil.

⁷ Tsi' yʌc'ʌ ti pañimil ñaxan bʌ ch'itoñ bʌ i yalobil, tsi' bʌc'ʌ ti' majts, tsi' ñolchoco ti' buc'ujib alʌc'ʌl, come ma'añic tsi' taja i yajñib ti' yotlel wʌyibʌl.

Jiñi ángelob yic'ot xcʌnta tʌñʌme'ob

⁸ Ti jiñi jach bʌ lum añ xcʌnta tʌñʌme'ob ti jamil, woli' cʌntañob i tʌñʌme' ti ac'ʌlel.

⁹ Awilan, tsa' tsictiyi juntiquil i yÁngel lac Yum ba'añob. I ñuclel Dios tsi' yʌc'ʌ i c'ʌc'al ti' joytʌlelob. Tsa' cajiyob ti ca'bʌl bʌq'uen.

¹⁰ Jiñi ángel tsi' su'beyob: —Mach mi la' cha'len bʌq'uen come tsa' c ch'ʌmbeyetla tilel wen t'añ cha'añ pejtelel wiñicob x'ixicob, mu' bʌ caj i yʌq'ueñetla ca'bʌl i tijicñʌyel la' pusic'al.

¹¹ Come sajmʌl ti' tejclum David tsi' yila pañimil la' waj Coltaya, jiñʌch Cristo lac Yum.

¹² Mi caj la' cʌn che' bajche' iliyi: Mi caj la' taj jiñi alʌl bʌc'ʌl ti majts, ñolol ti' buc'ujib alʌc'ʌl, che'en jiñi ángel.

¹³ Ti jiñi jach bʌ ora tsa' tsictiyi bajc'ʌl ángelob ch'oyolo' bʌ ti panchan, woli i su'bob i ñuclel Dios. Tsi' yʌlʌyob:

¹⁴ ¡La' sujbic i ñuclel Dios ya' ti panchan. Wʌ' ti pañimil woli' yʌq'ueñtelob i ñʌch'tʌlel i pusic'al wiñicob x'ixicob mu' bʌ i q'uejlelob ti uts'at ti Dios!

¹⁵ Che' bʌ tsa' cha' majliyob ángelob ti panchan, jiñi xcʌnta tʌñʌme'ob tsi' su'beyob i bʌ: —Coñixla ti Belén cha'añ mi laj q'uel ili tsa' bʌ ujti, tsa' bʌ su'bentiyonla cha'añ lac Yum.

¹⁶ Tsa' majliyob ti ora. Tsi' tajayob María yic'ot José yic'ot jiñi alʌl ñolol ti' buc'ujib alʌc'ʌl.

¹⁷ Che' bʌ tsi' q'ueleyob, tsa' caji i tsictesañob che' bajche' tsa' su'bentiyob cha'añ i cuxtʌlel jiñi alʌl.

¹⁸ Pejtelel tsa' bʌ i yu'biyob jiñi t'añ tsa' toj sajtiyob i pusic'al cha'añ chuqui tac tsa' su'bentiyob jiñi xcʌnta tʌñʌme'ob.

¹⁹ Pero María chʌn lotol ti' pusic'al pejtelel jiñi t'añ. Tsa' jach i chʌn ña'ta ti' pusic'al pejtelel chuqui tsi' yu'bi.

²⁰ Tsa' sujtiyob xcʌnta tʌñʌme'ob. Tsi' chʌn tsictesayob i ñuclel Dios. Tsi' su'buyob i ñuclel Dios cha'añ pejtelel chuqui tsi' yu'biyob yic'ot chuqui tsi' q'ueleyob che' bajche' tsa' su'bentiyob.

Tsi' pʌyʌyob majlel alʌ Jesús ti Templo

²¹ Che' bʌ tsa' ts'ʌctiyi waxʌcp'ejl q'uiñ cha'añ mi' tsepbentel i pʌchʌlel alʌ ch'itoñ, tsi' yotsʌbeyob i c'aba' Jesús. Jiñʌch i c'aba' tsa' bʌ i wʌn otsʌbe jiñi ángel che' maxto cʌntʌbilic.

²² Che' bʌ tsa' ts'ʌctiyi i yorajlel cha'añ mi' sʌc-esañob i bʌ che' bajche' mi' yʌl ti' mandar Moisés, tsi' pʌyʌyob majlel alʌ ch'itoñ ti Jerusalén cha'añ mi' yʌq'ueñob ti' wenta lac Yum.

²³ Che' bajche' ts'ijbubil ti' mandar lac Yum: “Mux caj la' ña'tan i cha'añʌch lac Yum pejtelel ch'itoñ ñaxan bʌ mi' yilan pañimil”.

²⁴ Che' ja'el tsa' majliyob cha'añ mi' yʌq'ueñob i majtañ Dios che' bajche' mi' yʌl ti' mandar lac Yum: “Aq'uen cha'cojt xpurwoc o mi cha'cojt x'ujcuts”.

²⁵ Añ juntiquil wiñic ti Jerusalén i c'aba' Simeón, toj bʌ i pusic'al, mu' bʌ i ch'ujutesan Dios. Woli i pijtan jiñi mu' bʌ caj i ñuq'uesʌbeñob i pusic'al israelob. Jiñi Ch'ujul bʌ Espíritu añ ti' pusic'al.

²⁶ Jiñi Ch'ujul bʌ Espíritu tsi' su'be Simeón cha'añ ma'añic mi' caj ti chʌmel jinto che' q'uelbilix i cha'añ jiñi Yajcʌbil bʌ cha'añ lac Yum.

²⁷ Ñijcʌbil ti Espíritu tsa' majli ti Templo. I tat i ña' Jesús tsi' pʌyʌyob ochel jiñi alʌ Jesús ti Templo cha'añ mi' melbeñob bajche' mi' yʌl ti mandar.

²⁸ Simeón tsi' meq'ue jiñi alʌl. Tsi' su'bu i ñuclel Dios. Tsi' yʌlʌ:

²⁹ Wʌle c Yum, x'e'telon a cha'añ. La'ix chʌmicon ti' ñʌch'tʌlel c pusic'al che' bajche' tsa' wʌlʌ,

³⁰ Come wʌle tsa'ix j q'uele tic wut jiñi xColtaya

³¹ tsa' bʌ a choco tilel ti' tojlel pejtelel wiñicob x'ixicob.

³² Jiñʌch i sʌclel pañimil mu' bʌ caj i tsictiyel ti' tojlel gentilob yic'ot i ñuclelʌch a cha'año' bʌ ti Israel, che'en Simeón.

³³ Tsa' toj sajtiyob i pusic'al José yic'ot María, i ña' Jesús, che' bʌ tsi' yu'biyob jiñi t'añ cha'añ i yalobil.

³⁴ Simeón tsi' yʌq'ueyob i yutslel i t'añ, tsi' su'be María, i ña' alʌl: —Awilan, wa'chocobilix a walobil cha'añ ca'bʌl israelob. Lamital mi caj i yajlelob, lamital mi caj i xuc'chocontelob. Ca'bʌlob mi caj i cha'leñob t'añ ti' contra.

³⁵ Wen ch'ijiyem a pusic'al mi caj a wu'bin che' mi' tsictiyel bajche' woli' ña'tañob ti' pusic'al ca'bʌlob, che'en Simeón.

³⁶ Ya'añ x'ixic bʌ x'alt'añ ja'el i c'aba' Ana, i yalobil Fanuel, i p'olbal Aser, wen ca'bʌlix i ja'bilel; che' xch'oc to tsa' chumle yic'ot i ñoxi'al wucp'ejl ja'b.

³⁷ C'ʌlʌl me'ba'ix che' bʌ tsi' taja chʌmp'ejl i jo'c'al (84) i ja'bilel. Ma'añic tsi' wis cʌyʌ i bʌ ti Templo ba' tsi' melbe i ye'tel Dios ti q'uiñil ti ac'ʌlel yic'ot ch'ajb yic'ot oración.

³⁸ Ti jiñi jach bʌ ora tsa' tili Ana ba'añ alʌl. Tsi' su'be wocolix i yʌlʌ Dios. Tsi' su'beyob isujmlel jiñi alʌl ti' tojlel pejtelel jiñi año' bʌ ti Jerusalén woli bʌ i pijtañob i coltʌntel.

Tsa' cha' majliyob ti Nazaret

³⁹ Che' bʌ tsa' ujti i melob pejtelel chuqui tac mi' yʌl ti' mandar lac Yum, María yic'ot José tsa' sujtiyob majlel ya' ti Galilea, tsa' c'otiyob ti' lumal i c'aba' Nazaret.

⁴⁰ Tsa' coli jiñi alʌl, tsa' p'ʌt-a, tsa' bujt'i ti' ña'tʌbal, tsa' chʌn ajñi i yutslel i pusic'al Dios ti' tojlel.

Ch'itoñ Jesús ti Templo

⁴¹ Ti jujump'ejl ja'b i tat i ña' Jesús mi' majlelob ti Jerusalén cha'añ i q'uiñilel Pascua.

⁴² Che' añix lajchʌmp'ejl i ja'bilel Jesús, tsa' majliyob ti q'uiñijel che' bajche' i tilel mi' melob.

⁴³ Che' bʌ tsa' ujtiyob ti q'uiñijel, tsa' cajiyob ti sujtel, pero jiñi ch'itoñ Jesús ya' tsa' cʌle ti Jerusalén che' mach yujilobic i tat i ña'.

⁴⁴ Tsi' lon ña'tayob woli' sujtel i yalobil yic'ot motocña bʌ i pi'ʌlob. Tsi' xʌñʌyob majlel jump'ejl q'uiñ. Tsa' caji i sʌclañob ba'añ i pi'ʌlob yic'ot ba'añ i cʌñʌyo' bʌ,

⁴⁵ pero ma'añic tsi' tajayob, che' jiñi tsa' cha' majliyob ti Jerusalén cha'añ mi' sʌclañob.

⁴⁶ Che' ñumeñix uxp'ejl q'uiñ tsi' tajayob ti Templo buchul ti' tojlel jiñi xcʌntesa mandarob, woli' ñʌch'tʌbeñob i t'añ yic'ot woli' yotsan i c'ajtibal tac ja'el.

⁴⁷ Pejtelel jiñi tsa' bʌ i yu'bibeyob i t'añ jiñi ch'itoñ tsa' toj sajtiyob i pusic'al come ca'bʌl i ña'tʌbal yic'ot uts'at bajche' tsi' jac'beyob i t'añ.

⁴⁸ Che' bʌ tsi' q'ueleyob i tat i ña', tsa' toj sajtiyob i pusic'al. I ña' Jesús tsi' su'be: —Calobil, ¿chucoch che' tsa' melbeyon lojon bajche' iliyi? Jiñi a tat yic'ot joñon ti' ch'ijiyemlel lojon c pusic'al tsa' c sʌclayet lojon, —che'en.

⁴⁹ Jesús tsi' su'beyob: —¿Chucoch tsa' la' sʌclayon? ¿Mach ba la' wujilic yom mic melben i ye'tel c Tat? —Che'en.

⁵⁰ Pero ma'añic tsi' ch'ʌmbeyob isujm i t'añ Jesús tsa' bʌ i su'beyob.

⁵¹ Tsa' ju'bi majlel Jesús yic'otob. Tsa' c'oti ti Nazaret. Tsi' wen jac'be i t'añ i tat i ña'. Jiñi i ña' tsi' loto ti' pusic'al pejtelel tsa' bʌ ujti.

⁵² Tsa' p'ojli i ña'tʌbal Jesús, tsa' chañ-a yic'ot tsa' chʌn q'uejli ti uts'at ti' wut Dios yic'ot ti' wut wiñicob x'ixicob.