Lucas 10 - Jiñi Tsiji' bʌ Wen T'añ cha'añ Estudio

I ye'tel lujuntiquil i chʌnc'al

¹ Che' ujtemix iliyi, lac Yum tsi' yʌq'ueyob i ye'tel yam bʌ lajchʌntiquil i chʌnc'al (72). Tsi' chocoyob majlel ti cha'cha'tiquil cha'añ mi' majlelob ti ñaxan ti pejtelel tejclum yic'ot xchumtʌl ba' mi caj i majlel Jesús.

² Tsi' su'beyob: “Isujm, ca'bʌl jiñi c'ajbal pero ma'añic jaytiquil x'e'telob, jiñi cha'añ c'ajtibenla i yum c'ajbal cha'añ mi' choc majlel x'e'telob ti c'ajbal.

³ Cucula; mic choquetla majlel che' bajche' tʌñʌme' joyol bʌ ti bʌte'el ts'i'.

⁴ Mach mi la' ch'ʌm majlel i yajñib taq'uiñ, mi mochila, mi xʌñʌbʌl, mach mi la' wʌq'ueñob cortesía jiñi xñumelob ti bij.

⁵ Baqui jach mi la' wochel ti otot ñaxan su'benla: La' ñʌch'lec la' pusic'al añet bʌ la' ti ili otot”.

⁶ Mi ya'añ juntiquil yom bʌ i taj i ñʌch'tʌlel i pusic'al, aq'uenla i yutslel la' t'añ cha'añ mi' taj i ñʌch'tʌlel i pusic'al, mi mach yomic, ma'añic mi caj i taj.

⁷ Ya' yom mi la' jijlel ti jiñi jach bʌ otot ba' pʌybiletla; c'uxula, japʌla chuqui mi la' wʌq'uentel; come uts'at mi' yʌq'ueñtelob i tojol x'e'telob. Mach mi la' c'axel ti jujump'ejl otot.

⁸ Che' mi la' wochel ti colem tejclum ba' uts'at mi' pʌyetla ochel, c'uxula chuqui jach mi' yʌq'ueñetla.

⁹ Mi añ xc'am-ʌjelob ya' ba' mi la' wochel, c'oq'uesanla, su'benla: “Tsa'ix juli i yumʌntel Dios wʌ' ba'añetla”.

¹⁰ Che' mi la' wochel ti colem tejclum ba' ma'añic mi' pʌyetla ochel, ñumenla ti calle tac, su'bula jiñi t'añ:

¹¹ “Jiñi ts'u'bejn tsa' bʌ i toybeyon lojon coc ti la' tejclum mic tijcan lojon loq'uel cha'añ i yejtal la' contrajintel, pero ña'tanla tsa'ix juli i yumʌntel Dios ti la tojlel”.

¹² Mic su'beñetla: Ñumen wocol mi caj i yu'biñob ti jiñi tejclum che' bajche' tsi' yu'biyob jiñi año' bʌ ti Sodoma.

Wocol tac bʌ tal bʌ ti' tojlelob tejclum

¹³ Mi caj la' taj wocol añet bʌ la ti Corazín, mi caj la' taj wocol añet bʌ la ti Betsaida, come tsa'ic mejli ñuc tac bʌ e'tel ti Tiro yic'ot ti Sidón che' bajche' tsa' mejli ba'añetla, tsi' cʌyʌyob i mul, tsa' buchleyob ti tʌñʌl c'ajc, tsi' xojoyob tsucul bʌ i pislelob.

¹⁴ Jiñi cha'añ, ñumen wocol mi caj i yu'biñob ti' q'uiñilel tojmulil jiñi chumulo' bʌ ti jiñi tejclum, bajche' jiñi ch'oyolo' bʌ ti Tiro yic'ot ti Sidón.

¹⁵ Ixcu jatet Capernaúm, mu' bʌ a q'uel a bʌ ti ñuc che' bajche' i ñuclel panchan, mi caj a chojquel ju'bel ti c'ajc.

¹⁶ Jiñi mu' bʌ i yu'biñetla la' t'añ mi' yu'bibeñon c t'añ, jiñi mu' bʌ i ts'a'leñetla, mi' ts'a'leñon, jiñi mu' bʌ i ts'a'leñon mi' ts'a'len jiñi tsa' bʌ i chocoyon tilel.

Jiñi lajchʌntiquil i chʌnc'al tsa' cha' sujtiyob ba'añ Jesús

¹⁷ Tsa' cha' tiliyob jiñi lajchʌntiquil i chʌnc'al, ti tijicñʌyelob, tsi' su'beyob: —C Yum, jiñi xi'bajob mi' loq'uelob che' mic su'ben lojon loq'uel ti a c'aba'.

¹⁸ Jesús tsi' su'beyob: —Tsa' j q'uele Satanás woli yajlel ju'bel tilel ti panchan che' bajche' i xu'il chajc.

¹⁹ La' wilan, mi cʌq'ueñetla la' p'ʌtʌlel cha'añ mi la' t'uchtan lucum yic'ot siñan yic'ot pejtelel i p'ʌtʌlel la' contra, ma'añic chuqui mi caj i tumbeñetla.

²⁰ Mach yomic tijicñayetla cha'añ woli' loq'uelob xi'bajob cha'añ ti la' t'añ, pero yom tijicñayetla cha'añ ts'ijbubil la' c'aba' ti panchan, —che'en Jesús.

Jesús tsi' yu'bi ca'bʌl i tijicñʌyel

²¹ Ti jim bʌ ora tijicña i pusic'al Jesús cha'añ jiñi Espíritu, tsi' yʌlʌ: “Mic su'beñet a ñuclel, c Tat, i Yumet panchan yic'ot pañimil, come tsa' mucbeyob a t'añ jiñi año' bʌ ca'bʌl i ña'tʌbal yic'ot jiñi p'ip'o' bʌ i pusic'al, pero tsa' wʌq'ueyob i ch'ʌmbeñob isujm alʌlob. Uts'atʌch, c Tat, come che'ʌch yom a pusic'al.

²² Pejtelel chuqui tac añ, aq'uebilon i cha'añ c Tat, ma'añic majqui mi' cʌñon cojach c Tat, che' ja'el, ma'añic majqui mi' cʌn c Tat cojach joñon come i Yalobilon, mi' cʌñob c Tat ja'el majqui jach mi cʌq'uen i cʌn”.

²³ Tsa' caji i su'ben xcʌnt'añob che' añobix ti bajñelil: —Tijicñayob jiñi mu' bʌ i q'uelob chuqui tac mi la' q'uel.

²⁴ Come mic su'beñetla, ca'bʌl x'alt'añob yic'ot reyob tsi' ña'tayob i q'uel jiñi woli bʌ la' q'uel pero ma'añic tsi' q'ueleyob, yomob i yu'biñob jiñi woli bʌ la' wu'bin pero ma'añic tsi' yu'biyob, che'en.

Jiñi wen bʌ samaritano

²⁵ Awilan, tsa' wa'le juntiquil xcʌntesa mandar cha'añ mi' yilʌben i pusic'al Jesús. Tsa' caji i c'ajtiben: —Maestro, ¿chuqui yom mic mel cha'añ mic taj cuxtʌlel mach bʌ añic mi' jilel? —Che'en.

²⁶ Jesús tsi' su'be: —¿Chuqui ts'ijbubil ti mandar? ¿Bajche' ma' ch'ʌmben isujm? —Che'en.

²⁷ Jiñi xcʌntesa mandar tsi' jac'ʌ: —“C'uxbin a Yum Dios ti pejtelel a pusic'al, ti pejtelel a ch'ujlel, ti pejtelel a p'ʌtʌlel yic'ot ti pejtelel a ña'tʌbal; che' ja'el, c'uxbin a pi'ʌlob che' bajche' ma' bajñel c'uxbin a bʌ”, —che'en.

²⁸ Jesús tsi' su'be: —Weñʌch bajche' tsa' jac'ʌ, che'ʌch yom ma' mel, che' jiñi, mi caj a taj a cuxtʌlel, —che'en.

²⁹ Jiñi wiñic yom i q'uel i bʌ ti toj, jiñi cha'añ tsi' su'be Jesús: —¿Majqui c pi'ʌlob? —Che'en.

³⁰ Jesús tsi' jac'ʌ: —Juntiquil wiñic tsa' loq'ui ti Jerusalén cha'añ mi' majlel ti Jericó, tsi' chucuyob xujch'ob, tsi' laj chilbeyob i chu'bʌañ yic'ot i pislel, tsi' lowoyob, tsa' majliyob, ts'ita' jax yom chʌmel che' bʌ tsi' cʌyʌyob.

³¹ Tsa' tili juntiquil motomaj ya' ti jiñi bij. Che' bʌ tsi' q'uele jiñi lojwem bʌ, tsa' ñumi ti junwejl i ti' bij.

³² Che'ʌch tsi' mele juntiquil leví ja'el che' bʌ tsa' tili ba'añ, tsa' jach i q'uele, tsa' ñumi ti junwejl i ti' bij.

³³ Pero juntiquil samaritano, che' bʌ woli ti xʌmbal tilel ti jiñi bij, tsa' c'oti ba'añ jiñi lojwem bʌ, che' bʌ tsi' q'uele, tsi' p'unta.

³⁴ Tsi' lʌc'tesa i bʌ ba'añ, tsi' pixbe i lojwel, tsi' bombe olivo aceite yic'ot vino, tsi' c'ʌchchoco ti' c'ʌchlib, tsi' pʌyʌ majlel ti' yotlel wʌyibʌl ba' tsi' cʌnta.

³⁵ Ti yijc'ʌlal che' yomix majlel, tsi' loc'sa cha'p'ejl denario, tsi' yʌq'ue i yum otot, tsi' su'be: “Cʌntʌbeñon jiñi wiñic, mi ñumen ma' jisan taq'uiñ mu' to c tojbeñet che' mic cha' tilel”, che'en.

³⁶ ¿Bajche' ma' wʌl? ¿Majqui ti yuxticlelob ili wiñicob tsi' pʌsʌ i bʌ ti' pi'ʌl jiñi tsa' bʌ chujqui cha'añ xujch'ob? Che'en Jesús.

³⁷ Jiñi wiñic tsi' yʌlʌ: —Jiñi tsa' bʌ i p'unta, —che'en. Che' jiñi, Jesús tsi' su'be: —Cucu, che'ʌch yom ma' mel ja'el.

Jesús tsi' jula'ta Marta yic'ot María

³⁸ Che' woli' majlel ti bij, Jesús tsa' c'oti ti xchumtʌl. Juntiquil x'ixic i c'aba' Marta tsi' pʌyʌ ochel ti' yotot.

³⁹ Añ i yijts'in jiñi Marta, i c'aba' María. María tsa' buchle ti' tojel Jesús cha'añ mi' ñʌch'tʌben i t'añ.

⁴⁰ Marta tsa' caji i mel i pusic'al, come ca'bʌl i ye'tel, tsa' tili ba'añ Jesús, tsi' yʌlʌ: —C Yum, ¿mach ba añic ma' q'uel bajche' mi' cʌyon quijts'in cha'añ mic bajñel cha'len e'tel? Su'ben cha'añ mi' coltañon, —che'en.

⁴¹ Pero Jesús tsi' su'be: —Marta, Marta, ca'bʌl ma' mel a pusic'al che' ja'el ma'añix ma' c'aj a wo cha'añ a we'tel.

⁴² Pero junchajp jach yom, María tsi' yajca jiñi wen bʌ, ma'añic mi caj i chilbentel, che'en.