Lucas 17 - Jiñi Tsiji' bʌ Wen T'añ cha'añ Estudio

Jiñi mu' bʌ i yʌsañonla ti mulil

¹ Jesús tsa' caji i su'ben xcʌnt'añob i cha'añ: “Wersa mi' tilelob jiñi mu' bʌ i yʌsañob ti mulil wiñicob x'ixicob, pero mi caj i tajob wocol.

² Uts'at tsa'ic ñaxan cʌjchi ña'atun ti' bic' cha'añ mi' chojquel ochel ti chʌmel ti mar che' maxto añic tsi' yʌsa ti mulil juntiquil ch'och'oco' bʌ.

³ Chʌcʌ q'uele la' bʌ, mi tsi' cha'le mulil a wermañu ti a contra, tiq'ui; mi' tsi' cʌñʌ i mul, ñusʌben.

⁴ Mi wucyajl ti jump'ejl q'uiñ mi' cha'len mulil ti a contra, ñusʌben i mul mi ti jujunyajl mi' tilel ba'añet cha'añ mi' su'beñet cha'añ tsa'ix i mele i pusic'al”.

P'ojlesʌbeñon lojon c xuc'tʌlel

⁵ Jiñi apóstolob tsi' su'beyob lac Yum: —Coltañon lojon cha'añ xuc'ul mic ñopet lojon.

⁶ Jiñi cha'añ lac Yum tsi' yʌlʌ: —Añic jax che' wistʌl i xuc'tʌlel la' pusic'al, che' bajche' i bʌc' mostaza, mi mejlel la' su'ben ili sicómoro te': “La' bojquiquet, la' pʌjq'uiquet ti mar”, che' jiñi mi caj i jac'beñet la' t'añ.

Jiñi am bʌ ti' wenta x'e'tel

⁷ ¿Am ba ti la' tojlel juntiquil x'e'tel a cha'añ, mi xtop' lum o mi xcʌnta tʌñʌme', mi tsa' sujti ti otot che' loq'uemix ti jamil, mu' ba a bʌc' su'ben: “La' ti buchtʌl, c'uxu a waj?”

⁸ ¿Mach ba muq'uic a su'ben? “Chajpʌbeñon i bʌl c ñʌc', chajpan a bʌ, aq'ueñon c we'el yic'ot chuqui mic jap, jinto mi cujtel, mi caj a cha'len we'el uch'el ja'el”

⁹ ¿Mu' ba a su'ben x'e'tel a cha'añ wocolix i yʌlʌ, che' mi' yujtel i mel chuqui tsa' su'be? Mi cʌl, ma'añic.

¹⁰ Che' ja'el jatetla, che' bʌ tsa'ix la' mele pejtelel chuqui tsa' bʌ su'bentiyetla ti Dios, su'bula: “X'e'telon jach lojon, mach ca'bʌlic j c'ʌjñibal lojon; tsa' jach c mele lojon jiñi am bʌ tic wenta lojon”, che'en Jesús.

Tsa' sʌc-esʌntiyob lujuntiquil año' bʌ leco bʌ i tsoy

¹¹ Che' woli' majlel Jesús ti Jerusalén, tsa' ñumi majlel ti lum Samaria yic'ot ti Galilea.

¹² Che' bʌ tsa' ochi ti jump'ejl xchumtʌl, awilan tsa' tili i tajob Jesús lujuntiquil wiñicob año' bʌ leco bʌ i tsoy; ñajt to tsa' wa'leyob.

¹³ C'am tsi' cha'leyob t'añ, tsi' yʌlʌyob: —Jesús, Maestro, p'untañon lojon.

¹⁴ Jesús tsi' q'ueleyob, tsi' su'beyob: —Cucula, pʌsʌ la' bʌ ba'añ motomajob. Che' woliyob ti majlel tsa' c'oq'uesʌntiyob.

¹⁵ Che' jiñi juntiquil che' bʌ tsi' q'uele lajmeñix i tsoy tsa' cha' tili ba'añ Jesús, c'am tsi' su'bu i ñuclel Dios,

¹⁶ tsi' pʌcchoco bʌ ti yoc Jesús, tsi' su'be wocolix i yʌlʌ. Ili wiñic ch'oyol ti Samaria.

¹⁷ Jesús tsi' c'ajtibe: —¿Mach ba lujuntiquilic tsa' bʌ c'oq'uesʌntiyob? Ixcu jiñi bolontiquil, ¿baqui añob?

¹⁸ Ma'añic majqui tsa' cha' tili i su'b i ñuclel Dios, cojach ili juntiquil ch'oyol bʌ ti yam bʌ lum.

¹⁹ Jesús tsi' su'be: —Ch'ojyen, cucu, tsa' coltʌntiyet cha'añ tsa' ñopoyon, —che'en.

Che' mi' tilel i yumʌntel Dios

²⁰ Jiñi fariseojob tsi' c'ajtibeyob Jesús baqui ora mi caj i tilel i yumʌntel Dios. Jesús tsi' jac'beyob, tsi' yʌlʌ: —Mach tsiquilic mi caj i tilel i yumʌntel Dios.

²¹ Ma'añic mi caj i yʌlob: “Q'uele ya'añ ya'i”, mi “q'uele wʌ'an ilayi”, come i yumʌntel Dios, wʌ'ix añ ti la' tojlel, —che'en Jesús.

²² Tsi' su'be xcʌnt'añob i cha'añ: —Tal to i yorajlel che' la' wom la' q'uel i q'uiñilel i Yalobil Wiñic, pero ma'añic mi caj la' q'uel.

²³ Wiñicob mi caj i su'beñetla: “Q'uele wʌ'an ilayi, q'uele ya'añ ya'i”, mach mi la' majlel, mach la' tsajcañob.

²⁴ Come che' bajche' mi' tsictiyel i xu'il chajc c'ʌlʌl ti junwejl panchan c'ʌlʌl ti yam bʌ junwejl, che' ja'el mi' caj ti tsictiyel i Yalobil Wiñic che' ti' q'uiñilel.

²⁵ Pero wersa mi' ñaxan u'bin ca'bʌl wocol, yic'ot wersa mi' ts'a'lentel cha'añ wiñicob x'ixicob año' bʌ ti pañimil wʌle.

²⁶ Che' bajche' tsa' ujti ti' yorajlel Noé, che' ja'el mi caj i yujtel ti' yorajlel i Yalobil Wiñic.

²⁷ Tsi' cha'leyob we'el, tsi' cha'leyob uch'el, tsi' cha'leyob ñujpuñijel, tsi' sijiyob i yalobilob c'ʌlʌl ti jiñi q'uiñ che' bʌ tsa' ochi Noé ti barco; tsa' tili but'ja', tsi' laj jisayob.

²⁸ Che' bajche' tsa' ujti ti' yorajlel Lot, tsi' cha'leyob we'el, uch'el, tsi' cha'leyob mʌñoñel, tsi' cha'leyob choñoñel, tsi' cha'leyob pac', tsi' wa'chocoyob i yotot;

²⁹ ti jiñi jach bʌ q'uiñ che' bʌ tsa' loq'ui Lot ti Sodoma, tsa' loq'ui tilel c'ajc yic'ot azufre ti panchan. Tsi' laj jisayob.

³⁰ Che'ʌch ja'el mi' caj ti ujtel ti jiñi q'uiñ che' mi' tsictiyel i Yalobil Wiñic.

³¹ Ti jiñi jach bʌ q'uiñ, jiñi am bʌ ti' jol otot mach ju'bic cha'añ mi' loc' i chu'bʌañ am bʌ ti' mal otot. Che' ja'el jiñi am bʌ ti cholel mach i chʌn ña'tan sujtel.

³² Ña'tanla i yijñam Lot.

³³ Majqui jach mi' ñop i bajñel cʌntan i cuxtʌlel mi caj i sʌt; majqui jach mi' yʌc' i cuxtʌlel cha'añon mi caj i coltʌntel.

³⁴ Mic su'beñetla, ti jim bʌ ac'ʌlel cha'tiquil mi caj i wʌyelob ti jump'ejl wʌyibʌl, juntiquil mi caj i pʌjyel majlel, yam bʌ mi caj i cʌytʌl.

³⁵ Temel mi' cajelob ti juch'bal cha'tiquil x'ixicob, juntiquil mi caj i pʌjyel majlel, yam bʌ mi caj i cʌytʌl.

³⁶ [Cha'tiquil wiñicob mi caj i yajñelob ti cholel, juntiquil mi caj i pʌjyel majlel, yam bʌ mi caj i cʌytʌl.]

³⁷ Jiñi xcʌnt'añob tsi' c'ajtibeyob Jesús: —¿Baqui mi caj i yujtel, c Yum? —Che'en. Jesús tsi' su'beyob: —Baqui jach añ i bʌc'tal chʌmeñ bʌ ya' mi caj i tempañob i bʌ xta'jol.