Lucas 13 - Jiñi Tsiji' bʌ Wen T'añ cha'añ Estudio

Mi ma'añic mi la' cʌy la' mul mi caj la' jilel

¹ Ti jim bʌ ora ya'añob cha'tiquil uxtiquil tsa' bʌ i su'beyob Jesús chuqui tsi' mele Pilato che' bʌ tsi' tsʌnsa galileojob. Tsi' xʌbeyob i ch'ich'el galileojob yic'ot i ch'ich'el jiñi tsʌnsʌbil bʌ i majtañ Dios tsa' bʌ i yʌq'ueyob.

² Jesús tsi' c'ajtibeyob, tsi' yʌlʌ: —¿Mu' ba la' lon ña'tan cha'añ ili galileojob tsa' bʌ tsʌnsʌntiyob ñumen ca'bʌlob i mul bajche' i mul pejtelel i pi'ʌlob?

³ Mic su'beñetla ma'añic: Mi ma'añic mi la' cʌy la' mul che'ʌch mi caj la' jilel ja'el ti la' pejtelel.

⁴ Ixcu jiñi waxʌclujuntiquilob (18) tsa' bʌ chʌmiyob che' bʌ tsa' tejñiyob ti chañ bʌ ts'ajc che' bʌ tsa' yajli ya' ti Siloé. ¿Mu' ba la' lon ña'tan ñumen ca'bʌlob i mul bajche' pejtelel chumulo' bʌ ti Jerusalén?

⁵ Mic su'beñetla ma'añic: Mi ma'añic mi la' cʌy la' mul che'ʌch mi caj la' jilel ja'el ti la' pejtelel, —che'en Jesús.

Lajiya cha'añ higuera te' mach bʌ añic mi yʌc' i wut

⁶ Tsi' yʌlʌ ja'el ili lajiya: Juntiquil wiñic añ i cha'añ higuera te' pʌc'bil ti' ts'usubil, tsa' tili i q'uel mi añix i wut, ma'añic tsi' taja.

⁷ Tsi' su'be xcʌnta ts'usubil: “Uxp'ejlix ja'b woli c tilel cha'añ mij q'uelben mi añix i wut jiñi higuera te', ma'añic tsa' c tajbe, seq'uex. ¿Chuqui to i ye'tel mi' chʌn mʌctañ lum?” Che'en.

⁸ Jiñi xcʌnta ts'usubil tsi' yʌlʌ: “C yum, la' to ajñic yam bʌ ja'b jinto mic joy picben i ye'bal, mi caj cotsʌben i ta' alʌc'ʌl.

⁹ Mi tsi' yʌc'ʌ i wut, uts'at, mi ma'añic mi' yʌc' i wut, ti wi'il ma' sec'”, che'en Jesús.

Jesús tsi' c'oq'uesa x'ixic ti' q'uiñilel c'aj-o

¹⁰ Ti' q'uiñilel c'aj-o tsa' caji ti cʌntesa Jesús ti sinagoga.

¹¹ Ya'añ x'ixic am bʌ i c'am-ʌjel waxʌclujump'ejlix (18) ja'b, c'uchucña tsi' cha'le xʌmbal, ma'añic tsa' mejli i toj-esan i pat cha'añ i xi'bʌjlel.

¹² Che' bʌ tsi' q'uele Jesús, tsi' pʌyʌ tilel, tsi' su'be: —X'ixic c'oq'uesʌbiletix ti a c'am-ʌjel, —che'en.

¹³ Tsi' yʌc'ʌ i c'ʌb ti jiñi x'ixic, ti ora tsa' toj-esʌbenti i pat. Tsi' tsictesa i ñuclel Dios.

¹⁴ Pero i yum sinagoga tsa' mich'a, come Jesús tsi' cha'le c'oq'uesaya ti' q'uiñilel c'aj-o. Tsi' su'beyob wiñicob x'ixicob: —Wʌcp'ejl q'uiñ mi lac cha'len e'tel, ti jim bʌ ora yom mi la' tilel cha'añ mi la' lajmesʌntel, mach ti' q'uiñilelic c'aj-o, —che'en.

¹⁵ Jiñi cha'añ lac Yum tsi' su'be: —Cha'chajp jax la' pusic'al. ¿Mach ba muq'uic a tic jiñi tat wacax yic'ot a burro ba' cʌchʌl ti' buc'ujib che' ti' q'uiñilel c'aj-o cha'añ ma' pʌy majlel ba' mi' jap ja'?

¹⁶ Ixcu ili x'ixic i yalobil Abraham ¿mach ba yomic mi' yʌjq'uel ti colel ti' q'uiñilel c'aj-o, che' añix waxʌclujump'ejl ja'b chucbil i cha'añ Satanás? Che'en.

¹⁷ Che' bʌ tsi' su'bu ili t'añ, tsi' cha'leyob quisin pejtelel i contrajob, pero pejtelel wiñicob x'ixicob tijicñajax tsi' yu'biyob cha'añ pejtelel jiñi ñuc tac bʌ i melbal Jesús.

Lajiya cha'añ pac' mostaza

¹⁸ Jesús tsi' yʌlʌ: —¿Bajche' mi' mejlel lac lajin i yumʌntel Dios? ¿Chuqui yic'ot mi mejlel c lajin?

¹⁹ Lajalʌch bajche' i bʌc' mostaza tsa' bʌ i ch'ʌmʌ wiñic, tsi' wejch'u ti lum, tsa' coli, tsa' ochi ti colem te'; jiñi te'lemut tsi' meleyob i c'u' tac ti' c'ʌb jiñi te', —che'en Jesús.

Lajiya cha'añ levadura

²⁰ Tsi' cha' alʌ: —¿Chuqui yic'ot mi mejlel c lajin i yumʌntel Dios?

²¹ Lajalʌch bajche' levadura tsa' bʌ i ch'ʌmʌ juntiquil x'ixic, tsi' yotsa ti uxp'is harina, jinto tsi' laj paj-esa, —che'en Jesús.

Ch'och'oc bʌ i ti' otot

²² Tsa' ñumi majlel Jesús ti pejtelel tejclum yic'ot ti xchumtʌl tac. Tsi' cha'le cʌntesa che' woli' majlel ti Jerusalén.

²³ Añ juntiquil tsa' bʌ i c'ajti: —C Yum, ¿ts'ita' jach ba mu' bʌ caj i coltʌntelob? Jesús tsi' su'beyob:

²⁴ —Cha'lenla wersa cha'añ mi la' wochel ti ch'och'oc bʌ i ti'. Come mic su'beñetla ca'bʌlob mi caj i ñopob ochel pero ma'añic mi caj i mejlelob.

²⁵ Ti wi'il i yum otot mi caj i ch'ojyel i ñup'ben i ti' otot, che' añetla ti jumpat mi caj la' pejcan i yum ya' ti ti' otot. Mi caj la' wʌl: “C Yum, c Yum, jambeñon lojon”, i yum otot mi caj i su'beñetla: “Mach cujilic baqui ch'oyoletla”, che'en.

²⁶ Che' jiñi mi caj la' wʌl: “Tsa' c cha'le lojon we'el uch'el ti a tojlel. Jatet tsa' cha'le cʌntesa ti yojlil c tejclum tac lojon”.

²⁷ Pero i yum otot mi caj i su'beñetla: “Mic su'beñetla, mach cujilic baqui ch'oyoletla; loq'uenla tic tojlel pejteletla mu' bʌ la' cha'len jontolil”, che'en.

²⁸ Che' bʌ chocbiletixla mi caj la' cha'len ca'bʌl uq'uel yic'ot quech'ecña bʌ i bʌquel la' wej, come mi caj la' q'uel Abraham yic'ot Isaac yic'ot Jacob yic'ot pejtelel x'alt'añob ti' yumʌntel Dios.

²⁹ Mi caj i tilelob ca'bʌl ch'oyolo' bʌ ti' pasibal q'uiñ yic'ot ti' bʌjlibal q'uiñ yic'ot ti norte yic'ot ti sur, mi caj i buchtʌlob ti' t'ejl mesa ya' ti' yumʌntel Dios.

³⁰ Awilan, añ wi'ilobix bʌ mu' bʌ caj i c'axelob majlel ti ñaxan; añ ñaxaño' bʌ mu' bʌ caj i cʌytʌlob ti wi'ipat, —che'en Jesús.

Jesús tsi' yuc'ta Jerusalén

³¹ Ti jiñi jach bʌ q'uiñ tsa' tiliyob cha'tiquil uxtiquil fariseojob, tsi' su'beyob Jesús: —Cucu, loq'uen wʌ'i come Herodes yom i tsʌnsañet.

³² Jesús tsi' su'beyob: —Cucula, su'benla jiñi wax: “Awilan, mic choc loq'uel xi'bajob yic'ot mic cha'len c'oq'uesaya wʌle yic'ot ijc'ʌl, ti yuxp'ejlel q'uiñ mi cujtesan que'tel”.

³³ Wersa mic cha'len xʌmbal wʌle, yic'ot ijc'ʌl, yic'ot cha'bi come mach mejlic ti tsʌnsʌntel x'alt'añ ti yam bʌ tejclum, ya' jach ti Jerusalén.

³⁴ Jerusalén, Jerusalén, mu' bʌ a tsʌnsan x'alt'añob, mi la' jul ti xajlel jiñi chocbilo' bʌ tilel ba'añetla. Añix ca'bʌl tsa' c ñopo c tempan la' walobilob che' bajche' mi' luts' i yal jiñi xña'a mut, pero mach la' womic.

³⁵ Awilan, jocholix mi caj i cʌlel la' wotot, mic su'beñetla ma'añic mi caj la' chʌn q'uelon jinto mi' tilel i yorajlel che' mi caj la' wʌl: “La' sujbic i ñuclel jiñi woli bʌ i tilel ti' c'aba' lac Yum”, —che'en Jesús. Jiñi lujuntiquil xch'ocob Jiñi x'ixic tsa' bʌ i sʌtʌ jump'ejl i taq'uiñ Jiñi me'ba' x'ixic yic'ot jiñi xmeloñel Jiñi me'ba' x'ixic am bʌ ti Sarepta Jiñi x'ixic bʌ yumʌl ti Sabá