Juan 6 - Jiñi Tsiji' bʌ Wen T'añ cha'añ Estudio

Tsa' we'sʌntiyob jo'p'ejl mil

¹ Ti wi'il Jesús tsa' c'axi ti junwejl mar am bʌ ti Galilea, i c'aba' Tiberias,

² bajc'ʌl wiñicob x'ixicob tsi' tsajcayob majlel Jesús, come tsi' q'uelbeyob i yejtal i p'ʌtʌlel tsa' bʌ i pʌsʌ ti' tojlel xc'am-ʌjelob.

³ Che' jiñi tsa' letsi majlel Jesús ti wits, ya'i tsa' buchle yic'ot xcʌnt'añob i cha'añ.

⁴ Lʌc'ʌlix i q'uiñilel Pascua mu' bʌ i melob judíojob.

⁵ Che' bʌ tsi' letsa i wut Jesús, tsi' q'uele bajc'ʌl wiñicob x'ixicob woli bʌ i tilelob ba'añ, tsi' su'be Felipe: —¿Baqui mi caj lac mʌn waj cha'añ mi' c'uxob ili wiñicob x'ixicob? —Che'en.

⁶ Tsi' yʌlʌ ili t'añ cha'añ yom i q'uelben i pusic'al Felipe, come yujilix chuqui mi caj i mel

⁷ Felipe tsi' jac'be: —Mach jasʌlic lujunc'al denario cha'añ mi lac mʌn waj cha'añ mi' ts'ita' c'uxob ti jujuntiquil, —che'en.

⁸ Yam bʌ juntiquil xcʌnt'añ i cha'añ i c'aba' Andrés, i yeran Simón Pedro, tsi' su'be:

⁹ —Wʌ'an juntiquil ch'itoñ am bʌ i cha'añ jo'q'uejl waj melbil bʌ ti cebada yic'ot cha'cojt chʌy, ¿jasʌl ba che' ca'bʌlonla? Che'en.

¹⁰ Jiñi cha'añ Jesús tsi' yʌlʌ: —Su'beñob buchtʌl wiñicob x'ixicob. Ya' ba'añob añ ca'bʌl jam, ya'i tsa' laj buchleyob, añob che' bajche' jo'p'ejl mil wiñicob.

¹¹ Jesús tsi' ch'ʌmʌ jiñi waj, che' bʌ tsi' su'be wocolix i yʌlʌ Dios, tsi' yʌq'ueyob xcʌnt'añob; jiñi xcʌnt'añob tsi' pucbeyob jiñi buchulo' bʌ, che' ja'el jiñi chʌy tsi' c'uxuyob bajche' c'amel yomob.

¹² Che' ñajobix, Jesús tsi' su'be xcʌnt'añob i cha'añ: —Laj tempanla i xujt'il tac tsa' bʌ colojbaji cha'añ ma'añic mi' sajtel mi ts'ita'ic.

¹³ Jiñi cha'añ tsi' tempayob, tsi' but'uyob lajchʌmp'ejl chiquib i xujt'il tac jiñi jo'q'uejl waj tsa' bʌ colojbaji che' bʌ tsa' ujti i c'uxob.

¹⁴ Jiñi wiñicob tsa' bʌ i q'ueleyob i yejtal i p'ʌtʌlel tsa' bʌ i pʌsʌ Jesús, tsi' yʌlʌyob: “Ili wiñic jiñʌch isujm bʌ x'alt'añ mu' bʌ i tilel ti pañimil”.

¹⁵ Che' bʌ tsi' ña'ta Jesús woli' tilel i chucob ti wersa cha'añ mi yotsañob ti rey, tsa' cha' majli ti wits ti' bajñel.

Tsi' cha'le xʌmbal Jesús ti' pam ja'

¹⁶ Che' wolix i yic'an, tsa' ju'biyob majlel xcʌnt'añob i cha'añ c'ʌlʌl ti mar.

¹⁷ Tsa' ochiyob ti barco. Tsa' ñumiyob ti mar cha'añ yomob majlel ti Capernaúm. Che' ac'ʌlelix, maxto c'otemic Jesús ba'añob.

¹⁸ Tsa' caji i ca'bʌl ñijcan i bʌ mar, come ca'bʌl ic' tsi' wec'ula ja'.

¹⁹ Che' bʌ tsa'ix i ñijcayob majlel barco che' bajche' jo'p'ejl o wʌcp'ejl kilómetro, jiñi xcʌnt'añob tsi' q'ueleyob Jesús, woli' cha'len xʌmbal ti' pam ja', woli i lʌc'tesan tilel i bʌ ba'añ barco, tsi' cha'leyob bʌq'uen.

²⁰ Jesús tsi' su'beyob: —Joñoñʌch; mach la' cha'len bʌq'uen, —che'en.

²¹ Jiñi cha'añ tijicñayob xcʌnt'añob tsi' pʌyʌyob ochel ti barco, ti ora tsa' c'oti barco ti lum ba' yomob majlel.

Wiñicob x'ixicob tsi' sajcayob Jesús

²² Ti yijc'ʌlal ya' to añ wiñicob x'ixicob ti junwejl mar ba' tsi' c'uxuyob waj, yujilob cha'añ jump'ejl jach barco ba' tsa' bajñel ochiyob jiñi xcʌnt'añob, come ma'añic tsa' ochi Jesús yic'otob; i bajñelob jach tsa' majliyob jiñi xcʌnt'añob.

²³ Ti jim bʌ ora tsa' c'oti yan tac bʌ barco ch'oyol bʌ ti Tiberias, lʌc'ʌl ba' tsi' c'uxuyob waj che' bʌ tsa' ujti i su'ben wocolix i yʌlʌ lac Yum.

²⁴ Che' bʌ tsi' q'ueleyob wiñicob mach ya'ic añ Jesús, mi jiñic xcʌnt'añob i cha'añ ja'el, tsa' ochiyob ti barco tac, tsa' tiliyob ti Capernaúm cha'añ mi' sajcañob Jesús.

Jesús jiñi Waj mu' bʌ i yʌq'ueñonla laj cuxtʌlel

²⁵ Che' bʌ tsi' tajayob Jesús ti junwejl mar, tsi' c'ajtibeyob: —Maestro, ¿baqui ora tsa' juliyet wʌ'i?

²⁶ Jesús tsi' jac'beyob: —Isujm, isujm mic su'beñetla, mi la' sajcañon mach cha'añic tsa' la' q'uele i yejtal c p'ʌtʌlel, cha'añ jach tsa' ñaj-ayetla ti waj.

²⁷ Cha'lenla e'tel, mach cha'añic jiñi we'elʌl mu' bʌ i jilel, cha'lenla e'tel cha'añ jiñi we'elʌl mu' bʌ i jalijel cha'añ mi la' taj la' cuxtʌlel mach bʌ añic mi' jilel, i Yalobil Wiñic mi caj i yʌq'ueñetla jiñi we'elʌl, come Dios lac Tat tsa'ix i yʌq'ueyon c p'ʌtʌlel cha'añ ili e'tel.

²⁸ Jiñi cha'añ tsi' c'ajtibeyob: —¿Chuqui yom mic cha'len lojon cha'añ mic mel lojon i ye'tel Dios?

²⁹ Jesús tsi' jac'beyob: —Jiñʌch i ye'tel Dios, che' mi la' ñop i Yalobil tsa' bʌ i choco tilel, —che'en.

³⁰ Jiñi cha'añ tsi' c'ajtibeyob: —¿Chuqui i yejtal a p'ʌtʌlel ma' pʌs cha'añ mij q'uel lojon, cha'añ mic ñopet lojon? ¿Chuqui a we'tel mu' bʌ a mel?

³¹ Jiñic c ñojte'el lojon tsi' c'uxuyob maná ti colem bʌ i tiquiñal lum che' bajche' ts'ijbubil: “Dios tsi' yʌq'ueyob waj ch'oyol bʌ ti panchan cha'añ mi' c'uxob”.

³² Jesús tsi' su'beyob: —Isujm, isujm mic su'beñetla: Mach jiñic Moisés jiñi tsa' bʌ i yʌq'ueyetla jiñi waj ch'oyol bʌ ti panchan. Pero c Tat mi' yʌq'ueñetla jiñi isujm bʌ waj ch'oyol bʌ ti panchan.

³³ Come jiñi waj ch'oyol bʌ ti Dios, jiñʌch tsa' bʌ ju'bi tilel ti panchan mu' bʌ i yʌq'ueñob i cuxtʌlel jiñi año' bʌ ti pañimil, —che'en Jesús.

³⁴ Tsi' su'beyob: —C Yum, aq'ueñon lojon jiñi waj ti pejtelel ora.

³⁵ Jesús tsi' su'beyob: —Joñon jiñi waj mu' bʌ i yʌq'ueñetla la' cuxtʌlel, jiñi mu' bʌ i tsajcañon ma'añic ba' ora mi caj i yu'bin wi'ñal, jiñi mu' bʌ i ñopon ma'añic ba' ora mi caj i tiquin i ti'.

³⁶ Pero jatetla, che' bajche' tsa' c su'beyetla, anquese tsa' la' q'ueleyon ma'añic mi la' ñopon.

³⁷ Pejtelel wiñicob x'ixicob mu' bʌ i yʌq'ueñon c Tat mi caj i tilelob ba'añon, majqui jach mi' tilel ba'añon ma'añic mi caj c choc loq'uel.

³⁸ Come tsa' ju'biyon tilel ti panchan, mach cha'añic mic mel chuqui yom c bajñel pusic'al, cha'añʌch mic mel chuqui yom c Tat tsa' bʌ i chocoyon tilel

³⁹ Jiñʌch chuqui yom c Tat tsa' bʌ i chocoyon tilel; cha'añ pejtelel wiñicob x'ixicob tsa' bʌ i yʌq'ueñon tic wenta, mach yomic mi' sajtel mi juntiquilic, yom mic techob ch'ojyel ti jiñi cojix bʌ q'uiñ.

⁴⁰ Come jiñi yom bʌ c Tat tsa' bʌ i chocoyon tilel jiñʌch cha'añ pejtelel mu' bʌ i q'uel i Yalobil Dios, yic'ot mu' bʌ i ñopob mi' tajob i cuxtʌlel mach bʌ añic mi' jilel; joñon mi caj c techob ch'ojyel ti jiñi cojix bʌ q'uiñ, —che'en Jesús.

⁴¹ Jiñi judíojob tsa' cajiyob ti wulwul a'leya come tsi' yʌlʌ Jesús: “Joñon jiñi Waj tsa' bʌ ju'bi tilel ti panchan”.

⁴² Tsi' yʌlʌyob: —¿Mach ba jiñic Jesús, i yalobil José, cʌmbil bʌ lac cha'añ i tat i ña'? ¿Bajche' mi' yʌl che' jiñi: “Tsa' ju'biyon tilel ti panchan”?

⁴³ Jesús tsi' jac'beyob: —Cʌyʌx la' wulwul a'len la' bʌ.

⁴⁴ Ma'añic majqui mi mejlel i tilel ba'añon, jiñi jach mu' bʌ i pʌjyel tilel cha'añ c Tat tsa' bʌ i chocoyon tilel, joñon mi caj c tech ch'ojyel ti jiñi cojix bʌ q'uiñ.

⁴⁵ Ts'ijbubil i cha'añ x'alt'añob: “Dios mi caj i cʌntesan pejtelel wiñicob x'ixicob”. Jiñi cha'añ, pejtelel mu' bʌ i yu'biñob i t'añ c Tat, mu' bʌ i ñopob i cʌntesa, mi' tilelob ba'añon.

⁴⁶ Ma'añic majqui tsi' q'uele c Tat mi juntiquilic, jiñi jach jiñi tsa' bʌ tili ti Dios; jiñi tsa'ix i q'uele lac Tat.

⁴⁷ Isujm, isujm mic su'beñetla, jiñi mu' bʌ i ñopon, añix i cuxtʌlel mach bʌ añic mi' jilel.

⁴⁸ Joñoñʌch jiñi Waj mu' bʌ yʌq'ueñetla la' cuxtʌlel.

⁴⁹ La' ñojte'el tsi' c'uxuyob maná ti jochol bʌ lum pero tsa' chʌmiyob.

⁵⁰ Jiñʌch jiñi Waj mu' bʌ i ju'bel tilel ti panchan, cha'añ majqui jach mi' c'ux, ma'añic mi' chʌmel.

⁵¹ Joñoñʌch jiñi cuxul bʌ Waj tsa' bʌ ju'bi tilel ti panchan, mi añ majqui mi' c'ux ili Waj, chʌn cuxul ti pejtelel ora; jiñi Waj mu' bʌ cʌc' jiñʌch c bʌc'tal, mu' bʌ cʌc' cha'añ i cuxtʌlel jiñi año' bʌ ti pañimil.

⁵² Jiñi cha'añ judíojob tsa' caji i cʌlʌx pejcañob i bʌ, tsi' yʌlʌyob: —¿Bajche' mi mejlel i yʌq'ueñonla i bʌc'tal cha'añ mi laj c'ux?

⁵³ Jesús tsi' su'beyob: —Isujm, isujm mic su'beñetla, mi ma'añic mi la' c'uxben i bʌc'tal i Yalobil Wiñic, mi ma'añic mi la' japben i ch'ich'el, ma'añic la' cuxtʌlel.

⁵⁴ Jiñi mu' bʌ i c'ux c bʌc'tal, mu' bʌ i jap c ch'ich'el, añix i cuxtʌlel mach bʌ añic mi' jilel; joñon mi caj c tech ch'ojyel ti jiñi cojix bʌ q'uiñ.

⁵⁵ Come c bʌc'tal jiñʌch mero we'elʌl, jiñic ch'ich'el jiñʌch mero japbil bʌ.

⁵⁶ Jiñi mu' bʌ i c'ux c bʌc'tal, mu' bʌ i jap c ch'ich'el, mi' yajñel ti joñon, joñon ja'el mi cajñel ti' pusic'al.

⁵⁷ Che' bajche' cuxul c Tat tsa' bʌ i chocoyon tilel, che' bajche' añ j cuxtʌlel tic Tat, che' ja'el jiñi mu' bʌ i c'ux c bʌc'tal mi caj i taj i cuxtʌlel ti joñon.

⁵⁸ Jiñʌch jiñi Waj tsa' bʌ ju'bi tilel ti panchan, mach che'ic bajche' jiñi maná tsa' bʌ i c'uxuyob la' ñojte'elob anquese tsi' c'uxuyob tsa' chʌmiyob, jiñi mu' bʌ i c'uxob jiñi Waj mu' bʌ cʌq'ueñob, chʌn cuxul mi' yajñelob ti pejtelel ora, che'en.

⁵⁹ Che'ʌch tsi' cha'le cʌntesa Jesús ti sinagoga ya' ti Capernaúm.

T'añ cha'añ laj cuxtʌlel mach bʌ añic mi' jilel

⁶⁰ Ca'bʌl xcʌnt'añob i cha'añ, che' bʌ tsi' yu'biyob jiñi t'añ, tsi' yʌlʌyob: —Tsʌts ili cʌntesa. ¿Majqui mi mejlel i chʌn u'bin?

⁶¹ Yujil Jesús ti' bajñelil woliyob ti wulwul t'añ xcʌnt'añob i cha'añ, cha'añ i cʌntesa, tsi' su'beyob: —¿Mu' ba i tic'lañetla ili c t'añ?

⁶² ¿Chuqui mi caj la' wʌl, che' jiñi, mi tsa' la' q'uele i Yalobil Wiñic che' mi' letsel majlel ya' ba' tsa' chumle ti ñaxan?

⁶³ Jiñi Espíritu jiñʌch mu' bʌ i yʌq'ueñonla laj cuxtʌlel; lac bʌc'tal ma'añic chuqui mi' yʌq'ueñonla, jiñi c t'añ tsa' bʌ c su'beyetla i cha'añʌch la' ch'ujlel, yic'ot mi' yʌq'ueñetla la' cuxtʌlel.

⁶⁴ Pero añ lamitaletla ma'añic mi la' ñop. Come yujil Jesús c'ʌlʌl ti' cajibal majquiyob jiñi mach bʌ añic mi' ñopob yic'ot majqui jiñi mu' bʌ caj i yʌc' ti' c'ʌb i contra.

⁶⁵ Tsi' yʌlʌ: —Jiñi cha'añ tsa' c su'beyetla, ma'añic majqui mi mejlel i tilel ba'añon mi mach aq'uebilic i p'ʌtʌlel tic Tat, —che'en.

⁶⁶ Ti jiñi jach bʌ ora, ca'bʌl tsa' bʌ i tsajcayob Jesús tsa' caji i tʌts'ob i bʌ, ma'añix tsi' chʌn cha'leyob xʌmbal yic'ot Jesús.

⁶⁷ Jiñi cha'añ Jesús tsi' su'beyob jiñi lajchʌntiquil: —¿La' wom ba majlel ja'el? —Che'en.

⁶⁸ Simón Pedro tsi' jac'ʌ: —C Yum, ¿am ba yam bʌ mu' bʌ mejlel tsajcan lojon majlel? Come jatet jach ma' su'b jiñi t'añ cha'añ mic taj lojon j cuxtʌlel mach bʌ añic mi' jilel.

⁶⁹ Mic ñopet lojon, cujil lojon cha'añ jatetʌch jiñi Cristo, i Yalobil bʌ jiñi cuxul bʌ Dios, —che'en Pedro.

⁷⁰ Jesús tsi' jac'be: —¿Mach ba tsa'ic j yajcayetla jatetla jiñi lajchʌntiquil, pero juntiquil i cha'añʌch xi'ba? —Che'en.

⁷¹ Jesús tsi' taja ti t'añ Judas Iscariote, i yalobil Simón, come jiñʌch Judas tsa' bʌ i yʌc'ʌ Jesús ti' c'ʌb i contra. Jiñi Judas i pi'ʌlʌch jiñi junlujuntiquil. “Jiñi waj cha'añ bʌ laj cuxtʌlel” ,, “I sʌclel pañimil” “I ti' otot” , “Jiñi wen bʌ xcʌnta tʌñʌme'” , “Jiñi mu' bʌ i yʌq'ueñ i cuxtʌlel chʌmeñ bʌ” “I bijlel, isujmlel bʌ yic'ot i cuxtʌlel” “Jiñi isujmlel bʌ ac'” ,