Lucas 15 - Jiñi Tsiji' bʌ Wen T'añ cha'añ Estudio

Lajiya cha'añ sajtem bʌ tʌñʌme'

¹ Tsa' cajiyob ti tilel pejtelel xch'ʌm tojoñelob yic'ot xmulilob ba'añ Jesús cha'añ mi yu'bibeñob i t'añ.

² Jiñi fariseojob yic'ot xts'ijbayajob tsa' cajiyob ti wulwul t'añ, tsi' yʌlʌyob: —Jesús mi' ch'ʌm ti' wenta xmulilob, mi' c'ux waj yic'otob.

³ Jiñi cha'añ Jesús, tsi' su'beyob ili t'añ ti lajiya:

⁴ ¿Am ba juntiquil wiñic ti la' tojlel am bʌ jo'c'al (100) i tʌñʌme', mi tsa' sajti juncojt, mach ba muq'uic i cʌy bolonlujuncojt i jo'c'al (99) ti jochol bʌ lum cha'añ mi' majlel i sajcan jiñi sajtem bʌ jinto mi' taj?

⁵ Che' bʌ tsa'ix i taja, tijicña i pusic'al mi' yʌc' ti' quejlab.

⁶ Che' mi' c'otel ti' yotot, mi' pʌy tilel i cʌñʌyo' bʌ yic'ot i pi'ʌlob ti chumtʌl, mi' su'beñob: “Yom tijicñayetla quic'ot come tsa' c taja c tʌñʌme' tsa' bʌ cʌn sajti”, che'en.

⁷ Mic su'beñetla, ñumen tijicñayob i pusic'al mi' yu'biñob jiñi año' bʌ ti panchan che' mi' cʌy i mul juntiquil xmulil, pero ts'ita' jach mi' yu'biñob i tijicñʌyel cha'añ bolonlujuntiquil i jo'c'al tojo' bʌ mach bʌ añobic i mul.

Lajiya cha'añ sajtem bʌ taq'uiñ

⁸ Mi añ x'ixic am bʌ i cha'añ lujump'ejl dracma mi tsi' sʌtʌ jump'ejl, ¿Mach ba añic mi' tsuc' c'ajc, mi' misun yotot, cha'añ mi' wen sʌclan jinto mi' taj?

⁹ Che' bʌ tsa'ix i taja mi' pʌy tilel i cʌñʌyo' bʌ yic'ot i pi'ʌlob ti chumtʌl. Mi' su'beñob: “Yom tem tijicñayetla quic'ot, come tsa' c taja jiñi taq'uiñ tsa' bʌ j cʌn sʌtʌ”, che'en.

¹⁰ Che' ja'el mic su'beñetla, tijicñayob i yángelob Dios cha'añ juntiquil xmulil mu' bʌ i cʌy i mul.

Lajiya cha'añ sajtem bʌ ch'itoñ

¹¹ Tsi' yʌlʌ ja'el: Juntiquil wiñic añ cha'tiquil i yalobil.

¹² Jiñi ijts'iñʌl bʌ tsi' su'be i tat: “C tat, aq'ueñon a chu'bʌañ che' bajche' c'amel yom mic ch'ʌm”. I tat tsi' t'oxbeyob i chu'bʌañ.

¹³ Che' ñumeñix cha'p'ejl uxp'ejl q'uiñ, jiñi ijts'iñʌl bʌ i yalobil tsi' ch'ʌmʌ pejtelel i chu'bʌañ; tsa' majli ti ñajt bʌ lum, ya'i tsi' to'ol jisa pejtelel i chu'bʌañ, tsi' to'ol ñusa q'uiñ ti mulil.

¹⁴ Che' bʌ tsa'ix i to'ol laj jisa i taq'uiñ, tsa' tejchi ca'bʌl wi'ñal ti jiñi lum, tsa' caji i yu'bin wi'ñal.

¹⁵ Che' jiñi tsa' majli ti e'tel ba'añ juntiquil wiñic ti jiñi lum, ba' tsa' chojqui majlel ti jamil cha'añ mi' buc'san chitam.

¹⁶ Jiñi ch'itoñ yom i c'uxben i buc'bal chitam, come ma'añic majqui tsi' yʌq'ue i bʌl i ñʌc'.

¹⁷ Che' bʌ tsa' caji i ña'tan pañimil tsi' yʌlʌ: “Añ x'e'telob ya' ti' yotot c tat añob ca'bʌl i waj; pero joñon ilayi woli c chʌmel ti wi'ñal.

¹⁸ Mi caj c ch'ojyel, muq'uix c majlel ba'añ c tat. Mi caj c su'ben: C tat, tsa'ix c cha'le mulil ti' contra jiñi am bʌ ti panchan yic'ot ti a tojlel.

¹⁹ Mach uts'aticon cha'añ mic chʌn pejcʌntel ti a walobil, otsañon jax ti x'e'tel a cha'añ”.

²⁰ Tsa' ch'ojyi, tsa' majli ba'añ i tat. Che' ñajt to i tilel, i tat tsi' q'uele, tsi' p'unta, ti ajñel tsa' majli i taj i yalobil, tsi' meq'ue, tsi' ts'ujts'u.

²¹ I yalobil tsi' su'be: “C tat, tsa'ix c cha'le mulil ti' contra jiñi am bʌ ti panchan yic'ot ti a tojlel; mach uts'aticon cha'añ mic chʌn pejcʌntel ti a walobil”, che'en.

²² I tat tsi' su'be x'e'telob i cha'añ: “Ch'ʌmʌla tilel jiñi ñumen uts'at bʌ bujcʌl, xojbenla, otsʌbenla mʌtc'ʌbʌl ti' c'ʌb yic'ot xʌñʌbʌl ti yoc.

²³ Pʌyʌla tilel jiñi jujp'em bʌ alʌ tat wacax, tsʌnsanla, la' laj c'ux, la' lac cha'len q'uiñijel.

²⁴ Come ili calobil chʌmeñ yu'bil ti yam bʌ ora, pero wʌle tsa'ix cha' cuxtʌyi; tsa' sajti pero tsa'ix cha' tajle”. Jiñi cha'añ tsa' caji i yu'biñob i tijicñʌyel i pusic'al.

²⁵ Jiñi ascuñʌl bʌ i yalobil ya'añ ti jamil, che' bʌ wolix i tilel ti' yotot che' lʌc'ʌlix añ, tsi' yu'bi música yic'ot son.

²⁶ Tsi' pʌyʌ juntiquil x'e'tel, tsi' c'ajtibe chuqui woli ti ujtel;

²⁷ jiñi x'e'tel tsi' su'be: “Tsa'ix juli a wijts'in. Jiñi a tat tsa'ix i tsʌnsa jujp'em bʌ alʌ tat wacax come c'oc' tsi' cha' taja a wijts'in”, che'en.

²⁸ Jiñi cha'añ, jiñi ascuñʌl bʌ tsa' mich'a mach yomic ochel ti mal; jiñi cha'añ tsa' loq'ui tilel i tat, tsi' su'be ti wocol t'añ cha'añ mi' yochel.

²⁹ Pero jiñi ascuñʌl bʌ tsi' su'be i tat: “Awilan ca'bʌl ja'b tsa' c melbeyet a we'tel, ma'añic ba' ora tsa' c ñusʌbeyet a t'añ, ma'añic ba' ora tsa' wʌq'ueyon mi juncojtic alʌ chivo cha'añ mic cha'len q'uiñijel quic'ot c pi'ʌlob.

³⁰ Pero che' bʌ tsa' tili ili a walobil tsa' bʌ i jisʌbeyet a chu'bʌañ yic'ot i yixicob, tsa' tsʌnsʌbe jiñi jujp'em bʌ alʌ tat wacax”, che'en.

³¹ I tat tsi' su'be: “Calobil, ti pejtelel q'uiñ wʌ' añet quic'ot yic'ot pejtelel c chu'bʌañ a cha'añʌch.

³² Pero wersa yom mi lac cha'len q'uiñijel yic'ot yom mi la cu'bin i tijicñʌyel lac pusic'al, come ili a wijts'in chʌmeñ yu'bil ti yam bʌ ora, pero wʌle tsa'ix cha' cuxtʌyi, tsa' cʌn sajti pero tsa'ix cha' tajle”.