Juan 7 - Jiñi Tsiji' bʌ Wen T'añ cha'añ Estudio

I yijts'iñob Jesús ma'añic tsi' ñopoyob

¹ Ti wi'il Jesús tsa' caji ti xʌmbal majlel ti Galilea, tsi' cʌyʌ i xʌmbal ti Judea, come judíojob woli' ña'tañob cha'añ mi' tsʌnsañob.

² Lʌc'ʌlix i yorajlel che' mi' melob q'uiñijel jiñi judíojob cha'añ Tabernáculo.

³ I yijts'iñob Jesús tsi' su'beyob: —Loq'uen wʌ'i. Cucu ti Judea cha'añ mi' q'uelob a melbal xcʌnt'añob a cha'añ.

⁴ Ma'añic majqui mi' cha'len i ye'tel ti mucul che' yom i yʌc' i bʌ ti cʌjñel, mi wolix a mel ili e'tel, pʌsʌ a bʌ ti' wut jiñi año' bʌ ti pañimil.

⁵ Mi jiñic i yijts'iñob tsi' ñopoyob ja'el.

⁶ Jiñi cha'añ Jesús tsi' su'beyob: —Maxto c'otemic i yorajlel cha'añ mic majlel, pero jatetla mi la' mel bajche' jach la' wom.

⁷ Wiñicob x'ixicob i cha'año' bʌ pañimil mach mejlic i ts'a'leñetla; pero joñon mi' ts'a'leñoñob come mic tsictesʌbeñob jontol bʌ i melbal.

⁸ Cucula jatetla ti' jiñi q'uiñijel; joñon maxto añic mic letsel majlel come maxto i yorajlelic, —che'en Jesús.

⁹ Che' bʌ tsa' ujti i su'beñob ili t'añ, Jesús tsa' cʌle ti Galilea.

Tsa' majli Jesús ti' q'uiñilel lejchempat tac

¹⁰ Che' majlemobix i yijts'iñob Jesús ti q'uiñijel, tsa' letsi majlel Jesús ja'el ba' woli' melob q'uiñijel, mucul jach tsa' majli, ma'añic tsi' pʌsʌ i bʌ.

¹¹ I yumob judíojob tsi' sajcayob Jesús ba' woli' melob q'uiñijel, tsi' c'ajtibeyob i bʌ: —¿Baqui añ jiñi Jesús mi la' wʌl?

¹² Ca'bʌl tsi' cha'leyob wulwul t'añ wiñicob x'ixicob cha'añ Jesús, lamital tsi' yʌlʌyob: Uts'at i pusic'al, yaño' bʌ tsi' yʌlʌyob: Mach uts'atic, come woli' soc wiñicob x'ixicob.

¹³ Mucul jach tsi' tajayob ti t'añ Jesús come tsi' bʌc'ñayob judíojob.

¹⁴ Che' ojlil to jiñi q'uiñijel, tsa' letsi majlel Jesús ti Templo, tsa' caji ti cʌntesa.

¹⁵ Tsa' toj sajtiyob i pusic'al judíojob, tsi' yʌlʌyob: —¿Bajche' tsi' taja ca'bʌl i ña'tʌbal jiñi wiñic che' mach ca'bʌlic tsa' cʌntesʌnti?

¹⁶ Jesús tsi' jac'beyob: —Jiñi j cʌntesa mach c cha'añic, i cha'añʌch jiñi tsa' bʌ i chocoyon tilel.

¹⁷ Majqui jach yom i mel chuqui yom Dios, mi caj i ña'tan mi ch'oyol j cʌntesa ti Dios, o mi ch'oyol jach tic bajñel pusic'al.

¹⁸ Jiñi mu' bʌ i cha'len t'añ ch'oyol bʌ ti' bajñel pusic'al woli jach i bajñel sʌclan i ñuclel, pero jiñi mu' bʌ i tsictesan i ñuclel c Tat tsa' bʌ i chocoyon tilel, jiñʌch isujm bʌ; ma'añic chuqui mach tojic ti' pusic'al.

¹⁹ ¿Mach ba añic tsi' yʌq'ueyetla mandar Moisés? Pero ma'añic mi la' jac' mi juntiquileticla. ¿Chucoch la' wom la' tsʌnsañon?

²⁰ Jiñi wiñicob x'ixicob tsi' jac'beyob: —Añ a xi'bʌjlel, ¿majqui yom i tsʌnsañet?

²¹ Jesús tsi' jac'beyob, tsi' yʌlʌ: —Tsa'ix c mele junchajp que'tel, mi' toj sajtel la' pusic'al ti la' pejtelel.

²² Isujm, Moisés tsi' yʌq'ueyetla tsep pʌchʌlel, (mach ch'oyolic ti Moisés, ch'oyol ti la' ñojte'el), mi la' wʌc' tsep pʌchʌlel ti' q'uiñilel c'aj-o.

²³ Mi uts'at mi' tsepbentel i pʌchʌlel wiñic ti' q'uiñilel c'aj-o cha'añ ma'añic mi' ñusʌntel i mandar Moisés, ¿chucoch mi la' mich'leñon cha'añ tsa' j c'oq'uesa wiñic ti pejtelel i chʌmel ti' q'uiñilel c'aj-o?

²⁴ Mach mi la' lon ña'tan woli la' cʌmben i pusic'al la' pi'ʌlob cha'añ chuqui jach mi la' q'uel ti' tojlel, ña'tanla ti toj chuqui mi la' ña'tan, che'en.

¿Jimba ili wiñic jiñi Cristo?

²⁵ Tsi' yʌlʌyob cha'tiquil, uxtiquil año' bʌ ti' Jerusalén: —¿Mach ba jiñic ili wiñic woli bʌ i sʌclañob judíojob cha'añ mi' tsʌnsañob?

²⁶ Awilan, ya' woli ti t'añ ti' wut pejtelel wiñicob x'ixicob, pero ma'añic chuqui woli i su'beñob. ¿Tsa'ix ba i cʌñʌyob ti' isujm jiñi yumʌlob cha'añ ili wiñic jiñʌch jiñi Cristo?

²⁷ Pero joñonla la cujil baqui ch'oyol jiñi wiñic; che' mi' tilel jiñi mero Cristo ma'añic majqui yujil baqui ch'oyol.

²⁸ Jiñi cha'añ Jesús tsa' caji ti cʌntesa ti templo, c'am tsa' caji ti t'añ, tsi' yʌlʌ: —Jatetla mi la' cʌñon, yic'ot la' wujil baqui ch'oyolon, ma'añic tsa' c bajñel ña'ta c tilel, pero jiñi tsa' bʌ i chocoyon tilel jiñʌch isujm bʌ, pero jatetla ma'añic mi la' cʌn.

²⁹ Pero joñon mij cʌn come ya' ch'oyolon ya' ba'añ, jiñi tsi' chocoyon tilel, che'en.

³⁰ Jiñi cha'añ tsi' ña'ta i chucob Jesús, ma'añic majqui tsi' chucu come maxto c'otemic i yorajlel.

³¹ Ca'bʌl wiñicob x'ixicob tsi' ñopoyob, tsi' yʌlʌyob: —Jiñi mero Cristo mu' bʌ i tilel, ¿mejl ba i pʌs ñumen ñuc bʌ i yejtal i p'ʌtʌlel che' bajche' tsi' pʌsʌ Jesús?

Jiñi fariseojob tsi' chocoyob tilel i wiñicob cha'añ mi' chucob Jesús

³² Jiñi fariseojob tsi' yu'biyob jiñi t'añ tsa' bʌ i yʌlʌyob wiñicob x'ixicob, jiñi cha'añ jiñi ñuc bʌ motomajob yic'ot fariseojob tsi' chocoyob tilel i wiñicob cha'añ mi' chucob Jesús.

³³ Jiñi cha'añ, Jesús tsi' yʌlʌ: —Jumuc' jax wʌ'añon la' wic'ot, mic cha' majlel ya' ba'añ jiñi tsa' bʌ i chocoyon tilel.

³⁴ Mi caj la' sajcañon, ma'añic mi caj la' tajon, ya' ba' mic majlel, ma'añic mi mejlel la' c'otel, —che'en Jesús.

³⁵ Jiñi cha'añ jiñi judíojob tsi' su'beyob i bʌ: —¿Baqui sami mi yʌl jiñi wiñic ba' ma'añic mi caj lac taj? ¿Mu' ba caj i majlel ba'añ lac pi'ʌlob ti' lumal griegojob cha'añ mi' cʌntesan griegojob?

³⁶ ¿Chuqui isujmlel jiñi t'añ tsa' bʌ i yʌlʌ: “Mi caj la' sʌclañon, ma'añic mi caj la' tajon, ya' ba' mic majlel, ma'añic mi mejlel la' c'otel”?

Cuxul bʌ ja'

³⁷ Che' ti' yujtibal jiñi ñuc bʌ q'uiñijel, Jesús tsa' wa'le, c'am tsi' cha'le t'añ, tsi' yʌlʌ: —Mi añ majqui añ i tiquinti', la' tilic ba'añon, la' i jap ja'.

³⁸ Jiñi mu' bʌ i ñopon, che' bajche' mi' yʌl i Ts'ijbujel Dios, oñ mi' caj i wʌjlel loq'uel cuxul bʌ ja' ti' pusic'al, che'en.

³⁹ Jiñi ja' jiñʌch jiñi Espíritu mu' bʌ caj i yʌq'ueñtelob jiñi mu' bʌ i ñopob, come maxto añic tsa' aq'uentiyob Ch'ujul bʌ Espíritu, che' ja'el maxto añic tsa' aq'uenti i ñuclel Jesús.

Tsi' t'oxoyob i bʌ wiñicob x'ixicob

⁴⁰ Jiñi cha'añ lamital wiñicob x'ixicob che' bʌ tsi' yu'biyob jiñi t'añ, tsi' yʌlʌyob: Isujm, jiñʌch jiñi x'alt'añ.

⁴¹ Yaño' bʌ tsi' yʌlʌyob: Jiñʌch jiñi Cristo, jiñi Yajcʌbil bʌ, pero juntiquil cha'tiquil tsi' yʌlʌyob: ¿ti Galilea ba mi caj i tilel jiñi Cristo?

⁴² ¿Mach ba añic mi yʌl ti' Ts'ijbujel Dios tal jiñi Cristo ti' p'olbal David ya' ti Belén, ya' ba' tsa' chumle David?

⁴³ Che' jiñi, tsa' caji i t'oxob i bʌ ti t'añ wiñicob x'ixicob cha'añ ti' caj Jesús.

⁴⁴ Lamital yomob i chuc Jesús pero ma'añic majqui tsi' chucu, mi juntiquilic.

Ma'añic ba ora tsi' cha'le t'añ wiñic che' bajche' jiñi

⁴⁵ Jiñi xcʌnta templojob tsa' tiliyob ba'añ ñuc bʌ motomajob yic'ot fariseojob. Jiñi año' bʌ i ye'tel tsi' c'ajtibeyob: —¿Chucoch ma'añic tsa' la' pʌyʌ tilel Jesús?

⁴⁶ Jiñi xcʌntayajob tsi' jac'beyob: —Ma'añic mi juntiquil wiñic ti pejtelel ora mu' bʌ i cha'len t'añ che' bajche' iliyi.

⁴⁷ Jiñi fariseojob tsi' c'ajtibeyob: —Ixcu jatetla ¿tsa'ix ba la' jac'ʌ la lotintel ja'el?

⁴⁸ ¿Am ba juntiquil yumʌl yic'ot fariseojob tsa' bʌ i ñopo Jesús?

⁴⁹ Jiñi jach mi' ñopob Jesús jiñi wiñicob x'ixicob mach bʌ cʌntesʌbilobic ti mandar, chocbilobix ti Dios.

⁵⁰ Ya'añ juntiquil yumʌl i c'aba' Nicodemo, jiñʌch tsajñi bʌ i pejcan Jesús ti ac'ʌlel, tsa' caji i su'beñob:

⁵¹ —¿Chuqui mi' yʌl jiñi mandar? ¿Mejl ba mi lac su'b mi añ i mul wiñic che' maxto u'bibilic i t'añ jiñi wiñic, che' maxto ña'tʌbilic chuqui tsi' mele? Che'en.

⁵² Jiñi fariseojob tsi' jac'beyob yic'ot tsi' c'ajtibeyob: —¿Jatet ch'oyolet ba ti Galilea ja'el? Wen q'uele jiñi ts'ijbubil bʌ, mi caj a taj cha'añ ma'añic mi juntiquilic x'alt'añ loq'uem bʌ ti Galilea.

Jiñi xts'i'lel x'ixic

⁵³ Che' jiñi ti jujuntiquil tsa' sujtiyob ti yotot tac,