Juan 5 - Jiñi Tsiji' bʌ Wen T'añ cha'añ Estudio

Jiñi mach bʌ weñic i yoc i c'ʌb am bʌ ti Betesda

¹ Ti wi'il tsa' caji i melob q'uiñijel judíojob, jiñi Jesús tsa' letsi majlel ti Jerusalén.

² Añ ya' ti Jerusalén lʌc'ʌl ti yochib tʌñʌme' jump'ejl ts'ʌmibʌl i c'aba' Betesda ti' t'añ hebreojob, ti joytʌlel jiñi ts'ʌmibʌl añ jo'p'ejl i ti'.

³ Ya' ñololob bajc'ʌl xc'am-ʌjelob, xpots'ob, yic'ot mach bʌ weñobic i yoc i c'ʌb [woli' pijtañob i ñijcʌntel ja'.]

⁴ [Come i tilel mi' ju'bel tilel juntiquil ángel ti' ts'ʌmibʌl cha'añ mi' ñijcan ja'. Majqui jach mi' ñaxan ochel che' mi' ñijcʌntel jiñi ja', mi' lajmel pejtelel i c'am-ʌjel.]

⁵ Ya'añ juntiquil wiñic wen c'am bʌ, añix che' bajche' waxʌclujump'ejl i cha'c'al (38) ja'b.

⁶ Che' bʌ tsi' q'uele Jesús ya' ñolol, tsi' yu'bi cha'añ añix ca'bʌl ora ya' ñolol, tsi' su'be: —¿Awom ba ma' taj a c'oq'uesʌntel? —Che'en.

⁷ Jiñi c'am bʌ tsi' jac'be: —C Yum, ma'añic majqui mi' yotsañon ti ts'ʌmibʌl che' mi' ñijcʌntel jiñi ja', che' woli to c ñochtan ja', mi' bʌc' ochel yam bʌ, —che'en.

⁸ Jesús tsi' su'be: —Ch'ojyen, q'ueche a wʌyib, cha'len xʌmbal, —che'en.

⁹ Ti orajach jiñi wiñic tsa' c'oc'a, tsi' q'ueche i wʌyib, tsi' cha'le xʌmbal. Ti' jim bʌ q'uiñ jiñʌch i yorajlel c'aj-o cha'añ judíojob.

¹⁰ Jiñi cha'añ judíojob tsi' su'beyob jiñi tsa' bʌ c'oq'uesʌnti: —Jiñʌch i q'uiñilel c'aj-o; mach uts'atic ma' q'uech majlel a wʌyib.

¹¹ Jiñi wiñic tsi' jac'beyob: —Jiñi wiñic tsa' bʌ i c'oq'uesayon tsi' su'beyon: “Q'ueche a wʌyib, cha'len xʌmbal”, —che'en.

¹² Jiñi cha'añ tsi' c'ajtibeyob: —¿Majqui jiñi wiñic tsa' bʌ i su'beyet: “Q'ueche a wʌyib, cha'len xʌmbal”?

¹³ Jiñi tsa' bʌ c'oq'uesʌnti mach yujilic majqui, come Jesús tsi' tʌts'ʌ i bʌ ba' tempʌbilob wiñicob x'ixicob.

¹⁴ Ti wi'il Jesús tsi' taja jiñi wiñic ti Templo, tsi' su'be: —Awilan, c'oq'uetix, mach a chʌn cha'len mulil ame mi' cha' tajet ñumen wocol bʌ, —che'en.

¹⁵ Tsa' majli jiñi wiñic, tsi' su'be judíojob cha'añ jiñʌch Jesús tsa' bʌ i c'oq'uesa.

¹⁶ Jiñi cha'añ judíojob tsi' sʌclayob Jesús, [come yomob i tsʌnsan] come tsi' cha'le c'oq'uesaya ti' q'uiñilel c'aj-o.

¹⁷ Jesús tsi' su'beyob: —C'ʌlʌl wʌle mi' cha'len e'tel c Tat, joñon ja'el mic cha'len e'tel, —che'en.

¹⁸ Jiñi cha'añ judíojob ñumen tsa' caji i ña'tañob i tsʌnsan Jesús, come mach cojic jach tsi' ñusa i q'uiñilel c'aj-o, yic'ot cha'añ tsi' pejca Dios ti' Tat ja'el; che' jiñi tsi' laji i bʌ bajche' Dios.

I p'ʌtʌlel i Yalobil Dios

¹⁹ Jiñi cha'añ Jesús tsi' su'beyob: —Isujm, isujm mic su'beñetla: Ma'añic chuqui mi mejlel i bajñel mel i Yalobil Dios; mi' q'uel chuqui tac woli' mel i Tat, come pejtelel chuqui tac mi' mel i Tat, mi' mel i Yalobil ja'el.

²⁰ Come c Tat mi' c'uxbin i Yalobil, mi' pʌsbeñon pejtelel chuqui tac mi' mel, mu' toj caj i pʌsbeñon ñumen ñuc bʌ i ye'tel, cha'añ mi' toj sajtel la' pusic'al.

²¹ Come che' bajche' c Tat mi' tech ch'ojyel jiñi chʌmeño' bʌ, mi' yʌq'ueñob i cuxtʌlel; che' ja'el i Yalobil mi' yʌq'ueñ i cuxtʌlel majqui jach yom i yʌq'ueñ.

²² Come c Tat ma'añic mi' mel wiñicob, tsi' yʌq'ue i p'ʌtʌlel i Yalobil cha'añ mi' cha'len meloñel,

²³ cha'añ mi' q'uelob ti ñuc i Yalobil, che' bajche' mi' q'uelob ti ñuc c Tat; jiñi mach bʌ añic mi' q'uel ti ñuc i Yalobil Dios, ma'añic mi' q'uel ti ñuc c Tat tsa' bʌ i chocoyon tilel.

²⁴ Isujm, isujm mic su'beñetla: Jiñi mu' bʌ i yu'bin c t'añ, mu' bʌ i ñop jiñi tsa' bʌ i chocoyon tilel, añix i cuxtʌlel mach bʌ añic mi' jilel, ma'añic mi yʌjq'uel ti tojmulil, tsa'ix i mʌlbe chʌmel, aq'uebilix i cuxtʌlel.

²⁵ Isujm, isujm mic su'beñetla: Tal i yorajlel, i yorajlelix wʌle, che' mi caj i yu'bibeñob i t'añ i Yalobil Dios jiñi chʌmeño' bʌ. Pejtelel mu' bʌ i yu'biñob mi caj i yʌq'ueñtelob i cuxtʌlel.

²⁶ Come che' bajche' c Tat añ i p'ʌtʌlel cha'añ mi' yʌq'ueñob i cuxtʌlel, che' ja'el tsi' yʌq'ue i p'ʌtʌlel i Yalobil cha'añ mi' yʌq'ueñob i cuxtʌlel,

²⁷ yic'ot ja'el tsi' yʌq'ue i p'ʌtʌlel cha'añ mi' cha'len meloñel come i Yalobilʌch Wiñic.

²⁸ Mach yomic mi' toj sajtel la' pusic'al cha'añ jiñi c t'añ, come tal i yorajlel che' mi caj i yu'bibeñob i t'añ i Yalobil Wiñic jiñi año' bʌ ti mucoñibʌl.

²⁹ Jiñi tsa' bʌ i meleyob chuqui wen, mi caj i tejchelob ch'ojyel ti mucoñibʌl cha'añ mi' yochelob ti' cuxtʌlel, jiñi tsa' bʌ i cha'leyob jontolil, mi caj i ch'ojyelob loq'uel ti mucoñibʌl cha'añ mi yochelob ti tojmulil.

Jiñi mu' bʌ i yʌc'ob ti cʌjñel Jesús

³⁰ Tic bajñelil ma'añic chuqui mi mejlel c mel; che' bajche' mi cu'bin che'ʌch mic cha'len meloñel, tojʌch c meloñel, come ma'añic mic mel chuqui com tic bajñelil, mic mel chuqui yom c Tat tsa' bʌ i chocoyon tilel.

³¹ Mi tsa' c bajñel su'bu c bʌ, mach isujmic c t'añ.

³² Añ yam bʌ mu' bʌ i yʌc'on ti cʌjñel; cujil isujm i t'añ jiñi mu' bʌ i yʌc'on ti cʌjñel.

³³ Jatetla tsa' la' choco majlel wiñicob ba'añ Juan, jiñi tsi' yʌc'ʌyon ti cʌjñel ti' isujm.

³⁴ Pero joñon ma'añic woli c taj coltʌntel ti wiñicob; pero woli c su'beñetla iliyi cha'añ jatetla mi la' taj la' coltʌntel.

³⁵ Lajalʌch Juan bajche' jump'ejl c'ajc woli bʌ ti lejmel mu' bʌ i yʌc' i sʌclel, pero jatetla poj tijicña tsa' la' wu'bi che' bʌ tsa' la' q'uele i sʌclel.

³⁶ Pero añ c cha'añ ñumen ñuc bʌ mu' bʌ i yʌc'on ti cʌjñel che' bajche' Juan; jiñʌch que'tel tsa' bʌ i yʌq'ueyon c Tat cha'añ mic mel ti ts'ʌcʌl. Jiñi c melbal, mi' yʌc'on ti cʌjñel cha'añ mi la' ña'tan tsi' chocoyon tilel c Tat.

³⁷ C Tat ja'el tsa' bʌ i chocoyon tilel tsa'ix i yʌc'ʌyon ti cʌjñel, jatetla ma'añic ba' ora tsa' la' wis u'bibe i t'añ, ma'añic ba' tsa' la' q'uele bajche' yilal Dios.

³⁸ Ma'añic mi yajñel i t'añ ti la' pusic'al, come ma'añic mi la' ñop jiñi tsa' bʌ i choco tilel.

³⁹ Jatetla woli la' wen q'uel i Ts'ijbujel Dios, come mi la' ña'tan cha'añ ya'ʌch mi la' taj la' cuxtʌlel mach bʌ añic mi' jilel; isujm jiñi i Ts'ijbujel Dios jiñʌch mu' bʌ i yʌc'on ti cʌjñel.

⁴⁰ Pero mach la' womic tilel ba'añon cha'añ mi la' taj la' cuxtʌlel.

⁴¹ Mach ti wiñiquic ch'oyol c ñuclel.

⁴² Pero joñon mij cʌñetla, ma'añic i c'uxbiya Dios ti la' pusic'al.

⁴³ Joñon tsa' tiliyon ti' c'aba' c Tat, pero ma'añic mi la' ñopon. Pero mi tsa' tili yam bʌ wiñic i su'b i bajñel c'aba', jiñi mi caj la' ch'ʌm ti la' wenta.

⁴⁴ ¿Bajche' mi mejlel la' ñop, che' mi la' wʌlʌc sʌclan la' ñuclel ti wiñicob; che' ma'añic mi la' sajcan la' ñuclel ch'oyol bʌ ti jiñi cojach bʌ Dios?

⁴⁵ Mach mi la' ña'tan cha'añ joñon mi caj c su'b la' mul ti' tojlel c Tat; añʌch mu' bʌ caj i su'b la' mul, jiñʌch Moisés jiñi mu' bʌ la' ñop.

⁴⁶ Tsa'ic la' ñopo Moisés, tsa' la' ñopoyon ja'el, come tsi' tajayon ti t'añ ti' ts'ijbujel.

⁴⁷ Pero mi ma'añic mi la' ñop chuqui tsi' ts'ijba Moisés, ¿bajche' mi caj la' ñop c t'añ?