Lucas 19 - Jiñi Tsiji' bʌ Wen T'añ cha'añ Estudio

Jesús yic'ot Zaqueo

¹ Che' bʌ tsa' ochi Jesús ti Jericó. Che' woli i ñumel majlel,

² awilan, ya'añ juntiquil wiñic i c'aba' Zaqueo, i yumʌch jiñi xch'ʌm tojoñelob. Wen chumul.

³ Tsi' ñopo i q'uel Jesús cha'añ mi' cʌn, pero ma'añic tsa' mejli come joyol ti bajc'ʌl wiñicob x'ixicob, come wen pec'atax.

⁴ Ti ajñel tsa' majli ti ñaxan, tsa' letsi ti sicómoro te' cha'añ mi' q'uel Jesús, come ya'i mi' caj i ñumel.

⁵ Che' bʌ tsa' c'oti Jesús ba'añ Zaqueo, tsi' letsa i wut, tsi' q'uele, tsi' su'be: —Zaqueo, juben ti ora come wersa yom mic jijlel ya' ti a wotot, —che'en.

⁶ Jiñi cha'añ orajach tsa' ju'bi Zaqueo. Tijicña i pusic'al tsi' pʌyʌ majlel Jesús ti' yotot.

⁷ Pejtelel tsa' bʌ i q'ueleyob tsa' cajiyob ti wulwul a'leya, tsi' yʌlʌyob: Tsa'ix majli ti jijlel ba'añ xmulil.

⁸ Jiñi cha'añ Zaqueo che' wa'al ti' tojel lac Yum, tsi' su'be: —C Yum, mi caj cʌq'ueñob ojlil c chu'bʌañ jiñi mach bʌ añobic i chu'bʌañ, mi añ tsa' bʌ j chilbe i chu'bʌañ, mi caj c cha' sutq'uiben chʌnyajl i ñumel, —che'en Zaqueo.

⁹ Jesús tsi' su'be: —Wʌle tsa'ix juli i coltʌntel jiñi año' bʌ ti ili otot, come jiñʌch i yalobil Abraham ja'el, —che'en.

¹⁰ Come i Yalobil Wiñic tsa' tili i sʌclan jiñi sajtem bʌ, tsa' tili i coltañ, che'en.

Lajiya cha'añ x'e'telob tsa' bʌ i c'ʌmbeyob i taq'uiñ i yum

¹¹ Che' bʌ tsi' yu'biyob ili t'añ, Jesús tsa' caji i su'beñob jump'ejl lajiya, come lʌc'ʌlix añ ti Jerusalén; jiñi wiñicob tsi' lon ña'tayob cha'añ i yumʌntel Dios mi caj i tsictiyel ti ora.

¹² Tsi' yʌlʌ: Juntiquil yumʌl tsa' majli ti ñajt bʌ lum cha'añ ya' mi' ch'ʌm i ye'tel ti yumʌl, tsi' ña'ta sujtel che' ujtel ch'ʌm.

¹³ Tsi' pʌyʌ tilel lujuntiquil x'e'telob i cha'añ, tsi' yʌq'ueyob lujump'ejl mina, tsi' su'beyob: “C'ʌñʌla ti ganar ili c taq'uiñ jinto mic cha' tilel”, che'en.

¹⁴ Pero jiñi i wiñicob año' bʌ ti' lumal tsi' ts'a'leyob, jiñi cha'añ tsi' chocoyob majlel wiñicob ti' pat jiñi yumʌl cha'añ mi' su'beñob: “Mach comic lojon cha'añ ili wiñic mi' cha'len yumʌl tic tojlel lojon”.

¹⁵ Che' bʌ tsa' ujti i ch'ʌm i ye'tel ti yumʌl, tsa' cha' sujti ti' yotot. Tsi' yʌc'ʌ i t'añ cha'añ mi' pʌjyelob tilel jiñi x'e'telob tsa' bʌ aq'uentiyob jiñi taq'uiñ, cha'añ mi' ña'tan bajche' woli i c'ʌñob ti ganar ti jujuntiquil.

¹⁶ Tsa' tili jiñi ñaxan bʌ, tsi' yʌlʌ: “C yum, tsa' cʌc'ʌ a taq'uiñ ti ganar, tsa' c taja lujump'ejl”, che'en.

¹⁷ I yum tsi' su'be: “Uts'at bajche' tsa' mele, xuc'ul bʌ x'e'telet, anquese ts'ita' jach añ ti a wenta; jiñi cha'añ mi caj cotsañet ti yumʌl ti lujump'ejl tejclum”.

¹⁸ Tsa' tili yam bʌ x'e'tel, tsi' su'be: “C yum, tsa' c'ʌñʌ a taq'uiñ ti ganar; tsa' p'ojli jo'p'ejl mina”, che'en.

¹⁹ Che' ja'el i yum tsi' su'be: “Jatet ja'el, mi caj cʌc' ti a wenta jo'p'ejl tejclum”, che'en.

²⁰ Tsa' tili yam bʌ x'e'tel, tsi' yʌlʌ: “C yum, wʌ'ʌch añ a taq'uiñ tsa' bʌ c pixi ti jump'ejl pisil.

²¹ Come tsa' c bʌc'ñayet, yic'ot bʌc'ñʌbilet, ma'añic ma' ch'ʌm chuqui ma'añic tsa' wʌc'ʌ, yic'ot ma' tsep jam ba' ma'añic tsa' pʌc'ʌ”, che'en jiñi x'e'tel.

²² Jiñi cha'añ i yum tsi' su'be: “Jontol bʌ x'e'telet, mi caj c melet cha'añ a t'añ tsa' bʌ a wʌlʌ; awujil bʌc'ñʌbilon, mic ch'ʌm chuqui ma'añic tsa' cʌc'ʌ, yic'ot mic tsep jam ba' ma'añic tsa' c pʌc'ʌ.

²³ ¿Chucoch che' jiñi, ma'añic tsa' wʌc'ʌ c taq'uiñ ba' mi' c'ʌjñel ti ganar? Che'ic jiñi tsa' mejli c cha' ch'ʌm c taq'uiñ yic'ot i jol che' bʌ tsa' juliyon”, che'en.

²⁴ I yum tsi' su'be jiñi ya' bʌ añob: “Chilbenla jiñi taq'uiñ, aq'uenla jiñi am bʌ i cha'añ lujump'ejl”, che'en.

²⁵ Tsi' su'beyob: “Pero, c yum, añix i cha'añ lujump'ejl”.

²⁶ “Joñon mic su'beñetla: Majqui jach añ i cha'añ mi caj i yʌq'uentel yam bʌ, pero jiñi mach bʌ añic i cha'añ mi caj i laj chilbentel chuqui añ i cha'añ.

²⁷ Che' ja'el pʌyʌla tilel jiñi mu' bʌ i contrajiñoñob mach bʌ yomobic i yumañoñob, pʌyʌla tilel ilayi, set' t'ojbenla loq'uel i bic' tic tojel”.

5. I YE'TEL JESÚS TI JERUSALÉN ( 19.28—21.38 ) Tsa' ochi Jesús ti Jerusalén

²⁸ Jesús tsa' ujti i su'b ili t'añ. Tsa' caji ti letsel majlel ti ñaxan ti Jerusalén.

²⁹ Che' lʌc'ʌlix añ ti Betfagé yic'ot ti Betania ya' ti Olivo wits, tsi' choco majlel cha'tiquil xcʌnt'añob i cha'añ.

³⁰ Tsi' yʌlʌ: —Cucula ti tejclum ya' ti' tojel la' wut, che' mi la' wochel, ya' cʌchʌl mi caj la' taj tsiji' bʌ burro maxto bʌ añic majqui tsi' c'ʌchta, jitila, chucula tilel.

³¹ Mi añ majqui mi' c'ajtibeñetla: ¿Chucoch woli la' jit? Yom mi la' su'ben: “Come yom i c'ʌn lac Yum”.

³² Tsa' majliyob. Tsi' tajayob che' bajche' tsi' yʌlʌ Jesús.

³³ Che' bʌ woli i jitob jiñi burro, i yumob tsa' caji i su'beñob: —¿Chucoch woli la' jit jiñi burro? —Che'en.

³⁴ Jiñi xcʌnt'añob tsi' yʌlʌyob: —Come yom i c'ʌn lac Yum.

³⁵ Tsi' pʌyʌyob tilel ba'añ Jesús. Tsi' tasibeyob i pat jiñi burro ti' pislelob, tsi' c'ʌchchocoyob Jesús.

³⁶ Che' bʌ woli ti majlel Jesús tsi' tasiyob majlel jiñi bij ti' pislelob.

³⁷ Che' bʌ lʌc'ʌlix añob ya' ti' ye'bal Olivo wits, pejtelel wiñicob x'ixicob woli bʌ i ñopob Jesús, tijicñayob; tsa' caji i su'bob i ñuclel Dios ti c'am bʌ t'añ cha'añ pejtelel ñuc tac bʌ i melbal Jesús tsa' bʌ i q'ueleyob.

³⁸ Tsi' yʌlʌyob: —La' sujbic i ñuclel Rey mu' bʌ i tilel ti' c'aba' lac Yum, ñʌch'ʌl i pusic'al jiñi am bʌ ti panchan, ñuc jiñi am bʌ ti chañ.

³⁹ Jiñi cha'añ cha'tiquil uxtiquil fariseojob ya' bʌ añob ti' tojlel bajc'ʌl wiñicob x'ixicob, tsi' su'beyob Jesús: —Maestro, tiq'ui jiñi xñopt'añob a cha'añ.

⁴⁰ Jesús tsi' su'beyob: —Mic su'beñetla, mi tsa' ñʌjch'iyob mi' caj ti c'am bʌ t'añ jiñi xajlel tac, —che'en.

⁴¹ Che' lʌc'ʌlix añ, che' wolix i q'uel jiñi tejclum, Jesús tsi' yuc'ta.

⁴² Tsi' yʌlʌ: —Uts'at tsa'ic jach la' ña'ta ti ili q'uiñ bajche' mi' mejlel la' taj i ñʌch'tʌlel la' pusic'al, pero wʌle mʌcʌl ti la' wut.

⁴³ Tal jiñi q'uiñ che' mi caj i tilel a contrajob cha'añ mi caj i joy mʌctañet, mi caj i joyetla, mi caj i mʌctañetla ti jujunwejl.

⁴⁴ Mi caj i choquetla ju'bel ti lum yic'ot la' walobilob año' bʌ ti la' tejclum, ma'añic mi caj la' cʌybentel mi jump'ejlic xajlel ti' pam yam bʌ, come ma'añic tsa' la' cʌñʌ i yorajlel la' coltʌntel ti Dios.

Jesús tsi' sʌc-esa templo

⁴⁵ Tsa' ochi Jesús ti Templo, tsa' caji i choc loq'uel pejtelel jiñi woliyo' bʌ ti choñoñel [yic'ot jiñi woliyo' bʌ ti mʌñoñel.]

⁴⁶ Jesús tsi' su'beyob: —Ts'ijbubil: “Jiñi cotot i yotlelʌch oración, pero jatetla tsa'ix la' sutq'ui ti' ch'eñal xujch'”, —che'en.

⁴⁷ Ti jujump'ejl q'uiñ tsi' cha'le cʌntesa Jesús ti Templo, pero jiñi ñuc bʌ motomajob yic'ot xts'ijbayajob yic'ot jiñi ñuco' bʌ i ye'tel ti tejclum, yomob i tsʌnsan Jesús,

⁴⁸ pero ma'añic chuqui tsa' mejli i tumbeñob come pejtelel jiñi wiñicob x'ixicob woli i wen ñʌch'tʌbeyob i t'añ.