Juan 8 - Jiñi Tsiji' bʌ Wen T'añ cha'añ Estudio

¹ pero Jesús tsa' majli ti olivo wits.

² Ti sʌc'ajel tsa' cha' majli ti Templo, pejtelel wiñicob x'ixicob tsa' tiliyob ba'añ, tsa' buchle Jesús, tsa' caji i cʌntesañob.

³ Jiñi xts'ijbayajob yic'ot fariseojob tsi' pʌyʌyob tilel juntiquil x'ixic tsa' bʌ tajle ti ts'i'lel, tsi' yʌc'ʌyob jiñi x'ixic ti ojlil ba'añob,

⁴ tsi' su'beyob: —Maestro, jiñi x'ixic tsa' tajle che' woli' mel i ts'i'lel.

⁵ Moisés mi' su'beyonla ti mandar cha'añ mi lac jul ti xajlel juntiquil am bʌ i mul che' bajche' ili x'ixic. Ixcu jatet ¿bajche' a wʌlʌ?

⁶ Che'ʌch tsi' yʌlʌyob cha'añ mi' q'uelob bajche' mi caj i jac' Jesús cha'añ mi' tajbeñob i mul, che' jiñi Jesús tsa' wutsle ti lum, tsa' caji i ts'ijban lum ti yal i c'ʌb.

⁷ Che' bʌ tsi' chʌn c'ajtibeyob Jesús jiñi wiñicob, tsa' wa'le Jesús, tsi' su'beyob: —Jiñi mach bʌ añic i mul, la' i ñaxan jul ti xajlel, —che'en.

⁸ Tsa' cha' wutsle Jesús, tsa' cha' caji i ts'ijban lum ti' yal i c'ʌb.

⁹ Che' bʌ tsi' yu'bibeyob i t'añ Jesús, tsi' yu'biyob i bʌ cha'añ añobʌch i mul, tsa' loq'uiyob majlel ti jujuntiquil, ñaxan jiñi ñoxobix bʌ, ti wi'il jiñi ch'itoñ wiñicob jinto tsa' laj majliyob, cojach tsa' bajñel cʌle Jesús yic'ot jiñi x'ixic tsa' bʌ wa'le ti ojlil.

¹⁰ Jesús tsa' cha' wa'le, che' bʌ tsi' q'uele i bajñel jax ya'añ jiñi x'ixic, tsi' c'ajtibe: —X'ixic, ¿baqui añob jiñi tsa' bʌ i su'buyob a mul? ¿Añ to ba majqui yom i julet cha'añ a mul? —Che'en.

¹¹ Jiñi x'ixic tsi' jac'ʌ: —C Yum, ma'añic mi juntiquilic, —che'en. Jiñi cha'añ Jesús tsi' su'be: —Joñon ja'el ma'añic mic julet cha'añ a mul, cucux; mach ma' chʌn cha'len mulil.

Jesús i sʌclel pañimil

¹² Jesús tsi' cha' su'beyob, tsi' yʌlʌ: —Joñon i sʌclelon pañimil, jiñi mu' bʌ i tsajcañon ma'añic mi' cajel ti xʌmbal ti ic'ch'ipan bʌ pañimil. Añ i cha'añ i sʌclel pañimil cha'añ i cuxtʌlel, —che'en.

¹³ Jiñi cha'añ jiñi fariseojob tsi' su'beyob: —Ti a bajñelil ma' su'b a bʌ, mach isujmic chuqui woli' a wʌl.

¹⁴ Jesús tsi' jac'beyob: —Anquese mic bajñel su'b c bʌ, isujmʌch c t'añ, come cujil baqui ch'oyolon, che' ja'el cujil baqui mic majlel; pero jatetla mach la' wujilic baqui ch'oyolon, mi baqui mic majlel.

¹⁵ Jatetla mi la' to'ol ña'tʌbeñon c pusic'al cha'añ chuqui jach mi la' q'uel, joñon ma'añic majqui mic to'ol ña'tʌben i pusic'al.

¹⁶ Che' mic ña'tʌbeñob chuqui mi' yʌl i pusic'al wiñicob x'ixicob, mij cʌñob ti isujm, come mach tic bajñelic mic ña'tʌbeñob i pusic'al, come jump'ejl jach c pusic'al quic'ot c Tat jiñi tsa' bʌ i chocoyon tilel.

¹⁷ Ts'ijbubil ti la' mandar: “Cha'añ ti t'añ cha'tiquil wiñicob isujmʌch jiñi t'añ”.

¹⁸ Joñon mic bajñel su'b c bʌ; che' ja'el c Tat tsa' bʌ i chocoyon tilel mi' yʌc'on ti cʌjñel, —che'en.

¹⁹ Tsi' c'ajtibeyob: —¿Baqui añ a Tat? —Che'en. Jesús tsi' jac'beyob: —Ma'añic mi la' cʌñon, ma'añic mi la' cʌn c Tat ja'el; tsa'ic la' cʌñʌyon, tsa' la' cʌñʌ c Tat ja'el.

²⁰ Ili t'añ tsi' yʌlʌ Jesús ya' ba' mi' yotsañob i yofrenda, tsi' cha'le cʌntesa ti Templo; ma'añic majqui tsi' chucu come maxto c'otemic i yorajlel.

Ya' ba' mic majlel mach mejliquetla ti majlel

²¹ Jesús tsi' cha' su'be fariseojob: —Joñon mic majlel, mi caj la' sʌclañon. Mi caj la' chʌmel che' añet to la ti la' mul. Ya' ba' mic majlel, jatetla mach mejliquetla ti majlel, —che'en.

²² Judíojob tsa' caji i su'beñob i bʌ: —¿Mu' ba caj i tsʌnsan i bʌ? Come mi' yʌl: “Baqui mic majlel mach mejliquetla ti majlel”.

²³ Jesús tsi' su'beyob: —Jatetla añetla ti' ye'bal, joñon añon ti chañ, i cha'añetla jiñi pañimil, joñon mach i cha'añoñic jiñi pañimil.

²⁴ Jiñi cha'añ tsa' c su'beyetla mi caj la' chʌmel che' añet to la ti la' mul, mi ma'añic mi la' ñopon, mi caj la' chʌmel che' añetla ti la' mul, —che'en Jesús.

²⁵ Jiñi cha'añ judíojob tsi' c'ajtibeyob: —¿Majquiyet? Jesús tsi' su'beyob: —Joñoñʌch jiñi tsa' bʌ c su'beyetla ti ñaxan.

²⁶ Añ ca'bʌl chuqui com c su'beñetla cha'añ mic tsictesan la' melbal, pero jiñi tsa' bʌ i chocoyon tilel isujm Diosʌch, joñon tsa' cu'bi ti' tojlel c Tat jiñʌch mu' bʌ su'beñob wiñicob x'ixicob, —che'en Jesús.

²⁷ Pero ma'añic tsi' ch'ʌmbeyob isujm mi woli i taj ti t'añ i Tat am bʌ ti panchan.

²⁸ Jiñi cha'añ Jesús tsi' su'beyob: —Che' bʌ tsa'ix la' ch'iji ti cruz i Yalobil Wiñic, che' jiñi mi caj la' ch'ʌmben isujm majquiyon, yic'ot ma'añic chuqui mic mel tic bajñelil, chuqui tac tsi' cʌntesayon c Tat, jiñi jach mic su'b.

²⁹ Come jiñi tsa' bʌ i chocoyon tilel añ quic'ot. Ma'añic tsi' cʌyʌyon c Tat tic bajñelil come ti pejtelel ora mic mel chuqui tac mi' mulan, —che'en Jesús.

³⁰ Che' bʌ tsi' su'bu jiñi t'añ ca'bʌl tsi' ñopoyob.

Isujmlel bʌ mi caj i yʌq'uetla ti colel

³¹ Jiñi cha'añ Jesús tsi' su'beyob judíojob tsa' bʌ i ñopoyob: —Mi chʌn xuc'uletla mi la' wajñel tic t'añ, mero xcʌnt'añetla c cha'añ.

³² Mi caj la' cʌn isujmlel c t'añ, isujmlel c t'añ mi caj i yʌq'uetla ti colel, che'en.

³³ Tsi' jac'beyob: —I p'olbalon lojon Abraham, ma'añic ba' ora tsa' ochiyon lojon ti mozo e'tel. ¿Chucoch ma' wʌl mi caj cʌjq'uel lojon ti colel?

³⁴ Jesús tsi' jac'beyob: —Isujm, isujm mic su'beñetla, pejtelel mu' bʌ i cha'leñob mulil, mi yochelob ti mozo cha'añ mulil.

³⁵ Jiñi wiñic am bʌ ti mozo e'tel mach ti pejtelic ora mi' yajñel ti' yotot i yum; jiñi i yalobil bʌ mi' yajñel ti pejtelel ora.

³⁶ Che' jiñi, mi tsi' yʌc'ʌyetla ti colel i Yalobil Dios, colbiletla ti isujm.

³⁷ Cujil i p'olbaletla Abraham, pero woli la' ña'tan la' tsʌnsañon come ma'añic mi' yochel c t'añ ti la' pusic'al.

³⁸ Joñon mic su'b chuqui tac tsa' j q'uele che' añon quic'ot c Tat; pero jatetla mi la' mel chuqui tac tsa' la' wu'bi ti' tojlel la' tat, che'en.

Jatetla i cha'añetla xi'ba

³⁹ Jiñi judíojob tsi' jac'beyob: —C tat lojon jiñʌch Abraham. Jesús tsi' su'beyob: —Che' i yalobileticla Abraham, mux la' tsajcʌben i melbal Abraham.

⁴⁰ Pero wʌle woli la' ña'tan la' tsʌnsañon, joñon tsa' c su'beyetla chuqui isujm che' bajche' tsi' su'beyon Dios. Mach che'ic tsi' mele Abraham.

⁴¹ Jatetla mi la' mel che' bajche' i melbal la' tat. Jiñi cha'añ judíojob tsa' caji i su'beñob: —Joñon lojon mach tsa'ic quila lojon pañimil cha'añ ti' ts'i'lel wiñicob, juntiquil jach c Tat lojon, jiñʌch Dios.

⁴² Jiñi cha'añ Jesús tsi' su'beyob: —Che' la' Tatic jiñi Dios, che' jiñi mi' la' c'uxbiñon, come ch'oyolon ti Dios i wʌ'añon la' wic'ot, ma'añic tsa' tiliyon tic bajñel pusic'al, Dios tsi' chocoyon tilel.

⁴³ ¿Chucoch ma'añic mi la' ch'ʌmben isujm c t'añ? Come mach la' womic la' wu'bin c t'añ.

⁴⁴ Jatetla, la' tatʌch xi'ba, la' wom la' mel chuqui yom la' tat. Jiñi xi'ba xtsʌnsajʌch c'ʌlʌl ti' cajibal, ma'añic mi' yajñel ti' isujmlel Dios, come ma'añic chuqui isujm ti' pusic'al xi'ba. Che' mi' cha'len lot i tilelʌch come xlotʌch, ya' ch'oyol ti xi'ba pejtelel lot.

⁴⁵ Joñon mic su'beñetla chuqui isujm, jiñi cha'añ ma'añic mi la' ñopon.

⁴⁶ ¿Majqui ti' la' tojlel mu' bʌ mejlel i su'b añ c mul? Mi' woli c su'b chuqui isujm ¿chucoch ma'añic mi la' ñopon?

⁴⁷ Jiñi i cha'año' bʌ Dios mi' yu'biben i t'añ Dios, jiñi cha'añ ma'añic mi la' wu'bin come mach i cha'añeticla Dios, che'en.

Añix Jesús ti' cajibal pañimil

⁴⁸ Jiñi judíojob tsi' jac'beyob, tsi' su'beyob: —¿Mach ba isujmic tsa' bʌ c su'bu lojon, samaritanojet yic'ot añ a xi'bʌjlel?

⁴⁹ Jesús tsi' jac'beyob: —Ma'añic c xi'bʌjlel, joñon mic su'b i ñuclel c Tat, jatetla ts'a' mi la' q'uelon.

⁵⁰ Ma'añic mic bajñel sʌclan c ñuclel, añ juntiquil mu' bʌ i yʌq'ueñon c ñuclel, jiñi mi' ña'tan ñucon.

⁵¹ Isujm, isujm mic su'beñetla, jiñi mu' bʌ i jac'beñon c t'añ, ma'añic mi' caj i chʌmel ti pejtelel ora, che'en.

⁵² Jiñi cha'añ judíojob tsi' su'beyob: —Wʌle cujilix lojon añ a xi'bʌjlel. Abraham tsa' chʌmi, che' ja'el x'alt'añob, jatet wola' wʌl mi añ majqui mi' jac'beñet a t'añ, ma'añic mi' caj i chʌmel ti pejtelel ora.

⁵³ ¿Ñumen ñuquet ba che' bajche' lac tat Abraham tsa' bʌ chʌmi, yic'ot x'alt'añob ja'el tsa' bʌ chʌmiyob? ¿Majquiyet ma' lon al?

⁵⁴ Jesús tsi' jac'beyob: —Mi tsa' c bajñel su'bu c bʌ ti ñuc, ma'añic c ñuclel; c Tat mi' tsictesan c ñuclel, jiñi mu' bʌ la lon pejcan ti la' Dios.

⁵⁵ Pero jatetla mach cʌmbilic la' cha'añ; joñon mij cʌn, mi tsa' c su'beyetla mach cʌñʌyic Dios, che'ic jiñi xloton che' bajche'etla, pero joñon cʌmbil c cha'añ, yic'ot mic jac'ben i t'añ.

⁵⁶ Abraham jiñi la' tat tsi' yu'bi i tijicñʌyel cha'añ mi' caj i q'uel j q'uiñilel ti pañimil. Abraham tsi' q'uele, tijicña tsi' yu'bi, che'en.

⁵⁷ Jiñi cha'añ judíojob tsi' su'beyob: —Maxto añic lujump'ejl i yuxc'al (50) a ja'bilel. ¿Bajche' mi mejlel a wʌl tsa'ix a q'uele Abraham?

⁵⁸ Jesús tsi' su'beyob: —Isujm, isujm mic su'beñetla, che' maxto añic Abraham añoñix, —che'en.

⁵⁹ Jiñi cha'añ tsi' lotoyob xajlel cha'añ mi' julob pero Jesús tsi' mʌcʌ i bʌ, tsa' loq'ui ti Templo, che' bʌ tsa' ñumi ti ojlil ba'añob, tsa' majli.