Lucas 18 - Jiñi Tsiji' bʌ Wen T'añ cha'añ Estudio

Lajiya cha'añ me'ba' x'ixic yic'ot jontol bʌ xmel mulil

¹ Jesús tsi' su'be xcʌnt'añob i cha'añ jump'ejl lajiya ti cʌntesa cha'añ mi' cha'leñob oración ti pejtelel ora cha'añ ma'añic mi' lujb-añob.

² Tsi' yʌlʌ: Añ juntiquil xmel mulil ti jump'ejl tejclum, mach bʌ añic mi' bʌc'ñan Dios yic'ot ma'añic mi' p'is ti' wenta wiñicob.

³ Ya'añ ja'el juntiquil me'ba' x'ixic ti jiñi tejclum, tsa' tili ba'añ jiñi xmel mulil, tsi' yʌlʌ: “Melbeñon toj bʌ meloñel ti' tojlel contra”, che'en.

⁴ Tsa' ñumi ca'bʌl ora cha'añ mach yomic i coltañ jiñi x'ixic. Ti wi'il tsa' caji i bajñel al ti' pusic'al: “Anquese ma'añic mic bʌc'ñan Dios, yic'ot ma'añic mic p'is ti' wenta wiñicob,

⁵ pero ili me'ba' x'ixic ca'bʌl woli' mʌctʌbeñon q'uiñ. Jiñi cha'añ mi caj c cha'len toj bʌ meloñel ti' tojlel, ame chʌn tilic i mich'esañon”, che'en jiñi xmel mulil.

⁶ Tsi' yʌlʌ lac Yum: U'binla chuqui mi' yʌl jiñi mach bʌ tojic bʌ xmel mulil.

⁷ Ixcu Dios, ¿mach ba muq'uic i melben i mul jiñi mu' bʌ i contrajin jiñi yajcʌbilo' bʌ i cha'añ, mu' bʌ i chʌn pejcañob ti q'uiñil yic'ot ti ac'ʌlel? ¿Jal ba mi' caj i jac'beñob?

⁸ Mic su'beñetla, ti ora mi caj i melbeñob i mul i contra; pero che' mi' tilel i Yalobil Wiñic, ¿mu' ba caj i taj ti pañimil jiñi mu' bʌ i ñopob?

Lajiya cha'añ fariseo yic'ot xch'ʌm tojoñel

⁹ Jesús tsi' su'beyob ili t'añ ti lajiya ti' tojlelob jiñi tsa' bʌ i ña'tayob toj i pusic'al cha'añ ti' bajñel p'ʌtʌlel, yic'ot tsa' bʌ i lon ña'tayob mach tojic i pusic'al yaño' bʌ.

¹⁰ Jesús tsi' yʌlʌ: Cha'tiquil wiñicob tsa' letsiyob majlel ti Templo ti oración, juntiquil fariseo, yam bʌ xch'ʌm tojoñel.

¹¹ Wa'al jiñi fariseo woli ti oración ti' bajñelil, tsi' yʌlʌ: “Wocolix a wʌlʌ Dios, come mach lajaloñic bajche' yaño' bʌ wiñicob: Xujch'o' bʌ, mach bʌ tojobic i pusic'al, xts'i'lelob, mach lajaloñic ja'el bajche' jiñi xch'ʌm tojoñel,

¹² joñon cha'yajl ti semana mic cha'len ch'ajb, mi cʌq'uen Dios i diezmojlel pejtelel c chu'bʌañ mu' bʌ c taj”.

¹³ Pero jiñi xch'ʌm tojoñel ñajt to añ, mach yomic i letsan i wut ti panchan, tsi' jats'ʌ i tajñ, tsi' yʌlʌ: “Dios, p'untañon, xmulilon”, che'en.

¹⁴ Mic su'beñetla: Dios tsi' q'uele ti toj ili wiñic che' bʌ tsa' ju'bi majlel ti' yotot. Pero ma'añic tsi' q'uele ti toj jiñi yam bʌ. Come majqui jach chañ mi' mel i bʌ mi caj i peq'uesʌntel, majqui jach pec' mi' mel i bʌ, mi caj i chañ-esʌntel, che'en Jesús.

Jesús tsi' yʌc'ʌ i c'ʌb ti alobob

¹⁵ Tsi' pʌyʌyob tilel alobob ba'añ Jesús cha'añ mi' yʌc' i c'ʌb ti' jol. Jiñi xcʌnt'añob tsi' tiq'uiyob che' bʌ tsi' q'ueleyob.

¹⁶ Pero Jesús tsi' pʌyʌyob tilel, tsi' su'beyob: —La' tilicob alobob ba'añon, mach mi la' mʌctañob come i cha'añob i yumʌntel Dios.

¹⁷ Ti isujm mic su'beñetla, jiñi mach bʌ añic mi' ch'ʌm ti' wenta i yumʌntel Dios che' bajche' alob, ma'añic mi caj i yochel, che'en.

Jiñi ch'itoñ wiñic wen chumul bʌ

¹⁸ Juntiquil i yum judíojob tsi' c'ajtibe, tsi' yʌlʌ: —Wen bʌ Maestro, ¿chuqui yom mic mel cha'añ mic taj j cuxtʌlel mach bʌ añic mi' jilel? —Che'en.

¹⁹ Jesús tsi' su'be: —¿Chucoch ma' wʌl weñon? Ma'añic majqui wen, jiñi jach Dios.

²⁰ A cʌñʌyʌch mandar: “Mach a cha'len ts'i'lel, mach a cha'len tsʌnsa, mach a cha'len xujch', mach a cha'len jop't'añ, q'uele ti ñuc a tat a ña'”, —che'en Jesús.

²¹ Jiñi i yum judíojob tsi' jac'ʌ: —Ti pejtelel jiñi mandar tsa' c jac'ʌ c'ʌlʌl che' ch'itoñon to, —che'en.

²² Che' bʌ tsi' yu'bi jiñi t'añ, Jesús tsi' su'be: —Añ to yom ma' mel yam bʌ junchajp, choño pejtelel a chu'bʌañ, aq'uen jiñi mach bʌ añobic i chu'bʌañ, che' jiñi, mi caj a taj ca'bʌl a chu'bʌañ ti panchan. La' tsajcañon, —che'en.

²³ Che' bʌ tsi' yu'bi ili t'añ, wen ch'ijiyem tsi' yu'bi, come wen ca'bʌl i chu'bʌañ.

²⁴ Che' bʌ tsi' q'uele Jesús wen ch'ijiyem i pusic'al i yum judíojob, tsi' yʌlʌ: —Wen wocol mi' yochelob ti' yumʌntel Dios jiñi wen chumulo' bʌ.

²⁵ Come mach wen wocolic mi ñumel camello ti wut acuxan, pero ñumen wocol mi' yochel ti' yumʌntel Dios jiñi wen chumul bʌ, —che'en Jesús.

²⁶ Jiñi tsa' bʌ i yu'biyob tsi' c'ajtibeyob: —¿Majqui mi mejlel i coltʌntel, che' jiñi?

²⁷ Jesús tsi' su'beyob: —Jiñi mach bʌ añic mi mejlel i mel wiñicob mi mejlel i mel Dios, —che'en.

²⁸ Jiñi cha'añ Pedro tsa' caji i su'ben: —Awilan, tsa' j cʌyʌ lojon c chu'bʌañ, cha'añ mic tsajcañet lojon, —che'en Pedro.

²⁹ Jesús tsi' su'beyob: —Isujm mic su'beñetla: Ma'añic juntiquil tsa' bʌ i cʌyʌ i yotot, mi i tat, mi i ña', mi i yerañob, mi i yijñam, mi i yalobilob cha'añ ti' caj i yumʌntel Dios,

³⁰ che' ja'el mi caj i taj ñumen ca'bʌl ti ili ora yic'ot ti wi'il bʌ ora mi caj i yʌq'uentel i cuxtʌlel mach bʌ añic mi' jilel, che'en.

Jesús tsi' cha' alʌ ti' yuxyajlel bajche' mi caj i chʌmel

³¹ Jesús tsi' pʌyʌ tilel jiñi lajchʌntiquil, tsi' su'beyob: —Awilan, woli lac letsel majlel ti Jerusalén, mi caj i ts'ʌctiyel pejtelel chuqui tac ts'ijbubil i cha'añ x'alt'añob cha'añ i Yalobil Wiñic.

³² Come mi caj i yʌjq'uel ti' c'ʌb gentilob, mi caj i wajlentel, mi caj i p'ajtʌl, yic'ot mi caj i tujbʌntel.

³³ Che' mi' yujtel i jats'ob ti asiyal mi caj i tsʌnsañob, pero ti yuxp'ejlel q'uiñ mi caj i cha' ch'ojyel, —che'en Jesús.

³⁴ Pero ma'añic tsi' ch'ʌmbeyob isujm ili t'añ mi ts'ita'ic, come ma'añic tsa' aq'uentiyob i ña'tan isujmlel, yic'ot ma'añic tsi' ch'ʌmbeyob isujm chuqui tac tsi' su'beyob Jesús.

Juntiquil xpots' ya' ti Jericó tsa' cha' c'oti i wut

³⁵ Che' bʌ lʌc'ʌlix añ Jesús ti Jericó, ya'añ juntiquil xpots' buchul ti ti' bij, woli' c'ajtin taq'uiñ.

³⁶ Che' bʌ tsi' yu'bi jiñi xpots' woli i ñumelob ca'bʌl wiñicob x'ixicob, tsi' c'ajtibeyob chuqui woli yujtel.

³⁷ Tsi' su'beyob: Woli ti ñumel Jesús ch'oyol bʌ ti Nazaret.

³⁸ Jiñi cha'añ c'am tsi' cha'le t'añ jiñi xpots', tsi' yʌlʌ: —Jesús, i Yalobilet bʌ David, p'untañon, —che'en.

³⁹ Jiñi woli bʌ i majlelob ti ñaxan, tsi' tiq'uiyob, pero tsa' utsi caji ti c'am bʌ t'añ jiñi xpots': —I Yalobilet bʌ David, p'untañon, —che'en.

⁴⁰ Jiñi cha'añ Jesús tsa' wa'le, tsi' yʌc'ʌ i t'añ cha'añ mi' pʌyob tilel ti' tojlel; che' bʌ tsa' c'oti tsi' c'ajtibe,

⁴¹ tsi' yʌlʌ: —¿Chuqui awom mic melbeñet? —Che'en. Jiñi xpots' tsi' jac'ʌ: —C Yum, com mi' cha' c'otel c wut.

⁴² Jesús tsi' su'be: —La' c'otic a wut; tsa' coltʌntiyet cha'añ tsa' ñopoyon, —che'en.

⁴³ Tsa' bʌc' c'oti i wut, tsi' tsajca majlel Jesús, woli i su'b majlel i ñuclel Dios. Pejtelel tsa' bʌ i q'ueleyob, tsi' su'buyob i ñuclel Dios.